ཀུའེ་ཀྲོའུ་ཞིང་ཆེན་གྱི་རྫོང་རིམ་པའི་གྲངས་གཞི་ཆེན་པོའི་ཐོན་ལས་གླིང་དང་པོ་ཞིག་ཡིན་པའི་ངོས་ནས། 2025ལོར“བྱ་བརྒྱ་གཙང་པོ་གྲངས་འཛིན་གྲོང་རྡལ་ཆུང་ངུའི”ལོ་རེའི་ཐོན་རྫས་རིན་ཐང་སྒོར་དུང་ཕྱུར་4.5ཟིན་པ་དང་གྲངས་འཛིན་ཤེས་ལྡན་པ་3000ལྷག་ཙམ་གསོ་སྐྱོང་བྱས་ཤིང་། མིག་སྔར་ཚན་རྩལ་ཆུ་ཚད་ནུས་ཤུགས་ཡོད་རྒུས་མཐོ་རུ་གཏོང་བ་དང་དེ་བཞིན་ཐོན་ཁུངས་གཅིག་སྡུད་དང་ཁྱབ་འགྱེད་སྐུལ་ཁྲིད་ནུས་པ་ཆེ་རུ་གཏོང་བཞིན་ཡོད།

གྲངས་གཞིའི་ཟུར་མཆན་ཐོན་ལས་དེ་ཚད་འགག་སྒྲོལ་སར་བྱས་ཏེ། ཀུའེ་ཀྲོའུ་ཡིས་གྲངས་གཞི་འཚོལ་བསྡུ་དང་། ཟུར་མཆན། ཉོ་ཚོང་། བཀོལ་སྤྱོད་བཅས་ལ་ཁྱབ་པའི་ཐོན་ལས་འཁོར་འབྲེལ་ཧྲིལ་པོའི་སྐྱེ་ཁམས་མགྱོགས་མྱུར་འཛུགས་སྐྱོང་བྱས་ཤིང་། 2025ལོར་ཀུའེ་ཀྲོའུ་ཡི་གྲངས་རིག་ཐོན་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་2800ལས་བརྒལ་བ་དང“ལོ་ལྔ་ཚན་བཅུ་བཞི་པའི”རིང་ལོ་རེར་ཆ་སྙོམས་འཕར་ཚད་16%ལས་བརྒལ་ཡོད།

2025ལོའི་ཟླ་3པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀུའེ་ཀྲོའུ་རུ་རྟོག་ཞིབ་གནང་སྐབས“གྲངས་འཛིན་དཔལ་འབྱོར་དང་ནུས་རྒྱུ་གསར་པ་སོགས་ཀྱི་ཐོན་ལས་སྟོབས་ཆེར་གཏོང་དགོས”ཞེས་ནན་བཤད་གནང་ཡོད། 2021ལོའི་ཟླ་2པར་དཔྱིད་གསར་དུས་ཆེན་གྱི་སྔ་ནུབ་ཏུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀུའེ་ཀྲོའུ་རུ་ཕེབས་ནས་མི་རིགས་ཁག་གི་ལས་བྱེད་པ་དང་མང་ཚོགས་ལ་འཚམས་འདྲི་གནང་བ་མ་ཟད། ཀུའེ་ཀྲོའུ་ཡིས“གྲངས་འཛིན་དཔལ་འབྱོར་གྱི་འཐབ་ཇུས་ལག་བསྟར་བྱེད་པའི་ཐད་གོ་སྐབས་གསར་པ་བརྩོན་ལེན་བྱེད་དགོས་པའི”ཐུགས་རེའང་གནང་བ་རེད།

ཀུའེ་ཀྲོའུ་ཡིས་རྩིས་ནུས་དང་། གྲངས་གཞི། བཀོལ་སྤྱོད། ཐོན་ལས་བཅས་མཉམ་འགུལ་མཐའ་འཁྱོངས་བྱས་ཏེ་གྲངས་རིག་ཐོན་ལས་ཚོ་འདུས་རྒྱ་ཆེར་གཏོང་བ་དང་གྲངས་འཛིན་དཔལ་འབྱོར་འཕེལ་རྒྱས་ཀྱི་གསར་གཏོད་ཁུལ་འཛུགས་སྐྲུན་ལ་སྐུལ་འདེད་ཏན་ཏིག་བཏང་ཡོད། “ལོ་ལྔ་ཚན་བཅོ་ལྔ་པའི”རིང་། ཀུའེ་ཀྲོའུ་ཡིས་རིག་རྩིས་གཙོ་གནད་དུ་བྱས་ཏེ་རྩིས་ནུས་ཐོན་ལས་འཕེལ་རྒྱས་བཏང་ནས“ཤར་གྲངས་ནུབ་རྩིས”ཀྱི་འདུ་འགོད་ལག་བསྟར་གཏིང་ཟབ་བྱེད་པ་དང་། སྤུས་ཚད་མཐོ་བའི་གྲངས་གཞི་ཕྱོགས་བསྒྲིགས་བྱ་རྒྱུ་གཙོ་གནད་དུ་བཟུང་ནས་གྲངས་གཞིའི་ཐོན་ལས་འཕེལ་རྒྱས་གཏོང་བ་དང་གྲངས་འཛིན་ཟུར་མཆན་ཐོན་ལས་འཕེལ་རྒྱས་དང་སྟོབས་ཆེར་གཏོང་བ། ལས་རིགས་ཀྱི་དཔེ་དབྱིབས་ཆེན་པོ་གཙོ་གནད་དུ་བཟུང་ནས་མི་ཐབས་རིག་ནུས་ཐོན་ལས་འཕེལ་རྒྱས་བཏང་སྟེ་ལས་རིགས་མང་པོར་མཐུན་རྐྱེན་སྔར་ལས་ལྷག་པ་སྦྱོར་རྒྱུ་རེད།

རྩིས་ནུས་ཀྱི་རྨང་གཞི་བརྟན་དུ་བཏང་ནས་རྩིས་ནུས་ཀྱི་རིན་ཐང་མངོན་པར་བྱས་པ།

ཀུའེ་ཀྲོའུ་གྲངས་གཞི་ཆེན་པོ་ཚོགས་པའི་རྒྱལ་ཡོངས་གཞི་གཅིག་ཅན་གྱི་རྩིས་ནུས་དྲ་རྒྱའི་རྒྱལ་ཁབ(ཀུའེ་ཀྲོའུ)ལྟེ་བའི་སྦྲེལ་ཚིགས་བཀོད་གཏོང་ལས་སྟེགས་སུ་སྐྱོད་སྐབས། འཆར་ཤེལ་ཆེན་པོའི་ཐོག་གྲངས་གཞི་སྣ་ཚོགས་མངོན་པ་དང་། རྩིས་ནུས་བཀོད་གཏོང་དང་འཁོར་རྒྱུག་ཐད་ཀར་མངོན་གྱི་ཡོད།

ཐོན་ཁུངས་སྡེབ་སྒྲིལ་བྱས་ནས་མཁོ་སྤྲོད་ཕྱོགས་གཉིས་ཀྱི་ནུས་ཆེའི་སྙོམས་སྒྲིག་ལ་སྐུལ་འདེད་བཏང་སྟེ་རྩིས་ནུས་ས་ཁོངས་དང་། ལས་སྒོ ལས་སྟེགས་བཅས་ལས་བརྒལ་བའི་གཅིག་སྡུད་དང་ནུས་ཆེའི་བཀོད་གཏོང་མངོན་འགྱུར་བྱུང་ཞིང་། 2025ལོའི་ལོ་མཇུག་བར་བཀོད་གཏོང་ལས་སྟེགས་ཀྱི་ཐོ་འགོད་ཉོ་ཚོང་བྱེད་ཚད་རིམ་རྩིས་བརྒྱབ་ན་སྒོར་དུང་ཕྱུར་258.5ཟིན་ཡོད།

སྒོར་དུང་ཕྱུར་31གི་རྣམ་གྲངས་དེ་རྩིས་ནུས་ལྟེ་གནས་ཀྱི་རྣམ་གྲངས་མཛོད་ནང་བཅུག་ནས་སྐྲུན་བཞིན་པའི་རྩིས་ནུས་རྣམ་གྲངས་ལ“གཅིག་གཏད་གཅིག”གི་གནད་སྨིན་ཞབས་འདེགས་ཞུས་པ་དང་། ལོ་རེ་བཞིན་རྩིས་ནུས་འཛིན་ཤོག་མུ་མཐུད་སྤྲད་ནས་ཁེ་ལས་ཀྱི་རྩིས་ནུས་སྤྱོད་པའི་མ་གནས་དམའ་རུ་གཏོང་རྩིས་ཡོད། ཀུའེ་ཀྲོའུ་ཡིས་རྒྱལ་ཡོངས་ལ་ཕྱོགས་པའི་རྩིས་ནུས་འགན་སྲུང་རྟེན་གཞི་མགྱོགས་མྱུར་སྐྲུན་གྱི་ཡོད་པ་རེད།

གྲངས་རིག་གི་མཐུན་རྐྱེན་སྦྱོར་ཚད་ཟབ་ཏུ་བཏང་ནས་བཀོལ་སྤྱོད་རྣམ་པ་གསར་སྤེལ་བྱས་པ།

ལོ་མང་རིང་འཛུགས་སྐྲུན་བྱས་པ་བརྒྱུད། མིག་སྔར་ཀུའེ་ཀྲོའུ་ཡིས་རྒྱལ་ནང་གི་གྲོང་ཁྱེར་གཙོ་བོ་42དབར་དྲ་རྒྱ་ཐད་སྦྲེལ་མངོན་འགྱུར་བྱུང་ནས་གོ་ལ་ཧྲིལ་པོའི་400Ｇརྩིས་ནུས་བགྲོད་ལམ་དང་པོ་བསྐྲུན་ཏེ་བེད་སྤྱོད་གཏོང་གི་ཡོད་པ་རེད།

གྲངས་གཞི་དང་རྩིས་ནུས་ཀྱི་ལེགས་ཆར་བརྟེན་ནས་ཀུའེ་ཀྲོའུ་ཡིས“མི་ཐབས་རིག་ནུས+”བྱ་སྤྱོད་ཕྱོགས་ཡོངས་ནས་ལག་བསྟར་བྱེད་བཞིན་ཡོད་ཅིང་། “དཔེ་དབྱིབས་བརྒྱ་དང་རྣམ་པ་སྟོང”གི་འཆར་གཞི་བཏོན་པས། གཙོ་གནད་ཐོན་ལས་ཁྱབ་ཁོངས་24ནང་དཔེ་དབྱིབས་ཆེན་པོའི་བཀོལ་སྤྱོད་རྣམ་པ་110གྲུབ་པ་དང་། མི་ཐབས་རིག་ནུས་ཀྱི་ལྟེ་བའི་ཐོན་ལས་ཀྱི་གཞི་ཁྱོན་སྒོར་དུང་ཕྱུར་240ཟིན་ཡོད།

“ང་ཚོས་གླིང་ཁུལ་དོ་དམ་གྱི་མི་ཐབས་རིག་ནུས་དཔེ་དབྱིབས་ཆེན་པོ་བཟོས་ནས་སྡེ་ཚན་ལས་བརྒལ་བའི་མཐུན་སྦྱོར་མངོན་འགྱུར་བྱས་ཏེ་གླིང་ཁུལ་གྱི་ཐོན་ནུས་ལྡབ་འཕར་དང་། རླངས་འཁོར་དང་ཚོང་ཟོག་སྙོམ་སྒྲིག་བྱེད་ཚད་20%མཐོ་རུ་འགྲོ་བ། ཕྱོགས་བསྡུས་གཉེར་སྐྱོང་ལས་ཆོད་30%མཐོ་རུ་འགྲོ་བ་བཅས་ཀྱི་ཐད་རམ་འདེགས་བྱས་ཡོད”ཅེས་ཀྲུང་གོ་ཚན་རྩལ་ཧྥུ་ཁྲོང(ཀུའེ་ཀྲོའུ)རིག་ནུས་ལག་རྩལ་ཚད་ཡོད་ཀུང་སིའི་སྤྱི་ཁྱབ་ཅིང་ལི་གཞོན་པ་ལིའུ་ལེ་ཡིས་ངོ་སྤྲོད་བྱས།

ཕྱིས་སུ་ཀུའེ་ཀྲོའུ་ཡིས་བཀོལ་སྤྱོད་རྣམ་པ་1000ལྷག་བཏོད་དེ་སྤུས་ཚད་མཐོ་བའི་གྲངས་གཞི་ཕྱོགས་བསྡུས་འཛུགས་སྐྲུན་དང་། ཐོན་ལས་སྐྱེ་ཁམས་གསོ་སྐྱོང་། མི་ཐབས་རིག་ནུས་ཀྱི་མཐུན་རྐྱེན་སྦྱོར་བའི་འགྲན་ལམ་གསར་པ་བརྩོན་ལེན་ཧུར་ཐག་བྱ་རྒྱུ་རེད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་བཅངས་ཏེ། ཀུའེ་ཀྲོའུ་ཡིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་བཏང་སྟེ། གྲངས་འཛིན་དཔལ་འབྱོར་སྟོབས་ཆེ་དང་སྤུས་ལེགས་ཡོང་བར་སྐུལ་འདེད་ཀྱིས‘གྲངས་རིག་ཀུའེ་ཀྲོའུ’འཛུགས་སྐྱོང་ལ་སྣེ་ཁྲིད་དང་འདེགས་སྐྱོར་བྱས་ཏེ། ནུས་ཤུགས་ཡོད་རྒུས‘ལོ་ལྔ་ཚན་བཅོ་ལྔ་པའི’འགོ་ཡག་པོ་འཛུགས་ཐུབ་པ་བྱ་རྒྱུ་ཡིན”ཞེས་ཀུའེ་ཀྲོའུ་ཞིང་ཨུད་ཀྱི་ཧྲུའུ་ཅི་ཞུས་ལིན་གྱིས་བརྗོད་པ་རེད།