ཀྲུང་དབྱང་སྒྲིག་ཨུད་རྒྱལ་ཁབ་ལྟ་ཞིབ་ཨུ་ལྷན་གྱིས།
མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་ལ་གཅིག་སྡུད་བཅོས་སྒྲིག་བྱེད་པའི་ལས་དོན་ལ་སླར་ཡང་སྐུལ་སློང་དང་བཀོད་སྒྲིག་བྱས་པ།
ཟླ་1ཚེས་26ཉིན། ཀྲུང་དབྱང་སྒྲིག་ཨུད་རྒྱལ་ཁབ་ལྟ་ཞིབ་ཨུ་ལྷན་གྱིས་ཚོགས་འདུ་འཚོགས་ནས། 2025ལོའི་མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་གནད་དོན་ལ་གཅིག་སྡུད་བཅོས་སྒྲིག་བྱེད་པའི་ལས་དོན་ལ་ཕྱོགས་སྡོམ་དང་། སྔོན་ཐོན་ཚན་པ་དང་མི་སྒེར་ལ་གཟེངས་བསྟོད། 2026ལོའི་ལས་འགན་བཀོད་སྒྲིག་བཅས་བྱས་པ་རེད། ཀྲུང་གུང་ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི་དང་ཀྲུང་དབྱང་སྒྲིག་ཨུད་ཀྱི་ཧྲུའུ་ཅི་གཞོན་པ་ལིའུ་ཅིན་གོ་ཚོགས་འདུར་ཞུགས་ནས་གསུང་བཤད་གནང་ཞིང་། ཁོང་གིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། མི་དམངས་མང་ཚོགས་ལ་བརྩེ་དུང་ཟབ་མོ་བཅངས་ནས། མུ་མཐུད་གཅིག་སྡུད་བཅོས་སྒྲིག་ལ་སྐུལ་འདེད་ཤུགས་ཆེན་བཏང་སྟེ། ཕན་འབྲས་དེ་བས་ཆེ་བ་ཐོན་ཐུབ་པའི་བརྩོན་ལེན་བྱེད་དགོས་ཞེས་ནན་བཤད་གནང་བ་རེད།
ལིའུ་ཅིན་གོ་ཡིས་གསུངས་དོན། ཕྱོགས་ཁག་གིས་ཐུན་མོང་ཐོག་འབད་བརྩོན་བྱས་པ་བརྒྱུད། གཅིག་སྡུད་བཅོས་སྒྲིག་ལ་གྲུབ་འབྲས་མངོན་གསལ་དོད་པོ་ཐོབ་ཡོད་མོད། འོན་ཀྱང་ལས་འགན་ད་དུང་དཀའ་ཚེགས་ཧ་ཅང་ཆེན་པོ་ཡོད། སྒྲིག་བཤེར་ལྟ་ཞིབ་ལས་ཁུངས་ཀྱིས་ཆོད་སེམས་དང་ཤུགས་ཚད་སྔར་ལས་ཆེ་བའི་སྒོ་ནས་དམ་འཛིན་བྱས་ཏེ། ས་གནས་ཁག་དང་སྡེ་ཚན་ཁག་གིས་འགན་འཁྲི་དོན་འཁྱོལ་དང་། གཙོ་གནད་གསལ་བཟོ། མཉམ་ཤུགས་ཆགས་པ་བཅས་ལ་སྐུལ་འདེད་གཏོང་དགོས། གྲོང་གསེབ་མཉམ་སྡེབ་ཀྱི“མ་རྩ་གསུམ”དོ་དམ་དང་། སྨན་བཅོས་འགན་བཅོལ་ཐེབས་རྩ་དོ་དམ། རྒན་གསོའི་ཞབས་ཞུ། ཚད་གཞི་མཐོ་བའི་ས་ཞིང་འཛུགས་སྐྲུན་སོགས་ཁྱབ་ཁོངས་ཀྱི་མངོན་གསལ་དོད་པའི་གནད་དོན་བཅོས་སྒྲིག་ཤུགས་ཆེན་བྱེད་པ་དང་། དམངས་འཚོའི་ཁྱབ་ཁོངས་ཀྱི་ཡིག་འབུལ་ཞུ་བཅར་གྱི་གནད་དོན་གཅིག་སྡུད་བཅོས་སྒྲིག་དང་། དཀའ་ངལ་ཡོད་པའི་མང་ཚོགས་ལ་རོགས་སྐྱོབ་གནད་འཁེལ་མ་ཐུབ་པའི་གནད་དོན་ཡོ་བཅོས་སོགས་དམངས་འཚོའི་གལ་ཆེན་ལས་དོན་དངོས་ལེགས་པར་སྒྲུབ་དགོས། གྱོད་སྒྲུབ་བྱེད་ཤུགས་ཆེ་རུ་བཏང་ནས“ཆུང་ཟ་ཆུང་རུལ”ལ་ཆད་པ་ནན་པོ་གཅོད་པ་དང་། བཟའ་འཁྱེར་བཀག་གསུམ་དང་ཧམ་བཟུང་གཞན་སྤྱོད་བྱས་པའི་གྱོད་འབྲེལ་རྒྱུ་དངོས་དུས་ཐོག་ཏུ་མང་ཚོགས་ལ་སློག་དགོས། སྟོབས་ཤུགས་སྲ་བརྟན་དུ་བཏང་ནས་ཞན་ཆ་སེལ་བར་སྐུལ་འདེད་གཏོང་བ་དང་། ལྟ་སྐུལ་དང་ལྟ་སྡོམ་བྱེད་ཤུགས་ཆེ་རུ་གཏོང་བ། གཞི་རིམ་གྱི་རྨང་གཞི་སྲ་བརྟན་དུ་གཏོང་བ་བཅས་བྱས་ཏེ་རྒྱུན་རྣམ་དང་ཡུན་རིང་བཅོས་སྐྱོང་བྱེད་པར་སྐུལ་འདེད་གཏོང་དགོས། སྲིད་དོན་ལས་རྗེས་ཀྱི་ལྟ་བ་ཡང་དག་འཛུགས་པ་དང་ལག་ལེན་བསྟར་ཏེ། དམ་པ་དོན་གཉེར་དང་ཡུལ་བབ་དང་བསྟུན་ནས་བཅོས་སྒྲིག་ལས་དོན་དམ་འཛིན་ཡག་པོ་བྱེད་དགོས།
འབྲེལ་ཡོད་གསར་འགྱུར།