ཚེས་27ཉིན། གསར་འགོད་པར་2026ལོའི་རྒྱལ་ཡོངས་ཀྱི་ཡིག་འབུལ་ཞུ་བཅར་གྱི་ཅུས་ཀྲང་ཚོགས་འདུའི་ཐོག་ནས་ཤེས་རྟོགས་བྱུང་བར། འདས་ཟིན་པའི་ལོ་གཅིག་ནང་། ཡིག་འབུལ་ཞུ་བཅར་ལས་དོན་གྱི་ཁྲིམས་སྐྱོང་ཅན་དུ་འགྱུར་བར་འཕེལ་རྒྱས་ཆེན་པོ་བྱུང་ཞིང་། རྒྱལ་ཡོངས་ཀྱི་ཡིག་འབུལ་ཞུ་བཅར་ཁོངས་གཏོགས་ཀྱིས་ཁྲིམས་སྐྱོང་གི་བསམ་གཞིག་དང་ཁྲིམས་སྐྱོང་བྱེད་སྟངས་མཐའ་འཁྱོངས་བྱས་ཏེ། 《ཡིག་འབུལ་ཞུ་བཅར་ལས་ཀའི་སྲོལ་ཡིག》ཕྱོགས་ཡོངས་ནས་དོན་འཁྱོལ་བྱས་པ་དང་། པུའུ་ཨུད་ཁག་43སྒྲིག་འཛུགས་བྱས་ནས་ཡིག་འབུལ་ཞུ་བཅར་གྱི་དོན་དག་ཁག་བཅའ་ཁྲིམས་དང་སྒྲིག་སྲོལ་ལྟར་ཐག་གཅོད་བྱེད་པའི་ཁྲིད་སྟོན་རི་མོ་བཟོས་པ་དང་། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་སྡེ་ཚན་ཁག་83རྒྱལ་ཁབ་ཀྱི་ཡིག་འབུལ་ཞུ་བཅར་ཆ་འཕྲིན་མ་ལག་དང་མཐུད་འཇུག་བྱེད་པར་སྐུལ་འདེད་བཏང་སྟེ། “བྱེད་དགོས་པ་བཞི་དང་མ་བྱེད་པ་བཞི”ཡི་གནད་དོན་ཡོ་བསྲང་བྱེད་པ་དང་ས་གནས་ས་ཐོག་ཏུ་ལྟ་སྐུལ་སློབ་སྟོན་ཧུར་ཐག་བྱས་ནས། “གྲོས་འགོ་ཁག་གསུམ”བཏོན་པའི་འགན་འཁྲི་བསྒྲུབས་པ། “བདག་སྤྲོད་སྡེ་ཚན་གྱིས་བརྒྱུད་རིམ་ལ་སྐུལ་འདེད་གཏོང་བའི་འགན་འཁུར་བ་དང་སྒྲུབ་གཉེར་སྡེ་ཚན་གྱིས་དངོས་སུ་ཐག་གཅོད་བྱེད་པའི་འགན་འཁུར་བའི”རྣམ་པ་བཟང་པོ་ཞིག་ཆགས་པར་སྐུལ་འདེད་བཏང་ཡོད།

ཟླ་1པོའི་ཚེས་26དང་27ཉིན་རྒྱལ་ཡོངས་ཀྱི་ཡིག་འབུལ་ཞུ་བཅར་གྱི་ཅུས་ཀྲང་ཚོགས་འདུ་འཚོགས་ཤིང་། ཚོགས་འདུའི་ཐོག་མི་དམངས་ཀྱི་ཡིག་འབུལ་ཞུ་བཅར་ལས་དོན་ལ་ཤུགས་སྣོན་རྒྱག་པ་དང་ལེགས་སུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་སློབ་སྦྱོང་ལག་བསྟར་གཏིང་ཟབ་བྱས་ཏེ། 2025ལོའི་ཡིག་འབུལ་ཞུ་བཅར་ལས་དོན་ལ་ཕྱོགས་སྡོམ་དང་། མིག་སྔའི་ཡིག་འབུལ་ཞུ་བཅར་གྱི་དུས་བབ་ལ་དབྱེ་ཞིབ། 2026ལོའི་གཙོ་གནད་ལས་འགན་བཀོད་སྒྲིག་བཅས་བྱས་ཡོད།

འདས་ཟིན་པའི་ལོ་གཅིག་གི་ལས་དོན་ཐད་ཚོགས་འདུའི་ཐོག་རྒྱལ་ཡོངས་ཀྱི་ཡིག་འབུལ་ཞུ་བཅར་ཁོངས་གཏོགས་ཀྱིས་ཡིག་འབུལ་ཞུ་བཅར་གྱི“ཆར་བརྟག་ཡོ་བྱད”ཀྱི་ནུས་པ་འདོན་སྤེལ་གང་ལེགས་བྱས་ཏེ། ཡིག་འབུལ་ཞུ་བཅར་གྱི་ཐབས་ལམ་ནས་མི་དམངས་ཀྱི་བསམ་འཆར་བསྡུ་ལེན་བྱེད་ཤུགས་ཆེ་རུ་གཏོང་བ་དང་། དུས་རབས་གསར་པའི“ཧྥེང་ཆའོ་ཉམས་མྱོང”ལག་ལེན་ཤུགས་ཆེན་བསྟར་བ། ས་གནས་ཁག་གིས་གཞི་རིམ་བཅོས་སྐྱོང་གསར་གཏོད་བྱས་པའི་དཔེ་མཚོན་ཉམས་མྱོང་དང་བྱེད་ཐབས་ཁྱབ་གདལ་ཤུགས་ཆེན་གཏོང་བ། “གཞི་རིམ་དུ་སྐྱོད་པ་བཞི”ཡི་སྤྱོད་ཚུལ་བཟང་པོ་དར་སྤེལ་ཤུགས་ཆེན་གཏོང་བ་བཅས་བྱས་ཏེ། རྒྱལ་ཡོངས་ཀྱི་རྫོང་རིམ་པ་ཡན་གྱི་འགོ་ཁྲིད་ལས་བྱེད་པས་ཡིག་འབུལ་ཞུ་བཅར་ལ་སྣེ་ལེན་དང་གཤམ་སྐྱོད་བྱེད་ཐེངས་ཁྲི་99.1ཟིན་པ་དང་ཡིག་འབུལ་ཞུ་བཅར་གྱི་དོན་དག་ཁྲི་128.1སྣེ་ལེན་དང་ཐག་གཅོད་བྱས་ཡོད་པ་བསྟན་ཡོད།

2026ལོར་ཕྱོགས་ནས་ཚོགས་འདུའི་ཐོག་ནན་བཤད་བྱས་དོན། རྒྱལ་ཡོངས་ཀྱི་ཡིག་འབུལ་ཞུ་བཅར་ཁོངས་གཏོགས་ཀྱིས་ཡིག་འབུལ་ཞུ་བཅར་ལས་དོན་ཁྲིམས་སྐྱོང་ཅན་ལ་སྐུལ་འདེད་ཤུགས་ཆེན་གཏོང་རྒྱུ་གཙོ་རྐང་དུ་བྱས་ཏེ། ཡིག་འབུལ་ཞུ་བཅར་སྡེ་ཚན་གྱི་ཆབ་སྲིད་ལས་ཁུངས་འཛུགས་སྐྱོང་དང་། ཡིག་འབུལ་ཞུ་བཅར་ལས་དོན་ཁྲིམས་སྐྱོང་ཅན། ཡིག་འབུལ་ཞུ་བཅར་གནད་དོན་གྱི་འབྱུང་རྩ་བཅོས་སྐྱོང་དང་ཡིག་འབུལ་ཞུ་བཅར་གྱི་མངོན་གསལ་དོད་པའི་འགལ་ཟླ་སེལ་བ། ཡིག་འབུལ་ཞུ་བཅར་ལས་དོན་གྱི་སྒྲིག་སྲོལ་དང་ལམ་སྲོལ་སྒྱུར་བཅོས། ཡིག་འབུལ་ཞུ་བཅར་ལས་བྱེད་པའི་དཔུང་ཁག་འཛུགས་སྐྱོང་བཅས་ལས་འགན་ཁག་ལྔ་ལ་སྐུལ་འདེད་ཏན་ཏིག་གཏོང་བ་དང་། ཡིག་འབུལ་ཞུ་བཅར་ལས་དོན་གྱི་མཉམ་འབྲེལ་ཚོགས་འདུའི་ལམ་སྲོལ་གྱི་ནུས་པ་གང་ལེགས་འདོན་པ། ཡིག་འབུལ་ཞུ་བཅར་གྱི་ཁྲིམས་སྐྱོང་རྣམ་པ་གསར་པ་དང་ཁོར་ཡུག་གསར་པ་གཏོད་པ་བཅས་བྱས་ནས། སྤྱི་ཚོགས་བཅོས་སྐྱོང་བྱ་རྒྱུ་དེང་རབས་ཅན་ལ་སྐུལ་འདེད་གཏོང་བ་དང་། ཆུ་ཚད་དེ་བས་མཐོ་བའི་དུས་བདེའི་ཀྲུང་གོ་འཛུགས་སྐྲུན་བྱེད་པར་ལེགས་སྐྱེས་གསར་པ་འབུལ་དགོས།