ཟླ་1ཚེས་28ཉིན་གྱི་ཕྱི་དྲོར། ལྗོངས་ཡོངས་ཀྱི་ནོར་སྲིད་ལས་དོན་ཚོགས་འདུ་ལྷ་སར་འཚོགས་ཤིང་། ཚོགས་འདུའི་ཐོག་2025ལོ་དང“ལོ་ལྔ་ཚན་བཅུ་བཞི་པའི”ནོར་སྲིད་ལས་དོན་ལ་ཕྱོགས་སྡོམ་དང་། མིག་སྔའི་དཔལ་འབྱོར་དང་ནོར་སྲིད་དུས་བབ་ལ་དབྱེ་ཞིབ། 2026ལོའི་གཙོ་གནད་ལས་འགན་བཀོད་སྒྲིག་བཅས་བྱས་ཡོད། རང་སྐྱོང་ལྗོངས་ནོར་སྲིད་ཐིང་གི་ཏང་ཙུའི་ཧྲུའུ་ཅི་དང་ཐིང་ཀྲང་གཞོན་པ་དབྱིན་ལི་ཧྥུང་གིས་ལས་དོན་སྙན་ཞུ་གནང་བ་རེད།

ཚོགས་འདུའི་ཐོག་བསྟན་དོན། 2025ལོར་ལྗོངས་ཡོངས་ཀྱི་རིམ་ཁག་ནོར་སྲིད་སྡེ་ཚན་གྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལག་བསྟར་ནན་ཏན་དང་། དེ་བས་དགེ་མཚན་ལྡན་པའི་ནོར་སྲིད་སྲིད་ཇུས་ཕྱོགས་ཡོངས་ནས་དོན་འཁྱོལ། རང་སྐྱོང་ལྗོངས་ཀྱི་འཐབ་ཇུས་ལས་འགན་གལ་ཆེན་ལ་ནུས་ཤུགས་ཡོད་རྒུས་འགན་ལེན། སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་མུ་མཐུད་བྱས་པར་བརྟེན་ནོར་སྲིད་སྒྱུར་བཅོས་འཕེལ་རྒྱས་ཀྱི་ལས་དོན་ཁག་ལ་གྲུབ་འབྲས་གསར་པ་ཐོབ་ཡོད་པ་སྟེ། གཅིག་ནི་ཐབས་བརྒྱ་ཇུས་སྟོང་གིས་ནོར་སྲིད་ཀྱི་ཡོང་འབབ་མང་དུ་བཏང་བ་དང་། ས་གནས་ཀྱི་ནོར་ཁུངས་འཛུགས་སྐྱོང་ལ་གྲུབ་འབྲས་མངོན་གསལ་དོད་པོ་ཐོབ་པ། ས་གནས་ཀྱི་ནོར་སྲིད་ཡོང་འབབ་སྒོར་དུང་ཕྱུར་300ཟིན་ནས་འཕར་ཚད་རྒྱལ་ཡོངས་ཀྱི་ཨང་དང་པོར་མུ་མཐུད་རྒྱུན་འཁྱོངས་ཐུབ་ཡོད། གཉིས་ནི་ཐབས་བརྒྱ་ཇུས་སྟོང་གིས་ཀྲུང་དབྱང་གི་རྒྱབ་སྐྱོར་བརྩོན་ལེན་བྱས་པ་དང་། ནོར་སྲིད་ཀྱི་འགན་ལེན་ནུས་པར་གྲུབ་འབྲས་མངོན་གསལ་དོད་པོ་ཐོབ་པ། ནོར་སྲིད་གཏོང་སྒོ་སྒོར་དུང་ཕྱུར་3000ཟིན་ནས་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཏེ་རང་སྐྱོང་ལྗོངས་ཀྱི་2025ལོ་དང“ལོ་ལྔ་ཚན་བཅུ་བཞི་པའི”དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་དང་ལས་འགན་ཕུན་སུམ་ཚོགས་པའི་ངང་ལེགས་གྲུབ་ཡོང་བར་འདེགས་སྐྱོར་ནུས་ལྡན་བྱས་ཡོད། གསུམ་ནི་སྲུང་སྐྱོང་དང་ཚོད་འཛིན་ཡོད་པའི་སྒོ་ནས་གཏོང་སྒོའི་གྲུབ་ཆ་ལེགས་སུ་བཏང་བར་བརྟེན་ནོར་སྲིད་སྲིད་ཇུས་ཀྱི་ཕན་འབྲས་མངོན་གསལ་དོད་པོ་ཐོན་ཡོད། ཏང་སྲིད་ལས་ཁུངས་ལ་ཟ་མཁས་འཐུང་མཁས་ཀྱི་གོམས་གཤིས་འཇགས་པར་བྱེད་དགོས་པའི་སྐོར་གྱི་ཏང་ཀྲུང་དབྱང་གི་བླང་བྱ་ལག་ལེན་མཐའ་གཅིག་ཏུ་བསྟར་ནས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་གལ་ཆེན་ལ་འགན་ལེན་བྱེད་པ་དང་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་བདེ་རྩ་ཆེ་རུ་གཏོང་བར་ནོར་ཤུགས་འདང་ངེས་ཐུབ་པ་བྱས་ཡོད། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་སྣོན་བརྒྱབ་སྟེ་མ་དངུལ་སྒོར་དུང་ཕྱུར་2850གྲབས་གསོག་བྱས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་གལ་ཆེན་ལ་མ་དངུལ་གྲངས་ཚང་འགན་ལེན་བྱས་ཡོད། བཞི་ནི་རྩ་ལག་མཉམ་བཅོས་བྱས་ནས་ནོར་སྲིད་ཀྱི་ཉེན་ཁ་སྔོན་འགོག་དང་ཚོད་འཛིན་བྱས་ཏེ་གསོག་འབོར་བུན་འཇལ་གྱི་གནད་དོན་ཐག་གཅོད་བྱ་རྒྱུར་གྲུབ་འབྲས་མངོན་གསལ་དོད་པོ་ཐོབ་ནས་ནོར་སྲིད་འཕེལ་རྒྱས་ཀྱི་བར་མཐོངས་རྒྱ་ཆེར་ཤུགས་ཆེན་ཕྱིན་ཡོད། རྒྱལ་ཡོངས་ཀྱི་སྔོན་དུ་རྫོང་རིམ་པའི“འགན་ལེན་གསུམ”གྱི་སྔོན་རྩིས་རིམ་སྤོར་ཞིབ་བཤེར་ཡོངས་སུ་ཐུབ་ནས་རྒྱལ་ཡོངས་ཀྱི“འགན་ལེན་གསུམ”གྱི་ཉེན་ཁ་སྔོན་འགོག་དང་ཚོད་འཛིན་བྱེད་ཡག་ཤོས་ཀྱི་ཞིང་ཆེན་ཞིག་རེད། ལྔ་ནི་འགག་སྒྲོལ་དཀའ་སེལ་བྱས་ནས་དོ་དམ་སྒྱུར་བཅོས་ལ་ཤུགས་སྣོན་བརྒྱབ་པར་བརྟེན་ནོར་སྲིད་ཀྱི་ཚན་རིག་དང་མཐུན་པའི་དོ་དམ་ལ་གྲུབ་འབྲས་མངོན་གསལ་དོད་པོ་ཐོབ་སྟེ་ནོར་སྲིད་སྒྱུར་བཅོས་ཁག་རྒྱལ་ཡོངས་ཀྱི་མདུན་གྲལ་དུ་སླེབས་ཡོད།

ཚོགས་འདུའི་ཐོག་བསྟན་དོན། 2026ལོར་རང་ལྗོངས་ཀྱིས་དེ་བས་དགེ་མཚན་ལྡན་པའི་ནོར་སྲིད་སྲིད་ཇུས་མུ་མཐུད་ལག་ལེན་བསྟར་རྒྱུ་སྟེ། གཅིག་ནས་ནོར་སྲིད་གཏོང་སྒོ་རྒྱ་ཆེར་བཏང་ནས་གཏོང་དགོས་ངེས་ཀྱི་གཏོང་སྒོར་འགན་ལེན་བྱ་རྒྱུ་དང་། གཉིས་ནས་བུན་འཛིན་སྡེབ་སྒྲིག་བྱ་ཐབས་ལེགས་སུ་བཏང་ནས་བུན་འཛིན་གྱི་ཕན་འབྲས་དེ་བས་ལེགས་པ་འདོན་རྒྱུ། གསུམ་ནས་སྤོ་སྒྱུར་གཏོང་སྤྲོད་ཀྱི་གཞི་ཁྱོན་ཆེ་རུ་བཏང་ནས་གྲོང་ཁྱེར་དང་རྫོང་གི་རང་བདག་དང་སྤྱོད་ཆོག་པའི་ནོར་ཤུགས་ཆེ་རུ་གཏོང་རྒྱུ། བཞི་ནས་གཏོང་སྒོའི་གྲུབ་ཆ་མུ་མཐུད་ལེགས་སུ་བཏང་ནས་གཙོ་གནད་ཁྱབ་ཁོངས་ཀྱི་འགན་ལེན་ལ་ཤུགས་སྣོན་རྒྱག་རྒྱུ། ལྔ་ནས་ནོར་སྲིད་དང་དངུལ་རྩའི་མཉམ་ལས་ལ་ཤུགས་སྣོན་བརྒྱབ་ནས་ནོར་སྲིད་མ་དངུལ་གྱི་འདེགས་ཤིང་གི་ཕན་འབྲས་ཆེ་རུ་གཏོང་རྒྱུ་བཅས་རེད།