མཚོ་བོད་ས་མཐོའི་དགུན་དུས་སུ་མཚན་མོའི་གྲང་ངར་ཧ་ཅང་ཆེ།

ཟླ་1ཚེས་26ཉིན་གྱི་ཆུ་ཚོད་14དང་སྐར་མ་56ཙམ་ལ། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཀྲོའུ་ཐེ་བོ་རྫོང་དུ་ས་ཡོམ་རིམ་པ་5.5བརྒྱབ་པ་དང་ཡོམ་ཁུངས་ཀྱི་གཏིང་ཚད་སྤྱི་ལེ་10ཟིན་ཡོད།

ཉིན་དེའི་ཆུ་ཚོད་19ཙམ་ལ། གསར་འགོད་པ་རླངས་འཁོར་ལ་བསྡད་ནས་ཐེ་བོ་རྫོང་སྟེང་ཁ་ཤང་ཝ་ཁྱུང་གྲོང་ཚོར་སྐྱོད་སྐབས། ལམ་བར་རོགས་སྐྱོབ་རླངས་འཁོར་གཅིག་རྗེས་གཉིས་མཐུད་ངང་གེགས་ཁུལ་གྱི་ཕྱོགས་སུ་སྐྱོད་པ་དང་། རོགས་སྐྱོབ་དཔུང་ཁག་གིས་ལམ་གཤོང་བ། གནོད་འཚེ་ཕོག་ཁུལ་གྱི་གྱང་དང་སྡོད་ཁང་ལོག་པའི་ཡིད་སྐྱོ་བའི་གནས་ཚུལ། དེ་བས་མང་ཚོགས་རྣམས་གུར་ནང་སྤོས་ནས་མེ་བསྲོ་བ་བཅས་གསར་འགོད་པས་མཐོང་།

ས་ཡོམ་བརྒྱབ་རྗེས། ས་གནས་དེས་གོང་རིམ་གྱི་བཀའ་རྒྱར་བརྡ་ལན་ཧུར་ཐག་ཞུས་ནས་ལས་བྱེད་ལས་བཟོ་དང་། སྤྱི་བདེ། མེ་ཟོན། སྨན་བཅོས་སོགས་ཀྱི་རོགས་སྐྱོབ་སྟོབས་ཤུགས་མི་གྲངས་3600སྒྲིག་འཛུགས་བྱས་ཏེ་གྲོང་ཁྱེར་དང་གྲོང་གསེབ་ཀྱི་ཡུལ་མི་ཁྲི་2ལྷག་ཙམ་ཛ་དྲག་ངང་ཁ་འགྲེམས་བྱས་པ་མ་ཟད། གནས་སྐབས་བཀོད་སྒྲིག་བྱ་ཡུལ་བསྐྲུན་ཞིང་། རིམ་བཤེར་བྱས་པ་བརྒྱུད་མི་གཅིག་ཀྱང་ཤི་རྨས་བྱུང་མེད།

ཝ་ཁྱུང་གྲོང་ཚོའི་གནས་སྐབས་བཀོད་སྒྲིག་བྱ་ཡུལ་ནི་གྲོང་མི་གཅིག་འདུས་བྱ་ཡུལ་ཁ་སྤྲོད་ཀྱི་ས་སྟོང་འབུར་ས་ཞིག་ཏུ་བསྐྲུན་ཡོད། རོགས་སྐྱོབ་མི་སྣ་ཚོས་གེགས་ཁུལ་གྱི་མང་ཚོགས་ལ་གནས་སྐབས་སྡོད་སའི་གུར་བརྒྱབ་པ་མ་ཟད། ཆུ་དང་། སྟབས་བདེའི་ཐུག་པ། ཐབ། རྡོ་སོལ་སོགས་དངོས་ཟོག་གཅིག་རྗེས་གཉིས་མཐུད་ངང་བསྐྱལ།

ཡུལ་མི་ཚོ་ཐབ་ཀྱི་འཁྲིས་སུ་མེ་བསྲོ་ཞོར་སྟབས་བདེའི་ཐུག་པ་འཐུང་བཞིན་འདུག་ལ། ཕྲུ་གུ་ཚོ་ཡང་ཁུ་སིམ་མེར་ཐབ་ཀྱི་འཁྲིས་སུ་མེ་བསྲོ་བཞིན་མཆིས།

མཚན་གུང་དུ། རོགས་སྐྱོབ་རླངས་འཁོར་དང་དངོས་ཟོག་སྐྱེལ་མཁན་རླངས་འཁོར་ཕར་འགྲོ་ཚུར་འོང་བྱེད་ཅིང་། ཐེ་བོ་རྫོང་སྤྱི་བདེ་ཅུས་འགྲིམ་འགྲུལ་དོ་དམ་རུ་ཆེན་གྱི་རུ་དཔོན་ཀྲན་ཐེན་ཁྲེང་ད་དུང་གྲོང་ཚོའི་ལམ་མདོར་འགྲིམ་འགྲུལ་ལ་བཀོད་འདོམས་བྱེད་བཞིན་འདུག ཁོང་གིས་གསར་འགོད་པར། ས་ཡོམ་བརྒྱབ་རྗེས་སྤྱི་བདེ་མི་དམངས་ཉེན་རྟོག་པ་འཕྲལ་དུ་རྡོག་ཐོན་བྱས་པ་དང་འགྲིམ་འགྲུལ་དོ་དམ་རུ་ཆེན་གྱིས་འཕྲལ་མར་འགྲིམ་འགྲུལ་ཤར་གཏོང་ཐུབ་པར་བྱས་པ་མ་ཟད། གཞུང་ལམ་གྱི་ཉེན་ཁ་དང་མངོན་མེད་རྐྱེན་ངན་ལ་ཞིབ་བཤེར་བྱས་ཏེ་རོགས་སྐྱོབ་སྟོབས་ཤུགས་དང་དངོས་ཟོག་མགྱོགས་མྱུར་འབྱོར་ཐུབ་པ་བྱས་ཡོད། ང་ཚོས་ད་དུང་ལམ་དང་ཟམ་པ་གཙོ་བོར་ཆུ་ཚོད་24རིང་སྐོར་ཞིབ་མི་ཆད་པ་བྱས་ཡོད་ཅེས་བརྗོད་བྱུང་།

སྟེང་ཁ་གྲོང་རྡལ་གྱི་ཀྲེན་ཀྲང་ཀྲང་ཅའོ་ལིན་གྱིས་ས་ཡོམ་བརྒྱབ་རྗེས། ས་གནས་ཀྱི་ལས་བྱེད་པ་ཚོས་གོང་རིམ་གྱི་བཀའ་རྒྱར་བརྡ་ལན་ཧུར་ཐག་ཞུས་ཏེ་མགྱོགས་མྱུར་མང་ཚོགས་གུ་ཡངས་པའི་ས་སྟོང་དུ་ཁ་འགྲེམས་བྱས་པ་ཡིན། དེ་རྗེས་གཏོར་སྐྱོན་ཕོག་པའི་ཁང་པ་གྲལ་བཤེར་རགས་ཙམ་བྱས་པ་དང་འབྲེལ། གེགས་ཁུལ་དུ་ཡོང་མཁན་རོགས་སྐྱོབ་སྟོབས་ཤུགས་དང་མཉམ་དུ་གནས་སྐབས་བཀོད་སྒྲིག་བྱ་ཡུལ་བསྐྲུན་པ་ཡིན། གེགས་སེལ་བྱེད་རིང་ང་ཚོས་དུས་ཐོག་ཏུ་གནོད་འཚེ་ཕོག་པའི་མང་ཚོགས་ལ་སེམས་གསོ་བཏང་བ་དང་ཆབས་ཅིག་ཁོང་ཚོའི་ལྟོ་དང་སྡོད་ས་འགན་ལེན་བྱས་པ་མ་ཟད། བློ་བདེའི་ངང་མཚན་མོ་སྐྱེལ་ཐུབ་པ་བྱས་ཡོད་ཅེས་བརྗོད་བྱུང་།

ཚེས་27ཉིན་གྱི་ཆུ་ཚོད་དང་པོ་ཙམ་བར། ས་གནས་དེ་གའི་མང་ཚོགས་232ཛ་དྲག་ངང་གནས་སྤོ་བཀོད་སྒྲིག་བྱས་པ་དང་། གུར་117བརྒྱབ་པ་དང་ཐབ་152དང་ཉལ་ཆས་300བསྐྱལ་བ་མ་ཟད། འབྲེལ་ཡོད་འཚོ་བའི་དངོས་ཟོག་ཚང་མ་འབྱོར་བར་བྱས་ཡོད།

གསར་འགོད་པས་རྒྱལ་ཁབ་གློག་དྲ་ཀན་སུའུ་ཞིང་ཆེན་གློག་ཤུགས་ཀུང་སི་ནས་ཤེས་རྟོགས་བྱས་པར། གློག་ཤུགས་མགྱོགས་མྱུར་ཉམས་བཟོ་བྱས་ཏེ། གནས་སྐབས་བཀོད་སྒྲིག་བྱ་ཡུལ་ལ་གློག་ཤར་གཏོང་ཐུབ་པར་བྱས་ཤིང་། ཀན་སུའུ་ཞིང་ཆེན་འགྲིམ་འགྲུལ་སྐྱེལ་འདྲེན་ཐིང་གིས་ངོ་སྤྲོད་བྱས་པར་གཞིགས་ན། ཚེས་26ཉིན་གྱི་ཆུ་ཚོད་21བར་གྲོང་ཚོའི་གཞུང་ལམ་ཚང་མ་ཤར་གཏོང་ཐུབ་ནས་གནོད་འཚེ་ཕོག་ཁུལ་གྱི་འགྲིམ་འགྲུལ་སྐྱེལ་འདྲེན་བདེ་འཇགས་ངང་ཤར་གཏོང་ཐུབ་པར་བྱས་ཡོད།

(ཤིན་ཧྭ་གསར་འགྱུར་ཁང་ལན་ཀྲོའུ་ནས་འབྱོར་བའི་གློག་འཕྲིན)