འདི་ནི་དིང་རི་རྫོང་གྲམ་མཚོ་ཤང་ཆ་ཚང་སློབ་ཆུང་གི་བསྐྱར་སྐྲུན་ལས་ཡུལ་ཡིན་པ།

 གསར་འགོད་པས་གཞིས་རྩེ་གྲོང་ཁྱེར་སློབ་གསོ་ཅུས་ནས་ཤེས་རྟོགས་བྱས་པར། དིང་རིར་ས་ཡོམ་བརྒྱབ་རྗེས་ཀྱི་སློབ་གྲྭའི་སླར་གསོ་བསྐྱར་སྐྲུན་ལས་དོན་ལ་དུས་མཚམས་རང་བཞིན་གྱི་གྲུབ་འབྲས་ཐོབ་པ་དང་། མིག་སྔར་སློབ་གྲྭ་ཁག་114ཡི་ཉམས་གསོ་བརྟན་གཏོང་ལས་གྲྭ་ཚང་མ་ལེགས་གྲུབ་ཟིན་ནས་སྤྱོད་འགོ་ཚུགས་པ་དང་། སློབ་གྲྭ་ཁག་6གི་འཛུགས་སྐྲུན་བསྐྱར་སྐྲུན་རྣམ་གྲངས་ཀྱི་ལས་གྲྭ་གཙོ་བོའི་འཛུགས་སྐྲུན་ལེགས་གྲུབ་ཟིན་ནས། ད་ལོའི་སྟོན་དུས་ཀྱི་སློབ་འགོ་ཚུགས་སྐབས་སྤྱོད་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། ཀྲུང་དབྱང་གི་སྔོན་རྩིས་ནང་སློབ་གྲྭ་120ལ་གེགས་རྗེས་སླར་གསོ་བསྐྱར་སྐྲུན་བྱེད་པའི་རྣམ་གྲངས་ཀྱི་ཆོག་མཆན་ཐོབ་པ་དང་དེའི་ནང་སློབ་གྲྭ་6གི་སྐྲུན་དངོས་ཁག་གཅིག་གི་བསྐྱར་སྐྲུན་གཞི་ཁྱོན་སྨི་ངོས་གྲུ་ཁྲི་4.13དང་སློབ་གྲྭ་114ཡི་ཉམས་གསོ་བརྟན་གཏོང་གི་གཞི་ཁྱོན་སྨི་ངོས་གྲུ་ཁྲི་34.41ཟིན་ཡོད།

ཉིན་ཤས་གོང་། དིང་རི་རྫོང་གྲམ་མཚོ་ཤང་ཆ་ཚང་སློབ་ཆུང་དུ་སྐྲུན་དངོས་མང་པོ་ཞིག་ལ་བདེ་འཇགས་འགོག་སྲུང་དྲ་བ་ལྗང་ཁུ་བཀབ་པ་དང་ལྕགས་སྒྲོམ་བསླངས་ཡོད་པ་དང་། བདེ་འཇགས་མཚོན་རྟགས་གསལ་ཞིང་འགོག་སྲུང་བྱེད་ཐབས་ཆ་ཚང་བ་དང་རྒྱུ་ཆ་གྲལ་འགྲིག་པོས་བཞག་ཡོད་པ་གསར་འགོད་པས་མཐོང་བྱུང་། དིང་རི་རྫོང་སློབ་གསོ་ཅུས་ཀྱི་ལས་དོན་པས་ངོ་སྤྲོད་བྱས་དོན། དིང་རི་རྫོང་གྲམ་མཚོ་ཤང་སློབ་ཆུང་ལ་ཕྱོགས་བསྡུས་སློབ་ཁྲིད་ཐོག་ཁང་དང་། སློབ་ཁྲིད་རམ་འདེགས་ཁང་པ། ལས་བཟོའི་ཉལ་ཁང་སོགས་གསར་པ་བསྐྲུན་རྒྱུ་དང་། སློབ་མའི་ཉལ་ཁང་དང་། ཟ་ཁང་། ཐོག་ཡོད་ལུས་རྩལ་ཐང་སོགས་ད་ཡོད་སྐྲུན་དངོས་ཉམས་གསོ་དང་བརྟན་དུ་གཏོང་རྒྱུ་ཡིན་ཞིང་། དེ་དག་བསྐྲུན་ཟིན་རྗེས་སློབ་གྲྭའི་ཁང་པའི་ཡོམ་འགོག་ནུས་པ་ཆེ་རུ་ཕྱིན་ནས་སློབ་གྲྭའི་བདེ་འཇགས་ལ་ཡུན་རིང་འགན་སྲུང་ཐུབ་རྒྱུ་མ་ཟད། སློབ་གཉེར་ཆ་རྐྱེན་ལེགས་སུ་ཆེས་ཆེར་ཕྱིན་ནས་དགེ་སློབ་ཀྱི་སློབ་སྦྱོང་དང་འཚོ་བའི་བདེ་འཇགས་ལའང་འགན་སྲུང་ཐུབ་རྒྱུ་རེད།