ཉེ་ཆར། ལྷ་ས་གྲོང་ཁྱེར་ཕུ་མདོ་ཆུ་འདྲེན་ལས་གྲྭའི་རྔ་ཆེན་ཆུ་ཕུག་བདེ་འཇགས་ངང་ཏལ་འབིགས་གནད་སྨིན་ཐུབ་ནས། ལས་གྲྭའི་མདོང་ལམ་ཧྲིལ་པོར་ཆུ་གཏོང་ཐུབ་པར་རྨང་གཞི་བརྟན་པོ་ཞིག་བཏིང་ཡོད།

ཤེས་རྟོགས་བྱུང་བར་གཞིགས་ན། རྔ་ཆེན་ཆུ་ཕུག་གི་སྤྱིའི་རིང་ཚད་ལ་སྨི་5036ཡོད་པ་དང་གཞོགས་གཉིས་ནས་བསྔོགས་ཡོད། ཨར་ལས་བྱེད་རིང་རྣམ་གྲངས་ཚོགས་པས་ཚན་རིག་དང་མཐུན་པའི་སྒྲིག་འཛུགས་དང་དོ་དམ་ཚགས་ཚུད་པོ་བྱས་ཏེ་ས་གཤིས་ཀྱི་དཀའ་གནད་མང་པོ་ཁྱད་དུ་བསད་ཡོད། མིག་སྔར་རྔ་ཆེན་ཆུ་ཕུག་ཏུ་ཨར་འདམ་འདིང་བཞིན་ཡོད་པ་དང་འཛུགས་སྐྲུན་ནང་ཞུགས་མཁན་ཕྱོགས་ཁག་གིས་གོམ་སྟབས་རྗེས་མའི་ལས་དོན་ལ་སྐུལ་འདེད་ཧུར་ཐག་གཏོང་བཞིན་ཡོད་པ་རེད།

རྣམ་གྲངས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར། ལྷ་ས་གྲོང་ཁྱེར་ཕུ་མདོ་ཆུ་འདྲེན་ལས་གྲྭ་ནི་བོད་རང་སྐྱོང་ལྗོངས་ཀྱི“ལོ་ལྔ་ཚན་བཅུ་བཞི་པའི”རིང་གི་འཆར་འགོད་འཛུགས་སྐྲུན་གྱི་ཆུ་བེད་ལས་གྲྭ་གཙོ་བོ་ཞིག་རེད། ཆུ་འདྲེན་མདོང་ལམ་གྱི་སྤྱིའི་རིང་ཚད་ལ་སྤྱི་ལེ་51.7ཙམ་ཟིན་པ་དང་། ལོར་ཆུ་མཁོ་འདོན་བྱེད་ཚད་སྨི་རྒྱ་དཔངས་གྲུ་བཞི་དུང་ཕྱུར་1.42ཇུས་འགོད་བྱས་ཡོད། ལས་གྲྭ་བསྐྲུན་རྗེས། ལྷ་ས་གྲོང་ཁྱེར་གྱི་ལྟེ་བའི་གྲོང་ཁུལ་གྱི་ཆུ་ཁ་ཐང་བའི་གནད་དོན་ཞི་ལྷོད་དུ་གཏོང་ཐུབ་པ་དང་། གྲོང་ཁྱེར་གྱི་ཆུ་མཁོ་འདོན་བདེ་འཇགས་ལ་འགན་ལེན་གང་ལེགས་ཐུབ་པ། ལྷུན་གྲུབ་རྫོང་གྲོང་ཁུལ་ལ་འཕྲལ་སྡོམ་གྲབས་སྤྱོད་ཆུ་མཁོ་འདོན་ཐུབ་པ་བཅས་བྱུང་ནས། ལྷ་སའི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་དང་ཁུལ་ཁོངས་ཀྱི་ཆུའི་སྐྱེ་ཁམས་ཁོར་ཡུག་ལེགས་སུ་འགྲོ་བར་དོན་སྙིང་གལ་ཆེན་ལྡན་ཡོད་པ་རེད།