འདི་ནི་དིང་རི་རྫོང་དམའ་འབྲིང་དང་པོའི“དགུན་གསེང་གི་སློབ་ཚན་དང་པོའི”བྱེད་སྒོ་སྤེལ་ཡུལ་ཡིན་པ།

ཉེ་ཆར། གཞིས་རྩེ་གྲོང་ཁྱེར་དིང་རི་རྫོང་དམའ་རིམ་སློབ་འབྲིང་དང་པོར། གསོན་ཉམས་དོད་པའི“དགུན་གསེང་གི་སློབ་ཚན་དང་པོ”སྟེ། བསམ་བློ་ཆབ་སྲིད་ཀྱི་སློབ་ཚན་འཚོགས་ཤིང་། མཚོ་བོད་ལྕགས་ལམ་གྱི་བརྗིད་ཆེའི་ལེའུ་དང་ཧྲང་ཧའེ་དང་བོད་ལྗོངས་ས་གནས་གཉིས་དབར་གྱི་བརྩེ་སེམས་ཟབ་མོ་གཅིག་ཏུ་སྦྲེལ་ནས། སློབ་གསོའི་བོད་སྐྱོར་ལས་དོན་གྱི་གསར་གཏོད་གྲུབ་འབྲས་གསོན་ཉམས་དོད་པོས་མངོན་པར་བྱས་ཡོད།

དེ་ནི་དིང་རི་རྫོང་དམའ་རིམ་སློབ་འབྲིང་དང་པོས་གཉེར་བའི“དགུན་གསེང་གི་སློབ་ཚན་དང་པོའི”བྱེད་སྒོ་ཐོག་མ་ཡིན་པ་དང་དེའི་བརྗོད་དོན་གཙོ་བོ་ནི“མཁའ་ལམ་བློ་སྦྱོང་དང་། བསྐྱར་སྐྲུན་སེམས་སྐྱེད། བདེ་ཐང་མཉམ་གནས”ཞེས་པ་དེ་་རེད། བྱེད་སྒོ་སྤེལ་ཡུལ་དུ་དགེ་སློབ་ཚོས་རང་རྩོམ་རང་འཁྲབ་བྱས་པའི་ཡུལ་རྣམ་འཁྲབ་ཚན《མཁའ་ལམ་ཐོག་གི་བསམ་བློ་ཆབ་སྲིད་སློབ་ཚན》དེ་བཀྲག་མདངས་འཚེར་སར་གྱུར་ཡོད། འཁྲབ་ཚན་དེར་དགེ་སློབ་ཚོས་མེ་འཁོར་Z166ལ་བསྡད་ནས་ཧྲང་ཧའེ་རུ་སྤེལ་རེས་སློབ་སྦྱོང་བྱེད་པར་སྐྱོད་པའི་ལམ་བར་གྱི་སྒུལ་བདེའི་སློབ་ཚན་གྱི་ངོ་མཚར་རྣམ་པ་ཟབ་མོ་མངོན་པར་བྱས་པ་སྟེ། མེ་འཁོར་འགོ་འཛིན་གྱིས་མཚོ་བོད་ལྕགས་ལམ་གྱི་འཛུགས་སྐྲུན་པ་ཚོའི་འབད་འཐབ་ཀྱི་གཏམ་རྒྱུད་བཤད་པ་དང་། རྒན་ལགས་ཀྱིས་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60སོང་རིང་གི་འཕོ་འགྱུར་ཆེན་པོའི་སྐོར་དང་དེ་བཞིན་དིང་རི་རྫོང་གི་གེགས་རྗེས་བསྐྱར་སྐྲུན་ཁྲོད་ཀྱི་ཀྲུང་གོའི་མྱུར་ཚད་དང་མི་སེམས་འགུལ་བའི་གཏམ་རྒྱུད་མང་པོ་བརྗོད་ཡོད། གར་སྟེགས་སྒྱུ་རྩལ་ལས་མཁའ་ལམ་གྱི་སྙིང་སྟོབས་ཚོར་ཐུབ་པ་མ་ཟད། གསོན་ཤུགས་གསར་པ་ཡང་འཕེལ་བར་བྱས་ཡོད།

བྱེད་སྒོ་སྤེལ་རིང་། རི་ཆུ་བརྒལ་བའི་འཕྲིན་ཡིག་གཅིག་གིས་མི་རྣམས་ལ་སེམས་འགུལ་ཚད་མེད་ཐེབས་ཤིང་། ཧྲང་ཧའེ་ཡི་ཁག་བཅུ་པའི་བོད་སྐྱོར་ལས་བྱེད་པ་དང་དིང་རི་རྫོང་སློབ་གསོ་ཅུས་ཀྱི་དེ་སྔའི་ཅུས་ཀྲང་གཞོན་པ་ཝང་ཧའེ་ཅིང་གིས་ཧྲང་ཧའེ་ནས་ཧྲང་ཧའེ་གྲོང་ཁྱེར་སུང་ཅང་ཆུས་ཧྲང་ཧའེ་ཕྱི་རྒྱལ་སྐད་ཡིག་སློབ་ཆེན་ཞོར་གཏོགས་ཕྱི་རྒྱལ་སྐད་ཡིག་སློབ་གྲྭའི་སུང་ཅང་ཡུན་ཅན་སློབ་འབྲིང་གི་སློབ་མའི་འཕྲིན་ཡིག་ཅིག་བསྐུར་ཏེ་བོད་ཀྱི་སློབ་མ་ཚོ་ཧྲང་ཧའེ་རུ་སྤེལ་རེས་བྱེད་པར་ཡོང་རྒྱུའི་གདན་དྲངས་ཡོད། ཡུལ་རྣམ་འཁྲབ་སྟོན་ནང་ཞུགས་མཁན་སློབ་མ་20ལ་གདན་ཞུའི་ཡི་གེ་འབྱོར་འཕྲལ་ཁོང་ཚོས་ཀྱང་བོད་ཀྱི་མཛེས་ལྗོངས་འཁོད་པའི་འཕྲིན་ཡིག་བསྐུར་ཏེ་རྒྱང་རིང་གི་གྲོགས་པོ་ཆུང་ཆུང་ཚོར་ཕ་ཡུལ་གྱི་གངས་རི་དང་མཚོ་མོའི་མཛེས་ལྗོངས་སྐོར་བྲིས་ནས་བོད་དུ་ཡོང་བར་གདན་དྲངས་པ་མ་ཟད། ད་ལོའི་ཟླ་བ་བཞི་པར་ཧྲང་ཧའེ་རུ་བསྐྱོད་ནས་རིག་གནས་ཡུལ་སྐོར་གྱི་བྱེད་སྒོའི་ནང་ཞུགས་རྒྱུའི་ཁ་ཆད་ཀྱང་བྱས་པ་རེད།

ད་ཐེངས་ཀྱི“དགུན་གསེང་གི་སློབ་ཚན་དང་པོའི”ཁྱད་ཆོས་གཞན་ཞིག་ནི་སློབ་གྲྭས་ཁྱད་པར་ཡོད་པའི་དགུན་གསེང་ལག་ལེན་ལས་འགན་ཇུས་འགོད་ཞིབ་ཚགས་པོ་བྱས་པ་དེ་རེད། སློབ་མའི་ཁྱིམ་ཚང་གི་གནས་ཚུལ་དངོས་དང་ཟུང་འབྲེལ་གྱིས་ལས་འགན་ཁག་གཉིས་བཀོད་སྒྲིག་བྱས་པ་སྟེ། གཅིག་ནི་གེགས་རྗེས་བསྐྱར་སྐྲུན་ཁྱིམ་ཚང་གི་སློབ་མར“གཅིག་རེ་གསུམ”གྱི་ལག་ལེན་ཏེ། སྡོད་ཁང་གསར་པའི་ནང་བདེ་སྐྱིད་ལྡན་པའི་མཉམ་འཛོམས་འདྲ་པར་རྒྱག་པ་དང་། ནང་མི་གཅིག་ལ་བཅར་འདྲི་བྱས་ནས་བསྐྱར་སྐྲུན་གྱི་གཏམ་རྒྱུད་འབྲི་བ། མྱོང་ཚོར་ཚིག་གཅིག་ཤོད་དུ་འཇུག་པ་དང་། དེའི་དམིགས་ཡུལ་ནི་སློབ་མ་ཚོས་དྲོ་སྐྱིད་ཚོར་བ་དང་། དྲིན་ཚོར་ཐུབ་པ། འཇོན་ཐང་ཆེ་རུ་གཏོང་བ་བཅས་བྱ་ཆེད་རེད། གཅིག་ཤོས་ནི་སློབ་མ་གཞན་རྣམས་ཀྱིས་ཉེ་དུས་སློབ་གྲྭའི་ནང་གི་ཆམ་རིམས་སྔོན་འགོག་དང་ཚོད་འཛིན་གྱི་དོན་དངོས་དང་ཟུང་འབྲེལ་བྱས་ཏེ། ཆམ་ནད་འགོག་སྲུང་གི་བདེ་ཐང་དྲིལ་བསྒྲགས་བརྡ་སྦྱོར་བཟོས་ནས། ཁྱིམ་ཚང་དང་སྡེ་ཁུལ་གྱི“བདེ་ཐང་དྲིལ་བསྒྲགས་པ”བྱ་རྒྱུ་དེ་རེད། ལག་ལེན་གྱི་ཇུས་འགོད་དེ་དག་འཚོ་བ་དང་ཉེ་བཅར་ཐུབ་པ་མ་ཟད། དོན་སྙིང་ཡང་ཟབ་མོ་ལྡན་པས་སློབ་ཁང་ཙམ་མ་ཟད་སློབ་ཕྱིར་ཡང་སྤེལ་རྒྱུ་རེད།

ཧྲང་ཧའེ་ཡི་སློབ་གསོའི་བོད་སྐྱོར་ལས་དོན་ལོ་མང་སྤེལ་རིང་། ཐོག་མའི་དངོས་པོའི་རོགས་སྐྱོར་ནས་བསམ་བློ་མཉམ་འདྲེས་དང་རིག་གནས་སྤེལ་རེས་ཀྱི་དུས་མཚམས་གསར་པའི་བར་བསྒྱུར་ཡོད་ཅིང་། ད་ཐེངས་ཀྱི“དགུན་གསེང་གི་སློབ་ཚན་དང་པོ”ནི་གྲུབ་འབྲས་དེའི་གཅིག་སྡུད་ཀྱི་མཚོན་ཚུལ་ཞིག་རེད། ཧྲང་ཧའེ་གྲོང་ཁྱེར་གྱི་ཁག་བཅུ་གཅིག་པའི་བོད་སྐྱོར་ལས་བྱེད་པ་དང་དིང་རི་རྫོང་སློབ་གསོ་ཅུས་ཀྱི་ཅུས་ཀྲང་ཡའོ་མིང་ཁའེ་ཡིས“ང་ཚོས་ཉམས་མྱོང་ལ་ཕྱོགས་སྡོམ་བྱས་ནས་རྫོང་ཡོངས་ཀྱི་སློབ་གྲྭར་བསམ་བློ་ཆབ་སྲིད་ཀྱི་སློབ་གསོ་དེ་སློབ་མས་ལྟ་འདོད་ལ་ཉན་སྤྲོ་བའི་བྱེད་སྟངས་དང་ཟུང་དུ་འབྲེལ་བའི་གསར་གཏོད་བྱེད་ཐབས་སྤྱད་དེ། མི་སྐྱོང་ལས་དོན་དེ་བས་མང་ཚོགས་དང་འབྲེལ་འདྲིས་ཐུབ་པ་དང་དེ་བས་གསོན་ཤུགས་ལྡན་པར་བྱེད་ཀྱི་ཡིན”ཞེས་བཤད།

ཡུལ་རྣམ་འཁྲབ་ཚན་གྱི་གར་སྟེགས་ནས་སྤྱི་ཚོགས་ལག་ལེན་གྱི་སློབ་ཚན་བར་དང་། མཛའ་གཅུགས་ཟབ་ཏུ་གཏོང་བ་ནས་ཕུགས་བསམ་མངོན་འགྱུར་བྱེད་པའི་བར། སློབ་གསོའི་བོད་སྐྱོར་གྱི་ས་བོན་གངས་ལྗོངས་ས་མཐོར་བཏབ་ནས་སྐྱེ་སྟོབས་ཀྱི་དཔལ་འབར་བཞིན་མཆིས་ལ། དམིགས་བསལ་གྱི“མཁའ་ལམ་ཐོག་གི་བསམ་བློ་ཆབ་སྲིད་ཀྱི་སློབ་ཚན”དེ་དུས་རབས་ཀྱི་ས་བོན་ཞིག་དང་འདྲ་བར་སློབ་མ་ཚོའི་སེམས་ཀྱི་ཞིང་སར་རྩ་བ་ཚུགས་ནས་མི་རིང་བར་འབྲས་བཟང་སྨིན་རྒྱུ་སྨོས་མེད་རེད།