ཟླ་1ཚེས་26ཉིན་གྱི་ཆུ་ཚོད་14དང་སྐར་མ་56ལ། ཀན་སུའུ་ཀན་ལྷོ་བོད་རིགས་རང་སྐྱོང་ཀྲོའུ་ཐེ་བོ་རྫོང་དུ་ས་ཡོམ་རིམ་པ་5.5བརྒྱབ་པ་དང་ཡོམ་ཁུངས་ཀྱི་གཏིང་ཚད་སྤྱི་ལེ་10ཟིན་ཡོད། ཆུ་བེད་པུའུ་ཡིས་ཆུ་བེད་ཀྱི་ཡོམ་འགོག་གེགས་སེལ་བཀོད་གཏོང་བཀོད་འདོམས་ལམ་སྲོལ་གང་མགྱོགས་ལག་བསྟར་བྱས་པ་མ་ཟད། ཆེད་དོན་ཚོགས་འདུ་འཚོགས་ཏེ་ས་ཡོམ་གྱིས་ཆུ་བེད་ལས་གྲྭ་དང་གྲོང་གསེབ་ཀྱི་ཆུ་མཁོ་འདོན་ཐད་ཐེབས་པའི་ཤུགས་རྐྱེན་ལ་དབྱེ་ཞིབ་དང་ཡོམ་ཁུལ་གྱི་ཆར་ཆུའི་གནས་ཚུལ་ལ་ཞིབ་འཇུག་བརྡར་གཅོད་བྱས་ནས་ཡོམ་འགོག་གེགས་སེལ་གྱི་ཆུ་བེད་ལས་དོན་བཀོད་སྒྲིག་བྱས་པ་རེད།

ཆུ་བེད་པུའུ་ཡིས་རྒྱལ་ཡོངས་ཀྱི“ཆུ་བེད་དཔེ་རིས་གཅིག”གཞིར་བཟུང་། ཡོམ་ཁུལ་གྱི་ཆུ་བོ་དང་དེ་བཞིན་ཆུ་མཛོད་དང་། ཆུ་ཤུགས་གློག་ཁང་། ཆུ་རགས། གྲོང་གསེབ་ཀྱི་ཆུ་མཁོ་འདོན་ལས་གྲྭ ཆུ་སྒོ ཆུ་དཔྱད་ཚད་ལེན་ས་ཚིགས་སོགས་ཆུ་བེད་ལས་གྲྭ་ཁྱབ་ཚུལ་ལ་འཕྲལ་མར་ཞིབ་བཤེར་བྱས་པ་མ་ཟད། ཀན་སུའུ་དང་སི་ཁྲོན་ཞིང་ཆེན་ཆུ་བེད་ཐིང་ལ་དུས་ཐོག་ཏུ་བརྡ་ཁྱབ་བཏང་ནས། ས་གནས་ཆུ་བེད་སྡེ་ཚན་གྱིས་ས་ཡོམ་ནང་གཏོར་སྐྱོན་ཕོག་པའི་ཆུ་བེད་ལས་གྲྭའི་གནས་ཚུལ་ལ་ཕྱོགས་ཡོངས་ནས་གྲལ་བཤེར་བྱེད་པར་ལྟ་སྐུལ་བྱས་ཡོད།

སྔོན་བརྡ་བཏང་བར་གཞིགས་ན། ཡོམ་ཁུལ་དུ་དེ་རིང་ནས་མ་འོངས་ཉིན་གསུམ་རིང་ཕལ་ཆེར་ཆར་པ་མེད་ཅིང་། ཆུ་བེད་པུའུ་ཡིས་ཡོམ་ཁུལ་གྱི་ཆར་ཆུ་དང་། ཆུའི་གནས་ཚུལ། དེ་བཞིན་ཆུ་བེད་ལས་གྲྭའི་འཁོར་རྒྱུག་གནས་ཚུལ་བཅས་ལ་དོ་སྣང་བྱ་རྒྱུ་མ་ཟད། ས་གནས་ཆུ་བེད་སྡེ་ཚན་གྱིས་སྲུང་སྐར་རྒྱང་ཚོར་དང་མི་མེད་གནམ་གྲུ་སོགས་ཀྱི་བྱ་ཐབས་སྤྱད་དེ་ཡོམ་ཁུལ་ནང་གཏོར་སྐྱོར་ཕོག་པའི་ཆུ་བེད་ལས་གྲྭའི་སྒྲིག་ཆས་ལ་གྲལ་བཤེར་བྱེད་པའི་ལས་དོན་མུ་མཐུད་ཡག་པོ་བསྒྲུབ་པར་མཛུབ་ཁྲིད་བྱས་ཏེ། ཞོར་སྐྱོན་གནོད་འཚེ་ཐོན་རྒྱུ་སྔོན་འགོག་ནན་པོ་བྱེད་པ་དང་ཆབས་ཅིག་མང་ཚོགས་ལ་གནས་སྐབས་ཆུ་མཁོ་འདོན་བྱེད་པའི་ལས་དོན་ཡག་པོ་སྒྲུབ་སྟེ་མང་ཚོགས་ཀྱི་འཐུང་ཆུའི་བདེ་འཇགས་ལ་འགན་ལེན་བྱ་རྒྱུ་རེད།