ཤིན་ཧྭ་གསར་འགྱུར་ཁང་ལན་ཀྲོའུ་ནས་ཟླ་1ཚེས་26ཉིན་གློག་འཕྲིན་འབྱོར་གསལ། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཀྲོའུ་ཐེ་བོ་རྫོང་དུ་ས་ཡོམ་རིམ་པ་5.5བརྒྱབ་རྗེས་ཀན་ལྷོ་ཀྲོའུ་ཡིས་ས་ཡོམ་གནོད་འཚེའི་རིམ་པ་གསུམ་པའི་འཕྲལ་སྡོམ་ལག་ལེན་བསྟར་བ་རེད། ཐེ་བོ་རྫོང་ཨུད་དང་རྫོང་སྲིད་གཞུང་གིས་རྫོང་ཡོངས་ཀྱི་ལས་བྱེད་པ་སྒྲིག་འཛུགས་བྱས་ཏེ་ལེབ་བཤེར་རྣམ་པའི་གྲལ་བཤེར་བྱས་རྗེས་ཤེས་རྟོགས་བྱུང་བ་ལྟར་ན། མི་སྣ་ཤི་རྨས་དང་ཉེན་ཁའི་གནས་སུ་གྱར་བའི་གནས་ཚུལ་གནས་སྐབས་ཐོན་མེད་པ་དང་། རྫོང་ཡོངས་ཀྱི་ཆུ་ཤུགས་གློག་ཁང་28རྒྱུན་གཏན་ལྟར་འཁོར་སྐྱོད་བྱེད་བཞིན་ཡོད་པ་མ་ཟད། གློག་ཤུགས་དང་འཕྲིན་གཏོང་ཡང་རྒྱུན་གཏན་ལྟར་ཡིན་པ་རེད། ཡོམ་ཚོར་དྲག་པོ་བྱུང་བའི་གྲོང་ཚོ་དང་སྡེ་ཁུལ་གྱི་ཁང་པ་ཁག་གཅིག་ལ་གཏོར་སྐྱོན་ཕོག་ཡོད་པ་རེད།

ཟླ་1ཚེས་26ཉིན་གྱི་ཆུ་ཚོད་14དང་སྐར་མ་56ལ། ཀན་སུའུ་ཐེ་བོར་ས་ཡོམ་རིམ་པ་5.5བརྒྱབ་པ་དང་། ཡོམ་ལྟེ་ནི་བྱང་གི་འཕྲེད་ཐིག་ཏུའུ་34.06དང་ཤར་གྱི་གཞུང་ཐིག་ཏུའུ་103.25ཡིན་པ། ཐེ་བོ་རྫོང་གྲོང་དང་བར་ཐག་སྤྱི་ལེ་2.8ཡོད་པ་རེད། ས་ཡོམ་རྒྱག་སྐབས་ཀན་སུའུ་ཞིང་ཆེན་ལན་ཀྲོའུ་གྲོང་ཁྱེར་དང་། ཏིང་ཤིས་གྲོང་ཁྱེར། ལུང་ནན་གྲོང་ཁྱེར། ཀན་ལྷོ་བོད་རིགས་རང་སྐྱོང་ཀྲོའུ། ལིན་ཞ་ཧུད་རིགས་རང་སྐྱོང་ཀྲོའུ་བཅས་དང་དེ་བཞིན་ཉེ་འགྲམ་ཞིང་ཆེན་གྱི་ས་འབྲེལ་ས་ཁུལ་དུ་ཡོམ་ཚོར་བྱུང་ཡོད། གྲལ་བཤེར་བྱས་རྗེས་ཤེས་རྟོགས་བྱུང་བར། ཐེ་བོ་རྫོང་སྟེང་ཁ་གྲོང་རྡལ་གྱི་སྲིད་འཛིན་གྲོང་ཚོ་7དང་རང་བྱུང་གྲོང་ཚོ་49ལ་ཡོམ་ཚོར་ཅུང་དྲག་པོ་བྱུང་བའི་ཁྲོད་གྲོང་ཚོ་3དང་སྡེ་ཁུལ་2ཀྱི་ཁང་པ་ཁག་གཅིག་ལ་སེར་ག་གས་པ་དང་གྱང་གི་ས་ཕག་ལྷུངས་ཡོད་པ་རེད།

ས་ཡོམ་བརྒྱབ་རྗེས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་ལེན་བྱ་ཆེད། ཐེ་བོ་རྫོང་གིས་གྲོང་ཁྱེར་དང་གྲོང་གསེབ་ཀྱི་ཡུལ་མི་ཁྲི་2ལྷག་ཙམ་ཛ་དྲག་ངང་ཁ་བཀྲམ་པ་དང་། རྒན་གསོ་ཁང་གི་གཅིག་སྡུད་བསྙེན་བཀུར་མི་སྣ་དང་ཕྱོགས་བསྡུས་རྒན་གསོའི་ཞབས་ཞུའི་ལྟེ་གནས་ཀྱི་མི་སྣ་ཚང་མ་དུས་ཐོག་དང་བདེ་འཇགས་ངང་གནས་སྤོས་ཡོད། ས་ཡོམ་བརྒྱབ་རྗེས་Ｇ345ལམ་རྒྱུད་ཀྱི་ལམ་དུམ་ཁག་གཅིག་ཏུ་རྡོ་ཐར་ཐོར་ལྷུངས་ཡོད་པ་དེ་དག་འགྲིམ་འགྲུལ་སྐྱེལ་འདྲེན་སྡེ་ཚན་གྱིས་གཙང་སེལ་བྱས་པ་དང་གཞུང་ལམ་གཞན་དག་རྒྱུན་གཏན་ལྟར་ཤར་གཏོང་ཡིན་པ་རེད།

ས་ཡོམ་བརྒྱབ་རྗེས་ཀྲུང་གོ་ས་ཡོམ་ཅུས་ཀྱིས་འཕྲལ་དུ་རིམ་པ་བཞི་པའི་འཕྲལ་སྡོམ་ཞབས་ཞུ་སྤེལ་འགོ་བཙུགས་ཡོད། ཀན་སུའུ་ཞིང་ཆེན་མེ་ཟོན་རོགས་སྐྱོབ་སྤྱི་ཁྱབ་རུ་ཁག་དང་དྲག་ཆས་ཉེན་རྟོག་ཀན་སུའུ་སྤྱི་ཁྱབ་རུ་ཁག་གིས་ཀྱང་སྟོབས་ཤུགས་མངགས་ནས་གེགས་ཁུལ་དུ་ཉེན་སེལ་ལས་དོན་སྤེལ་བར་བསྐྱོད་པ་རེད།

ཚེས་26ཉིན་གྱི་ས་སྲོས་སུ་ཤིན་ཧྭ་གསར་འགྱུར་ཁང་གི་གསར་འགོད་པ་རླངས་འཁོར་ལ་བསྡད་དེ་ཐེ་བོ་རྫོང་ཁོངས་སུ་འབྱོར་སྐབས། ལམ་རྒྱུད་ཀྱི་ཁང་པར་སྤྱིའི་ཆ་ནས་གཏོར་སྐྱོན་ཕོག་མེད་པ་དང་། ལམ་བར་དུ་མེ་ཟོན་སོགས་ཀྱི་རོགས་སྐྱོབ་རླངས་འཁོར་ཡང་སེ་མཐོང་རྒྱུ་ཡོད། ས་གནས་དེ་གའི་ལས་བྱེད་པས་གསར་འགོད་པར་ས་གནས་དེ་གས་གནས་སྐབས་བཀོད་སྒྲིག་བྱ་ཡུལ་བཀོད་སྒྲིག་བྱས་ཟིན་པ་དང་། ལས་བྱེད་པ་དང་མང་ཚོགས་ཚོས་ཀྱང་མཉམ་དུ་གུར་རྒྱག་བཞིན་ཡོད། ཉལ་ཆས་དང་། ལྕགས་ཐབ། རྡོ་སོལ་སོགས་འཕྲལ་སྡོམ་དངོས་ཟོག་གཅིག་རྗེས་གཉིས་མཐུད་ངང་འབྱོར་བཞིན་ཡོད་ཅེས་བཤད།