དགུན་གསེང་རིང་ཁྲེང་ཀོན་ཆུས་ཀྱིས་ཁོངས་གཏོགས་ཁུལ་གྱི་བཟའ་མི་གཉིས་ཀ་ལས་བྱེད་ལས་བཟོ་ཡིན་པའི་ཁྱིམ་ཚང་གི་ཕྲུ་གུར་བཅོལ་ཉར་ལྟ་སྐྱོང་གི་ཞབས་འདེགས་ཞུས་ཤིང་། འདི་ནི་ཕྲུ་གུ་ཚོས་རང་ཉིད་ཀྱི་རི་མོའི་བརྩམས་ཆོས་སྟོན་བཞིན་པ།

འདི་ནི་ཁྲེང་ཀོན་ཆུས་ཀྱིས“ཀྲི་པུའུ་སྟོང་དང་ཏང་ཡོན་ཁྲི”སྡེ་ཁུལ་དུ་བསྐྱོད་ནས་ཞབས་ཞུའི་འབྱོར་ཐོ་འགོད་བཞིན་པ།

འདི་ནི་ཁྲེང་ཀོན་ཆུས་ཀྱིས་ལོ་ན་མཐོ་བའི་རྒན་རྒོན་ལ་གནས་ངེས་མགུལ་རྒྱན་སྤྲོད་བཞིན་པ།

ཞོགས་པའི་ཉི་གཞོན་ལྷ་ས་གྲོང་ཁྱེར་ཁྲེང་ཀོན་ཆུས་རྩེ་ཤིང་སྡེ་ཁུལ་ཏང་དམངས་ཞབས་ཞུ་ལྟེ་གནས་ལ་འཕྲོས་ཤིང་། ལོ་75ལ་སླེབས་པའི་བགྲེས་སོང་དོན་གྲུབ་ཀྱིས་དང་བླངས་པའི་རོགས་རམ་འོག གསར་དུ་བསྒར་བའི“མཐེབ་གཅིག་འབོད་བརྡའི”སྒྲིག་ཆས་དལ་པོར་མནན་པ་དང་། “ཏི་ཏི་ཏི”ཞེས་པའི་སྒྲ་གྲགས་མ་ཐག་སྡེ་ཁུལ་གྱི་སྨན་པས་དེ་མ་ཉིད་དུ་ཁ་པར་བླངས། “སྤོ་བོ་དོན་གྲུབ་ལཌ། དེ་རིང་ཁྱེད་ཀྱི་ཁྲག་ཤེད་འཇལ་བའི་དུས་ལ་སླེབས་འདུག ང་ལམ་སེང་སླེབས་ཡོང”ཞེས་པའི་དྲོ་སྐྱིད་ལྡན་པའི་རྣམ་པ་དེ་ནི་ཁྲེང་ཀོན་ཆུས་ཀྱིས“ལྔ་ལྔའི་ལས་ཀའི་བྱ་ཐབས”མུ་མཐུད་གཏིང་ཟབ་ཏུ་གཏོང་བ་དང་གཞི་རིམ་བཅོས་སྐྱོང་གི་ཕན་འབྲས་ཆེ་རུ་གཏོང་བར་སྐུལ་འདེད་གཏོང་བའི་གསོན་ཉམས་ལྡན་པའི་མཚོན་ཚུལ་ཞིག་རེད།

2025ལོ་ནས་བཟུང་། ཁྲེང་ཀོན་ཆུས་ཀྱིས་བརྒྱུད་རིམ་ལྡན་པའི་འཆར་འགོད་ལ་བརྟེན་ནས་གཞི་རིམ་བཅོས་སྐྱོང་རྒྱུན་རྣམ་ཅན་དང་ཕུགས་ཕན་ཅན་གྱི་ཕན་འབྲས་མངོན་འགྱུར་ཡོང་བར་སྐུལ་འདེད་བཏང་བར། ཏང་འཛུགས་སྐྱོང་གིས་ཁྲིད་སྟོན་གང་ལེགས་ཐུབ་པ་དང་། ཞབས་འདེགས་གནད་སྨིན་ཞུ་ཐུབ་པ། སྟོབས་ཤུགས་སྣ་མང་གཅིག་ཏུ་བསྒྲིལ་བའི་རྣམ་པ་གསར་པ་ཞིག་གྲུབ་ཡོད།

རྩ་འཛུགས་ཀྱི་སྟོབས་ཤུགས་གཞི་རིམ་དུ་མཉམ་འདྲེས་གཏིང་ཟབ་བྱས་ཤིང་། འོ་བརྒྱལ་ཐང་སྡེ་ཁུལ་དུ་ཏང་ཡོན་གྱི་ལྟེ་བའི་དུད་ཚང་སྤེན་པའི་སྒོ་འགྲམ་གྱི་མཚོན་རྟགས་དམར་པོ་དེ་མངོན་གསལ་ཤིན་ཏུ་དོད། ཁོང་གི་ཟིན་བྲིས་ཐོག་ཁྱིམ་མཚེས་ཀྱི་དོན་དག་ཆུང་ཆུང་དང་དགོས་མཁོ་མང་དག་བྲིས་ཡོད་པ་དང་། ཐག་གཅོད་བྱེད་ཐུབ་ན་འཕྲལ་མར་མཐུན་སྦྱོར་བྱེད་པ་དང་ཐག་གཅོད་བྱེད་མི་ཐུབ་པའི་རིགས་ལག་ཐོགས་ཁ་པར་གྱི་ＡＰＰབརྒྱུད་ནས་གོང་ཞུ་བྱེད་དགོས་ཀྱི་ཡོད། 2025ལོར་ཁྲེང་ཀོན་ཆུས་སུ་སྤེན་པ་ལྟ་བུའི་ཏང་ཡོན་གྱི་ལྟེ་བའི་དུད་ཚང་3600ལྷག་ཙམ་མང་དུ་ཕྱིན་པ་དང་། ཁོང་ཚོ་འཁྲུག་ཆ་དོད་པའི“མཐའ་སྣེ”དང་འདྲ་བར་ཏང་རྩ་འཛུགས་ཀྱི་སྣེ་མོ་གང་སར་བསྲིངས་ཡོད།

བཅོས་སྐྱོང་ཞིབ་ཚགས་བྱེད་པ་དེ“ས་ཁྲ་གསོན་པོ”རེ་རེའི་ཐོག་ནས་མངོན་ཞིང་། རྗེ་འབུམ་སྒང་ཁྲོམ་གཞུང་གི་དྲ་མིག་པ་ལྷ་མོར་གཅེས་ནོར་ཞིག་ཡོད་པ་དེ་ནི་ཁོ་མོ་སོ་སོས་བྲིས་པའི“དམངས་ཀྱི་གནས་ཚུལ་མཚོན་པའི་ས་ཁྲ”ཡིན་ཞིང་། དེའི་ཐོག་ཁྱིམ་ཚང་སོ་སོའི་གནས་ཚུལ་དང་མངོན་མེད་རྐྱེན་ངན་ཞིབ་ཕྲ་བཀོད་ཡོད་པ་དེ་རེད། “ས་ཁྲ་འབྲི་བའི་བརྒྱུད་རིམ་ནི་དམངས་ཀྱི་གནས་ཚུལ་ལ་རྒྱུས་ལོན་ཁ་གསལ་བྱེད་པའི་བརྒྱུད་རིམ་ཞིག་རེད”ཅེས་ལྷ་མོས་བརྗོད། འདི་འདྲའི་འདྲི་རྩད་གཏིང་ཟབ་དང“དམར་པོ་དང་། སེར་པོ། ལྗང་གུ”བཅས་ཚོན་མདོག་གསུམ་གྱི་འགུལ་རྣམ་དོ་དམ་བྱེད་སྟངས་བརྒྱུད། ཁྲེང་ཀོན་ཆུས་ཀྱིས་2025ལོར་རིམ་རྩིས་བརྒྱབ་ན་ཉེན་ཁ་དང་མངོན་མེད་རྐྱེན་ངན་ཁག་1300ལྷག་ཙམ་ཞིབ་བཤེར་ཐག་གཅོད་བྱས་པར་འདུམ་འགྲིག་ཐུབ་ཚད་97%ཟིན་ཡོད་པ་རེད།

ཞབས་ཞུའི་དྲོ་སྐྱིད་མང་ཚོགས་ཀྱི་སེམས་སུ་ཐད་ཀར་བསྐྱལ་ཞིང་། ཉིན་གུང་གི་དུས་སུ་རྨེ་རུ་སྡེ་ཁུལ་གྱི“བདེ་སྐྱིད་ཟ་ཁང”ནས་ཁ་ལག་གི་དྲི་ཞིམ་ལྷང་ལྷང་དུ་འཐུལ་བ་དང་། མི་ཧྲེང་རྒན་རྒོན་ཚེ་རིང་གིས་རྒན་རྒོན་གྱི་བྱང་བུ་སྤྱད་ན་སྒོར་ལྔ་ལས་སྤྲོད་དགོས་མེད་པའི་དགུང་ཟས་བྲོ་བ་ཞིམ་པོ་ཞིག་བཟས། ཁྲེང་ཀོན་ཆུས་ཀྱིས་བསྐྲུན་པའི་སྡེ་ཁུལ་གྱི་ཟ་ཁང་17གྱིས་རིམ་རྩིས་བརྒྱབ་ན་གྲོང་མི་མི་ཐེངས་ཁྲི་3.2 ལ་ཞབས་འདེགས་ཞུས་པ་དང་། སྤྱི་ཕན་སློབ་ཚན་སྣ་ཚོགས་འཚོགས་ཏེ་བྱིས་པ་7500ལྷག་ཙམ་ལ་བཅོལ་ཉར་ལྟ་སྐྱོང་བྱས་ནས་དམངས་འཚོའི་དོ་ཁུར་དེ་སྙིང་ཉེ་བའི་བྱ་སྤྱོད་ལ་དངོས་སུ་བསྒྱུར་ཡོད།

ཚན་རྩལ་གྱི་བློ་རིག་གིས་རྒྱུན་གཏན་གྱི་འཚོ་བར་སྐད་གྲགས་མེད་པར་ལེགས་སྐྱེས་འབུལ་བཞིན་ཡོད་ཅིང་། ཁྲེང་ཀོན་ཆུས་ཀྱིས་དོན་གྲུབ་དང་འདྲ་བའི་རྒན་རྒོན་ལ“མཐེབ་གཅིག་འབོད་བརྡའི” སྒྲིག་ཆས་བསྒར་བ་མ་ཟད། ད་དུང་དམིགས་བསལ་བྱིས་པ་87ལ་བརླགས་ན་གནས་གང་དུ་ཡོད་མེད་གཏན་འཁེལ་བྱེད་པའི་གནས་ངེས་ཉིང་ལྷེབ་བསྒར་ཏེ། ཚན་རྩལ་ལ་བརྟེན་ནས“རྒན་གཅིག་གཞོན་གཅིག”གི་བདེ་འཇགས་ལ་སྲུང་སྐྱོང་བརྟན་པོ་བྱས་ཡོད།

མཉམ་བཅོས་ཀྱི་སྟོབས་ཤུགས་དེ་སྣ་མང་ཞུགས་པའི་ཁྲོད་ཆེ་རུ་སོང་ཞིང་། མངག་ཚོང་སྐྱེལ་མཁན་བཀྲ་ཤིས་ལ“སྐོར་སྐྱོད་དྲ་མིག་པ”ཞེས་པའི་ཐོབ་ཐང་གསར་པ་ཞིག་ཡོད། ཁོང་གིས་ཁ་ལག་སྐྱེལ་བའི་ལམ་བར་དུ་མེ་གསོད་བགྲོད་ལམ་གང་བྱུང་བཟུང་བ་ཤེས་རྟོགས་བྱུང་སྟེ། དེ་འཕྲལ་པར་བརྒྱབ་ནས་བསྐུར་བས་གནད་དོན་མགྱོགས་མྱུར་ཐག་གཅོད་ཐུབ་ཡོད། ཁྲེང་ཀོན་ཆུས་སུ་བཀྲ་ཤིས་དང་འདྲ་བའི་ལས་ཞུགས་ཚོགས་པ་གསར་པ་300ལྷག་ཙམ་གྲོང་ཁྱེར་གྱི“སྐོར་སྐྱོད་དོ་དམ་པར”གྱུར་ཡོད། གནའ་བོའི་སྲང་ལམ་དུ་ལས་བྲལ་དང་རྒན་ཡོལ་ཞུས་པའི་ལས་བྱེད་པ་རྒན་གྲས་ལས་གྲུབ་པའི“དབུ་དཀར་བྱ་སྤྱོད”ཞབས་ཞུ་རུ་ཁག་གིས་ཁྱིམ་མཚེས་དབར་གྱི་རྩོད་གཞི་འདུམ་འགྲིག་བྱེད་བཞིན་ཡོད་པ་དང་། “སྒྲོལ་མ་འདུམ་འགྲིག་ཁང”དང“སྐོར་སྐྱོད་རྐུབ་སྟེགས་ཆུང་ཆུང”སོགས་མང་ཚོགས་ཀྱི་རང་སྐྱོང་སྤུས་རྟགས་37གྱིས་གྲོང་མི་རང་ཉིད་ཀྱིས་ཉེ་འགྲམ་གྱི་གནད་དོན་ཁག་2000ལྷག་ཙམ་ཐག་གཅོད་བྱེད་པར་ཁྲིད་སྟོན་བྱས་ཡོད།

ཏང་ཡོན་གྱི་ལྟེ་བའི་དུད་ཚང་གི་ཞབས་ཞུ་ཞིབ་ཚགས་ནས་ལག་པས་བྲིས་པའི་དྲ་བའི་དོ་དམ་གནད་སྨིན་བར་དང་། སྡེ་ཁུལ་གྱི་ཟ་ཁང་ཚ་སོབ་སོབ་ནས་རིག་ནུས་སྒྲིག་ཆས་ཀྱི་སྨྲ་བ་མེད་པའི་སྲུང་སྐྱོང་བར། དེ་ནས་མི་དཀྱུས་མ་གྲངས་མེད་རང་འགུལ་ངང་ཞུགས་པའི་བར་བཅས། ཁྲེང་ཀོན་ཆུས་ཀྱི་མ་ལག་གིས“ལྔ་ལྔའི་ལས་ཀའི་བྱ་ཐབས”ལ་སྐུལ་འདེད་བཏང་བས། “ཁེར་རྐྱང་དམག་འཐབ”ནས“མ་ལག་འདུས་གྲུབ”དང་། “དོ་དམ་གཙོ་བོར་འཛིན་པ”ནས“ཞབས་ཞུ་གོང་དུ་བཀུར་བའི”བར་གྱི་འགྱུར་ལྡོག་ཟབ་མོ་མངོན་འགྱུར་བྱུང་ཡོད།