ཁུའུ་མའེ་ཧཱ།

ལེ་པ་ནོན་དར་གོས་འགྲུལ་ལམ་ཞིབ་འཇུག་ཁང་གི་ཡོན་ཀྲང་ཝ་ལི་ཕུའུ·ཁུའུ་མའེ་ཧཱ་ཡིས་བྲིས་པའི《ཤིན་ཅང་གི་མཛེས་སྡུག་དང་། བདེ་སྐྱིད། དར་རྒྱས་བཅས་ལྡན་པའི་ལམ་བུ》ད་ལོའི་ཟླ་2པར་དཔེ་སྐྲུན་བྱ་རྒྱུ་རེད། ཁུའུ་མའེ་ཧཱ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་ངོ་སྤྲོད་བྱས་པར་གཞིགས་ན། དཔེ་དེབ་དེའི་ནང་ཁོང་གིས་ཀྲུང་གོའི་ཤིན་ཅང་ལ་འཚམས་འདྲི་བྱས་པའི་བརྒྱུད་རིམ་བརྗོད་ཅིང་། ཐུན་མིན་གྱི་ཟུར་ཕྱོགས་ནས་ལེ་པ་ནོན་གྱི་ཀློག་པ་པོའི་འདྲེན་བྱེད་ལམ་དུ་སྣ་མང་ཕུན་སུམ་ཚོགས་པའི་ཤིན་ཅང་བཤམས་ཡོད། དེབ་དེའི་ནང་ད་དུང་ཁུའུ་མའེ་ཧཱ་ཡིས་བསྡུ་རུབ་བྱས་པའི་སྦྲག་འཛིན་འབོར་ཆེན་བསྟན་ཏེ། རི་མོ་དཔང་རྟགས་སུ་བྱེད་པའི་རྣམ་པའི་ཐོག་ནས་ཀྲུང་གོའི་ཡུལ་སྲོལ་གོམས་གཤིས་དང་། ཨ་ཀྲུང་དབར་འགྲོ་འོང་བྱུང་བའི་ལོ་རྒྱུས། “རྒྱུད་གཅིག་ལམ་གཅིག”མཉམ་སྐྲུན་བྱེད་རིང་གི་མཛའ་གྲོགས་གཏམ་རྒྱུད་བཅས་ངོ་སྤྲོད་བྱས་ཡོད།

འདས་ཟིན་པའི་ལོ་10ཡི་ནང་ཁུའུ་མའེ་ཧཱ་ཡིས་ཀྲུང་གོའི་གྲོང་ཁྱེར་40ལྷག་ཙམ་ལ་འཚམས་འདྲི་བྱས་ཡོད། “གྲོང་ཁྱེར་མི་འདྲ་བ་ནས་རང་ཉིད་ལ་གྲུབ་འབྲས་མི་འདྲ་བ་ཐོབ་པ་དཔེར་ན། ཧྲེན་ཀྲེན་ནས་གསར་གཏོད་ལ་བརྟེན་ནས་གྲོང་ཁྱེར་ཞིག་གི་འཕེལ་རྒྱས་ལ་སྐུལ་འདེད་ཇི་ལྟར་བཏང་ཚུལ་མྱོང་ཚོར་བྱུང་བ་དང་། སན་ཡ་ནས་རང་ཉིད་ཀྱིས་ཀྲུང་གོའི་སྐྱེ་ཁམས་ཤེས་དཔལ་འཛུགས་སྐྱོང་གི་གྲུབ་འབྲས་གསར་པ་ཤེས་རྟོགས་ཟབ་མོ་བྱུང”ཞེས་དང་ཀྲུང་གོར་འཚམས་འདྲི་བྱེད་རིང་ཀྲུང་གོའི་རིག་གནས་མཁྱེན་རྒྱ་ཡངས་ལ་གཏིང་ཟབ་པ་དང་། སྣ་མང་ཕུན་སུམ་ཚོགས་པ། དེ་བཞིན་དེང་རབས་དང་སྲོལ་རྒྱུན་མཉམ་འདྲེས་དམ་ཟབ་ཐུབ་པ་བཅས་ཀྱི་མྱོང་ཚོར་ཟབ་ཤོས་བྱུང་ཞེས་ཁུའུ་མའེ་ཧཱ་ཡིས་བརྗོད།

ཁུའུ་མའེ་ཧཱ་ཡིས་ལེ་པ་ནོན་དང་ཀྲུང་གོའི་དབར་གྱི་སྲོལ་རྒྱུན་མཛའ་གྲོགས་ཟབ་ཏུ་ཕྱིན་ཞིང་། ཉེ་བའི་ལོ་ཤས་རིང་། ལེ་པ་ནོན་གྱི་དམངས་ཚོགས་ཀྱིས་ཀྲུང་གོའི་རིག་གནས་ཤེས་འདོད་ཆེན་པོ་བྱེད་ཀྱི་ཡོད་ལ། ཕྱོགས་གཉིས་པོའི་ཁྱབ་ཁོངས་ཁག་གི་མཉམ་ལས་ལ་མི་མངོན་པའི་སྟོབས་ཤུགས་ཆེན་པོའང་ལྡན་ཡོད། ཀྲུང་གོ་ཕྱོགས་ཀྱིས་རོགས་སྐྲུན་བྱས་པའི་ལེ་པ་ནོན་རྒྱལ་ཁབ་མཐོ་རིམ་རོལ་དབྱངས་སློབ་གླིང་ནི་ལེ་པ་ནོན་ཕྱོགས་ཀྱི་འཐུས་སྒོ་ཚང་བའི་རོལ་དབྱངས་སློབ་གླིང་དང་པོ་དང་རོལ་དབྱངས་ཚོམས་ཆེན་ཆེ་གྲས་ཤིག་རེད། ལེ་པ་ནོན་དང་ཀྲུང་གོས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་བྱས་པའི་མཚོན་བྱེད་རང་བཞིན་གྱི་འཛུགས་སྐྲུན་དངོས་པོ་དེ་ལས་ཕྱོགས་གཉིས་པོའི་རིག་གནས་སྤེལ་རེས་བྱེད་རིང་ནུས་པ་གལ་ཆེན་ཐོན་ངེས་རེད་ཅེས་བརྗོད།

ཁུའུ་མའེ་ཧཱ་ཡི་ཀྲུང་གོའི་སྐོར་གྱི་དེབ་བཞི་པ་སྟེ《པེ་ཅིང་ནས་ཧྲང་ཧའེ་བར། ཀྲུང་གོའི་གྲོང་ཁྱེར་ཆེན་པོའི་ལམ་བུ》ཞེས་པ་རྩོམ་འབྲི་བྱེད་བཞིན་ཡོད། “ངས་དཔེ་དེབ་འདི་བརྒྱུད་ཀྲུང་གོས་ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་ཇི་ལྟར་བྱས་པ་ངོ་སྤྲོད་བྱ་རྒྱུ་དང་ཆབས་ཅིག སྔོན་ཐོན་གྱི་ལག་རྩལ་དང་འདུ་ཤེས་དཔྱད་གཞིར་འཛིན་ནས་དེང་རབས་ཅན་འཕེལ་རྒྱས་ཀྱི་གྲུབ་འབྲས་གསར་པ་ཟམ་མི་ཆད་པར་ཐོབ་པ་བྱ་རྒྱུ་ཡིན”ཞེས་བརྗོད།