ཉེ་ཆར། 2025ལོའི་ཀྲུང་གོའི་དཔལ་འབྱོར་གྱི་ལོ་འཁོར་སྙན་ཞུ་སྒྲོག་སྤེལ་བྱས་པར་རྒྱལ་སྤྱིའི་སྤྱི་ཚོགས་ཀྱི་དོ་ཁུར་ཆེན་པོ་བྱེད་ཅིང་། ཕྱི་རྒྱལ་གྱི་སྨྱན་སྦྱོར་མང་པོས་གནས་ཚུལ་སྤེལ་ནས་ངོས་འཛིན་བྱས་པར། རྒྱལ་ཁབ་ཕྱི་ནང་གི་དཔལ་འབྱོར་ཁོར་ཡུག་རྙོག་འཛིང་དང་འགྱུར་ལྡོག་ཆེ་རུ་འགྲོ་བའི་སྐབས་སུ། ཀྲུང་གོའི་དཔལ་འབྱོར་ལ་བརྟན་ཐོག་ཡར་འཕེལ་འགྲོ་བའི་རྣམ་པ་དང་། གསར་ལེགས་ཕྱོགས་སུ་འཕེལ་རྒྱས་འགྲོ་བའི་གསོན་ཤུགས། སྣོན་ཤུགས་བཟོད་ནས་མདུན་སྐྱོད་བྱེད་པའི་མཉེན་ཆ་བཅས་མངོན་པ་དང་། ཀྲུང་གོའི་དཔལ་འབྱོར་གྱི་གཞི་རྒྱ་འཛམ་གླིང་གི་ཨང་གཉིས་པར་བརྟན་པོར་སླེབས་པ་དང་འཕར་ཚད་འཛམ་གླིང་གི་དཔལ་འབྱོར་དངོས་ཚན་གཙོ་བོའི་མདུན་གྲལ་དུ་སླེབས་པ། གོ་ལ་ཧྲིལ་པོའི་དཔལ་འབྱོར་གྱི་སྒུལ་བྱེད་འཕྲུལ་འཁོར་གྱི་ནུས་པ་མུ་མཐུད་ཐོན་ཏེ། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྒོ་དབྱེར་བརྟེན་ནས་གོ་ལ་ཧྲིལ་པོའི་དཔལ་འབྱོར་འཕར་བར་སྒུལ་ཤུགས་དེ་བས་ཆེ་བ་སྦྱིན་བཞིན་ཡོད།

“རྒྱལ་ཁབ་ཕྱི་ནང་གི་རྙོག་འཛིང་ཆེ་བའི་ཁོར་ཡུག་ཁྲོད་དུ་འཕར་སྣོན་གྱི་མཉེན་ཆ་མངོན་པ”

གཞི་ཁྱོན་ཡན་གྱི་བཟོ་ལས་ཀྱི་འཕར་ཐང་ལོ་གོང་མ་ལས་5.9%འཕར་བ་དང་། དངོས་ཟོག་ཕྱིར་གཏོང་ནང་འདྲེན་གྱི་བསྡོམས་འབོར་ལོ་གོང་མ་ལས་3.8%འཕར་བ། མཐའ་མའི་འཛད་སྤྱོད་གཏོང་སྒོས་དཔལ་འབྱོར་འཕར་བར་ལེགས་སྐྱེས་འབུལ་ཚད་བཅུ་ཆ་ལྔ་ལས་བརྒལ་བ། གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་དངོས་སུ་5.0%འཕར་བ་དེ་དཔལ་འབྱོར་འཕར་ཚད་དང་གོམ་སྟབས་གཅིག་མཚུངས་བྱུང་བ་སོགས། 2025ལོར་ཀྲུང་གོའི་དཔལ་འབྱོར་ལ་གྲུབ་འབྲས་མངོན་གསལ་དོད་པོ་རབ་དང་རིམ་པ་ཐོབ་ཡོད།

“རྙོག་འཛིང་དང་ཛ་དྲག་ཆེ་བའི་རྒྱལ་སྤྱིའི་དུས་བབ་ཀྱི་མདུན་དུ། 2025ལོར་ཀྲུང་གོའི་དཔལ་འབྱོར་གྱི་སྔོན་དཔག་དམིགས་ཚད་ཕུན་སུམ་ཚོགས་པོའི་ངང་མངོན་འགྱུར་བྱུང་བ་དེ། ཀྲུང་གོ་སྲིད་གཞུང་གིས་དཔལ་འབྱོར་ཆེར་སྐྱེད་ཡོང་ཐབས་རབ་དང་རིམ་པ་སྤྱད་པ་ལས་བྱུང་བ་རེད” ཕ་ཁི་སི་ཐན་མཉམ་འབྲེལ་འཕྲིན་གཏོང་ཁང་གིས་གནས་ཚུལ་སྤེལ་བར་གཞིགས་ན། 2025ལོར་ཀྲུང་གོ་སྲིད་གཞུང་གིས་ཁྱིམ་སྤྱོད་གློག་ཆས་དང་། རླངས་འཁོར། རིག་ནུས་ལག་ཐོགས་ཁ་པར་སོགས་འཛད་ཟོག་ཚུད་པའི་རྙིང་ཚབ་གསར་བརྗེའི་སྲིད་ཇུས་བཏོན་ཏེ། སྤྱི་ཚོགས་ཀྱི་འཛད་ཟོག་སིལ་འཚོང་བསྡོམས་འབོར་འཕར་སྣོན་ཡོང་བར་སྐུལ་ཁྲིད་བྱས་པས། ཕན་ནུས་ཆེ་ལ་རིམ་པ་མཐོ་བའི་ཁྱིམ་སྤྱོད་གློག་ཆས་དང་རིག་ནུས་ཁྱིམ་ཆས་སྔར་ལས་མང་པོ་ཁྱིམ་ཚང་ཁྲི་སྟོང་མང་པོར་བེད་སྤྱོད་གཏོང་རྒྱུ་བྱུང་ཡོད།

ཨུ་རུ་སུ་སྲུང་སྐར་འཕྲིན་གཏོང་ཁང་གིས་གནས་ཚུལ་སྤེལ་བར་གཞིགས་ན། ཀྲུང་གོའི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་མི་དམངས་ཤོག་སྒོར་དུང་ཕྱུར་ཁྲི་140ཡི་འགག་སྒོ་ཆེན་པོ་ལས་ཐོག་མར་བརྒལ་ཏེ། ཀྲུང་གོའི་དཔལ་འབྱོར་འཕེལ་རྒྱས་ཀྱི་ཚད་གཞི་གསར་པ་བཏོད་ཡོད། ཀྲུང་གོས་བློ་བརྟན་འགྱུར་མེད་ངང་གསར་གཏོད་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་རྒྱུའི་འཐབ་ཇུས་ལག་ལེན་བསྟར་ཞིང་། ཐོན་སྐྱེད་ནུས་ཤུགས་གསར་མ་འཕེལ་རྒྱས་དང་སྟོབས་ཆེར་གཏོང་བར་བརྟེན་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བས། ཐོན་སྐྱེད་ཀྱི་ལས་ཕྱོད་རྒྱུན་ཆད་མེད་པར་ཆེ་རུ་ཕྱིན་པ་དང་བཟོ་སྐྲུན་ལས་རིགས་ཀྱི་ལག་རྩལ་འདུས་ཚད་རྒྱུན་ཆད་མེད་པར་མཐོ་རུ་ཕྱིན་ཡོད། ཀྲུང་གོས་འཛམ་གླིང་གི་དཔལ་འབྱོར་འཕར་སྣོན་དང་། ལག་རྩལ་སྒྱུར་བཅོས། གོ་ལ་ཧྲིལ་པོ་བཅོས་སྐྱོང་བཅས་ལ་བཞག་པའི་བྱས་རྗེས་དེ་བས་མངོན་གསལ་དོད་དུ་འགྲོ་བཞིན་ཡོད།

“ཀྲུང་གོར་གྲུབ་འབྲས་ཐོབ་པ་ནི་རྒྱུ་མཚན་ཁུངས་བཙན་ཡོད་པ་ཞིག་ཡིན་པ”

2025ལོར་ཀྲུང་གོའི་དཔལ་འབྱོར་ནས“གསར་ཕྱོགས་མདུན་སྐྱོད”ཀྱི་ཁྱད་ཆོས་མངོན་གསལ་དོད་པོ་ཞིག་མངོན་པ་སྟེ། ཞིབ་འཇུག་གསར་སྤེལ་གྱི་གྲོན་དངུལ་གཏོང་ཚད་2.8%ཟིན་པ་དེ་ལོ་གོང་མ་ལས་བརྒྱ་ཆའི་གྲངས་0.11འཕར་ནས། དཔལ་འབྱོར་མཉམ་ལས་དང་འཕེལ་རྒྱས་རྩ་འཛུགས་རྒྱལ་ཁབ་ཀྱི་ཆ་སྙོམས་ཆུ་ཚད་ལས་ཐོག་མར་བརྒལ་བ་དང་། འཛམ་གླིང་ཤེས་རིག་བདག་དབང་རྩ་འཛུགས་ཀྱི་གྲངས་གཞི་ལས་མངོན་པར་གཞིགས་ན། ཀྲུང་གོའི་གསར་གཏོད་སྟོན་གྲངས་ཀྱི་ཨང་རིམ་དེ་གོ་ལ་ཧྲིལ་པོའི་མདུན་གྲལ་བཅུའི་ནང་ཐོག་མར་ཚུད་པ། ཀྲུང་གོའི་མི་ཐབས་རིག་ནུས་དང་། ཚད་རྡུལ་ཚན་རྩལ། ཀླད་འཕྲུལ་མཐུད་ཁ་སོགས་མདུན་གྲལ་ཁྱབ་ཁོངས་ནས་རྒྱལ་ཁའི་གཏམ་བཟང་ཡང་ཡང་གྲགས་པ། ཚན་རིག་ཞིབ་འཇུག་གི་གྲུབ་འབྲས་གལ་ཆེན་མང་པོ་ཞིག་གཅིག་ལ་གཅིག་འགྲན་གྱི་རྣམ་པའི་ཐོག་ནས་ཐོན་པ། ལྗང་མདོག་གློག་དང་། ལྗང་མདོག་ནུས་རྒྱུ། ལྗང་མདོག་དཔལ་འབྱོར་བཅས་དབྱར་མཚོ་རྒྱས་པ་ལྟར་གོང་ནས་གོང་དུ་འཕེལ་བཞིན་པ་སོགས་ཡིན།

སི་ཕེན་གྱི《རྒྱལ་ཁབ་ཚགས་པར》དྲ་ཚིགས་ཐོག་གནས་ཚུལ་སྤེལ་བར་གཞིགས་ན། འཛམ་གླིང་བཟོ་སྐྲུན་ལས་རིགས་ཀྱི་མེ་འཁོར་གྱི་མགོ་ལྟ་བུ་ཡིན་པའི་ཀྲུང་གོས་མདུན་སྐྱོད་ཀྱི་འཕེལ་ཕྱོགས་ཆེན་པོ་རྒྱུན་འཁྱོངས་བྱས་པ་མ་ཟད། འཕར་སྣོན་གྱི་ཁྱབ་ཁོངས་གསར་པ་རྒྱུན་ཆད་མེད་པར་གསར་གཏོད་ཀྱང་བྱས་ཡོད། 2025ལོར་ཀྲུང་གོས་གོ་ལ་ཧྲིལ་པོའི་རིན་ཐང་སྦྲེལ་ཐག་ཁྲོད་ཀྱི་ཀྲུང་གོའི་གནས་བབ་མཐོ་རུ་གཏོང་ཐུབ་པའི་འབད་བརྩོན་མུ་མཐུད་བྱས་ཤིང་། ལྷག་པར་དུ་སྔོན་ཐོན་ལག་རྩལ་དང་འབྲེལ་བ་ཡོད་པའི་ཐོན་ཟོག་གི་ཐོན་འབོར་འཕར་སྣོན་མངོན་གསལ་དོད་པོ་བྱུང་བ་དཔེར་ན། དམངས་སྤྱོད་མི་མེད་གནམ་གྲུ(37.3%འཕར་བ)དང་། 3Ｄབསྐྱར་དཔར་སྒྲིག་ཆས(52.5%འཕར་བ) བཟོ་ལས་འཕྲུལ་མི(28.0%འཕར་བ) ནུས་རྒྱུ་གསར་པའི་རླངས་འཁོར(25.1%འཕར་བ)སོགས་རེད།

ཨ་རིའི་སྐུད་ཡོད་བརྙན་འཕྲིན་གསར་འགྱུར་དྲ་ཚིགས་ཀྱི་དུས་དེབ་ཐོག་བཀོད་པའི་རྩོམ་ཡིག་ནང་འཁོད་པར། ཀྲུང་གོར་གློག་སྒུལ་རླངས་འཁོར་དང་། ལིས་གྱེས་རྡུལ་གློག་སྨན། ཉི་ནུས་གློག་པང་སོགས་ལྗང་མདོག་ལག་རྩལ་ཁྱབ་ཁོངས་སུ་འཕེལ་རྒྱས་མགྱོགས་མྱུར་བྱུང་བ་དང་། གཞི་ཁྱོན་ཆེ་བའི་བཟོ་སྐྲུན་འཕྲུལ་ཆས་དང་ལག་རྩལ་ཐོན་རྫས་ཀྱི་སྟོབས་ཤུགས་རྒྱུན་ཆད་མེད་པར་ཆེ་རུ་བཏང་ཡོད། གོ་ལ་ཧྲིལ་པོའི་བཟོ་སྐྲུན་ལས་རིགས་ཀྱི་ལྟེ་གནས་ཡིན་པའི་ཀྲུང་གོའི་གནས་བབ་ཉིན་རེ་བཞིན་བརྟན་དུ་འགྲོ་བཞིན་ཡོད།

“ཡིད་ཆེས་ཀྱིས་ཁེངས་བཞིན་ཁ་ཕྱོགས་དང་དམིགས་ཚད་ཁ་གསལ་ཕྱོགས་སུ་སྐྱོད་པ”

འཛམ་གླིང་ལ་རྒྱང་ལྟ་བྱེད་སྐབས། ཀྲུང་གོའི་དཔལ་འབྱོར་འཕར་ཚད་དེ་དཔལ་འབྱོར་དངོས་ཚན་གཙོ་བོའི་ཁྲོད་ཀྱི་མདུན་གྲལ་དུ་སླེབས་པ་དང་། འཛམ་གླིང་ཡོངས་ཀྱི་དཔལ་འབྱོར་འཕར་བའི་ཁྲོད་ཀྱི་བརྟན་ཤོས་དང་བློས་འཁེལ་ཤོས་ཀྱི་སྒུལ་ཤུགས་འབྱུང་ཁུངས་ཡིན་པ། འཛམ་གླིང་གི་དཔལ་འབྱོར་འཕར་བར་ལེགས་སྐྱེས་འབུལ་ཚད་སྔོན་དཔག་བྱས་ན་30%ཡས་མས་སུ་སླེབས་རྒྱུ་རེད། ཕྱི་རྒྱལ་གྱི་སྨྱན་སྦྱོར་མང་པོས་རྩོམ་ཡིག་བཀོད་དེ་ཀྲུང་གོའི་དཔལ་འབྱོར་གྱི་མངོན་གསལ་དོད་པའི་རྣམ་པ་དང་འཕེལ་རྒྱས་ཀྱི་གྲུབ་འབྲས་རྒྱབ་ཀྱི་གདིང་རྩའི་རྒྱུ་རྐྱེན་ལ་དབྱེ་ཞིབ་གཏིང་ཟབ་བྱས་ཡོད།

ཝུ་ར་ཀུའེ་ཡི《སྤྱི་མཐུན་རྒྱལ་ཁབ་ཀྱི་ཚགས་པར》དྲ་ཚིགས་ལ་བཀོད་པའི་རྩོམ་ཡིག་ནང་འཁོད་པར། ལག་རྩལ་དང་གསར་གཏོད་ཁྱབ་ཁོངས་སུ་ཀྲུང་གོར་ཡར་རྒྱས་ཧ་ཅང་ཆེན་པོ་བྱུང་ནས“འཛམ་གླིང་གི་བཟོ་གྲྭ”ནས་ཚན་རྩལ་དང་གསར་གཏོད་ཀྱི་རྒྱལ་ཁབ་སྟོབས་ཆེན་ཕྱོགས་སུ་མགྱོགས་མྱུར་སྐྱོད་ཐུབ་ཡོད། འདི་ནི་ཞིབ་འཇུག་གསར་སྤེལ་ལ་མ་དངུལ་ཤུགས་ཆེན་བཏང་བ་དང་། ཚན་རིག་དང་། ལག་རྩལ། བཟོ་སྐྲུན། རྩིས་རིག་སློབ་གསོ་བཅས་ལ་རྒྱུན་མཐུད་རྒྱབ་སྐྱོར་བྱས་པ་ལས་བྱུང་བ་ཞིག་རེད།

ཉིན་ཤས་གོང་། ཕ་ཁི་སི་ཐན་གྱི《ཉིན་རེའི་མཐུན་སྒྲིལ་ཚགས་པར》གྱི་སྤྱི་ཁྱབ་རྩོམ་སྒྲིག་པ་ཐཱ་ཞིར·ཧྥ་ལུའུ་ཁེ་ཀྲུང་གོར་ལྟ་སྐོར་འཚམས་འདྲི་བྱེད་པར་ཡོང་ནས་རིག་གནས་ཤུལ་བཞག་སྲུང་སྐྱོང་དང་། གསར་གཏོད། ཁོར་ཡུག་སྲུང་སྐྱོང་སོགས་ཁྱབ་ཁོངས་ཀྱི་ཀྲུང་གོའི་འཕེལ་རྒྱས་སྐོར་གྱི་གནས་ཚུལ་ཤེས་རྟོགས་བྱས་ཤིང་། 《ཉིན་རེའི་མཐུན་སྒྲིལ་ཚགས་པར》ལ་བཀོད་པའི་ཁོང་གི་རྩོམ་ཡིག་ནང་། ཀྲུང་གོའི་འཕེལ་རྒྱས་ཀྱི་འགྲོ་ལམ་ནི་རིག་གནས་ཀྱི་གདེང་ཚོད་དང་། ཚན་རྩལ་ཡར་ཐོན། མི་དམངས་ལྟེ་བར་འཛིན་པ་བཅས་ཀྱི་འཕེལ་རྒྱས་ཀྱི་བསམ་བློར་གཞི་ཚུགས་ཡོད། “ཀྲུང་གོས་ཡིད་ཆེས་ཀྱིས་ཁེངས་བཞིན་དུ་ཁ་ཕྱོགས་དང་དམིགས་ཚད་ཁ་གསལ་ཕྱོགས་སུ་བསྐྱོད་པ་དང་། སྒོ་དབྱེ་རྣམ་པའི་ཐོག་ནས་གོ་ལ་ཧྲིལ་པོའི་སྤེལ་རེས་མཉམ་ལས་ལ་དགའ་བསུ་ཞུས་ཏེ། རྒྱུན་མཐུད་ཆོག་པའི་འཕེལ་རྒྱས་དོན་གཉེར་བྱེད་མཁན་རྒྱལ་ཁབ་ལ་ངོས་འཛིན་གཅིག་མཐུན་བྱུང་བའི་ཉམས་མྱོང་མཁོ་འདོན་བྱེད་བཞིན་ཡོད”ཅེས་བརྗོད།