དགུན་དུས་ཀྱི་ཚྭ་མཚོ་དཀར་མོར་གྲང་རླུང་འུར་འུང་དུ་ལྡང་ཡང་ཚྭ་སྔོག་ཚྭ་འདྲེན་གྲུ་གཟིངས་ཀྱིས་ཉིན་མཚན་དབྱེར་མེད་ངང་མ་བཅོས་རྒྱུ་ཆ་ཐོན་སྐྱེད་འཁོར་ཁང་དུ་དབོར་བར་བྲེལ། མཚོ་སྔོན་ཚྭ་མཚོ་བཟོ་ལས་མ་རྐང་ཚད་ཡོད་ཀུང་སིའི་ཐོན་སྐྱེད་འཁོར་ཁང་ཞིག་ཏུ་ལས་དོན་པ་ལི་ཡུང་ལིན་ལ་ལབ་པར་ནས་ཐོན་སྐྱེད་སྒྲིག་ཆས་ཀྱི་དཔྱད་གྲངས་དུས་ཐོག་བསྒྲིགས་ཏེ་ཐཱན་སྐྱུར་ལིས་དག་ལིས་གློག་རྫས་ཐོན་སྐྱེད་ཁེ་ལས་སུ་བདེ་བླག་ངང་གཏོང་དགོས་པའི་བརྡ་ཐོ་འབྱོར།

“ཁྲོམ་རའི་དགོས་མཁོ་ཇེ་ཆེར་ཕྱིན་པ་དང་བསྟུན་ནས་ཁེ་ལས་ཀྱི་དགུན་དུས་ཉིན་རེའི་ཐཱན་སྐྱུར་ལིས་ཆ་སྙོམས་ཐོན་ཚད་ཏུན་90ཙམ་ཟིན་ཡང་ཐོན་རྫས་ཀྱི་དགོས་མཁོ་སྐོང་ཐུབ་ཀྱི་མེད”ཅེས་ཚྭ་མཚོ་མ་རྐང་ལིས་གློག་ཚན་རྩལ་ཡན་ལག་ཀུང་སིའི་ལག་རྩལ་ཀྲུའུ་རེན་མཱ་ཁྲེང་ཀུང་གིས་བཤད་པ་དང་། ཁོང་གིས། སྔོན་ཐོན་ལག་རྩལ་གྱི་མཐུན་རྐྱེན་སྦྱར་བ་ལས་འཁོར་ཁང་དུ་མི་མེད་ཐོན་སྐྱེད་གཞི་རྩའི་ཆ་ནས་མངོན་འགྱུར་བྱུང་བ་དང་། བཟོ་པས་ཆུ་ཚོད་4རེར་ཐོན་སྐྱེད་སྒྲིག་ཆས་འཁོར་སྐྱོད་གནས་ཚུལ་ལ་སྐོར་ཞིབ་ཐེངས་གཅིག་རེ་བྱས་ན་འགྲིག་གི་ཡོད་ཅེས་བཤད།

མཱ་ཁྲེང་ཀུང་ལས་ཀ་བྱེད་སའི་ཐོན་སྐྱེད་འཁོར་ཁང་དེ་ནི་ཚྭ་མཚོ་མ་རྐང་གིས་ལོ་རེར་རྨང་གཞིའི་ལིས་ཚྭ་ཏུན་ཁྲི་4ཐོན་སྐྱེད་བྱེད་པའི་གཞི་གཅིག་ཅན་གྱི་རྣམ་གྲངས་འཛུགས་སྐྲུན་ལ་བརྟེན་ནས་བྱུང་བ་ཞིག་རེད། རྣམ་གྲངས་དེ་ཚྭ་མཚོ་དཀར་མོའི་ཚྭ་ཆུའི་ཐོན་ཁུངས་དམིགས་བསལ་ལ་གཞི་ཚུགས་ནས་བཟོ་རྩལ་གསར་གཏོད་དང་། ལག་རྩལ་ལེགས་སུ་གཏོང་བ། སྒྲིག་ཆས་རིམ་འཇུག་བཅས་བྱས་པ་བརྒྱུད། ལིས་ཕྱོགས་བསྡུས་བསྡུ་ཚད་82.4%བར་མཐོ་རུ་ཕྱིན་པ་དང་དུས་མཚུངས་ཕྱོགས་བསྡུས་ནུས་ཟད་50.67%ཆག་ཡོད་པ་རེད།

སྤུས་འབྲས་ལེགས་གཉེར་བྱུང་བ་ལས་གྲུབ་འབྲས་ཟམ་མི་ཆད་པར་མངོན་པ་དང་གྲངས་འཛིན་ཅན་དང་རིག་ནུས་ཅན་གྱི་སྒྱུར་བཀོད་དེ་ཁེ་ལས་ཀྱི་ཐོན་སྐྱེད་འཁོར་འབྲེལ་ཆེ་གྲས་ཁག་ཏུ་སྣུར་སྲིང་བྱེད་བཞིན་ཡོད།

དཔྱིད་རྨོད་དཔྱིད་གྲབས་ཀྱི་དུས་ཚིགས་སླེབས་ཉེར་ཡོད་ཅིང་། ཚྭ་མཚོ་མ་རྐང་གིས་ཅཱ་ལུད་ཐོན་སྐྱེད་བརྒྱུད་རིམ་རིམ་སྤོར་སྒྱུར་བཀོད་ལ་གོ་རིམ་ལྡན་པའི་ངང་སྐུལ་འདེད་བཏང་བས། མིག་སྔར་ཉིན་རེར་ཅཱ་ལུད་ཐོན་ཚད་ཏུན་ཁྲི་1ཙམ་རྒྱུན་འཁྱོངས་ཐུབ་ཡོད། ཚྭ་མཚོ་མ་རྐང་ཅཱ་ལུད་ཡན་ལག་ཀུང་སིའི་ཐོན་སྐྱེད་འཁོར་ཁང་ཞིག་གི་ཀྲུའུ་རེན་གཞོན་པ་ལི་ཧྲེང་པིན་གྱིས་གྲངས་གཞི་ཆེ་མོ་དང་མི་ཐབས་རིག་ནུས་སོགས་ལག་རྩལ་ལ་བརྟེན་ནས་འཁོར་ཁང་སྒྱུར་བཀོད་བྱས་རྗེས། ཐོན་སྐྱེད་ནུས་ཟད་རྒྱུན་མཐུད་ཆག་པ་མ་ཟད། ཁིལ་སྐྱུར་ཅཱ་ཡི་ཐོན་སྐྱེད་ལས་ཆོད་10%ཙམ་མཐོ་རུ་ཕྱིན་ཡོད་ཅེས་ངོ་སྤྲོད་བྱས།

ཚྭ་མཚོ་མ་རྐང་ཅཱ་ལུད་ཡན་ལག་ཀུང་སིའི་ཐོན་སྐྱེད་པུའི་པུའུ་ཀྲང་གཞོན་པ་ཝང་ཁྲུན་ཧུའེ་ཡིས“དཔྱིད་རྨོད་ཀྱི་མཁོ་སྤྲོད་འགན་ལེན་བྱེད་རིང་ང་ཚོས་ཅཱ་ལུད་བསྡོམས་ཏུན་ཁྲི་180ལྷག་ཙམ་ཐོན་སྐྱེད་བྱས་ཏེ། མཁོ་སྤྲོད་བརྟན་པོ་ཡོང་བ་དང་ཞིང་ལུད་ཀྱི་མ་གནས་ཆུང་དུ་གཏོང་གང་ཐུབ་བྱེད་ཀྱི་ཡིན”ཞེས་བཤད།

ཚྭ་མཚོ་དཀར་མོའི་མེ་འཁོར་འབབ་ཚུགས་སུ་ཅཱ་ལུད་བྱུར་བུར་བླུགས་པའི་མེ་འཁོར་མང་པོ་ཞིག་ལྕགས་ལམ་དང་གཞུང་ལམ་གྱི་མཉམ་འདྲེན་སྣ་མང་བརྒྱུད་རྒྱལ་ཡོངས་ཀྱི་འབྲུ་རིགས་ཐོན་ཁུལ་གཙོ་བོར་དབོར་འདྲེན་བྱེད་ཀྱི་ཡོད།

མཚོ་སྔོན་ཚྭ་འདམ་གཤོངས་སར་གནས་པའི་ཚྭ་མཚོ་དཀར་མོ་ནི་རང་རྒྱལ་གྱི་ཚྭ་མཚོ་ཆེ་ཤོས་ཡིན་ལ། རང་རྒྱལ་གྱི་ཅཱ་ལུད་ཐོན་སྐྱེད་རྟེན་གཞི་དང་ཚྭ་མཚོ་ཐོན་ལས་རྟེན་གཞི་གལ་ཆེན་ཞིག་ཀྱང་ཡིན། ཚྭའི་ཐོན་ཁུངས་སྣ་ཚོགས་ཀྱི་གསོག་འབོར་ཏུན་དུང་ཕྱུར་600ཟིན་གྱི་ཡོད།

ཀྲུང་གོ་ཚྭ་མཚོ་བཟོ་ལས་ཚོགས་པ་ཚད་ཡོད་ཀུང་སིའི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། གོམ་སྟབས་རྗེས་མར། ཚོགས་པས་ཚྭ་མཚོ་ཐོན་ལས་རིག་ནུས་ཅན་དང་། ལྗང་མདོག་ཅན། མཉམ་འདྲེས་ཅན་བཅས་ཀྱི་ཕྱོགས་སྒྱུར་རིམ་སྤོར་ལ་དམིགས་ཏེ། ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་ལ་སྐུལ་འདེད་གཏོང་རྒྱུ་མཐའ་འཁྱོངས་དང་། ཡུལ་བབ་དང་བསྟུན་ནས་ཚྭ་མཚོའི་ཐོན་སྐྱེད་ནུས་ཤུགས་གསར་མ་སྐྱེད་སྲིང་དང་འཕེལ་རྒྱས་བཏང་ནས། འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་གང་མགྱོགས་འཛུགས་སྐྲུན་བྱ་ཆེད་རྨང་གཞི་བརྟན་དུ་གཏོང་རྒྱུ་རེད།

ཤིན་ཧྭ་གསར་འགྱུར་ཁང་ཟི་ལིང་ནས་འབྱོར་བའི་གློག་འཕྲིན།