ཉེ་ཆར། ཟི་ལིང་འགག་སྒོས་ཤོག་མེད་རྣམ་པ་བརྒྱུད་མཚོ་སྔོན་ཏུང་ཐའེ་ཅི་ནེར་ལིས་ཐོན་ཁུངས་མ་རྐང་ཚད་ཡོད་ཀུང་སིར་ཁྲལ་སློག་ལས་སྒོ་ཞིག་གཉེར་ནས་ཁྲལ་དངུལ་སྒོར་ཁྲི་1.1བསློགས་པ་རེད། དེ་ནི་2025ལོའི་ཟླ་11ཚེས་1ཉིན་རྒྱལ་ཡོངས་འགག་སྒོས་ཤོག་མེད་ཁྲལ་སློག་བྱེད་སྟངས་ཁྱབ་གདལ་བཏང་ཚུན་མཚོ་སྔོན་ཞིང་ཆེན་གྱིས་གཉེར་བའི་ལས་སྒོ་ཐོག་མ་ཡིན་ལ། དེའི་ཐོག་ནས་མཚོ་སྔོན་ཞིང་ཆེན་གྱི་འགག་སྒོའི་ཁྲལ་སློག་ལས་སྒོ“དྲ་ཐོག་མྱུར་སྒྲུབ”ཀྱི་དུས་རབས་སུ་སླེབས་པ་མཚོན་ཡོད།

“སྔོན་ཆད་ང་ཚོའི་ཁེ་ལས་ཀྱིས་ཁྲལ་སློག་ལས་སྒོ་གཉེར་སྐབས་ཤོག་ཐོག་དཔྱད་གཞི་མང་པོ་གྲ་སྒྲིག་བྱས་ནས་སྡེ་ཚན་མང་པོའི་བར་ཡར་རྒྱུག་མར་རྒྱུག་བྱེད་དགོས་ཀྱི་ཡོད། ལྷག་པར་ཏུ་མཚོ་སྔོན་ཞིང་ཆེན་ས་རྒྱ་ཆེན་པོ་ཡོད་པས། ང་ཚོའི་བཟོ་གྲྭ་ནས་གོར་མོ་གྲོང་ཁྱེར་བར་སྤྱི་ལེ་450ཡོད། ཡིན་ན་ཡང་ད་ཆ་བརྒྱུད་རིམ་ཧྲིལ་པོ་དྲ་ཐོག་ནས་སྒྲུབ་ཆོག་པས་སློག་ཁྲལ་མགྱོགས་མྱུར་འབྱོར་གྱི་འདུག དངོས་འབྲེལ་སྟབས་བདེ་རུ་ཕྱིན་ཡོད”ཅེས་མཚོ་སྔོན་ཏུང་ཐའེ་ཅི་ནེར་ལིས་ཐོན་ཁུངས་མ་རྐང་ཚད་ཡོད་ཀུང་སིའི་འབྲེལ་ཡོད་ལས་སྒོའི་འགན་འཁུར་བ་ཞི་ཧེང་ཅུན་གྱིས་བཤད། ཤེས་རྟོགས་བྱུང་བར་གཞིགས་ན། ད་ཆ། ཁེ་ལས་དག་གིས“ཀྲུང་གོའི་རྒྱལ་སྤྱིའི་ཚོང་དོན་གྱི་སྐར་ཁུང་རྐྱང་པ”བརྒྱུད་དྲ་ཐོག་ནས་ཁྲལ་སློག་རེ་ཞུ་དང་འབྲེལ་ཡོད་དཔྱད་གཞི་ཕུལ་ཚེ། ཁྲལ་སློག་ལས་སྒོའི་བརྒྱུད་རིམ་ཧྲིལ་པོ་དྲ་ཐོག་ནས་གློག་རྡུལ་ཅན་གྱི་སྒྲུབ་གཉེར་བྱེད་ཐུབ། ཤོག་མེད་ཁྲལ་སློག་གི་བྱེད་སྟངས་འདི་བརྒྱུད་ཁྲལ་སློག་ཆ་འཕྲིན་ཚང་མ་འགག་སྒོ་དང་། ཁྲལ་དོན། རྒྱལ་མཛོད། དངུལ་ཁང་བཅས་ཀྱི་དབར་གློག་རྡུལ་ཅན་གྱི་འཁོར་རྒྱུག་ཐུབ་ནས། ཁེ་ལས་ཁག་ཕྱིར་མ་ཐོན་པར་འགྲོ་ལུགས་གཉེར་ཐུབ་པས། སྒྲུབ་གཉེར་དུས་ཚོད་ཆེས་ཆེར་ཐུང་དུ་ཕྱིན་ནས་ཁེ་ལས་ཀྱི་གཉེར་སྐྱོང་མ་གནས་དམའ་རུ་ནུས་ལྡན་ཕྱིན་ཡོད་པ་རེད།