འདི་ནི་སྲིད་གྲོས་ཀྱི་ཨུ་ཡོན་གྱིས་བཞུགས་གནས་ནས་ལག་ཁྱེར་དང་ཚོགས་འདུའི་དཔྱད་ཡིག་ལེན་བཞིན་པ།

འདི་ནི་མི་དམངས་འཐུས་ཚོགས་ཀྱི་འཐུས་མིས་བཞུགས་གནས་ནས་ལག་ཁྱེར་དང་ཚོགས་འདུའི་དཔྱད་ཡིག་ལེན་བཞིན་པ།

ཟླ་1ཚེས་28ཉིན། རང་སྐྱོང་ལྗོངས་ཀྱི་ཚོགས་འདུ་གཉིས་ལ་ཞུགས་མཁན་མི་དམངས་འཐུས་ཚོགས་ཀྱི་འཐུས་མི་དང་སྲིད་གྲོས་ཀྱི་ཨུ་ཡོན་སྔ་རྗེས་སུ་བཞུགས་གནས་སུ་འབྱོར་ཏེ་ཚོགས་ཆེན་ལ་འབྱོར་ཐོ་བཀོད་གནང་བ་རེད།

སྔ་དྲོའི་ཆུ་ཚོད་10ཙམ་ལ་བཞུགས་གནས་ཁག་གི་འབྱོར་ཐོ་འགོད་ཡུལ་དུ་གོ་རིམ་དང་ལྡན་ཞིང་། བྲང་ཁར་དམར་མདངས་བཀྲ་བའི་ཚོགས་ཞུགས་ལག་ཁྱེར་བཏགས་པའི་འཐུས་མི་དང་ཨུ་ཡོན་ཚོ་གོམ་སྟབས་བརྟན་ལ་སྤོབས་པ་དང་གདེང་ཚོད་ཀྱིས་ཁེངས་ཡོད།

ལྷ་ས་གསོལ་མགྲོན་ཁང་གི་འབྱོར་ཐོ་འགོད་སར་ལས་དོན་པའི་ཁྲིད་སྟོན་འོག་འཐུས་མི་ཚོས་རིམ་པ་བཞིན་མིང་ཐོ་འགོད་བཞིན་མཆིས།

“སེམས་འགུལ་ཚད་མེད་ཐེབས་ཀྱི་འདུག་ལ་ཕྲག་ཐོག་གི་འགན་འཁྲི་ལྕི་པོ་ཡོད་པའང་ཚོར་གྱི་འདུག”ཅེས་ནག་ཆུ་གྲོང་ཁྱེར་ནས་ཡིན་པའི་འཐུས་མི་རྒྱལ་བསྟན་སྔ་ས་ནས་ལྷ་ས་གསོལ་མགྲོན་ཁང་དུ་ཕེབས་འབྱོར་ཟིན་པ་རེད། ད་ལོ་ཁོང་གིས་གྲ་སྒྲིག་གནང་བའི་གྲོས་འགོས་ཡུལ་དེ་གའི་སློབ་ཆེན་སློབ་མའི་ལས་གཏོད་རྣམ་གྲངས་དང་ཚན་རྩལ་གྱིས་མཐུན་རྐྱེན་སྦྱོར་བར་མཉམ་དུ་སྐུལ་འདེད་གཏོང་བར་དམིགས་ཡོད། “ང་ཚོས་གྲངས་འཛིན་དཔལ་འབྱོར་གྱི་གོ་སྐབས་དང་བསྟུན་ནས་ལས་སྟེགས་ཏན་ཏན་ཏིག་ཏིག་བསྐྲུན་ཏེ་ཐབས་ཤེས་ཡག་པོ་དོན་ཐོག་ཏུ་འཁྱོལ་ཐུབ་པ་བྱེད་དགོས”

ལྷ་ས་གནས་མཆོག་ཀྲོའུ་ཅི་གསོལ་མགྲོན་ཁང་ཆེ་མོར་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་ཚོས་གོ་རིམ་ལྡན་པའི་ངང་འབྱོར་ཐོ་འགོད་བཞིན་ཡོད། ཨུ་ཡོན་ཚོས་སྙིང་སྟོབས་རབ་ཏུ་འཕེལ་ཞིང་སྤྲོ་སེམས་ཆེན་པོས་རང་རང་སོ་སོས་འཁྱེར་བའི་གྲོས་གཞིའི་སྐོར་ལ་གྲོས་བསྡུར་གནང་བཞིན་ཡོད་པ་རེད།

ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་སློབ་ཆུང་ནས་ཡིན་པའི་རང་སྐྱོང་ལྗོངས་སྲིད་གྲོས་ཀྱི་ཨུ་ཡོན་དགྲ་འདུལ་གྱིས“ད་རེས་ཀྱི་ཚོགས་འདུར་ངས་གྲོས་གཞི་གསུམ་གྲ་སྒྲིག་བྱས་པའི་ནང་དོན་བསླབ་གཞི་སྡེབ་སྐྱེལ་ལམ་སྲོལ་ལེགས་སུ་གཏོང་བ་དང་། བོད་ཀྱི་དྲ་རྒྱའི་བར་མཐོངས་ཡག་ཏུ་གཏོང་བ། ལྗོངས་ཡོངས་ཀྱི་བུ་བཅོལ་ཁང་དང་སློབ་གྲྭ་འབྲིང་ཆུང་གི་དགེ་རྒན་གྱི་གོ་མིང་དཔྱད་ཞིབ་ལམ་སྲོལ་འཐུས་སྒོ་ཚང་དུ་གཏོང་བ་བཅས་དང་འབྲེལ་བ་ཡོད། མང་ཚོགས་ཀྱིས་དོ་ཁུར་བྱེད་བཞིན་པའི་གནད་དོན་འདི་དག་ཐག་གཅོད་བྱེད་པར་སྐུལ་འདེད་གཏོང་རྒྱུ་ནི་ང་རང་དགེ་རྒན་ཞིག་ཡིན་པའི་ལས་རིགས་ཀྱི་འགན་འཁྲི་རེད་ལ་སྲིད་གྲོས་ཨུ་ཡོན་ཞིག་གི་འགན་འཁྲི་འཁུར་སེམས་དེ་བས་ཀྱང་ཡིན”ཞེས་གསུངས།

ཚོགས་འདུ་གཟབ་རྒྱས་འཚོག་ཉེར་ཡོད་པའི་སྐབས་སུ་འཐུས་མི་དང་ཨུ་ཡོན་རྣམས་ཀྱིས་འགན་སྒྲུབ་ཀྱི་སྤྲོ་སེམས་འཕེལ་བ་དང་། ཐབས་འདོན་ཇུས་འབུལ་ནན་ཏན་བྱེད་པ། འཕེལ་རྒྱས་ཀྱི་ཇུས་བཟང་མཉམ་གྲོས་བཅས་བྱས་ཏེ་གཞི་རིམ་གྱི་བསམ་འདུན་དང་དམངས་འཚོའི་རེ་སྒུག་དེ་འཕེལ་རྒྱས་ཀྱི་འཆར་འགོད་ནང་བཅུག་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཆེད་བློ་གྲོས་དང་སྟོབས་ཤུགས་གཅིག་ཏུ་སྒྲིལ་ངེས་རེད།