ཤིན་ཧྭ་གསར་འགྱུར་ཁང་ལྷ་ས་ནས་ཟླ་1ཚེས་24ཉིན་གློག་འཕྲིན་འབྱོར་གསལ། ཚེས་24ཉིན། གསར་འགོད་པས་2026ལོའི་བོད་རང་སྐྱོང་ལྗོངས་ཀྱི་རིག་གནས་དང་ཡུལ་སྐོར་ལས་དོན་ཚོགས་འདུའི་ཐོག་ནས་ཤེས་རྟོགས་བྱས་པར་གཞིགས་ན། 2025ལོར་བོད་ཀྱི་རིག་གནས་ཡུལ་སྐོར་ཁྲོམ་ར་རྒྱུན་མཐུད་འཁྲུག་ཏུ་སོང་ནས་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་7073.37ལ་སྣེ་ལེན་ཞུས་པ་དེ་དུས་མཚུངས་ལས་10.71%འཕར་ཡོད་པ་རེད།

གྲངས་གཞི་ལས་མངོན་པར། 2025ལོར་བོད་ཀྱི་རིག་གནས་ཡུལ་སྐོར་ཐོན་རྫས་སྔར་བས་ཕུན་སུམ་ཚོགས་སུ་ཕྱིན་པ་དང་། རིག་གནས་ཐོན་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་150.13བར་འཕར་བ་དེ་དུས་མཚུངས་ལས་35.29%འཕར་བ། ཡུལ་སྐོར་གྱི་འགྲོ་སོང་བསྡོམས་འབོར་སྒོར་དུང་ཕྱུར་816.81ཟིན་པ་དེ་དུས་མཚུངས་ལས་9.51%འཕར་ཡོད། བོད་རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གི་ཏང་ཙུའི་ཧྲུའུ་ཅི་དང་ཐིང་ཀྲང་གཞོན་པ་ཤའོ་ཁྲོན་ཅང་གིས“དགུན་དུས་བོད་དུ་ཡུལ་སྐོར་བྱེད་པ”དང“རང་སའི་ཡུལ་སྐོར”སོགས་དམངས་ཕན་སྲིད་ཇུས་རབ་དང་རིམ་པ་དང་། དེ་བཞིན་བོད་ཀྱི་ལུས་སྦྱོང་སྒོར་གཞས་དང་ཀོ་གྲུ(གྲུ་ཤན་འབྲུག་མགོ་མ)འགྲན་བསྡུར་སོགས་མི་མང་པོས་དགའ་མོས་བྱེད་པའི་དམངས་སྲོལ་བྱེད་སྒོས་རང་ས་རང་ཡུལ་གྱི་ཐོན་ཁུངས་དང་། ལས་རྣམ། ཁོར་ཡུག་བཅས་མཐུན་སྦྱོར་ངང་འཕེལ་རྒྱས་འགྲོ་བར་སྐུལ་འདེད་ཐེབས་ཡོད་ཅེས་བཤད།

ངོ་སྤྲོད་བྱས་པར་གཞིགས་ན། རྒྱལ་ཡོངས་ཀྱི་རིག་དངོས་ཡོངས་བཤེར་ཐེངས་བཞི་པར་བོད་ནས་རིག་དངོས་ས་ཚིགས་3346གསར་དུ་རྙེད་པ་དང་། གསར་དུ་རྙེད་ཚད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད། 2023ལོར་འགོ་བཙུགས་པའི་རང་སྐྱོང་ལྗོངས་ཀྱི་ཡུལ་སྐོར་ཐོན་ཁུངས་ཡོངས་བཤེར་ནང་ཡུལ་སྐོར་ཐོན་ཁུངས་ཁྲི་3.1ལྷག་ཙམ་གསར་དུ་གཏན་འཁེལ་བྱས་པའི་ཁྲོད་རིམ་པ་མཐོ་བའི་ཡུལ་སྐོར་ཐོན་ཁུངས་ཁྲི་1.35ཙམ་ཡོད། དིང་རིར་ས་ཡོམ་རིམ་པ་6.8བརྒྱབ་པར་དམིགས་ཏེ་བོད་ཀྱིས་མ་དངུལ་སྒོར་ཁྲི་1500ལྷག་ཙམ་བཏང་ནས་རིག་དངོས་སྲུང་སྐྱོང་རྣམ་གྲངས་ཁག་72ལ་དཔྱད་དཔོག་དང་ཞིབ་བཤེར་རྩིས་ལེན་བྱས་པ་རེད། “སྲུང་སྐྱོང་བྱེད་ཀྱིན་གསར་སྤེལ་དང་། གསར་སྤེལ་བྱེད་ཀྱིན་སྲུང་སྐྱོང་བྱེད་པའི”རྣམ་པ་དེ་རིགས་ཀྱིས་ཡུལ་སྐོར་གྱི་ཐོན་ཁུངས་རིམ་བཞིན་རིག་གནས་ཡུལ་སྐོར་ཐོན་རྫས་སུ་བསྒྱུར་ནས་རིག་གནས་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྒུལ་ནུས་བསྣན་ཡོད་པ་རེད།

གཞན་ཡང་། བོད་ཀྱིས་གྲངས་འཛིན་རིག་གནས་ཡུལ་སྐོར་གྱི་འདུ་འགོད་ལག་བསྟར་གཏིང་ཟབ་བྱས་ཏེ“གྲངས་རིག་པོ་ཏ་ལ”ཞེས་པའི་རིག་གནས་ཡུལ་སྐོར་མཉམ་འདྲེས་གསར་གཏོད་ཁུལ་གསར་པ་འཛུགས་སྐྲུན་ལ་སྐུལ་འདེད་བརྟན་པོ་བཏང་བ་མ་ཟད། ད་དུང་གྲངས་འཛིན་རིག་གནས་འཕྲིན་ལམ་བཏོད་པ་དང་སྤྱི་པའི་རིག་གནས་དྲ་རྒྱ་འཛུགས་སྐྱོང་བྱེད་ཤུགས་ཆེ་རུའང་བཏང་སྟེ་རིག་གནས་ཐོན་ཁུངས་ཉེ་འགྲམ་དུ་ཁྱབ་ཐུབ་པར་བྱས་ཡོད། 2025ལོའི་ལོ་མཇུག་བར་གྲངས་འཛིན་ཅན་གྱི་ཞབས་ཞུ་དེ་དག་ལས་མང་ཚོགས་མི་ཐེངས་ཁྲི་250ལྷག་ཙམ་ལ་ཕན་པ་བཏགས་ཡོད་པ་རེད།