ཤིན་ཧྭ་གསར་འགྱུར་ཁང་ཟི་ལིང་ནས་ཟླ་1ཚེས་28ཉིན་གློག་འཕྲིན་འབྱོར་གསལ། གསར་འགོད་པར་ཟླ་1ཚེས་28ཉིན་མཚོ་སྔོན་ཞིང་ཆེན་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་བཞི་པ་ནས་ཤེས་རྟོགས་བྱུང་བར། མཚོ་སྔོན་གྱིས་ཐོན་སྐྱེད་དང་འཚོ་བའི་ཆ་རྐྱེན་རྒྱུན་མཐུད་ལེགས་སུ་བཏང་བ་དང་། སྨན་བཅོས་ཞབས་ཞུའི་འགན་ལེན་བྱེད་ཤུགས་ཆེ་རུ་བཏང་བ།“རྒན་གཅིག་གཞོན་གཅིག”ལ་ཞབས་འདེགས་ཞུ་བའི་ཆུ་ཚད་ཕྱོགས་ཡོངས་ནས་མཐོ་རུ་བཏང་བས། ཞིང་ཆེན་ཡོངས་ཀྱི་མི་རེའི་ཆ་སྙོམས་ཚེ་ཚད་ལོ་75.3བར་རིང་དུ་ཕྱིན་ཡོད།

ས་མཐོའི་མི་འབོར་གྱི་བདེ་ཐང་དང་ས་མཐོའི་ལུས་གསོའི་གནད་དོན་ལ་ཐོག་མཐའ་བར་གསུམ་དུ་དོ་ཁུར་ཐོབ་ཡོད། བསྡོམས་རྩིས་གསར་ཤོས་ལས་མངོན་པར། མཚོ་སྔོན་དུ་ལོ་60དང་དེ་ཡན་གྱི་རྒན་རྒོན་མི་འབོར་ཁྲི་96.23ཟིན་ནས་མི་འབོར་བསྡོམས་འབོར་གྱི་བསྡུར་གྲངས་བཟུང་ཚད་15%ལས་བརྒལ་བ་དང་དེའི་ནང་ལོ་བརྒྱ་ལ་སླེབས་པའི་རྒན་རྒོན་432ཡོད་པ་རེད། མཚོ་སྔོན་ཞིང་ཆེན་སྲིད་གྲོས་ཀྱི་ཨུ་ཡོན་དང་མཚོ་སྔོན་སློབ་ཆེན་ས་མཐོའི་གསོ་རིག་ཞིབ་འཇུག་ལྟེ་གནས་ཀྱི་དགེ་རྒན་ཆེ་མོ་བ་གཞོན་པ་ཨོ་རེན་ཐ་ན་ཡིས། མཚོ་བོད་ས་མཐོའི་དྲོད་གཤེར་མཁའ་རླུང་གིས་ས་མཐོའི་འཚོ་གནས་ཁོར་ཡུག་ལེགས་བཅོས་ལ་རང་བྱུང་གི་གོ་སྐབས་སྦྱིན་པ་དང་། དུས་མཚུངས་སུ་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་གཏོད་པའི་འཐབ་ཇུས་བྱ་སྤྱོད་དང་རྒྱལ་ཁབ་ཀྱི་འདུ་འགོད་གལ་ཆེན་ཁག་ལག་བསྟར་གྱིས་མཚོ་བོད་ས་མཐོའི་གནས་འཕྲོད་འཕེལ་རྒྱས་ལ་དྲང་ནུས་སྦྱིན་ཡོད།

“རྒན་གཅིག་གཞོན་གཅིག”འགན་སྲུང་བྱ་རྒྱུ་དེ་མི་སེར་གྱི་བདེ་རྩར་ཐུག་ཡོད། 2025ལོར། མཚོ་སྔོན་གྱིས་སློབ་གསོ་སྟོབས་ཆེའི་ཞིང་ཆེན་འཛུགས་པར་སྐུལ་འདེད་བརྟན་པོ་བཏང་ནས། སློབ་ཞུགས་གོང་གི་འཛིན་གྲྭ་ཆེ་བའི་བྱིས་པ་ཁྲི་7.6ལ་རིན་མེད་སློབ་གསོ་ལོངས་སྤྱོད་ཐུབ་པར་བྱས་པ་དང་། འོས་འགན་སློབ་གསོའི་འཚོ་བཅུད་ལེགས་བཅོས་འཆར་གཞིའི་སྤུས་ཚད་ལེགས་སུ་དང་ཁྱབ་རྒྱ་ཆེ་རུ་བཏང་བ། ཕན་པ་ཐོབ་མཁན་སློབ་མ་25.48མང་དུ་བཏང་བ། ལོ་འཁོར་གྱི་བྱིས་གསོའི་ཁ་གསབ་སྤྲོད་པའི་ལས་དོན་གྱིས་ཕྲུ་གུ་དམར་འབྱར་ཁྲི་17ལ་ཕན་པ་ཐོབ་པ། རྒན་གསོའི་ཞབས་ཞུའི་སྤུས་ཚད་མཐོར་གཏོང་རིམ་སྤོར་ལ་དུས་མཚུངས་སུ་སྐུལ་འདེད་བཏང་སྟེ། ས་གནས་དེ་གའི་གྲོང་གསེབ་ཀྱི་རོགས་རེས་བདེ་སྐྱིད་ཁང་108སྒྱུར་བཀོད་རིམ་སྤོར་བྱས་པ། དཀའ་ངལ་ཡོད་པའི་རྒན་རྒོན་ཁྱིམ་ཚང་2056ལ་རྒན་འཕྲོད་ཅན་གྱི་སྒྱུར་བཀོད་བྱས་པ། སྡོད་ཁང་གི་གློག་སྐས་400ལྷག་ཙམ་གསར་པ་བརྗེས་ཡོད།

《མཚོ་སྔོན་ཞིང་ཆེན་གྱི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་ཕྱོགས་ཀྱི་ལོ་ལྔ་ཚན་བཅོ་ལྔ་པའི་འཆར་འགོད་རྩ་གནད(འཆར་ཟིན)》ནང་། མཚོ་སྔོན་གྱིས་དམངས་འཚོ་གཙོ་བོར་འཛིན་རྒྱུ་མཐའ་འཁྱོངས་བྱས་ཏེ་སྤུས་ཚད་མཐོ་པོས་ལས་ཞུགས་གང་ལེགས་ཐུབ་པར་འཕེལ་རིམ་གསར་པ་ཡོང་བར་སྐུལ་འདེད་བཏང་ནས། མི་རེའི་ཆ་སྙོམས་སྔོན་དཔག་ཚེ་ཚད་སླར་ཡང་ལོ་1.5རིང་དུ་འགྲོ་ཐུབ་པ་བྱ་རྒྱུ་རེད།