འདི་ནི་ཉེ་ཆར་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་གདོང་དཀར་ཞིང་ཞོར་ཐོན་ཟོག་སྡེབ་ཚོང་ཁྲོམ་རར་ཚོང་པས་ཁྲོམ་བཀྱག་ཐོག་ཤིང་འབྲས་སྒྲིག་བཞིན་པ།

རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་གི་ཏང་ཙུའི་ཁོངས་མི་དང་ཐིང་ཀྲང་གཞོན་པ་ལིན་མུའུ་ཡིས་ངོ་སྤྲོད་བྱས་པར་གཞིགས་ན། མིག་སྔར་ལྗོངས་ཡོངས་ཀྱི་དགུན་དུས་ཤིང་འབྲས་དང་སྔོ་ཚལ་མཁོ་སྤྲོད་འགན་ལེན་ཐུབ་པ་དང་། ཁྲོམ་རར་དངོས་ཟོག་དབོར་འདྲེན་ཐབས་ལམ་ཤར་གཏོང་ཡིན་པ། ལྗོངས་ཕྱི་ནས་དབོར་བའམ་རང་ཡུལ་དུ་བཏབ་པའི་ཤིང་འབྲས་དང་སྔོ་ཚལ་གྱི་རིགས་ཕུན་སུམ་ཚོགས་ལ་མཁོ་སྤྲོད་འདང་ངེས་ཡོད་པ་བཅས་ལས་ས་མཐོའི་མང་ཚོགས་ཀྱི“ཤ་ཚལ་སྒོང་གསུམ”དང“ཤིང་འབྲས”འདང་ངེས་དང་། རིན་གོང་བརྟན་པ། སྤུས་ཚད་ལེགས་པ་བཅས་འགན་ལེན་ཏན་ཏིག་ཐུབ་པ་བྱས་ཡོད།

སྣ་ཁ་འཛོམས་ལ་མཁོ་སྤྲོད་འདང་ངེས་ཡོད་པ།

སྟོད་ལུང་བདེ་ཆེན་ཆུས་གདོང་དཀར་ཞིང་ཞོར་ཐོན་ཟོག་སྡེབ་ཚོང་ཁྲོམ་རར་ཤིང་འབྲས་ཚོང་མཁན་སུན་པིང་ཧྭ་ཡིས་ཁྲོམ་བཀྱག་ཐོག་གི་ཤིང་འབྲས་ལེགས་སྒྲིག་བྱེད་བཞིན་དུ་གསར་འགོད་པར“ད་ཆ་ཚོང་ཁང་ནང་ཤིང་འབྲས་སྣ་ཁ་60ནས་80བར་རྒྱུན་གཏན་ནས་གྲབས་གསོག་བྱེད་ཀྱི་ཡོད་པས་སྣ་ཁ་ཕུན་སུམ་ཚོགས་པོས་འཛད་སྤྱོད་པའི་དགོས་མཁོ་མི་འདྲ་བ་སྐོང་ཐུབ་ཀྱི་ཡོད”ཅེས་ངོ་སྤྲོད་བྱས།

ཤིང་ཏོག་སོས་པ་ཡོང་ཆེད། སུན་པིང་ཧྭ་ཡིས་ཉིན་ལྟར་ཚོང་ཟོག་ཐེངས་གཉིས་འཐེན་རྒྱུ་མཐའ་འཁྱོངས་བྱས་ཏེ་ཉིན་རེའི་ཆ་སྙོམས་བྲིན་ཚད་རྒྱ་མ་1000ཙམ་ཟིན་གྱི་ཡོད། “དབྱར་ཁར་དྲོད་སྙོམས་རླངས་འཁོར་གྱིས་ཤིང་འབྲས་སོས་པ་སྐྱེལ་འདྲེན་བྱེད་ཀྱི་ཡོད། དགུན་ཁ་ཕོ་ཁེབས་དང་འགྱིག་སོབ་སྒམ་གྱིས་དྲོད་སྲུང་བྱས་ཏེ་ས་མཐོའི་མང་ཚོགས་ཀྱིས་དུས་ཚིགས་བཞི་ཀར་ཤིང་འབྲས་སོས་པ་བཟའ་ཐུབ་པའི་རེ་བ་བྱེད་ཀྱི་ཡོད” ཟོག་ཁུངས་འདེམས་པའི་ཐད་སུན་པིང་ཧྭ་ལ་རང་ཉིད་ཀྱི་ལྟ་སྟངས་ཡོད་པ་སྟེ། “ཚ་ལུ་མའི་རིགས་ཀྱི་ཤིང་འབྲས་གཙོ་བོ་སི་ཁྲོན་གྱི་ཟོག་ཁུངས་འདེམས་པ་དང་། ཀུ་ཤུའི་རིགས་སྔོན་ལ་ཀན་སུའུ་ཡི་ཟོག་ཁུངས་འདེམས་ཀྱི་ཡོད། ཐོན་ཡུལ་དེ་དག་གི་ཤིང་འབྲས་ཀྱི་སྤུས་ཚད་བརྟན་པོ་ཡོད་པ་མ་ཟད། འཛད་སྤྱོད་པའི་དགའ་བསུ་ཆེན་པོ་ཐོབ་ཀྱི་ཡོད” མིག་སྔར་ཁོང་གི་མཛོད་ཁང་ནང་རྒྱུན་དུ་ཤིང་འབྲས་མཛོད་ཉར་བྱེད་ཚད་རྒྱ་མ་2000ཙམ་ཟིན་ནས་རྒྱུན་གཏན་གྱི་དགོས་མཁོ་སྐོང་ཐུབ་ཀྱི་ཡོད་ལ་དུས་ཆེན་སྐབས་ཀྱི་འཛད་སྤྱོད་མང་ཤོས་ཀྱི་དགོས་མཁོ་ཡང་སྐོང་ཐུབ་ཀྱི་ཡོད།

ཡུལ་འདི་གའི་སྔོ་ཚལ་ཚོང་པ་སུང་སི་དབྱིའི་ཁྲོམ་བཀྱག་མདུན་དུའང་འཁྲུག་ཆ་དོད་པ་དང་། ཁོང་གིས་པད་ཚལ་དང་ཧྲང་ཧའེ་ཆིང་སོགས་སྔོ་ཚལ་ཆེད་གཉེར་བྱེད་ཀྱི་ཡོད། ཟོག་ཁུངས་ཚང་མ་ཆུ་ཤུར་རྫོང་རྒྱལ་མཚན་དྲོད་ཁང་རྟེན་གཞི་ནས་ཡིན་ཞིང་། “པད་ཚལ་རྒྱ་མ་རེར་སྒོར་2དང་། ཧྲང་ཧའེ་ཆིང་རྒྱ་མ་རེར་སྒོར་1.8ཡིན་པས་རིན་གོང་བརྟན་པོ་དང་སྤུས་ཚད་ཡག་པོ་ཡོད”ས་གནས་དེ་གའི་འདེབས་འཛུགས་ཀྱི་ལེགས་ཆར་བརྟེན་ནས་ཁོང་གིས་ཉིན་རེར་ཆ་སྙོམས་སྔོ་ཚལ་ཏུན་2.5ནས་3བར་འཚོང་གི་ཡོད། མཁོ་སྤྲོད་ཁྱབ་ཁོངས་ལྷ་ས་དང་དེ་བཞིན་ས་ཁུལ་དང་གྲོང་ཁྱེར་ཁག་ཏུ་ཁྱབ་ནས“ཉིན་ལྟར་ཆུ་ཤུར་ནས་དངོས་ཟོག་ཐེངས་གཉིས་དབོར་གྱི་ཡོད་ལ་འཛད་སྤྱོད་པས་ཁ་ཆད་བྱས་པའི་འབྲེལ་མཐུད་རྟེན་གཞི་གཞིར་བཟུང་ཟོག་ཁུངས་མི་ཆད་པ་བྱེད་ཀྱི་ཡོད”ཅེས་གྲོང་མི་ཀྲང་ཆེ་གེ་མོས་ཚལ་ཉོས་རྗེས“ས་གནས་དེ་གའི་སྔོ་ཚལ་སོས་པ་དང་རིན་གོང་ཁེ་ལ་བྲོ་བ་ཞིམ་པོ་འདུག སྦྱིན་བདག་སུང་ལགས་ཀྱི་སྔོ་ཚལ་ཚང་མ་འཐེན་མ་ཐག་ཡིན་པས་བློ་བདེ་པོ་འདུག”ཅེས་བསྔགས་བརྗོད་བྱས།

སྤྱི་འདོམས་འགན་ལེན་དང་སྙོམས་སྒྲིག་བྱེད་ཤུགས་ཆེ་རུ་གཏོང་བ།

ཚོང་དུད་ཀྱིས་ཚོང་གཉེར་བརྟན་པོ་ཡོང་བ་ནི་ཁྲོམ་རའི་འདེགས་སྐྱོར་བརྟན་པོ་ཡོད་པ་དང་འབྲལ་ཐབས་མེད། བོད་ལྗོངས་ལིང་ཧྥུང་ཞིང་ཞོར་ཐོན་ཟོག་ཚོང་གཉེར་དོ་དམ་ཚད་ཡོད་ཀུང་སིའི་འགན་འཁུར་བ་ཀྲང་ཞའོ་ལིང་གིས། དགུན་དུས་ཤིང་འབྲས་དང་སྔོ་ཚལ་མཁོ་སྤྲོད་ཀྱི་ཁྱད་ཆོས་ལ་དམིགས་ཏེ་ཁྲོམ་རས་ཟོག་ཁུངས་སྒྲིག་འཛུགས་དང་། སོས་པ་སྐྱེལ་འདྲེན། ཐོན་ཚོང་འབྲེལ་མཐུད་སོགས་ཕྱོགས་མང་པོའི་ཐད་ནས་གནད་སྨིན་ཇུས་བསྟར་བྱས་ཏེ་བརྟན་ལ་ནུས་ཆེའི་མཁོ་སྤྲོད་འགན་ལེན་མ་ལག་བཙུགས་ཡོད་ཅེས་ངོ་སྤྲོད་བྱས་པ་རེད།

མིག་སྔར་དགུན་དུས་ཀྱི་ཤིང་འབྲས་དང་སྔོ་ཚལ་མཁོ་སྤྲོད་འདང་ངེས་ཡོད་པ་དང་། ཉིན་རེར་དངོས་ཟོག་ཏུན་400ནས་450བར་འཐེན་པ་དང་། ཕྱིར་ཚོང་བྱེད་ཚད་ཏུན་350ནས་380བར་ཟིན་པ། ད་ཡོད་ཀྱི་སྔོ་ཚལ་མཛོད་ཉར་བྱེད་ཚད་ཏུན་1050ཙམ་དང་ཤིང་འབྲས་མཛོད་ཉར་བྱེད་ཚད་ཏུན་510ཙམ་ཟིན་ནས་རྒྱུན་གཏན་དང་དུས་ཆེན་གྱི་གསོག་འཇོག་དགོས་མཁོ་སྐོང་ཐུབ་ཀྱི་ཡོད་པ་རེད།

ཐོན་ཡུལ་གྱི་གློ་བུར་དུ་ལྷག་སྲིད་པའི་གནས་ཚུལ་ལ་དམིགས་ནས། ཁྲོམ་རར་འཕྲལ་སྡོམ་མཁོ་སྤྲོད་འགན་ལེན་ལམ་སྲོལ་བཙུགས་པ་དང་འཐུས་སྒོ་ཚང་དུ་བཏང་བས་ཟོག་ཁུངས་དཀོན་པའི་སྐབས་སུ་གྲབས་གསོག་ཟོག་ཁུངས་མཛོད་སྤྱོད་ཆོག་པ་དང་། ས་ཁོངས་ལས་བརྒལ་བའི་ཐོན་ཡུལ་3ཡན་དང་འབྲེལ་མཐུད་བྱས་ནས་ཐབས་ལམ་རྒྱ་ཆེར་གཏོང་བ་དང་དུས་མཚུངས་འབྲེལ་ཡོད་སྡེ་ཚན་དང་མཉམ་འགུལ་གྱིས་ལྗང་མདོག་བགྲོད་ལམ་བཙུགས་ནས་གསབ་སྤྲོད་མགྱོགས་སུ་བཏང་ཡོད་ཅེས་ཀྲང་ཞའོ་ལིང་གིས་བཤད།

ཤིང་འབྲས་དང་སྔོ་ཚལ་7%ནས་23%བར་གྱི་སྐྱེལ་འདྲེན་སྡེབ་ཚོང་གི་ཟད་གྲོན་ལ་དམིགས་ནས། ཁྲོམ་ར་དང་ཚོང་པས་གསོག་འཇོག་བྱ་ཡུལ་ལེགས་སུ་གཏོང་བ་དང་། ཐུམ་སྒྲིལ་ལེགས་བཅོས་བྱེད་པ། འདོན་འཇུག་ཚད་ལྡན་དུ་གཏོང་བ་སོགས་ཀྱི་བྱ་ཐབས་བརྒྱུད་གྱོང་གུན་ཆུང་དུ་བཏང་བ་རེད། རིན་གོང་འཕར་ཆག་གི་མདུན་དུ་ཁྲོམ་རར་བབ་བསྟུན་གྱི་ཁ་གཏད་གཅོག་པའི་ལམ་སྲོལ་བཟོས་ནས་ས་གནས་དེ་གར་སྔོ་ཚལ་ཐོན་ཉུང་དུ་ཕྱིན་པའི་དབང་གིས་སྣ་ཁ་ཁ་ཤས་ཀྱི་རིན་གོང་འཕར་སྐབས། ཚོང་ཁང་ལ་ཟོག་ཁུངས་རྒྱ་ཆེར་གཏོང་རྒྱུར་སྐུལ་འདེད་བཏང་སྟེ་ཁྲོམ་རའི་རིན་གོང་འཕར་ཚད་ཡོངས་བསྒྲགས་བྱས་པའི་རིན་གོང་གི་20%ལས་མི་བརྒལ་བའི་ཚོད་འཛིན་ནན་པོར་སྐུལ་ལྕག་བྱས་པ་དང་། རིན་གོང་ཆག་པའི་སྐབས་སུ་ཚོང་པས་ཚོང་ཟོག་འཐེན་ཉུང་དུ་གཏོང་བ་མ་ཟད། རིན་གོང་ཆག་པའི་སྣ་ཁར་རྟགས་བརྒྱབ་ནས་འཛད་སྤྱོད་པའི་ཡིད་དབང་བཀུག་ཐོག་ཚོང་པའི་གྱོང་གུན་ཆུང་དུ་གཏོང་བར་ཁྲིད་སྟོན་བྱས་པ་རེད།

བྱེད་ཐབས་མང་པོ་མཉམ་དུ་སྤྱད་དེ་ཐོན་སྐྱེད་ལ་སྐུལ་འདེད་བཏང་བ།

གསར་འགོད་པས་རང་སྐྱོང་ལྗོངས་ཞིང་ལས་གྲོང་གསེབ་ཐིང་ནས་ཤེས་རྟོགས་བྱས་པར་གཞིགས་ན། ལྗོངས་ཡོངས་ཀྱི་དགུན་དུས་དང་དཔྱིད་གསར་དུས་ཆེན་རིང་ཤིང་འབྲས་དང་སྔོ་ཚལ་མཁོ་སྤྲོད་འདང་ངེས་དང་རིན་གོང་བརྟན་པོ་ཡོང་བའི་འགན་ལེན་བྱ་ཆེད། བོད་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱིས《2025ལོའི་སྔོ་ཚལ་ཐོན་སྐྱེད་ལས་དོན་ཏན་ཏིག་བསྒྲུབ་རྒྱུའི་སྐོར་གྱི་བརྡ་ཐོ》བཀྲམ་ནས་ལོ་འཁོར་གྱི་སྔོ་ཚལ་ཐོན་སྐྱེད་ཀྱི་དོན་དག་ཁག་ལ་སྤྱི་འདོམས་བཀོད་སྒྲིག་བྱས་ཏེ་བྱེད་ཐབས་ཏན་ཏིག་ལ་བརྟེན་ནས་ས་མཐོའི་མང་ཚོགས་ཀྱི“ཤ་ཚལ་སྒོང”གསུམ་མཁོ་སྤྲོད་བརྟན་པོ་ཡོང་བར་བྱས་པ་རེད།

མིག་སྔར། རིམ་རྩིས་བརྒྱབ་ན་ལྗོངས་ཡོངས་ཀྱི་སྔོ་ཚལ་འདེབས་ཁྱོན་མུའུ་ཁྲི་46ཟིན་པའི་ནང་འདབ་ལོའི་རིགས་ཀྱི་སྔོ་ཚལ་དང་པད་ཚལ་རིགས་སོགས་རིགས་ཆེན་པོ་བཅུ་དང་སྣ་ཁ་35ཚུད་ཡོད།

ལིན་མུའུ་ཡིས། གོམ་སྟབས་རྗེས་མར་འབྲེལ་ཡོད་སྡེ་ཚན་གྱིས་ཞིང་ལས་མཁོ་སྤྲོད་ཕྱོགས་ཀྱི་གྲུབ་ཚུལ་རང་བཞིན་གྱི་སྒྱུར་བཅོས་མུ་མཐུད་གཏིང་ཟབ་ཏུ་གཏོང་བ་དང་། ས་ཁོངས་བཀོད་སྒྲིག་དང་སྣ་ཁའི་གྲུབ་ཆ་ལེགས་སྒྲིག་བྱེད་པ། སྒྲིག་བཀོད་ཞིང་ལས་འཕེལ་རྒྱས་ཤུགས་ཆེན་གཏོང་བ། ནུས་ཆེའི་ཉི་འོད་དྲོད་ཁང་དང་ཞིབ་གཉེར་ཅན་གྱི་ཐོན་སྐྱེད་རྟེན་གཞི་འཛུགས་སྐྲུན་བྱ་རྒྱུ་བཅས་རེད། དེ་དང་ཆབས་ཅིག་གྲང་ཕྲེང་ཟོག་འགྲེམས་མ་ལག་འཛུགས་སྐྱོང་བྱེད་ཤུགས་ཆེ་རུ་བཏང་ནས་གྲང་མཛོད་དང་གསོག་མཛོད་སོགས་རྣམ་གྲངས་གྲབས་གསོག་དང་འཛུགས་སྐྲུན་བྱས་ཏེ་ས་ཁོངས་རང་བཞིན་གྱི་ཞིང་ལས་ཐོན་རྫས་ཐོན་ཡུལ་ཁྲོམ་ར་དང་ཞིང་ནང་ཁྲོམ་ར་བཏོད་ནས་ས་མཐོའི་ཤིང་འབྲས་དང་སྔོ་ཚལ་མཁོ་སྤྲོད་འགན་ལེན་གྱི་རྨང་གཞི་སྔར་བས་བརྟན་དུ་གཏོང་རྒྱུ་རེད་ཅེས་བརྗོད་པ་རེད།