རང་ལྗོངས་ཀྱི་ས་ཁུལ་ཁག་དང་སྡེ་ཚན་ཁག་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་པ།
ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་དུས་ཚོད་ངེས་ཅན་ཞིག་རིང་སློབ་སྦྱོང་ལག་བསྟར་དང་ལག་ལེན་ལ་སྐུལ་སྤེལ་བཏང་བ་བརྒྱུད། ལྗོངས་ཡོངས་ཀྱི་གོང་འོག་ཚང་མའི་ལས་སྒྲུབ་ལས་གཏོད་ཀྱི་བསམ་བློའི་ཐུན་མོང་ངོས་འཛིན་དང་བྱ་སྤྱོད་ཀྱི་རང་རྟོགས་སུ་གྱུར་ནས། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཆེད་བསམ་བློའི་རྨང་གཞི་བརྟན་པོ་འདིང་བ་དང་སྒུལ་ཤུགས་རྒྱུན་མཐུད་སྣོན་བཞིན་ཡོད་པ་རེད།
ཉེ་ཆར། རང་སྐྱོང་ལྗོངས་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱིས“ཧི་མ་ལ་ཡའི་སྤྱི་ཚོགས་ཚན་རིག་གི་སློབ་ཁང་ཆེན་མོ”དུས་ཐེངས་བཅུ་བདུན་པ་གཉེར་ཞིང་། བོད་རང་སྐྱོང་ལྗོངས་ཏང་ཨུད་ཏང་གི་སློབ་གྲྭའི(སྲིད་འཛིན་སློབ་གླིང)སློབ་སྤྱི་གཞོན་པ(ཡོན་ཀྲང་གཞོན་པ)དང་དགེ་རྒན་ཆེ་མོ་བ་ཧོང་ཤང་ཧོའེ་གདན་དྲངས་ཏེ་ཆེད་དོན་སྒྲོག་འགྲེལ་བྱས་པ་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་གསལ་འགྲེལ་གཏིང་ཟབ་བྱས་ནས་ཚང་འཛོམས་གྲོས་ཚོགས་ཀྱི་དགོངས་དོན་དེ་ལྗོངས་ཡོངས་ཀྱི་སྤྱི་ཚོགས་ཚན་རིག་ཁྱབ་ཁོངས་སུ་རྩ་བ་ཚུགས་པར་སྐུལ་འདེད་བཏང་བ་རེད།
ཧོང་ཤང་ཧོའེ་ཡིས“‘ལོ་ལྔ་ཚན་བཅོ་ལྔ་པའི’འཐབ་ཇུས་ལས་འགན་དང་བྱེད་ཐབས་གལ་ཆེན་ཁོང་དུ་ཆུད་པ”དང“ཏང་གིས་ཕྱོགས་ཡོངས་ལ་འགོ་ཁྲིད་བྱེད་པའི་རྩ་བའི་འགན་ལེན་འདི་མཐའ་འཁྱོངས”སོགས་ཀྱི་ཐད་ནས་བརྒྱུད་རིམ་ལྡན་པའི་གསལ་འགྲེལ་དང་ཚང་འཛོམས་གྲོས་ཚོགས་ཀྱི་དོན་སྙིང་གལ་ཆེན་དང་ལྟེ་བའི་དོན་སྙིང་ལ་འགྲེལ་བཤད་བརྒྱབ་པ་མ་ཟད། བོད་ཀྱི་དོན་དངོས་དང་ཟུང་འབྲེལ་དམ་ཟབ་བྱས་ཏེ་འཕེལ་རྒྱས་ཀྱི་གོ་སྐབས་དང་ལག་ལེན་གྱི་ཐབས་ལམ་ལ་དབྱེ་ཞིབ་དང་། གསོན་ཉམས་དོད་པའི་གྱོད་དཔེ་དང་གོ་བདེ་བའི་སྐད་ཆ་ནས་ཚང་མས“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་མཛུབ་ཁྲིད་དགོངས་པ་དང་། རྩ་དོན་གལ་ཆེན། དམིགས་ཚད་གཙོ་བོ་བཅས་ལ་ངོས་འཛིན་དེ་བས་གསལ་པོ་དང་གོ་བ་དེ་བས་ཡག་པོ་ལོན་པར་བྱས་པ་རེད།
ཉིན་ཤས་བསྟུད་མར། ཆབ་མདོ་སྡེ་ཚོགས་གྲོང་ཨུད་དང་གྲོང་ཁྱེར་ལོ་ཆུང་གདོང་ལེན་རུ་མིའི་ལས་དོན་ཨུ་ལྷན་གྱིས་གྲོང་ཁྱེར་རིམ་པའི“སྐེ་དར་དམར་པོའི་སྐོར་སྐྱོད་སྒྲོག་འགྲེལ་ཚོགས་པ”སྒྲིག་འཛུགས་བྱས་ཏེ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་གྱི་བརྗོད་དོན་གཙོ་བོའི་སྒྲོག་འགྲེལ་བྱེད་སྒོ་སྤེལ་བར་རིམ་རྩིས་བརྒྱབ་ན་ཐེངས་27སྤེལ་བ་རེད། སྐོར་སྐྱོད་སྒྲོག་འགྲེལ་ཚོགས་པས“མྱུར་སྐྱེལ་གསལ་ཐོ་གཅིག་དང་། ཕྲུ་གུ་དམར་འབྱར་གྱི་ཉལ་ཁྲི་གཅིག ཧྥུའུ་ཅན་གྱི་དམག་གྲུ་གཅིག སྨི་བརྒྱའི་རྒྱུག་ལམ་གཅིག”བཅས་ནས་འགོ་བཙུགས་ཏེ“ལོ་ལྔ་ཚན་བཅུ་བཞི་པའི”རིང་གི་དམངས་འཚོ་དང་། ཚན་རྩལ། ལུས་རྩལ་སོགས་ཐད་ཀྱི་གྲུབ་འབྲས་བསྟན་པ་དང་། དེ་རྗེས“དུས་ཚོད་འཁོར་མདའ”ལ་བརྟེན་ནས“ལོ་ལྔ་ཚན་བཅོ་ལྔ་པའི”དམིགས་ཚད་གཙོ་བོ་བསྟན་ཏེ་ཚང་མར་རྒྱལ་གཅེས་ཀྱི་བརྩེ་བ་དང་རྒྱལ་ཁབ་སྟོབས་ཆེན་གྱི་ཕུགས་འདུན་དེ“ཉིན་ལྟར་ཆུ་ཐིགས་གཅིག་གྲོན་ཆུང་དང་། དང་བླངས་ཞབས་ཞུར་ ཐེངས་གཅིག་ཞུགས་པའི”ལག་ལེན་གྱི་བྱ་སྤྱོད་ཁྲོད་དོན་འཁྱོལ་བྱས་ཏེ། ཏང་གཅེས་རྒྱལ་གཅེས་དང་། སྙིང་རུས་ཆེ་ཞིང་སློབ་ལ་དགའ་བ། ཕྱོགས་ཡོངས་འཕེལ་རྒྱས་བཅས་ཀྱི་དུས་རབས་གསར་པའི་ལོ་ཆུང་བཟང་པོ་ཞིག་ཧུར་ཐག་བྱེད་དགོས་པའི་འབོད་སྐུལ་བྱས་པ་རེད།
ཉིན་ཤས་གོང་། ལྷ་ས་གྲོང་ཁྱེར་མལ་གྲོ་གུང་དཀར་རྫོང་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སྒྲོག་འགྲེལ་སྙན་ཞུའི་ཚོགས་འདུ་འཚོགས་ཤིང་། རང་སྐྱོང་ལྗོངས་འཆད་ཁྲིད་ཚོགས་པའི་ཁོངས་མི་དང་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ་ཁྲེན་རེན་ཅེ་ཡིས་ཆེད་དོན་སྒྲོག་འགྲེལ་བྱས་ཤིང་། སྒྲོག་འགྲེལ་བྱེད་རིང་། ཁྲེན་རེན་ཅེ་ཡིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་ལ་དམ་པོར་དམིགས་ཏེ། དོན་སྙིང་གཙོ་བོ་དང་། ཕུན་སུམ་ཚོགས་པའི་ནང་དོན། ལག་ལེན་གྱི་བླང་བྱ་སོགས་ཀྱི་ཐད་ནས་བརྒྱུད་རིམ་ལྡན་པའི་གསལ་འགྲེལ་དང་འགྲེལ་བཤད་གཏིང་ཟབ་བརྒྱབ་པ་དང་། སྒྲོག་འགྲེལ་གྱི་ནང་དོན་ཐད་གཏན་ཚིགས་ཀྱིས་ཕྱུག་ཅིང་གྱོད་དཔེ་གསོན་ཉམས་ལྡན་པ་ཞིག་ཡོད་པས། མལ་གྲོ་གུང་དཀར་རྫོང་གི་ལས་བྱེད་པ་དང་མང་ཚོགས་ཚོས་ཚང་འཛོམས་གྲོས་ཚོགས་ཀྱི་དགོངས་དོན་ཁོང་དུ་ཡག་པོ་ཆུད་པར་ཁྲིད་སྟོན་གསལ་པོ་བྱས་ཡོད། ཚང་མས། ད་ཐེངས་ཀྱི་སྒྲོག་འགྲེལ་སྙན་ཞུའི་ཚོགས་འདུ་གོ་སྐབས་སུ་བྱས་ཏེ་ཟབ་སྦྱོང་ཞིབ་རྟོགས་དང་སྦྱོང་སྤྱོད་ཟུང་འབྲེལ་གྱིས་ཚང་འཛོམས་གྲོས་ཚོགས་ཀྱི་དགོངས་དོན་དོན་ཐོག་ཏུ་འཁྱོལ་བ་དང་ཕན་འབྲས་ཐོན་རྒྱུར་སྐུལ་འདེད་བཏང་ནས་གཙོ་གནད་ལས་དོན་ཁག་གོ་རིམ་ལྡན་པའི་ངང་སྤེལ་ཐུབ་པའི་འགན་ལེན་བྱེད་ཀྱི་ཡིན་ཞེས་བཤད་པ་རེད།
འབྲེལ་ཡོད་གསར་འགྱུར།