རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་བཞི་པའི་ཚོགས་འདུ་ཐེངས་བཞི་པ་དང་སྲིད་གྲོས་སྐབས་བཅུ་བཞི་པའི་རྒྱལ་ཡོངས་ཨུ་ཡོན་ལྷན་ཁང་གི་ཚོགས་འདུ་ཐེངས་བཞི་པ་2026ལོའི་ཟླ་3ཚེས་5ཉིན་དང་ཟླ་3ཚེས་4ཉིན་པེ་ཅིང་དུ་འཚོག་རྒྱུ་རེད། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གཞུང་དོན་ཐིང་དང་རྒྱལ་ཡོངས་སྲིད་གྲོས་གཞུང་དོན་ཐིང་གིས་ཚེས་27ཉིན་ཀྲུང་གོ་དང་ཕྱི་རྒྱལ་གྱི་གསར་འགོད་པ་སྐབས་དེ་དུས་བཅར་འདྲིར་ཡོང་བར་དགའ་བསུ་ཞུ་རྒྱུ་ཡིན་པ་ཁྱབ་བསྒྲགས་བྱས་པ་རེད།

ཚོགས་འདུའི་བཅར་འདྲི་དེ་ས་གནས་ས་ཐོག་གི་བྱ་ཐབས་གཙོ་བོར་བྱེད་པ་དང་བྱ་ཐབས་སྣ་ཚོགས་ཕྱོགས་བསྡུས་ཐོག་སྤྱད་ནས་བྱེད་རྒྱུ་ཡིན་ཞིང་། ཚོགས་འདུས་སྒོ་དབྱེ་དང་ཕྱི་གསལ་ནང་གསལ་གྱི་སྙིང་སྟོབས་མུ་མཐུད་མཐའ་འཁྱོངས་བྱས་ཏེ། ཀྲུང་གོ་དང་ཕྱི་རྒྱལ་གྱི་གསར་འགོད་པ་བཅར་འདྲིར་ཡོང་བར་ཞབས་འདེགས་ཞུ་རྒྱུ་རེད།

ཀྲུང་གོ་དང་ཕྱི་རྒྱལ་གྱི་གསར་འགོད་པས་ཚོགས་འདུ་གཉིས་ལ་བཅར་འདྲི་བྱེད་པར་གོ་རིམ་ལྟར་རེ་ཞུ་བྱེད་དགོས་ཤིང་། ཀྲུང་དབྱང་གསར་འགྱུར་ཚན་པའི་གསར་འགོད་པས་གསར་འགྱུར་ལྟེ་གནས་ལ་རེ་ཞུ་བྱེད་དགོས་པ་དང་། ས་གནས་ཀྱི་འཐུས་མི་ཚོགས་པ་དང་མཉམ་དུ་ཡོང་བའི་གསར་འགོད་པའི་འཐུས་མི་ཚོགས་པ་ཁག་གིས་གསར་འགྱུར་ལྟེ་གནས་ལ་རེ་ཞུ་བྱེད་དགོས་པ། ཤང་ཀང་དམིགས་བསལ་སྲིད་འཛིན་ཁུལ་གྱི་གསར་འགོད་པས་ཤང་ཀང་དམིགས་བསལ་སྲིད་འཛིན་ཁུལ་དུ་བཅའ་སྡོད་ཀྲུང་དབྱང་མི་དམངས་སྲིད་གཞུང་གི་འབྲེལ་གཏུག་གཞུང་དོན་ཁང་ལ་རེ་ཞུ་བྱེད་དགོས་པ། ཨའོ་མོན་དམིགས་བསལ་སྲིད་འཛིན་ཁུལ་གྱི་གསར་འགོད་པས་ཨའོ་མོན་དམིགས་བསལ་སྲིད་འཛིན་ཁུལ་དུ་བཅའ་སྡོད་ཀྲུང་དབྱང་མི་དམངས་སྲིད་གཞུང་གི་འབྲེལ་གཏུག་གཞུང་དོན་ཁང་ལ་རེ་ཞུ་བྱེད་དགོས་པ། ཐའེ་དབན་ས་ཁུལ་གྱི་གསར་འགོད་པས་རྒྱལ་སྲིད་སྤྱི་ཁྱབ་ཁང་ཐའེ་དབན་ལས་དོན་གཞུང་དོན་ཁང་ལ་རེ་ཞུ་བྱེད་དགོས་པ། ཕྱི་རྒྱལ་གྱི་གསར་འགོད་པས་གསར་འགྱུར་ལྟེ་གནས་ལ་རེ་ཞུ་བྱེད་དགོས་པ། གནས་སྐབས་ཀྲུང་གོར་ཡོང་མཁན་ཕྱི་རྒྱལ་གྱི་གསར་འགོད་པས་ཀྲུང་གོར་བཅའ་སྡོད་རྒྱལ་ཁབ་དེའི་གཞུང་ཚབ་ཆེ་མོ་ཁང་དང་ཁེ་སྐྱོང་ལས་ཤག་གམ་ཡང་ན་ཀྲུང་གོའི་ཕྱི་འབྲེལ་པུས་དབང་བསྐུར་བའི་མཆན་འགོད་ལས་ཁུངས་ལ་རེ་ཞུ་བྱེད་དགོས། གསར་འགོད་པའི་མིང་ཐོ་འགོད་མཚམས་འཇོག་པའི་དུས་ཚོད་ནི་ཟླ་2ཚེས་3ཉིན་ཡིན་པ་རེད།

རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་བཞི་པ་དང་རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་བཞི་པས་པེ་ཅིང་གྲོང་ཁྱེར་བསྐྱར་དར་ལམ་ཁ་པ་ཨང་11པའི་མའེ་ཏི་ཡ་ལྟེ་གནས་སུ་གསར་འགྱུར་ལྟེ་གནས་བཙུགས་ཏེ་ཀྲུང་གོ་དང་ཕྱི་རྒྱལ་གྱི་གསར་འགོད་པས་ཚོགས་འདུ་གཉིས་ལ་བཅར་འདྲིར་ཡོང་བར་སྣེ་ལེན་དང་བཀོད་སྒྲིག་གི་འགན་འཁུར་རྒྱུ་དང་། གསར་འགྱུར་ལྟེ་གནས་ཀྱིས་ཟླ་2ཚེས་27ཉིན་ནས་དངོས་སུ་ལས་དོན་སྤེལ་རྒྱུ་རེད།