དཔྱིད་གསར་སྐྱེལ་འདྲེན་རིང་བསྐུར་སྐྱེལ་ཞབས་ཞུའི་འགན་ལེན་ལས་དོན་གྱི་ཇུས་གཞི་ཁྱབ་བསྒྲགས་བྱས་པ།
མྱུར་སྐྱེལ་བའི་ངལ་གསོ་དང་གུང་གསེང་སོགས་ཁྲིམས་མཐུན་ཁེ་དབང་ལ་འགན་ལེན་ཏན་ཏིག་བྱ་རྒྱུ་ཡིན་པ།
ཉེ་ཆར། རྒྱལ་ཁབ་སྦྲག་སྲིད་ཅུས་ཀྱིས《2026ལོའི་དཔྱིད་གསར་སྐྱེལ་འདྲེན་རིང་གི་བསྐུར་སྐྱེལ་ཞབས་ཞུའི་འགན་ལེན་ལས་དོན་གྱི་ཇུས་གཞི》བཀྲམ་ནས་མི་དམངས་མང་ཚོགས་ཀྱི་བསྐུར་སྐྱེལ་དགོས་མཁོ་སྐོང་རྒྱུ་དང་མྱུར་སྐྱེལ་བའི་ཁྲིམས་མཐུན་ཁེ་དབང་སྤྱི་འདོམས་ངང་འགན་ལེན་བྱས་ནས་2026ལོའི་དཔྱིད་གསར་སྐྱེལ་འདྲེན་རིང་གི་བསྐུར་སྐྱེལ་ཞབས་ཞུའི་འགན་ལེན་གྱི་ལས་དོན་ཏན་ཏིག་ལེགས་སྒྲུབ་བྱེད་དགོས་ཞེས་ནན་བཤད་བྱས་པ་རེད།
ཇུས་གཞིའི་ནང་བསྟན་དོན། དཔྱིད་གསར་དུས་ཆེན་གྱི་གུང་གསེང་རིང་གཞི་རྩའི་བསྐུར་སྐྱེལ་ཞབས་ཞུའི་དགོས་མཁོ་འགན་ལེན་ནུས་ལྡན་བྱེད་དགོས་པ་དང་། དུས་ཆེན་རྗེས་ཀྱི་ལས་རིགས་ཀྱི་ཐོན་སྐྱེད་འཁོར་རྒྱུག་སླར་གསོ་ཡོང་བར་གོ་རིམ་ལྡན་པའི་སྒྲིག་འཛུགས་བྱེད་དགོས། སྦྲག་སྲིད་ཁེ་ལས་དང་མྱུར་སྐྱེལ་ཁེ་ལས་ཀྱིས་དུས་ཆེན་གོང་མི་དམངས་མང་ཚོགས་ཀྱི་ལོ་གསར་ཉོ་སྒྲུབ་ཀྱི་དགོས་མཁོར་དམིགས་ཏེ་དུས་ཐོག་ཏུ་བསྡུ་ལེན་བྱེད་པ་དང་འབྲེལ། ཁ་ཆད་ལྟར་བསྐུར་སྐྱེལ་ཞབས་ཞུ་སྒྲུབ་དགོས། ཀྲུང་གོ་སྦྲག་སྲིད་ཚོགས་པ་ཚད་ཡོད་ཀུང་སིས་སྦྲག་སྲིད་ཀྱི་ཡོངས་ཁྱབ་ཞབས་ཞུ་རྒྱུན་མཐུད་བྱ་རྒྱུའི་འགན་ལེན་བྱེད་དགོས། མྱུར་སྐྱེལ་ཁེ་ལས་ཁག་གིས་ལས་སྒོའི་གྲངས་འབོར་གྱི་འགྱུར་ལྡོག་ལ་ཚན་རིག་དང་མཐུན་པའི་སྒོ་ནས་སྔོན་དཔག་བྱས་ཏེ་དཔྱིད་གསར་དུས་ཆེན་གྱི་གུང་གསེང་རིང་གཉེར་སྐྱོང་འཆར་གཞི་ལུགས་མཐུན་ངང་བཟོས་ནས་སྤྱི་ཚོགས་ལ་ཞབས་ཞུའི་དུས་ཚོད་དང་ཞབས་ཞུའི་ས་ཁོངས་སྔ་སྣུར་དུ་སྤྱི་བསྒྲགས་དང་ཁྱབ་བསྒྲགས་བྱེད་པ་དང་འབྲེལ། སྤྱི་བསྒྲགས་དང་ཁྱབ་བསྒྲགས་ཀྱི་ཆ་འཕྲིན་གཞིར་བཟུང་ཞབས་ཞུ་ཧུར་ཐག་བསྒྲུབས་ཏེ་དཔྱིད་གསར་དུས་ཆེན་གྱི་གུང་གསེང་རིང་གཞི་རྩའི་བསྐུར་སྐྱེལ་ཞབས་ཞུའི་དགོས་མཁོ་སྐོང་དགོས།
ཇུས་གཞིའི་ནང་ཁ་གསལ་བཏོན་དོན། མྱུར་སྐྱེལ་བའི་དཔྱིད་གསར་སྐྱེལ་འདྲེན་རིང་གི་ངལ་གསོ་དང་གུང་གསེང་སོགས་ཁྲིམས་མཐུན་ཁེ་དབང་ལ་འགན་ལེན་བྱེད་པ་དང་། ལས་དོན་པའི་གླ་ཆ་དུས་ཐོག་ཏུ་སྤྲོད་པ། མྱུར་སྐྱེལ་བའི་རེ་འདུན་བརྡ་སློག་གི་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ནས་མྱུར་སྐྱེལ་བའི་ཁྲིམས་མཐུན་ཁེ་དབང་ལ་འགན་ལེན་ཏན་ཏིག་བྱེད་དགོས། སྦྲག་སྲིད་ཁེ་ལས་དང་མྱུར་སྐྱེལ་ཁེ་ལས་ཀྱིས་ལས་འབོར་འགྱུར་ལྡོག་དང་མྱུར་སྐྱེལ་བ་མི་སྒེར་གྱི་འདོད་མོས་ལ་གཞིགས་ནས་འཚང་གཡོལ་ངང་ངལ་གསོ་འཇོག་པ་དང་ངལ་གསོ་ལེགས་སྒྲིག་བྱེད་དགོས། ཁག་ཐེག་དངུལ་དང་། གྲོན་དངུལ་བཀག་ཉར། དཔྱད་ཞིབ་མ་དངུལ་ཕྱིར་སློག་སོགས་ཀྱི་རྣམ་པའི་ཐོག་ནས་མྱུར་སྐྱེལ་བར་ལས་གནས་སུ་ལས་རེས་བྱེད་དུ་འཇུག་པའམ་ཡང་ན་དུས་ཆེན་རྗེས་ལས་གནས་སུ་ལོག་དགོས་པའི་བཙན་ཤེད་བླང་བྱ་འདོན་མི་ཆོག དཔྱིད་གསར་དུས་ཆེན་གྱི་གུང་གསེང་རིང་ལས་གནས་སུ་བསྡད་ནས་ལས་སྣོན་བྱས་པའི་མྱུར་སྐྱེལ་བར་དུས་ཐོག་ཏུ་ལས་སྣོན་གླ་ཆ་དང་དུས་ཆེན་གྱི་ཁ་གསབ་མ་དངུལ་གྲངས་ཚང་ངང་སྤྲོད་དགོས་པ་དང་ལས་གནས་སུ་བསྡད་ནས་ལོ་གསར་གཏོང་མཁན་ལས་བཟོའི་བཟའ་བཏུང་དང་། ཞག་སྡོད། སྨན་བཅོས་སོགས་ཀྱི་ཞབས་ཞུ་འགན་ལེན་ཧུར་ཐག་བྱེད་དགོས། མྱུར་སྐྱེལ་བའི་ངལ་རྩོལ་གྱི་གླ་ཆ་དུས་ཐོག་ཏུ་གཙང་འཇལ་བྱས་ཏེ་གླ་ཆ་དང་མངགས་སྐྱེལ་གྲོན་དངུལ་འགྱངས་ཆད་བྱེད་སྤྱོད་གཏན་འགོག་བྱེད་པ་དང་ཁྲིམས་ལྟར་མྱུར་སྐྱེལ་བའི་ངལ་རྩོལ་ཐོབ་ཆ་འགན་ལེན་བྱེད་དགོས།
འབྲེལ་ཡོད་གསར་འགྱུར།