མཚོ་སྔོན་རྨ་ལྷོ་ཀྲོའུ་ཡི་ཁྱད་ལྡན་ཞིང་ལས་ཐོན་རྫས་ལ་ཤང་ཀང་གི་སྤུས་ཚད་ཁས་ལེན་དཔང་འདོན་ཐོབ་པ།
མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། རྨ་ལྷོ་བོད་རིགས་རང་སྐྱོང་ཀྲོའུ་ཁྲོམ་ར་ལྟ་འདོམས་ཅུས་ཀྱིས་གཅན་ཚ་རྫོང་དབྱི་ཕུང་ཚགས་ཤའི་བཟའ་རིགས་ལས་སྣོན་ཐུམ་སྒྲིལ་ཕྱིར་ཚོང་ཚད་ཡོད་ཀུང་སིས་ཐོན་སྐྱེད་བྱས་པའི་ཚགས་ཤའི་ཐོན་རྫས་ལ་ཤང་ཀང་གི་ཚད་གཞི་དང་དེ་བཞིན་དཔྱད་ཞིབ་གཏན་འཁེལ་ལྟེ་གནས(ＳＴＣ)ཀྱི་སྤུས་ལེགས་ཁས་ལེན་བདེན་དཔང་ཐོབ་ཡོད་ཅེས་ཁྱབ་བསྒྲགས་བྱས་པ་དང་། དེ་ནི་རྨ་ལྷོ་ཀྲོའུ་ཡི་ཁྱད་ལྡན་ཞིང་ལས་ཐོན་རྫས་ལ་ཤང་ཀང་གི་ＳＴＣཁས་ལེན་བདེན་དཔང་ཐེངས་དང་པོ་ཐོབ་པ་ཞིག་ཡིན་པ་དང་། དེ་ལས་རྨ་ལྷོའི་སྤུས་ལེགས་ཞིང་འབྲོག་ཐོན་རྫས་ལ་ཤང་ཀང་ཙམ་མ་ཟད་ཐ་ན་རྒྱལ་སྤྱིའི་ཁྲོམ་རར་དངོས་སུ་སྤྱོད་ཆོག་པའི་ལག་ཁྱེར་རག་ནས“ས་གནས་དེ་གའི་ཐོན་སྐྱེད་དང་། ཤང་ཀང་གི་ཁས་ལེན་བདེན་དཔང་། གོ་ལ་ཧྲིལ་པོའི་ཕྱིར་ཚོང”བཅས་ཀྱི་ཐབས་ལམ་གསར་པ་གཏོད་འགོ་ཚུགས་པ་མཚོན་གྱི་ཡོད།
ཤང་ཀང་གི་ＳＴＣཁས་ལེན་བདེན་དཔང་ནི་རྒྱལ་སྤྱིའི་ཐོག་ཀུན་གྱི་ཁས་ལེན་ཐོབ་པའི་སྤུས་ཚད་ཀྱི་ཚད་གཞི་ཞིག་ཡིན་ཞིང་། དེའི་ཞིབ་དཔྱད་ཚད་ལེན་གྱི་ཚད་གཞིའི་ནང་བདེ་འཇགས་དང་། ཁོར་ཡུག་སྲུང་སྐྱོང་། ནུས་ཕྱོད་སོགས་འགག་རྩའི་དམིགས་ཚད་མང་པོ་ཚུད་ཡོད་པ་དང་། ཁས་ལེན་བདེན་དཔང་བྱས་འབྲས་གོ་ལ་ཧྲིལ་པོའི་རྒྱལ་ཁབ་དང་ས་ཁུལ་53དུ་ཕན་ཚུན་ཁས་ལེན་བྱེད་ཀྱི་ཡོད། ཁས་ལེན་བདེན་དཔང་ཐོབ་པ་དེ་ཐོག་ནས་རྨ་ལྷོའི་ཚགས་ཤའི་ཐོན་རྫས་ཀྱི་སྤུས་ཚད་རྒྱལ་སྤྱིའི་ཐོག་ཁས་ལེན་བྱེད་པའི་ཆུ་ཚད་དུ་སླེབས་པ་མཚོན་པ་དང་དེའི་ཁྲོམ་རའི་འགྲན་རྩོད་ནུས་པ་དང་སྤུས་རྟགས་ཀྱི་རིན་ཐང་མངོན་གསལ་དོད་པོས་མཐོ་རུ་ཕྱིན་ཡོད་པ་རེད།
འབྲེལ་ཡོད་གསར་འགྱུར།