ཉིན་ཤས་གོང་། ཕ་ཁི་སི་ཐན་གྱི“ཀྲུང་གོར་ཤེས་རྟོགས”གླེང་སྟེགས་ཀྱི་ལས་འཛིན་དཔོན་དང་དེ་སྔའི་ཙུང་ལིའི་དམིགས་བསལ་ལས་རོགས་པ་ཀྲ་ཧྥར·ཝུའུ་ཏིང·མཱ་ཧ་མའོ་ཏེས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས“ཀྲུང་གོར་སློབ་སྦྱོང་བྱེད་དུ་ཡོང་བས་ངའི་མི་ཚེ་ཧྲིལ་པོར་འགྱུར་ལྡོག་ཕྱིན་སོང་། ང་དང་ཀྲུང་གོའི་དབར་ཚེ་གང་གི་འབྲེལ་བ་དམ་ཟབ་ཅིག་ཆགས་ཡོད། ངས་རྒྱལ་ཁབ་གཉིས་པོའི་གཞོན་ནུ་དེ་བས་མང་བ་ཕན་ཚུན་འབྲེལ་འདྲིས་ཐུབ་ནས་ཕ་ཀྲུང་མཛའ་གྲོགས་མཉམ་ལས་ཀྱི་ཞིང་ས་སྔར་བས་སྐྱོང་སྤེལ་ཡོང་བའི་རེ་སྒུག་བྱེད་ཀྱི་ཡོད”ཅེས་བརྗོད།

1976ལོར་ཀྲ་ཧྥར་ཀྲུང་གོར་སློབ་སྦྱོང་ལ་ཡོང་ནས་པེ་ཅིང་སྐད་ཡིག་སློབ་གླིང(ད་ལྟའི་པེ་ཅིང་སྐད་ཡིག་སློབ་ཆེན)དུ་རྒྱ་ཡིག་སྦྱངས་པ་དང་། 1977ལོ་ནས་1982ལོའི་བར་ཀོང་ཀྲོའུ་ཀྲུང་ཧྲན་གསོ་རིག་སློབ་གླིང(ད་ལྟའི་ཀྲུང་ཧྲན་སློབ་ཆེན་ཀྲུང་ཧྲན་གསོ་རིག་སློབ་གླིང)དུ་སློབ་སྦྱོང་བྱས། སློབ་གྲྭ་ཐོན་རྗེས་ཁོང་ཀྲུང་གོར་བསྡད་དེ་ཀྲུང་གོར་མ་འཇོག་དང་ཚོང་དོན་ལས་ཀ་བྱས། 1998ལོར་ཁོང་ཀྲུང་གོར་བཅའ་སྡོད་ཕ་ཁི་སི་ཐན་གྱི་གཞུང་ཚབ་ཆེ་མོ་ཁང་གི་དཔལ་འབྱོར་ཚོང་དོན་ཚན་ཙན་ལ་བསྐོ་གཞག་བྱས། དེའི་རྗེས་ཁོང་གིས་ད་དུང་ཧྲང་ཧའེ་རུ་བཅའ་སྡོད་ཕ་ཁི་སི་ཐན་གྱི་སྤྱི་ཁྱབ་ཁེ་སྐྱོང་བ་དང་ཀྲུང་ཕ་དཔལ་འབྱོར་བར་ཁྱམས་ཀྱི་ཆེད་བསྐོས་ཕོ་ཉ་སོགས་ཀྱི་འགན་འཁུར་མྱོང་ཡོད། 2017ལོར་ལས་འགན་ཕྱིར་འཐེན་བྱས་ནས་ཕ་ཁི་སི་ཐན་དུ་ལོག་པ་དང་། 2020ལོར་ཁོང་གིས་ཕ་ཁི་སི་ཐན་གྱི“ཀྲུང་གོར་ཤེས་རྟོགས”གླེང་སྟེགས་གཉེར་བ་དང་འབྲེལ་ཕ་ཁི་སི་ཐན་གྱི་ཙུང་ལིའི་དམིགས་བསལ་ལས་རོགས་པའི་འགན་འཁུར་ནས་ཀྲུང་ཕའི་འབྲེལ་བ་འཕེལ་རྒྱས་འགྲོ་རྒྱུར་ལེགས་སྐྱེས་གལ་ཆེན་ཕུལ་ཡོད།

ཀྲ་ཧྥར་གྱིས་ཀྲུང་གོར་སློབ་སྦྱོང་དང་ལས་ཀ་བྱས་ནས་ལོ་40ཡི་རིང་སྒྱུར་བཅོས་སྒོ་དབྱེ་བྱས་ཚུན་གྱི་ཀྲུང་གོའི་དཔལ་འབྱོར་དང་སྤྱི་ཚོགས་ལ་འཕེལ་རྒྱས་མྱུར་པོ་ཕྱིན་པ་དང་གནམ་ས་བླ་འོག་ལྟ་བུའི་འགྱུར་ལྡོག་གི་དཔང་པོ་བྱས་པ་སྟེ། 1976ལོར“ཀྲུང་གོའི་བ་གམ་ཨང་དང་པོ”ཀོང་ཀྲོའུ་པའེ་ཡུན་གསོལ་མགྲོན་ཁང་བསྐྲུན་པ་ནས་ད་ཆའི་ཀྲུང་གོའི་གྲོང་ཁྱེར་ཆེ་གྲས་ཁག་གི་མཐོ་དམའ་མི་འདྲ་བ་དང་རང་སོ་སོའི་ཁྱད་ཆོས་ལྡན་པའི་བ་གམ་ཚར་དུ་དངར་བ་མང་པོའི་བར་དང་། ཀྲུང་གོས་ཕ་ཁི་སི་ཐན་ནས་རླུང་འབུད་རྣམ་པའི་འགྲུལ་སྐྱེལ་གནམ་གྲུ་ཁག་དང་པོ་ནང་འདྲེན་བྱས་པ་ནས་ད་ཆའི་ཀྲུང་གོས་རང་བརྟེན་ཞིབ་བཟོ་བྱས་པའི་མྱུར་བགྲོད་ལྕགས་ལམ་དང་Ｃ919རྟགས་ཅན་གྱི་གནམ་གྲུ་ཆེ་གྲས་བར་ལ་སོགས་རེད།“ཀྲུང་གོའི་འཕེལ་རྒྱས་དང་འགྱུར་ལྡོག་ཤིན་ཏུ་མྱུར་བ་དེ་བསམ་ཡུལ་ལས་འདས་པ་ཞིག་རེད”ཅེས་ཀྲ་ཧྥར་གྱིས་བརྗོད།

ཀྲ་ཧྥར་གྱིས་ཀྲུང་གོའི་འཕེལ་རྒྱས་ཀྱི་ཉམས་མྱོང་དེར་གོ་ལ་ཧྲིལ་པོས་དོ་ཁུར་དང་ཞིབ་འཇུག་དེ་བས་མང་བ་བྱེད་འོས་པ་ཞིག་རེད། ཀྲུང་གོ་འཕེལ་རྒྱས་ཀྱི་བདེན་དཔང་བ་དང་དངོས་སུ་བརྒྱུད་མྱོང་མཁན་ཞིག་ཡིན་པའི་ངོས་ནས་བརྗོད་ན་དེ་ནི་ངའི་གཟི་བསོད་ཡིན་ལ་འགན་འཁྲི་ལྕི་པོ་ཞིག་ཀྱང་ཡིན་ཞེས་བརྗོད། “ངའི་ལས་འགན་ནི་མི་དེ་བས་མང་བས་ཀྲུང་གོར་ཤེས་རྟོགས་ཐུབ་པ་བྱ་རྒྱུ་མ་ཟད། བྱེད་ཐབས་དེ་བརྒྱུད་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ལ་རང་ངོས་རྒྱལ་ཁབ་ཀྱི་འཕེལ་རྒྱས་དང་འཚམ་པའི་ལམ་བུ་ཞིག་འཚོལ་རོགས་བྱས་ཏེ་དཔལ་འབྱོར་དང་སྤྱི་ཚོགས་མགྱོགས་མྱུར་འཕེལ་རྒྱས་འགྲོ་བ་དང་རྒྱལ་ཁབ་ཁག་གི་མི་དམངས་ལ་བདེ་སྐྱིད་བསྐྲུན་རྒྱུ་དེ་ཡིན”ཞེས་བརྗོད།

དམིགས་ཚད་འདི་མངོན་འགྱུར་བྱ་ཆེད། ཀྲ་ཧྥར་གྱིས་ཕ་ཁི་སི་ཐན་གྱི“ཀྲུང་གོར་ཤེས་རྟོགས”གླེང་སྟེགས་བཙུགས་པ་དང་། བགྲོ་གླེང་ཚོགས་འདུ་འཚོག་པ་དང་དཔེ་དེབ་དང་ཚགས་པར་དུས་དེབ་དཔེ་སྐྲུན་བྱེད་པ་སོགས་ཀྱི་རྣམ་པ་བརྒྱུད། ཕ་ཁི་སི་ཐན་གྱི་ལས་རིགས་ཁག་གི་མི་སྣར་ཀྲུང་གོའི་འཕེལ་རྒྱས་ཀྱི་བརྒྱུད་རིམ་དང་གྲུབ་འབྲས་ཐོབ་པའི་ཉམས་མྱོང་ངོ་སྤྲོད་བྱས་ཏེ་ཕ་ཁི་སི་ཐན་ཚུད་པའི་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཁག་ལ་དཔྱད་གཞི་མཁོ་འདོན་བྱེད་ཀྱི་ཡོད། “ཀྲུང་གོར་ཤེས་རྟོགས”གླེང་སྟེགས་ཀྱིས་ཕ་ཁི་སི་ཐན་གྱི་ན་གཞོན་ཚོས་ཀྲུང་གོ་ཤེས་རྟོགས་བྱེད་པ་དང་ཀྲུང་གོའི་ན་གཞོན་དང་སྤེལ་རེས་རྒྱ་ཁྱབ་བྱེད་པར་སྐུལ་འདེད་ཧུར་ཐག་གཏོང་གི་ཡོད་པ་རེད།

ཀྲ་ཧྥར་གྱིས། “ཀྲུང་གོར་ཐོབ་པའི་འཕེལ་རྒྱས་ཀྱི་གྲུབ་འབྲས་ལས་རང་རྒྱལ་ཁབ་ཀྱི་མི་དམངས་ལ་ཕན་བདེ་བསྐྲུན་པ་མ་ཟད། གོ་ལ་ཧྲིལ་པོའི་འཕེལ་རྒྱས་ལའང་གོ་སྐབས་བསྐྲུན་ཡོད། ང་རང་ཀྲུང་གོའི་འཕེལ་རྒྱས་ཀྱི་དཔང་པོ་བྱེད་པའི་གཟི་བསོད་བྱུང་ལ་ཀྲུང་གོའི་གཏམ་རྒྱུད་དང་ཉམས་མྱོང་མི་དེ་བས་མང་བར་མཉམ་སྤྱོད་བྱེད་དགོས་པའི་ལས་འགན་ཕྲག་ཏུ་བབས་པའི་མྱོང་ཚོར་ཟབ་མོ་བྱུང”ཞེས་བརྗོད་པ་རེད།