ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་28ཉིན་གློག་འཕྲིན་འབྱོར་གསལ། ཟླ་1ཚེས་28ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཙམ་པབ་ཝེ་ཡི་བཅིངས་འགྲོལ་འཐབ་རྩོད་ཀྱི་འཐབ་འཛིང་པ་རྒན་གྲས་ཚོར་འཕྲིན་ལན་སྤྲིངས་པ་རེད།

ཞི་ཅིན་ཕིང་གིས་གསུངས་དོན། ཁྱེད་ཚོ་གཞོན་ནུའི་དུས་རབས་མི་རིགས་བཅིངས་འགྲོལ་གྱི་བྱ་གཞག་རླབས་པོ་ཆེར་ཞུགས་ཏེ་ཕ་ཡུལ་དང་ཁ་བྲལ་ནས་ཀྲུང་གོ་དང་ལས་འབྲེལ་བཟང་པོ་དང་འཐབ་འཛིང་གི་མཛའ་བརྩེ་ཟབ་མོ་བཙུགས་པ་མ་ཟད། ད་བར་སྔར་བཞིན་ཀྲུང་ཙམ་དང་ཀྲུང་ཧྥེའི་མཛའ་གཅུགས་ལ་སེམས་ཁུར་གནང་གི་ཡོད་པས་མི་རྣམས་ལ་སེམས་འགུལ་ཆེན་པོ་ཐེབས་ཡོད།

ཞི་ཅིན་ཕིང་གིས་ནན་བཤད་གནང་དོན། 2026ལོ་ནི་ཀྲུང་ཧྥེའི་དབར་ཕྱི་འབྲེལ་བཙུགས་ནས་ལོ་ངོ་70འཁོར་བའི་ལོ་རེད་ལ། “ཀྲུང་ཧྥེའི་མི་ཆོས་རིག་གནས་སྤེལ་རེས་ཀྱི་ལོ”ཡང་རེད། ལོ་70ཡི་རིང་། ཀྲུང་གོ་ནི་ཐོག་མཐའ་བར་གསུམ་དུ་ཨ་ཧྥེ་རི་ཁའི་མི་རིགས་བཅིངས་འགྲོལ་དང་བྱ་གཞག་འཕེལ་རྒྱས་དང་དར་རྒྱས་གཏོང་མཁན་གྱི་འཐབ་གྲོགས་ཡག་པོ་དང་རོགས་ཟླ་ཡག་པོ་ཞིག་ཡིན། ཨ་ཧྥེ་རི་ཁའི་གྲོགས་པོ་དང་མཉམ་དུ་ཕན་ཚུན་བརྩི་འཇོག་དང་ཕན་ཚུན་རྒྱབ་སྐྱོར་བྱས་ཏེ་ལག་གདང་སྦྲེལ་ནས་སྤྱིར་བཏང་མིན་པའི་ལོ་ཟླ་བརྒྱུད་ཡོད་ལ། དེང་རབས་ཅན་གྱི་རྒྱང་ལམ་གསར་པར་ཡང་མཉམ་དུ་བསྐྱོད་ཡོད། ཀྲུང་གོ་ཕྱོགས་ཀྱིས་ཀྲུང་ཧྥེའི་མཉམ་ལས་གླེང་སྟེགས་པེ་ཅིང་དབུ་ཚོགས་ཀྱི་གྲུབ་འབྲས་དོན་འཁྱོལ་བྱ་རྒྱུ་གོ་སྐབས་སུ་བྱས་ནས་ཨ་ཧྥེ་རི་ཁ་ཕྱོགས་དང་སྲོལ་རྒྱུན་མཛའ་གྲོགས་ཀྱི་རྒྱུན་མཐུད་དེ་ཀྲུང་ཧྥེའི་འབྲེལ་བའི་དེ་བས་འོད་སྟོང་འཕྲོ་བའི་འབྱུང་འགྱུར་མཉམ་དུ་གཏོད་འདོད་ཡོད། ཁྱེད་ཚོས་ཨ་ཧྥེ་རི་ཁའི་གཞོན་ནུ་དེ་བས་མང་བ་ཀྲུང་ཙམ་དང་ཀྲུང་ཧྥེའི་མཛའ་གྲོགས་བྱ་གཞག་ནང་ཞུགས་པར་སྣེ་ཁྲིད་བྱ་རྒྱུའི་རེ་བ་ཡོད།

ཞི་ཅིན་ཕིང་གིས་ནན་བཤད་གནང་དོན། ཀྲུང་གོའི་ལུགས་རྙིང་རྟ་ལོའི་དཔྱིད་གསར་དུས་ཆེན་འཆར་ཉེར་ཡོད་པས་ཀྲུང་ཧྥེ་ཕྱོགས་གཉིས་པོས་ཉམས་པ་མེད་པའི་གྱི་ལིང་སྙིང་སྟོབས་དར་སྤེལ་བཏང་ནས་ལག་གདང་སྦྲེལ་ཏེ་དུས་རབས་གསར་པའི་དུས་དང་རྣམ་པ་ཀུན་གྱི་ཀྲུང་ཧྥེའི་ལས་དབང་གཅིག་མཐུན་ཚོགས་པ་བཙུགས་ནས་ཀྲུང་ཧྥེའི་མཛའ་གྲོགས་ཀྱི་དུས་རབས་ཀྱི་ལེའུ་གསར་པ་མུ་མཐུད་རྩོམ་དགོས།

ཀྲུང་གོ་གསར་པ་དབུ་བརྙེས་རྗེས། ཨ་ཧྥེ་རི་ཁས་བཙན་རྒྱལ་རིང་ལུགས་དང་མི་སེར་སྤེལ་བའི་རིང་ལུགས་ལ་ངོ་རྒོལ་དང་མི་རིགས་བཅིངས་འགྲོལ་གཏོང་བར་ཀྲུང་གོས་བློ་བརྟན་འགྱུར་མེད་ངང་རྒྱབ་སྐྱོར་བྱས་ཡོད། ཉེ་ཆར། ཙམ་པབ་ཝེ་བཅིངས་འགྲོལ་འཐབ་རྩོད་ཀྱི་འཐབ་འཛིང་པ་རྒན་གྲས་ཚོས་ཀྲུའུ་ཞི་ཞི་ཅིན་ཕིང་ལ་མིང་མཉམ་དུ་བཀོད་པའི་འཕྲིན་ཡིག་སྤྲིངས་ནས་ཀྲུང་གོས་ཙམ་པབ་ཝེ་ཡི་མི་རིགས་བཅིངས་འགྲོལ་ལ་རྩ་ཆེའི་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་མ་ཟད། ཀྲུའུ་ཞི་ཞི་ཅིན་ཕིང་གིས་ཀྲུང་གོ་གུང་ཁྲན་ཏང་དང་ཀྲུང་གོའི་མི་དམངས་ལ་འགོ་ཁྲིད་གནང་ནས་དུས་རབས་གསར་པར་གཡུར་ཟའི་གྲུབ་འབྲས་ཐོབ་པ་དང་ཀྲུང་གོའི་ལུགས་ཀྱི་དེང་རབས་ཅན་གྱི་འགྲོ་ལམ་བཏོད་དེ་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་ལ་རྩ་ཆེའི་དཔྱད་གཞི་མཁོ་འདོན་གནང་བར་ཡིད་སྨོན་སྐྱེ་ལུགས་བརྗོད་པ་དང་། ཀྲུང་གོ་དང་ཙམ་པབ་ཝེ་ཡི་དུས་དང་རྣམ་པ་ཀུན་གྱི་ལས་དབང་གཅིག་མཐུན་ཚོགས་པར་སེམས་གཏིང་ནས་སྤོབས་པ་ཆེན་པོ་སྐྱེ་བ་དང་རྒྱལ་ཁབ་གཉིས་པོའི་མཛའ་གྲོགས་བྱ་གཞག་རྒྱུན་མཐུད་ཐུབ་པར་འབད་བརྩོན་བྱེད་ཀྱི་ཡིན་ཞེས་བརྗོད་ཡོད།