བསམ་གྲུབ་རྩེ་ཆུས་ལྕང་ལོ་ཁང་གསར་སྡེ་ཁུལ་གྱིས་སྲང་ལམ་ཆུང་ངུར་བཅོས་སྒྲིག་བྱས།སྡེ་ཁུལ་མཛེས་རིས་མིག་ལ་གསལ།
ཉེ་བའི་ལོ་ཤས་རིང་། བསམ་གྲུབ་རྩེ་ཆུས་ལྕང་ལོ་ཁང་གསར་སྡེ་ཁུལ་གྱིས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ལ་གཞིགས་ཏེ། རླངས་འཁོར་འཇོག་ས་བསྐྲུན་པ་དང་། སྲང་ལམ་ཆུང་ངུ་བཅོས་སྒྲིག “སྡོམ་དྲ”སྒྱུར་བཀོད་སོགས་ཀྱི་དམངས་འཚོའི་བྱེད་ཐབས་རབ་དང་རིམ་པར་བརྟེན་ནས་ཁོངས་གཏོགས་ཁུལ་གྱི་ཁོར་ཡུག་གསར་རྐྱང་དུ་གྱུར་པས། གྲོང་མིའི་ཐོབ་སྣང་དང་སྐྱིད་སྣང་ཆེ་རུ་ཏན་ཏིག་ཕྱིན་ཡོད།
ལྕང་ལོ་ཁང་གསར་སྡེ་ཁུལ་གྲོང་མི་ཨུ་ལྷན་གྱི་ཀྲུའུ་རེན་སྤེན་པ་ཆུང་བདག་གིས་ངོ་སྤྲོད་བྱས་པ་ལྟར་ན། སྔོན་ཆད་ཁྲོམ་གཞུང་སྲང་ལམ་གྱི་ཟུར་དང་མི་འགྲུལ་ལམ་དུ་འཁོར་རིགས་གང་བྱུང་དུ་འཇོག་གི་ཡོད་པས། གྲོང་མི་འགྲོ་སྐྱོད་ཐད་འགལ་རྐྱེན་བཟོས་པའི་ཁར་བདེ་འཇགས་ཀྱི་མངོན་མེད་རྐྱེན་ངན་ཡང་གནས་ཡོད། དེས་མི་ཚད་ཆེད་སྤྱོད་རླངས་འཁོར་འཇོག་ས་མེད་ཅིང་། གློག་བརྙན་ཟློས་གར་ཁང་དང་། གློག་བརྙན་རུ་ཁག་གི་གནས་ཡུལ་རྙིང་པ། དེ་བཞིན་ས་ཕག་ཁང་པ་ཁག་གཅིག་བཅས་ཚང་མ་ཉེན་ཁ་ཡོད་པའི་ཁང་པ་ཡིན་པ་མ་ཟད། རྩ་ཆེའི་བར་མཐོངས་བཟུང་ཡོད་ལ་བདེ་འཇགས་ཀྱི་མངོན་མེད་རྐྱེན་ངན་ཡང་གནས་ཡོད། དཀའ་གནད་དེ་ཐག་གཅོད་བྱ་ཆེད། སྡེ་ཁུལ་གྱིས་གོང་རིམ་སྡེ་ཚན་ལ་རེ་ཞུ་ཧུར་ཐག་བྱས་ནས་བེད་མེད་ས་ཆ་རྣམས་རླངས་འཁོར་འཇོག་སར་འཆར་འགོད་བྱས་ནས་སྒྱུར་བཀོད་བྱས་ཏེ། མཐར་ས་སྟེང་དང་ས་འོག་གཉིས་ཀའི་ཕྱོགས་བསྡུས་རླངས་འཁོར་འཇོག་ས་བསྐྲུན་ནས་རླངས་འཁོར་འཇོག་ས་200འཆར་འགོད་བྱས་པ་མ་ཟད། དངོས་སུ་གཉེར་སྐྱོང་ཡང་བྱས་པ་རེད།
དམངས་འཚོའི་སྒྱུར་བཀོད་ཀྱིས་གྲོང་མིར་ཕན་བདེ་བྱུང་བ་མ་ཟད། ཁོངས་གཏོགས་ཁུལ་གྱི་ཚོང་དུད་ཀྱིས་ཀྱང་དེའི་ཁེ་ཕན་མཉམ་དུ་སྤྱོད་ཐུབ་ཡོད་ཅིང་། ཧྲང་ཧའེ་བྱང་ལམ་དུ་ཇ་ཁང་གཉེར་བའི་བདེ་ཆེན་ལ་དེའི་ཐད་མྱོང་ཚོར་ཟབ་མོ་བྱུང་སྟེ“ངས་ས་ཆ་འདིར་ཇ་ཁང་བཙུགས་ནས་ལོ་ལྔ་སོང་། དེ་སྔོན་རླངས་འཁོར་འཇོག་ས་མེད་པའི་སྐབས་སྐུ་མགྲོན་དང་གྲོང་མིས་རླངས་འཁོར་ཇ་ཁང་གི་སྒོ་ཁར་འཚང་ཁ་ཤིག་ཤིག་ངང་འཇོག་གི་ཡོད་པས། ང་ཚོང་ཟོག་འདོན་འཇུག་བྱེད་པར་དཀའ་ངལ་ཆེ་བ་དང་ཚོང་ལ་ཤུགས་རྐྱེན་ངན་པའང་ཐེབས་ཀྱི་ཡོད། ད་ཆ་ཆེད་སྤྱོད་རླངས་འཁོར་འཇོག་ས་ཡོད་པས་གང་བྱུང་དུ་རླངས་འཁོར་འཇོག་པའི་སྣང་ཚུལ་རྩ་བ་ནས་མེད་ལ་ཇ་ཁང་དུ་སྐུ་མགྲོན་ཡང་ཇེ་མང་དུ་ཕྱིན་སོང་། འདི་ནི་དངོས་གནས་ངེད་ཅག་ཚོང་དུད་ལ་བྱ་བ་བཟང་པོ་བསྒྲུབས་པ་ཞིག་རེད”ཅེས་བཤད།
རླངས་འཁོར་འཇོག་དཀའ་བའི་གནད་དོན་ཐག་གཅོད་བྱས་པའི་ཁར་ལྕང་ལོ་ཁང་གསར་སྡེ་ཁུལ་གྱིས་ད་དུང་སྲང་ལམ་ཆུང་ངུ་དག་གི“སྡོམ་དྲ”སྒྱུར་བཀོད་ལས་གྲྭར་སྐུལ་འདེད་ཤུགས་ཆེན་ཡང་བཏང་ཡོད། དེ་སྔོན་ ཁོངས་གཏོགས་ཁུལ་གྱི་གློག་སྐུད་དང་དྲ་སྐུད་གོ་རིམ་མེད་པར་ཁྲིད་པས། གྲོང་ཁྱེར་གྱི་བཀོད་པར་ཤུགས་རྐྱེན་ཚབས་ཆེན་བཟོས་པ་མ་ཟད། ད་དུང་བདེ་འཇགས་ཀྱི་མངོན་མེད་ཉེན་ཁའང་ཆེན་པོ་ཡོད། གཅིག་སྡུད་བཅོས་སྒྲིག་བྱས་པ་བརྒྱུད། སྐུད་ལམ་ཟང་ཟིང་ལ་བརྒྱུད་རིམ་ལྡན་པའི་སྒོ་ནས་ལེགས་སྒྲིག་བྱས་ཏེ་བདེ་འཇགས་ཀྱི་ཉེན་ཁ་རྦད་དེ་བསལ་བ་མ་ཟད། སྲང་ལམ་ཆུང་ངུའི་ཁོར་ཡུག་གཙང་ལ་ཉམས་དགའ་བ་ཞིག་ཏུའང་བསྒྱུར་ཡོད།
ཉེན་ཁ་ཡོད་པའི་ཁང་པ་བཤིག་ནས་རླངས་འཁོར་འཇོག་ས་བསྐྲུན་པའི་བར་དང་། གང་བྱུང་དུ་རླངས་འཁོར་འཇོག་པར་བཅོས་སྒྲིག་བྱས་ནས“སྡོམ་དྲ”གཙང་སེལ་བྱས་པའི་བར་ལྕང་ལོ་ཁང་གསར་སྡེ་ཁུལ་གྱིས་ཐོག་མཐའ་བར་གསུམ་དུ“དམངས་ལ་བྱ་བ་དངོས་སྒྲུབ་པ”དམིགས་ཡུལ་དུ་བཟུང་སྟེ། དམངས་འཚོའི་འདུ་འགོད་དང་དངོས་སྒྲུབ་བྱེད་ཐབས་རབ་དང་རིམ་པར་བརྟེན་ནས་དུས་ཡུན་རིང་པོར་མང་ཚོགས་ལ་དཀའ་ངལ་བཟོ་བའི་འཚོ་བའི་དཀའ་གནད་ནུས་ལྡན་ངང་ཐག་གཅོད་བྱས་ཏེ། སྲང་ལམ་ཆུང་ངུར་ཤེས་དཔལ་གྱི་ཉམས་བཟང་མངོན་པར་བྱས་ཡོད།
འབྲེལ་ཡོད་གསར་འགྱུར།