ཉིང་ཁྲི་གྲོང་ཁྱེར་བྲག་ཡིབ་ཆུས་སུ“སྐལ་བཟང་མེ་ཏོག་འཁྲབ་སྟོན་དུས་ཚིགས་ཀྱི་བཞད་གད་འཁྲབ་སྟོན་པ་གྲགས་ཅན་གྱི་འདུ་ཚོགས”སྐབས་གསར་རྩོམ་ལེ་ཚན་འཁྲབ་སྟོན་བྱས་པ།
ཉེ་ཆར། རང་སྐྱོང་ལྗོངས་ཀྱི་རིག་གནས་སྤུས་རྟགས་བྱེད་སྒོ“སྐལ་བཟང་མེ་ཏོག་འཁྲབ་སྟོན་དུས་ཚིགས་ཀྱི་བཞད་གད་འཁྲབ་སྟོན་པ་གྲགས་ཅན་གྱི་འདུ་ཚོགས”དེ་མང་ཚོགས་ཀྱི་རེ་སྒུག་ཁྲོད་དུ་དགའ་སྤྲོའི་ངང་འགོ་ཚུགས་ཤིང་། ཉིང་ཁྲི་གྲོང་ཁྱེར་བྲག་ཡིབ་ཆུས་སྒྱུ་རྩལ་ཚོགས་པས《བྲག་ཡིབ་ཀྱི་འགྱུར་ལྡོག་ལ་བསྟོད་གླུ་འབུལ》དང《བྲག་ཡིབ་ཏུ་ཕེབས་པར་དགའ་བསུ་ཞུ》ཞེས་པའི་གསར་རྩོམ་ལེ་ཚན་ཆེན་པོ་གཉིས་འཁྲབ་སྟོན་བྱས་ཏེ། སྤྲོ་སྣང་ལྡན་པའི་ཉམས་འགྱུར་དང་ཕུན་སུམ་ཚོགས་པའི་ཀོང་པོའི་ཡུལ་སྲོལ་གོམས་གཤིས་ལ་བརྟེན་ནས་ལྟད་མོ་བར་སློབ་གསོའི་དོན་སྙིང་ལྡན་ལ་ལྟད་མོ་ཆེ་བའི་རིག་གནས་ཀྱི་གསོལ་སྟོན་གཟབ་རྒྱས་ཤིག་བཤམས་པ་དེ་འཁྲབ་སྟོན་དུས་ཚིགས་ཁྲོད་ཀྱི་བཀྲག་མདངས་འཚེར་སར་གྱུར་ཡོད། དེའི་ནང《བྲག་ཡིབ་ཀྱི་འགྱུར་ལྡོག་ལ་བསྟོད་གླུ་འབུལ》ཞེས་པའི་ལེ་ཚན་ལ་བྱ་དགའ་རིམ་པ་གསུམ་པ་ཐོབ་པ་རེད།
《བྲག་ཡིབ་ཀྱི་འགྱུར་ལྡོག་ལ་བསྟོད་གླུ་འབུལ》ཞེས་པ་དེས་དུས་རབས་ཀྱི་འཕར་རྩ་དང་བསྟུན་ནས་ཡུལ་སྐད་ཀྱི་ཐོལ་ཤོད་རྣམ་པ་གཙོ་བོར་བྱས་ཏེ། ཉེ་བའི་ལོ་ཤས་རིང་བྲག་ཡིབ་ཁུལ་གྱི་འཕེལ་རྒྱས་ཀྱི་འགྱུར་ལྡོག་ཆེན་པོ་སྦྲེལ་མཐུད་བྱས་ཡོད། འཁྲབ་སྟོན་པ་ཚོས་གསོན་ཉམས་དོད་པའི་འཁྲབ་ཚིག་དང་། མང་ཚོགས་དང་ཉེ་བཅར་གྱི་འཁྲབ་སྟོན། བསྟན་བཤིག་ཚ་བའི་སྐད་ཆ་བཅས་ཀྱི་ཐོག་ནས་སྔ་དེང་བསྡུར་བ་བྱས་ཏེ། ཐོན་ལས་དར་རྒྱས་ཀྱི་གྲུབ་འབྲས་གཡུར་དུ་ཟ་བ་དང་གྲོང་ཁྱེར་དང་གྲོང་གསེབ་ཀྱི་འགྱུར་ལྡོག་ཆེ་བའི་རྣམ་པ། མང་ཚོགས་ཀྱི་བདེ་སྐྱིད་ལྡན་པའི་འཚོ་བ་བཅས་ལྷུག་པོར་བརྗོད་ཅིང་། བྲག་ཡིབ་ཆུས་ཀྱི་སྤུས་ཚད་མཐོ་བའི་འཕེལ་རྒྱས་ཀྱི་གྲུབ་འབྲས་མངོན་པ་དང་མི་རིགས་ཁག་གི་མི་དམངས་ཀྱིས་འཕེལ་རྒྱས་ཆེད་མཐུན་སྒྲིལ་འབད་འཐབ་བྱེད་པའི་སྤྲོ་སེམས་བརྒྱུད་སྤྲོད་ཀྱང་བྱས་ཡོད།
ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མར་ཉིང་ཁྲི་གྲོང་ཁྱེར་བྲག་ཡིབ་ཆུས་སྒྱུ་རྩལ་ཚོགས་པས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་གཙོ་རྐང་དུ་མཐའ་འཁྱོངས་བྱས་ཏེ། ས་གནས་དེ་རང་གི་རིག་གནས་ཐོན་ཁུངས་སྔོག་འདོན་མུ་མཐུད་བྱས་ནས་དུས་རབས་ཀྱི་སྙིང་སྟོབས་མཚོན་པ་དང་། ས་གནས་ཀྱི་འཕེལ་རྒྱས་མངོན་པ། མང་ཚོགས་ཀྱི་འཚོ་བ་དང་ཉེ་བཅར་བཅས་ཀྱི་བརྩམས་ཆོས་སྤུས་ལེགས་དེ་བས་མང་བ་གསར་རྩོམ་བྱས་ཏེ་རིག་རྩལ་དྲིལ་བསྒྲགས་ལ་བརྟེན་ནས་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ལ་རམ་འདེགས་བྱ་རྒྱུ་རེད།
འབྲེལ་ཡོད་གསར་འགྱུར།