ཚེས་27ཉིན། གསར་འགོད་པར་ཤིན་ཅང་ཡུ་གུར་རང་སྐྱོང་ལྗོངས་མི་དམངས་སྲིད་གཞུང་ནས་ཤེས་རྟོགས་བྱུང་བར། 2025ལོར་ཤིན་ཅང་གི་ཕྱི་ཕྱོགས་ཚོང་དོན་ཕྱིར་གཏོང་ནང་འདྲེན་གྱི་རིན་ཐང་བསྡོམས་འབོར་སྒོར་དུང་ཕྱུར་5000ལས་ཐོག་མར་བརྒལ་ནས་སྒོར་དུང་ཕྱུར་5203.7ཟིན་ཏེ་དུས་མཚུངས་ལས་19.9%འཕར་ཞིང་། དེའི་ནང“རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་ལ་ཕྱིར་གཏོང་ནང་འདྲེན་བྱས་པའི་རིན་ཐང་བསྡོམས་འབོར་སྒོར་དུང་ཕྱུར་4583.7ཟིན་ནས་དུས་མཚུངས་ལས་14.7%འཕར་བ་དང་ཨེ་ཤེ་ཡ་དབུས་མའི་རྒྱལ་ཁབ་ལྔའི་ཚོང་དོན་བསྡུར་ཚད་ཀྱིས་རྒྱལ་ཡོངས་ཀྱི་36.4%བཟུང་ཡོད་པ་རེད།

2025ལོར་ཤིན་ཅང་གིས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་བཏང་བ་དང་། ཨེ་ཤེ་ཡ་དང་ཡོ་རོབ་ཀྱི་བགྲོད་ལམ་རྩེ་གྲའི་ནུས་རིམ་ལེགས་སུ་བཏང་བ། ཞིང་ཆེན་དང་གྲོང་ཁྱེར་གཞན་དང་མཐུན་སྦྱོར་བྱས་ནས་ནུབ་རྒྱུད་ལ་སྒོ་མོ་ཕྱེ་བ། “ཀོང་ཀྲོའུ་ནས་ཤིན་ཅང་བར་གྱི་མྱུར་བགྲོད་ལྕགས་ལམ”དང“ཐེན་ཧྲན་རྟགས་ཅན”གཅིག་འདུས་བརྒྱུད་སྐྱེལ་གྱི་སྐྱེལ་འདྲེན་དུས་གཏན་མེ་འཁོར་ཐོག་མར་བཏང་བ། པོ་ལོ་ཏི་མཚོ་དང་ལྷོ་ཨ་ཧྥེ་རི་ཁར་ཐད་ཀར་སྐྱོད་པའི་རྒྱལ་སྤྱིའི་ཟོག་འདྲེན་མཁའ་ལམ་ཐོག་མ་ཤར་གཏོང་ཐུབ་པ། “རིག་ལྡན་ལྕགས་ལམ་འགག་སྒོ་དང་ཁོངས་གཏོགས་ཀྱི་མྱུར་བགྲོད་འགག་སྒྲོལ”གྱི་བྱ་ཐབས་ཐོག་མར་བཏོད་པ། “གཞུང་ལམ་འགག་སྒོ་དང་མངའ་ཁོངས་ཐད་བགྲོད”སོགས་ཀྱི་བྱ་ཐབས་ཁྱབ་གདལ་བཏང་བར་བརྟེན། ཁེ་ལས་ཀྱི་འགག་སྒོ་སྒྲོལ་བའི་དུས་ཚོད་80%ཡན་མགྱོགས་སུ་ཕྱིན་ཡོད། 《ཀྲུང་གོའི(ཤིན་ཅང)རང་མོས་ཚོང་དོན་ཚོད་ལྟའི་ཁུལ་གྱི་སྲོལ་ཡིག》ཁྱབ་བསྒྲགས་བྱས་ནས་ལག་ལེན་བསྟར་བ་དང་། རང་མོས་ཚོང་དོན་ཚོད་ལྟའི་ཁུལ་ལག་བསྟར་དང་དུས་མཚམས་རང་བཞིན་གྱི་ཕན་འབྲས་ཐོབ་པའི་སྒྱུར་བཅོས་ཚོད་ལྟའི་ལས་འགན་ཁྱོན་115དོན་འཁྱོལ་བྱས་པས། རང་སྐྱོང་ལྗོངས་རིམ་པའི་ལམ་ལུགས་གསར་གཏོད་ཀྱི་གྲུབ་འབྲས་ཁག་72གྲུབ་ནས་མ་འཇོག་ཚོང་དོན་དང་། ཟོག་འགྲེམས་སྐྱེལ་འདྲེན། མ་དངུལ་འཁོར་རྒྱུག མི་སྣ་འགྲོ་འོང་སོགས་སྟབས་བདེ་ཅན་གྱི་ཆུ་ཚད་མུ་མཐུད་མཐོ་རུ་ཕྱིན་ཡོད་པ་རེད།