ཉེ་ཆར། གཞིས་རྩེ་གྲོང་ཁྱེར་ངམ་རིང་རྫོང་རིག་གནས་དང་ཡུལ་སྐོར་ཅུས་ཀྱིས་ཁྲོམ་ར་ལྟ་འདོམས་ཅུས་དང་མེ་ཟོན་རོགས་སྐྱོབ་རུ་ཆེན་སོགས་སྡེ་ཚན་དང་མཉམ་འབྲེལ་ཐོག་ཞིབ་བཤེར་ཚོགས་ཆུང་བཙུགས་ཏེ། དུས་ཆེན་གོང་གི་རིག་གནས་ཁྲོམ་རའི་བདེ་འཇགས་ཀྱི་མངོན་མེད་རྐྱེན་ངན་མཉམ་འབྲེལ་ཐོག་གྲལ་བཤེར་བྱས་པ་རེད།

ཞིབ་བཤེར་ཚོགས་ཆུང་གིས་རྫོང་གྲོང་གི་རིག་གནས་རོལ་རྩེད་བྱ་ཡུལ་དང་། སྐར་རིམ་གསུམ་པའི་གསོལ་མགྲོན་ཁང་། ཡིག་དཔར་ཁང་སོགས་གཙོ་གནད་ཁུལ་ཁོངས་ལ་དམིགས་ཏེ། ས་གནས་ས་ཐོག་ཏུ་སྐྱོད་པ་དང་། རྩིས་ཐོར་ལྟ་ཞིབ། ས་གནས་ས་ཐོག་ཏུ་འདྲི་རྩད་སོགས་ཀྱི་བྱེད་ཐབས་བརྒྱུད་གནས་ཡུལ་ཁག་གིས་མེ་ཟོན་བདེ་འཇགས་དོ་དམ་ལམ་ལུགས་དོན་འཁྱོལ་བྱས་ཚུལ་དང་། མེ་ཟོན་སྒྲིག་བཀོད་དང་འཁོར་སྐྱོད་གནས་ཚུལ། འཕྲལ་སྡོམ་ཁ་འགྲེམས་བགྲོད་ལམ་ཤར་གཏོང་གནས་ཚུལ། དེ་བཞིན་ན་སོ་དར་ལ་མ་བབས་པའི་མི་སྒྲིག་འགལ་ངང་བསྡུས་ཡོད་མེད་དང་། དཔེ་སྐྲུན་དངོས་པོ་དང་སྒྲ་བརྙན་ཐོན་རྫས་གཉེར་སྐྱོང་སྒྲིག་སྲོལ་དང་མཐུན་མིན་སོགས་གཙོ་གནད་ལྷུ་ཚིགས་ལ་ཕྱོགས་ཡོངས་ནས་ཞིབ་བཤེར་བྱས་པ་མ་ཟད། གནད་དོན་རེ་རེ་བཞིན་བཅོས་སྒྲིག་གི་རྩིས་ཐོ་བཟོས་ནས་འགན་འཁྲི་གཙོ་བོ་དང་། བྱེད་ཐབས། དུས་ཚད་བཅས་ཁ་གསལ་བཟོས་ཏེ་འབྲེལ་ཡོད་སྡེ་ཚན་གྱིས་དུས་བཀག་ནང་བཅོས་སྒྲིག་བྱེད་དགོས་པའི་བླང་བྱ་བཏོན་ཡོད།