བོད་ལྗོངས་དང་ཡུན་ནན་གཞོན་ནུས་ལག་གདང་སྦྲེལ། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ།
ལྷ་སའི་ལོ་ཆུང་གདོང་ལེན་རུ་མིའི་དགུན་སྒར་བྱེད་སྒོ་སྤེལ་བ།
ཉེ་ཆར། ལྷ་ས་གྲོང་ཁྱེར་ལོ་ཆུང་བྱིས་པའི་བྱེད་སྒོ་ལྟེ་གནས་ཀྱིས་ཁུན་མིང་གྲོང་ཁྱེར་ལོ་ཆུང་བྱིས་པའི་བྱེད་སྒོ་ལྟེ་གནས་དང་མཉམ་དུ“བོད་ལྗོངས་དང་ཡུན་ནན་གཞོན་ནུས་ལག་གདང་སྦྲེལ། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ”ཞེས་པའི་བརྗོད་དོན་གཙོ་བོའི་དགུན་སྒར་བྱེད་སྒོ་སྤེལ་ཏེ། ལག་ལེན་ལ་བརྟེན་ནས་མི་གསོ་སྐྱོང་གིས་མི་རིགས་ཁག་གི་གཞོན་ནུ་ལོ་ཆུང་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པར་སྐུལ་འདེད་བཏང་སྟེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟབ་ཏུ་བཏང་བ་རེད།
ད་ཐེངས་ཀྱི་དགུན་སྒར་ནང་བོད་རིགས་དང་། རྒྱ་རིགས། ཧུད་རིགས། འཇང་རིགས། ཧོར་རིགས་སོགས་མི་རིགས་བཅུ་ལྷག་ཙམ་གྱི་ལོ་ཆུང་བྱིས་པ་ཞུགས་ཡོད་པ་དང་། བྱེད་སྒོ་ཕུན་སུམ་ཚོགས་ཤིང་ཁྱད་ཆོས་ཆེན་པོ་ལྡན་ཡོད། ཕྲུ་གུ་རྣམས་སྔ་རྗེས་སུ་ཡུན་ནན་མི་རིགས་རྟེན་མཛོད་ཁང་དང་། མི་རིགས་གྲོང་ཚོ། ཡུན་ཙི་རྟེན་མཛོད་ཁང་བཅས་སུ་བསྐྱོད་དེ་ཡུན་ཙི་བཟོ་རྩལ་ཐད་དབྱིངས་ཞུགས་རྣམ་པའི་ཉམས་ལེན་བྱས་པ་དང་། མཐར་ཁུན་མིང་གི་གཞོན་ནུ་ལོ་ཆུང་བྱེད་སྒོ་ལྟེ་གནས་སུ་འཛོམས་ནས་བརྗོད་དོན་གཙོ་བོའི་མཉམ་འགུལ་བྱེད་སྒོ་སྣ་ཚོགས་ནང་ཞུགས་པ་རེད།
ལག་ལེན་གྱི་ཉམས་ལེན་སྣ་ཚོགས་ཀྱིས་མི་རིགས་ཁག་གི་གཞོན་ནུ་ཚོར་མཛའ་གཅུགས་ཀྱི་འབྲེལ་ཟམ་བསྐྲུན་ཞིང་། ལྟ་སྐོར་སློབ་སྦྱོང་དང་ལག་པ་འགུལ་བའི་ལག་ལེན་གྱི་བརྒྱུད་རིམ་ཁྲོད། ཕྲུ་གུ་ཚོ་ཕན་ཚུན་དབར་སྤེལ་རེས་དང་རོགས་རམ་བྱས་པ་ལས་མི་རིགས་མི་འདྲ་བའི་རིག་གནས་ཤེས་ཚད་ཟབ་ཏུ་ཕྱིན་པ་མ་ཟད། ཕན་ཚུན་དབར་གྱི་མཛའ་བརྩེའང་ཟབ་ཏུ་སོང་བ་རེད།
ད་ཐེངས་ཀྱི་དགུན་སྒར་བྱེད་སྒོས་ལག་ལེན་ཁྲོད་ལོ་ཆུང་གདོང་ལེན་རུ་ཁག་གསོ་སྐྱོང་བྱེད་པའི་འགན་འཁྲི་དོན་འཁྱོལ་ལ་གཞི་བཙུགས་ཏེ“མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི”འདུ་ཤེས་ཕྲུ་གུ་ཚོའི་སེམས་རྒྱུད་དུ་གཏིང་ཟབ་འཇགས་པར་བྱས་ཡོད། གཙོ་གཉེར་ཕྱོགས་ཀྱིས། བྱེད་སྒོ་འདི་རིགས་གོ་སྐབས་སུ་བརྩིས་ནས་འབྲེལ་འདྲིས་ཁྲོད་མི་རིགས་ཁག་གི་ལོ་ཆུང་དབར་བརྩེ་དུང་ཟབ་མོ་ཆགས་པ་དང་། ཁོ་ཚོ་མི་རིགས་མཐུན་སྒྲིལ་གྱི་ཕོ་ཉ་ཆུང་ཆུང་ཞིག་ཏུ་གྱུར་པ་བྱས་ཏེ། གཞོན་ནུ་ལོ་ཆུང་གི་ཡིད་ཀྱི་ཞིང་སར་མི་རིགས་མཐུན་སྒྲིལ་གྱི་མེ་ཏོག་རྟག་ཏུ་བཞད་ཐུབ་པའི་རེ་བ་ཡོད་ཅེས་བརྗོད།
འབྲེལ་ཡོད་གསར་འགྱུར།