ཟླ་1ཚེས་24ཉིན། ཀྲུང་གོ་མི་དམངས་སློབ་ཆེན་གྱིས་གཙོ་གཉེར་བྱས་པའི“2026ལོའི་གོ་ལ་ཧྲིལ་པོའི་བཅོས་སྐྱོང་གླེང་སྟེགས”པེ་ཅིང་དུ་འཚོགས་པ་རེད། གླེང་སྟེགས་རིང་ད་དུང《གོ་ལ་ཧྲིལ་པོའི་བཅོས་སྐྱོང་གི་གྲོས་འགོ་སྟེ། ལག་གདང་སྦྲེལ་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པའི་ཕྱོགས་སུ་སྐྱོད་དགོས》(ཡིག་རིགས་དགུ)ཞེས་པའི་དེབ་གསར་ཡོངས་བསྒྲགས་ཚོགས་འདུ་དང“གོ་ལ་ཧྲིལ་པོའི་བཅོས་སྐྱོང་གྲོས་འགོའི”རྒྱལ་སྤྱིའི་ཞིབ་འཇུག་མནའ་འབྲེལ་བཙུགས་པའི་ཚོགས་ཆེན་འཚོགས་པ་རེད། ཀྲུང་གོར་བཅའ་སྡོད་རྒྱལ་ཁབ་མང་པོའི་གཞུང་ཚབ་པ་དང་ཀྲུང་གོ་དང་ཕྱི་རྒྱལ་གྱི་རིགས་གཅིག་མཁས་ཅན་དང་མཁས་དབང་གླེང་སྟེགས་ལ་ཞུགས་ནས་ཀྲུང་གོས་བཏོན་པའི་གོ་ལ་ཧྲིལ་པོའི་བཅོས་སྐྱོང་གྲོས་འགོའི་བསམ་བློའི་ལེགས་སྐྱེས་དང་དུས་རབས་ཀྱི་དོན་སྙིང་དང་། དེ་བས་དྲང་གཞག་ལུགས་མཐུན་གྱི་གོ་ལ་ཧྲིལ་པོའི་བཅོས་སྐྱོང་མ་ལག་ཇི་ལྟར་འཛུགས་པ་སོགས་ཀྱི་གྲོས་གཞིར་གྲོས་བསྡུར་གཏིང་ཟབ་བྱས་པ་རེད།

ཤེས་རྟོགས་བྱུང་བར་གཞིགས་ན། 《གོ་ལ་ཧྲིལ་པོའི་བཅོས་སྐྱོང་གི་གྲོས་འགོ་སྟེ། ལག་གདང་སྦྲེལ་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པའི་ཕྱོགས་སུ་སྐྱོད་དགོས》ཞེས་པའི་དེབ་འདི་ཀྲུང་གོ་མི་དམངས་སློབ་ཆེན་གྱིས་སྒྲིག་འཛུགས་རྩོམ་འབྲི་བྱས་པ་དང་ཕྱི་རྒྱལ་སྐད་ཡིག་དཔེ་སྐྲུན་ཁང་གིས་པར་སྐྲུན་བྱས་ནས་གོ་ལ་ཧྲིལ་པོར་འགྲེམས་སྤེལ་བྱས་ཡོད། “གོ་ལ་ཧྲིལ་པོའི་བཅོས་སྐྱོང་གྲོས་འགོའི”རྒྱལ་སྤྱིའི་ཞིབ་འཇུག་མནའ་འབྲེལ་ནི་ཀྲུང་གོ་མི་དམངས་སློབ་ཆེན་གྱིས་གྲོས་འགོ་བཏོན་ནས་བཙུགས་པ་ཞིག་དང་། རྒྱལ་ཁབ་དང་ས་ཁུལ་50ཙམ་གྱི་རིགས་གཅིག་མཁས་ཅན་དང་མཁས་དབང་100ལྷག་ཙམ་མནའ་འབྲེལ་ནང་ཞུགས་ཏེ་མཉམ་དུ་ཞིབ་འཇུག་དང་། ཆ་འཕྲིན་མཉམ་སྤྱོད། རྒྱལ་སྒྲོལ་བརྒྱུད་བསྒྲགས། མི་སྣ་ཕན་ཚུན་འཚམས་འདྲི་བཅས་མཉམ་ལས་ལམ་སྲོལ་ཆེན་པོ་བཞི་བཙུགས་ནས་སྒོ་དབྱེ་དང་བསྟུན་མཁས་ཀྱི་རྒྱལ་སྤྱིའི་རིག་གཞུང་དྲ་བ་འཛུགས་རྒྱུ་རེད།