ཉེ་ཆར། གསར་འགོད་པར་རང་སྐྱོང་ལྗོངས་ཀྱི་2026ལོའི་ཕྱོགས་བསྡུས་སྐྱེལ་འདྲེན་གྱི་དཔྱིད་གསར་སྐྱེལ་འདྲེན་ལས་དོན་གྱི་བརྙན་འཕྲིན་ཁ་པར་ཚོགས་འདུ་ནས་ཤེས་རྟོགས་བྱུང་བར། བོད་ལྗོངས་ཀྱི་2026ལོའི་དཔྱིད་གསར་སྐྱེལ་འདྲེན་ལས་དོན་ཟླ་བ་2པའི་ཚེས་2ཉིན་ནས་དངོས་སུ་འགོ་ཚུགས་རྒྱུ་དང་ཟླ་བ་3པའི་ཚེས་13ཉིན་མཇུག་འགྲིལ་རྒྱུ་ཡིན་ཞིང་། སྔོན་དཔག་ལྟར་ན་དཔྱིད་གསར་སྐྱེལ་འདྲེན་རིང་ལྗོངས་ཡོངས་ཀྱི་ཕྱོགས་བསྡུས་འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་172.12ཟིན་རྒྱུ་དང་། ལོ་གོང་མའི་དུས་མཚུངས་ལས་2.59%འཕར་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་དཔྱིད་གསར་སྐྱེལ་འདྲེན་ལས་དོན་དེ་ཕྱོགས་ཐོན་བདེ་འཇགས་མཐའ་ཚད་དུ་བྱས་ཏེ། འགྲིམ་འགྲུལ་སྐྱེལ་འདྲེན་བདེ་འཇགས་ཐོན་སྐྱེད་ཀྱི་ཉེན་ཁ་དང་མངོན་མེད་རྐྱེན་ངན་ཚབས་ཆེན་ལ་ཕྱོགས་ཡོངས་ནས་གྲལ་བཤེར་བཅོས་སྒྲིག་བྱེད་པ་དང་། གཙོ་གནད་ཁྱབ་ཁོངས་ཀྱི་བདེ་འཇགས་ལྟ་འདོམས་བྱེད་ཤུགས་ཆེ་རུ་གཏོང་བ། གནམ་གཤིས་ཧ་ཅང་ཞན་པའི་སྐབས་ཀྱི་སྔོན་འགོག་དང་ཁ་གཏད་གཅོག་ཐབས་དོན་འཁྱོལ་ནན་ཏན་བྱེད་པ། ལྕགས་ལམ་ཉེན་རྟོག་པ་དང་མཉམ་འབྲེལ་གྱིས་འགྲོ་ལམ་ཤར་གཏོང་ལས་ཀར་ཤུགས་སྣོན་རྒྱག་པ། ནུས་ཤུགས་ཡོད་རྒུས་དུས་བདེའི་དཔྱིད་གསར་སྐྱེལ་འདྲེན་གྱི་འགོག་སྲུང་འཛིང་རགས་བརྟན་དུ་གཏོང་བ་བཅས་བྱས་ནས། གཞུང་ལམ་འགྲིམ་འགྲུལ་གྱི་འཕར་རྩ་བདེ་བགྲོད་དང་གོ་རིམ་ལྡན་པ་ཡོང་བའི་འགན་སྲུང་བྱ་རྒྱུ་ཡིན་པ་རེད།