འདི་ནི་ཆབ་མདོ་གྲོང་ཁྱེར་ཁ་རུབ་ཆུས་ཞིབ་དཔྱོད་ཁང་གི་ལས་མིས་དྲིལ་བསྒྲགས་ལག་དེབ་སྤྲོད་བཞིན་པ།

འབྲི་ཆུ་དང་། རྒྱལ་མོ་རྔུལ་ཆུ། ཟླ་ཆུ་བཅས“གཙང་པོ་གསུམ”ལང་ལོང་དུ་རྒྱུག་པ་དང་། རྩ་ཆེའི་སྲོག་ཆགས་གསའ་སོགས་འཚོ་གནས་བྱེད་པའི་བོད་ཤར་གྱི་མུ་ཏིག་ལྟ་བུའི་ཆབ་མདོ་གྲོང་ཁྱེར་ནི་སྐྱེ་ཁམས་ཀྱི་གནས་ཡུལ་བཟང་པོ་ཞིག་རེད། སྐྱེ་ཁམས་བཟང་པོ་དེར་སྲུང་སྐྱོབ་བྱེད་པའི་ཐོག་མཐའ་བར་གསུམ་དུ་ཞིབ་དཔྱོད་པའི་གཟུགས་བརྙན་གནས་མུས་རེད། ཁོང་ཚོས་སྤུས་ཚད་དང་ནུས་ཕྱོད་གཉིས་ལྡན་གྱི་སྤྱི་ཕན་གཏུག་བཤེར་ཞིབ་དཔྱོད་ལ་བརྟེན་ནས་འགན་འཁྲི་བསྒྲུབས་ཏེ། བོད་ཤར་ཁུལ་གྱི་སྐྱེ་ཁམས“དར་རྒྱས”དང“མཛེས་པོ”ཡོང་བར་ཁྲིམས་འཛིན་གྱི་སྲུང་བཅད་བརྟན་པོ་ཞིག་ནུས་ཤུགས་ཡོད་རྒུས་བསྐྲུན་ཡོད།

“འདི་གར་གནའ་བོའི་ཤིང་སྡོང་མང་པོ་ཞིག་ལ་སྲུང་སྐྱོབ་བྱེད་མཁན་མི་འདུག ཁྱེད་ཚོས་དོན་དག་དེར་ཇུས་གཏོགས་བྱེད་ཀྱི་རེད་དམ”ཞེས་2025ལོའི་ཟླ་གསུམ་པའི་ཟླ་འགོར། སྤྱི་གླིང་ཤང་མང་ཚོགས་ཀྱིས་དཔལ་འབར་རྫོང་གི་ཞིབ་དཔྱོད་ཞབས་ཞུའི་ཐད་སྦྲེལ་ཁ་པར་12309ལ་འབྲེལ་བ་བྱས་ནས་གནད་དོན་དེ་སྙན་སེང་ཞུས།

དཔལ་འབར་རྫོང་སྤྱི་གླིང་ཤང་དང་དཔལ་འབར་གྲོང་རྡལ་གྱི་ས་ཁོངས་སུ་གནའ་བོའི་གླ་ཚེར་དང་ཆབ་མདོའི་སྦྱར་ལྕང་མང་པོ་སྐྱེས་ཡོད་ཅིང་། ཤིང་སྡོང་དེ་ཚོའི་ལོ་ཚད་ལོ་101ནས་485བར་ཟིན་གྱི་ཡོད། འོན་ཀྱང་ཤིང་སྡོང་ཁག་གཅིག་ལ་སྲུང་སྐྱོབ་ཀྱི་བྱང་བུ་བཀལ་མེད་པ་དང་། རྒྱུན་གཏན་གྱི་དོ་དམ་དང་སྲུང་སྐྱོང་བྱ་ཐབས་མི་འདང་བ། གཙོ་གཉེར་སྡེ་ཚན་གྱི་འགན་འཁྲི་དོན་འཁྱོལ་ཡག་པོ་མ་ཐུབ་པ་སོགས་གནའ་བོའི་ཤིང་སྡོང་དེ་དག་གི་སྐྱེ་འཚར་ལ་འགོག་རྐྱེན་མང་པོ་འཕྲད་བཞིན་ཡོད།

ཁུངས་སྣེ་ཤེས་རྟོགས་བྱུང་རྗེས། དཔལ་འབར་རྫོང་མི་དམངས་ཞིབ་དཔྱོད་ཁང་གིས་འཕྲལ་དུ་གྱོད་དོན་ཐོ་འགོད་བྱས་ནས་བརྟག་དཔྱད་བྱས་པ་རེད། ལྟ་སྐུལ་གྱི་གནད་སྨིན་རང་བཞིན་འགན་ལེན་བྱ་ཆེད། ཞིབ་དཔྱོད་ཁང་དེས་བོད་ལྗོངས་ཞིང་འབྲོག་སློབ་ཆེན་གནའ་བོའི་ཤིང་སྡོང་གི་རིགས་གཅིག་མཁས་ཅན་ཚོགས་པ་གདན་དྲངས་ནས་ཡུལ་དེ་གར་བསྐྱོད་དེ་གནའ་བོའི་ཤིང་སྡོང་ལ་དཔེ་ལེན་ཞིབ་དཔྱད་བྱས་པ་དང་འབྲེལ་རིགས་གཅིག་མཁས་ཅན་གྱི་བསམ་འཆར་ཡང་བཏོན་པ་རེད།

2025ལོའི་ཟླ་9པར། དཔལ་འབར་རྫོང་མི་དམངས་ཞིབ་དཔྱོད་ཁང་གིས་སྲིད་འཛིན་སྤྱི་ཕན་གྱི་གཏུག་བཤེར་བྱས་ནས་སྲིད་འཛིན་ལས་ཁུངས་ལ་དུས་ཐོག་ཏུ་བཅོས་སྒྲིག་བྱེད་དུ་བཅུག་པས། ལོ་བརྒྱའི་གནའ་བོའི་ཤིང་སྡོང་དེ་དག་ལ་སྲུང་སྐྱོང་ཡག་པོ་ཐུབ་སྟེ་སླར་ཡང་གསོན་ཤུགས་རྒྱས་ཡོད།

ཆབ་མདོ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་སྐྱེ་དངོས་སྣ་མང་རང་བཞིན་སྲུང་སྐྱོང་བྱ་རྒྱུ་དེ་སྤྱི་ཕན་གཏུག་བཤེར་གྱི་གཙོ་གནད་ཁ་ཕྱོགས་སུ་བརྩིས་ནས། ཁྲིམས་འཛིན་ལ་བརྟེན་ཏེ་སྐྱེ་ཁམས་སྲུང་བཞིན་ཡོད། 2023ལོ་ཚུན་དུ། ཉེས་དོན་ཞོར་འབྲེལ་དམངས་དོན་སྤྱི་ཕན་གཏུག་བཤེར་གྱོད་གཞི་ཁྱོན་25གྱོད་དོན་ཐོ་འགོད་བྱས་ནས་བསྒྲུབས་པའི་ནང་རྩ་ཆེ་ཞིང་སྟོངས་ལ་ཉེ་བའི་རི་སྐྱེས་སྲོག་ཆགས་ལ་གནོད་འཚེ་བཏང་བའི་གྱོད་གཞི་10དང་ཤིང་སྡོང་ལྐོག་གཅོད་བྱས་པའི་གྱོད་གཞི་15ཡོད་པར་ཁྲིམས་ཁང་གི་འདྲི་གཅོད་དང་པོའི་དཔྱད་གཅོད་ཀྱི་རྒྱབ་སྐྱོར་100%ཐོབ་པ་དང་། དོ་བདག་ལ་རྒྱལ་ཁབ་ཀྱི་ཐོན་ཁུངས་འཕྲོ་བརླག་བཏང་བའི་གྲོན་དངུལ་ཁྱོན་སྒོར་ཁྲི་37.12སྐྱིན་ཚབ་འཇལ་བ་དང་། ཤིང་སྡོང་1552གསབ་འདེབས་བྱེད་དུ་བཅུག་པ་རེད།

2024ལོར་རྒྱལ་ལམ་317དང་318(ཆབ་མདོ་དུམ་བུ)ལམ་རྒྱུད་དུ་འཚོ་བའི་གད་སྙིགས་གང་བྱུང་དུ་སྤུངས་པའི་གནད་དོན་ལ་དམིགས་ནས། ཆབ་མདོ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་ཆེད་དོན་བཅོས་སྒྲིག་བྱེད་སྒོ་སྤེལ་ཏེ། སྒྲིག་སྲོལ་དང་འགལ་ནས་འཚོ་བའི་གད་སྙིགས་དབྱུགས་པ་དང་། སྤུང་བ། མེར་སྲེག་པ་བཅས་ཀྱི་བྱེད་སྤྱོད་གཅིག་སྡུད་བཅོས་སྒྲིག་བྱས་པ་རེད། ཆེད་དོན་བཅོས་སྒྲིག་བྱེད་སྒོ་དེ་ལྗོངས་ཡོངས་ཀྱི་ཞིབ་དཔྱོད་ལས་ཁུངས་ཀྱི་2024ལོའི་སྐྱེ་ཁམས་ཁོར་ཡུག་སྲུང་སྐྱོང་ཁྱབ་ཁོངས་དང་འབྲེལ་བའི་དཔེ་མཚོན་གྱོད་དཔེར་བདམས་ཤིང་དེའི་ཉམས་མྱོང་ལྗོངས་ཡོངས་ཀྱི་ཁྱབ་ཁོངས་སུ་ཁྱབ་གདལ་བཏང་ཡོད།

2023ལོ་ཚུན་དུ། ཆབ་མདོ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་གཉེར་བའི་ས་འོག་ཚ་ནུས་ཆུའི་ཐོན་ཁུངས་སྲུང་སྐྱོང་ལ་སྐུལ་འདེད་གཏོང་བའི་གྱོད་གཞི་དང་། གནའ་བོའི་ཤིང་སྡོང་སྲུང་སྐྱོང་གི་འགན་འཁྲི་ལག་བསྟར་ལ་སྐུལ་འདེད་གཏོང་བའི་གྱོད་གཞི་སོགས་གྱོད་གཞི་མང་པོ་ཞིག་སྔ་རྗེས་སུ་ཆེས་མཐོའི་མི་དམངས་ཞིབ་དཔྱོད་ཁང་དང་རང་སྐྱོང་ལྗོངས་མི་དམངས་ཞིབ་དཔྱོད་ཁང་གིས་དཔེ་མཚོན་གྱོད་དཔེའམ་ཡང་ན་སྤུས་ཕན་གཉིས་ལྡན་གྱི་གྱོད་དཔེར་བདམས་པ་རེད།

ཉེ་བའི་ལོ་ཤས་རིང་། ཆབ་མདོ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་སྲིད་གཞུང་དང་ཞིབ་དཔྱོད་ལས་ཁུངས་ཀྱི་མཉམ་འགུལ་ལམ་སྲོལ་ཧུར་ཐག་བཙུགས་པ་དང་། སྐྱེ་ཁམས་ཁོར་ཡུག་དང་ནགས་ལས་རྩྭ་ཐང་སོགས་སྡེ་ཚན་དང་སྲིད་འཛིན་ཁྲིམས་སྒྱུར་དང་ཉེས་དོན་ཁྲིམས་འཛིན་སྦྲེལ་མཐུད་ལམ་སྲོལ་དང་། སྲིད་འཛིན་ཁྲིམས་སྒྱུར་དང་སྤྱི་ཕན་གཏུག་བཤེར་ཞིབ་དཔྱོད་ལས་དོན་སྦྲེལ་མཐུད་ལམ་སྲོལ་བཙུཌ་པ་དེ་ལས་སྐྱེ་ཁམས་བཅོས་སྐྱོང་གི་ལས་ཕྱོད་ཆེ་རུ་ཕྱིན་པ་མ་ཟད། ཁྲིམས་སྐྱོང་སྲིད་གཞུང་འཛུགས་སྐྱོང་ལ་དེ་བས་སྐུལ་འདེད་ཐུབ་སྟེ་སྐྱེ་ཁམས་སྲུང་སྐྱོང་གི་འགན་འཁྲི་སྡེ་ཚན་རེ་རེ་དང་ལྷུ་ཚིགས་ཚང་མར་དངོས་སུ་དོན་འཁྱོལ་ཐུབ་ཡོད།

བོད་ཤར་ཁུལ་གྱི་ས་ཆ་སྐྱིད་པོ་འདིར“ཞིབ་དཔྱོད་པ”དང“སྐྱེ་ཁམས་ལྗང་མདོག”ཕན་ཚུན་གཅིག་ལ་གཅིག་བརྒྱན་བྱས་ནས་སྐྱེ་ཁམས་དར་རྒྱས་དང་མི་སེར་འབྱོར་ཕྱུག་ཡོང་བའི་གཏམ་རྒྱུད་བརྩམས་དང་རྩོམ་བཞིན་ཡོད།