བརྗིད་ཆེའི་འཆར་གཞི་དོན་དངོས་ལ་འགྱུར་བར་འབད་བརྩོན་བྱེད་ཀྱི་ཡིན།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུའུ་རིམ་པའི་ཆེད་དོན་བགྲོ་གླེང་འཛིན་གྲྭ་སློབ་འགོ་ཚུགས་པའི་མཛད་སྒོའི་ཐོག་གནང་བའི་གསུང་བཤད་གལ་ཆེན་གྱིས་ཁ་ཕྱོགས་གསལ་སྟོན་དང་མི་སེམས་ལ་སྐུལ་མ་ཐེབས་པ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཆེད་དོན་བགྲོ་གླེང་འཛིན་གྲྭ་སློབ་འགོ་ཚུགས་པའི་མཛད་སྒོའི་ཐོག་གསུང་བཤད་གལ་ཆེན་གནང་ནས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་འཐབ་ཇུས་བཀོད་སྒྲིག་ཕྱོགས་ཡོངས་དང་། གཏིང་ཟབ། ཡང་དག་བཅས་ཀྱི་སྒོ་ནས་གོ་བ་ལེན་པ་དང་ཁོང་དུ་ཆུད་པ་སོགས་ཀྱི་གནད་དོན་གལ་ཆེན་ལ་རྒྱས་བཤད་གཏིང་ཟབ་གནང་བ་མ་ཟད། བླང་བྱའང་ཁ་གསལ་བཏོན་ཡོད།
ཉིན་ཤས་བསྟུད་མར། རྒྱ་ཆེའི་ཏང་ཡོན་ལས་བྱེད་པ་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ཏེ། “གཏན་འཁེལ་གཉིས”ལ་བརྩི་བཀུར་མཐའ་གཅིག་ཏུ་ཞུ་བ་དང་། “སྲུང་སྐྱོང་གཉིས”མཐའ་གཅིག་ཏུ་ཐུབ་པ། འཐབ་ཇུས་ཀྱི་ངེས་ཤུགས་རྒྱུན་འཁྱོངས། རྒྱལ་ཁ་ཐོབ་ངེས་ཀྱི་གདེང་ཚོད་ཆེ་རུ་གཏོང་བ། ཐེག་པ་འཁུར་ལེན་ཧུར་ཐག་བཅས་བྱས་ཏེ་བརྗིད་ཆེའི་འཆར་གཞི་དོན་དངོས་ལ་འགྱུར་བར་འབད་བརྩོན་བྱེད་ཀྱི་ཡིན་ཞེས་བཤད།
ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་འཐབ་ཇུས་བཀོད་སྒྲིག་ཕྱོགས་ཡོངས་དང་། གཏིང་ཟབ། ཡང་དག་བཅས་ཀྱི་སྒོ་ནས་གོ་བ་ལེན་པ་དང་ཁོང་དུ་ཆུད་པ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འཐབ་ཇུས་བཀོད་སྒྲིག་གནང་ཡོད་པས་ཕྱོགས་ཡོངས་དང་། གཏིང་ཟབ། ཡང་དག་བཅས་ཀྱི་སྒོ་ནས་གོ་བ་ལེན་པ་དང་ཁོང་དུ་ཆུད་པར་བྱེད་དགོས་ཞེས་ནན་བཤད་གནང་ཡོད།
“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས‘ཕྱོགས་ཡོངས’དང་། ‘གཏིང་ཟབ’ ‘ཡང་དག’བཅས་ལ་རྒྱས་བཤད་གཏིང་ཟབ་གནང་ནས་ང་ཚོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་བྱེད་པར་ཚན་རིག་དང་མཐུན་པའི་མཛུབ་ཁྲིད་གནང་ཡོད” ཀོང་ཤིས་ཀྲོང་རིགས་རང་སྐྱོང་ལྗོངས་ཏང་ཨུད་ཏང་གི་སློབ་གྲྭའི(སྲིད་འཛིན་སློབ་གླིང)སྤྱི་པའི་དོ་དམ་རིག་པའི་དགེ་རྒན་ཆེ་མོ་བ་ཧན་ཡུང་གིས“ཏང་ཡོན་ལས་བྱེད་པ་ཚོས་ཕྱོགས་ཡོངས་དང་། གཏིང་ཟབ། ཡང་དག་བཅས་ཀྱི་སྒོ་ནས་འཐབ་ཇུས་བཀོད་སྒྲིག་ཁག་ལ་གོ་བ་ལེན་པ་དང་ཁོང་དུ་ཆུད་པར་བྱས་ཚེ། དགོངས་དོན་གྱི་སྤྱི་ཡོངས་ཀྱི་ལྟ་བ་དང་བརྒྱུད་རིམ་ལྡན་པའི་བསམ་གཞིག་དང་དེ་བཞིན་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཆོས་ཉིད་བཅས་སྔར་བས་ཤེས་རྟོགས་ཐུབ་པ་དང་བསམ་བློ་སྔར་བས་གཅིག་གྱུར་དང་སེམས་ཤུགས་གཅིག་སྒྲིལ་ཐུབ་ནས་ལས་དོན་ཁག་ཏན་ཏིག་སྒྲུབ་ཐུབ”ཅེས་བཤད།
“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒྲུབ་དགོས་པ་དེ་ངེས་པར་དུ་སྒྲུབ་པ་དང་། སྒྲུབ་ཐུབ་པ་དེ་ཧུར་ཐག་སྒྲུབ་པ། སྒྲུབ་མི་རུང་བ་དེ་གཏན་ནས་མི་སྒྲུབ་པ་བཅས་བྱེད་དགོས”ཞེས་ནན་བཤད་གནང་ཡོད། ཐོན་ཁུངས་རྣམ་པའི་གྲོང་ཁྱེར་ཞིག་ཡིན་པའི་ཆ་ནས། ཐོན་ཁུངས་རྣམ་པའི་དཔལ་འབྱོར་ཕྱོགས་སྒྱུར་གྱི་ལས་འགན་ཕྲག་ཏུ་ཁུར་ཡོད་པས། ང་ཚོས་སྲིད་ཇུས་ཀྱི་དབྱེ་མཚམས་དང་ཚད་གཞི་གནད་སྨིན་ངང་སྟངས་འཛིན་བྱེད་པ་དང་། འཕེལ་རྒྱས་དང་བདེ་འཇགས་ལ་སྤྱི་འདོམས་བྱེད་པ། ནུས་རྒྱུ་ཕྱོགས་སྒྱུར་དང་། ཐོན་ལས་རིམ་སྤོར། འོས་འཚམ་དང་སྣ་མང་འཕེལ་རྒྱས་བཅས་ལ་ཡུལ་བབ་དང་བསྟུན་ནས་སྐུལ་འདེད་གཏོང་དགོས”ཞེས་ཧྲན་ཤིས་ཞིང་ཆེན་ཅེ་ཤིའུ་གྲོང་ཨུད་ཀྱི་ཧྲུའུ་ཅི་རེན་ཀོང་ཡའོ་ཡིས་བཤད།
རང་རྒྱལ་འཕེལ་རྒྱས་ཀྱི་གཏན་འཁེལ་རང་བཞིན་དང་རྒྱུན་མཐུད་ཆོག་པའི་རང་བཞིན་རྒྱུན་ཆད་མེད་པར་ཆེ་རུ་ཕྱིན་པ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཕྱི་རྒྱལ་ནང་གི་དུས་བབ་འགྱུར་ལྡོག་སྟངས་འཛིན་དང་། དེང་རབས་ཅན་གྱི་ཐོན་ལས་མ་ལག་འཛུགས་པ། འཕེལ་རྒྱས་ཀྱི་བཀོད་པ་གསར་པ་གཏོད་པ། དཔལ་འབྱོར་དང་སྤྱི་ཚོགས་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ་སོགས་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་ལ་རྒྱས་བཤད་གཏིང་ཟབ་གནང་སྟེ“སྤྱི་ཡོངས་ལ་བསམ་བློ་གཏོང་བ་དང་ཕུགས་ལ་རྒྱང་ལྟ་བྱས་ཏེ་འཐབ་ཇུས་ཐད་ངེས་ཤུགས་རྒྱུན་འཁྱོངས་དང་འཐབ་རྩལ་ཐད་འཆར་འགོད་ཞིབ་ཚགས་བཏིང་ནས་རང་རྒྱལ་འཕེལ་རྒྱས་གཏོང་བའི་གཏན་འཁེལ་རང་བཞིན་དང་རྒྱུན་མཐུད་ཆོག་པའི་རང་བཞིན་རྒྱུན་ཆད་མེད་པར་ཆེ་རུ་གཏོང་དགོས”ཞེས་གསུངས་ཡོད།
དེང་རབས་ཅན་གྱི་ཐོན་ལས་མ་ལག་འཛུགས་སྐྱོང་དང་ཐོན་ལས་མ་ལག་སྤྱི་ཡོངས་མཐོར་འདེགས་བྱ་རྒྱུ་ནི“ལོ་ལྔ་ཚན་བཅོ་ལྔ་པའི”རིང་གི་འཐབ་ཇུས་ལས་འགན་གལ་ཆེན་ཞིག་ཡིན། “སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ནང་ང་ཚོས་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་བར་ཁ་ཕྱོགས་གསལ་སྟོན་གནང་ཡོད”ཧྲན་ཏུང་ཞིང་ཆེན་གཡན་ཐའེ་གྲོང་ཁྱེར་བཟོ་ལས་དང་ཆ་འཕྲིན་ཅན་ཅུས་ཀྱི་ཏང་ཙུའུ་ཡི་ཧྲུའུ་ཅི་དང་ཅུས་ཀྲང་ཀྲང་ཧུང་གིས། གཡན་ཐའེ་གྲོང་ཁྱེར་གྱིས་ལྗང་མདོག་རྡོ་སྣུམ་རྫས་འགྱུར་དང་། མདོག་ལྡན་ལྕགས་རིགས་སོགས་ལེགས་ཆའི་ཐོན་ལས་མུ་མཐུད་སྲ་བརྟན་རིམ་སྤོར་དང་། ནུས་རྒྱུ་གསར་པ་དང་ཨར་ལས་རྒྱུ་ཆ་གསར་པ་སོགས་ཁྱད་ལྡན་ཐོན་ལས་སྐྱེད་སྲིང་དང་སྟོབས་ཆེར་གཏོང་བ། མི་ཐབས་རིག་ནུས་དང་མཚོ་འཇིངས་དང་མཁའ་དབྱིངས་སོགས་གསར་དར་འབྱུང་འགྱུར་ཐོན་ལས་སྔོན་ཚུད་ནས་བཀོད་སྒྲིག་བཅས་བྱས་ཏེ། ལས་རིགས་གཙོ་བོ་མངོན་གསལ་དོད་པ་དང་། ལེགས་ཆ་གཅིག་སྡུད། སྣ་མང་མཉམ་འདྲེས་བཅས་ཀྱི་དེང་རབས་ཅན་གྱི་ཐོན་ལས་མ་ལག་ཧུར་ཐག་བཏོད་ཡོད་ཅེས་བཤད།
དཔལ་འབྱོར་འཕེལ་རྒྱས་དང་སྤྱི་ཚོགས་འཕེལ་རྒྱས་གཅིག་རམ་གཅིག་འདེགས་ཡོང་བར་ངེས་པར་དུ་མཐུན་སྦྱོར་སྐུལ་འདེད་གཏོང་དགོས། “སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས‘དམངས་འཚོ་ལེགས་སུ་གཏོང་རྒྱུ་དེ་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བའི་གཙོ་གནད་ལ་བརྩིས་ནས་དཔལ་འབྱོར་འཕེལ་རྒྱས་གཏོང་བ་དང་ཆབས་ཅིག་མི་དམངས་ཀྱི་འཚོ་བའི་སྤུས་ཚད་བརྟན་པོའི་ངང་མཐོ་རུ་གཏོང་དགོས’ཞེས་ནན་བཤད་གནང་ཡོད། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ཕྱོགས་གཅིག་ནས་ཐོན་ལས་རིམ་སྤོར་ལ་དམ་འཛིན་བྱས་ཏེ། ལྗང་མདོག་འཛུགས་སྐྲུན་དང་རྫ་དཀར་སོགས་གཙོ་ཁྲིད་ཐོན་ལས་སྟོབས་ཆེར་གཏོང་བ་དང་རིག་ནུས་བཟོ་སྐྲུན་དང་རྒྱུ་ཆ་གསར་པ་སོགས་ཚན་རྩལ་མཐོ་བའི་རྣམ་གྲངས་ནང་འདྲེན་བྱ་རྒྱུ་དང་། ཕྱོགས་གཅིག་ནས་དམངས་འཚོ་ལེགས་སུ་གཏོང་རྒྱུ་དམ་འཛིན་བྱས་ཏེ་སྤུས་ལེགས་སྨན་བཅོས་ཐོན་ཁུངས་གཤམ་སྤེལ་བྱ་རྒྱུར་སྐུལ་འདེད་གཏོང་བ་དང་། སློབ་གསོར་བརྟེན་ནས་རྫོང་སྟོབས་ཆེར་གཏོང་བའི་འཆར་གཞི་མུ་མཐུད་ཟབ་ཏུ་གཏོང་བ། ས་གནས་ལ་ལས་གནས་དེ་བས་མང་བ་གཏོད་པ་བཅས་བྱས་ཏེ་མང་ཚོགས་སྒོ་རྩར་སྨན་བཅོས་ཐུབ་པ་དང་། ཕྲུ་གུ་སྒོ་རྩར་སློབ་གྲྭར་བསྐྱོད་ཐུབ་པ། མི་སེར་སྒོ་རྩར་ལས་ཞུགས་ཐུབ་པ་བཅས་བྱས་ཡོད”ཅེས་ཧྥུའུ་ཅན་ཞིང་ཆེན་ཧྥུའུ་ཀྲོའུ་གྲོང་ཁྱེར་མེན་ཆིང་རྫོང་ཨུད་ཀྱི་ཧྲུའུ་ཅི་ཀྲའོ་ཁྲུན་རུང་གིས་བཤད།
ཏང་གིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འགོ་ཁྲིད་བྱེད་པའི་ནུས་པ་དང་ཆུ་ཚད་མཐོ་རུ་གཏོང་བར་ཤུཌ་སྣོན་བརྒྱབ་པ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ལོ་ལྔ་ཚན་བཅོ་ལྔ་པའི”རིང་གི་དམིགས་ཚད་དང་ལས་འགན་བདེ་བླག་ངང་ལེགས་སྒྲུབ་བྱེད་པར་ངེས་པར་དུ་ཏང་གིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འགོ་ཁྲིད་བྱེད་པའི་ནུས་པ་དང་ཆུ་ཚད་མཐོ་རུ་གཏོང་བར་ཤུགས་སྣོན་རྒྱག་དགོས་ཞེས་ནན་བཤད་གནང་ཡོད།
“ཏང་གི་གསར་གཏོད་རིགས་པའི་གཞུང་ལུགས་ནི་ང་ཚོས་དཀའ་ངལ་མཐའ་དག་སེལ་བའི་གསེར་གྱི་ལྡེ་མིག་ལྟ་བུ་ཡིན” ནང་སོག་རང་སྐྱོང་ལྗོངས་པཱ་ཡན་ནའོ་ཨེར་གྲོང་ཁྱེར་སྐྱེ་ཁམས་ཁོར་ཡུག་ཅུས་ཀྱི་ཏང་ཙུའུ་ཡི་ཧྲུའུ་ཅི་དང་ཅུས་ཀྲང་ཧྲི་ཝང་ཆིང་གིས“ཝུའུ་ལེང་སུའུ་མཚོ་རྒྱུད་ཀྱི་ཕྱོགས་བསྡུས་བཅོས་སྐྱོང་ལ་གྲུབ་འབྲས་མངོན་གསལ་དོད་པོ་ཐོབ་དོན་ནི་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པའི་ཚན་རིག་དང་མཐུན་པའི་ཁྲིད་སྟོན་ལས་བྱུང་བ་ཞིག་རེད། ང་ཚོས‘ཏང་གི་གསར་གཏོད་རིགས་པའི་གཞུང་ལུགས་ལ་བརྩོན་ཞིབ་བྱས་ནས་ཆེད་ལས་ཀྱི་བྱང་ཚད་མཐོ་རུ་གཏོང་བ་དང་དངོས་སྒྲུབ་ཀྱི་འཇོན་ཐང་ཆེ་རུ་གཏོང་བའི’བླང་བྱ་དོན་ཐོག་ཏུ་འཁྱོལ་བར་བྱས་ཏེ་ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་གནས་ཚུལ་གསར་པར་ཞིབ་འཇུག་དང་གནད་དོན་གསར་པ་ཐག་གཅོད་བྱེད་པའི་འཇོན་ཐང་དང་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་མཛེས་སྡུག་ལྡན་པའི་གྲོང་གསེབ་དང་། དྭངས་གཙང་གི་ཆུ་དང་མཚོ། མཛེས་སྡུག་ལྡན་པའི་གྲོང་ཁྱེར་བཅས་བསྐྲུན་པར་གཞི་གཅིག་ཏུ་སྐུལ་འདེད་བཏང་སྟེ། དེ་བས་ཚན་རིག་དང་མཐུན་པའི་སྒོ་ནས་སྐྱེ་ཁམས་བདེ་འཇགས་ཀྱི་སྲུང་བཅད་བརྟན་དུ་ནུས་ལྡན་བཏང་ཡོད”ཅེས་བཤད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། ཡང་དག་པའི་སྲིད་དོན་ལས་རྗེས་ཀྱི་ལྟ་བ་འཛུགས་པ་དང་ལག་ལེན་བསྟར་བར་དོན་དངོས་དང་བསྟུན་པ་དང་ཆོས་ཉིད་ལྟར་བྱ་བ་བསྒྲུབ་རྒྱུ་མཐའ་འཁྱོངས་བྱས་ཏེ། རང་རྟོགས་ངང་མི་དམངས་ཀྱི་ཆེད་དུ་སྲིད་དོན་ལས་རྗེས་འཇོག་པ་དང་དངོས་སྒྲུབ་ཀྱིས་སྲིད་དོན་ལས་རྗེས་འཇོག་ཐུབ་པར་བྱེད་དགོས་ཞེས་ནན་བཤད་གནང་ཡོད།
“ཏང་ཡོན་ལས་བྱེད་པ་ཚོས་ཡང་དག་པའི་སྲིད་དོན་ལས་རྗེས་ཀྱི་ལྟ་བ་འཛུགས་པ་དང་ལག་ལེན་བསྟར་ཚེ་གཞི་ནས་ཏང་གི་ལམ་ཕྱོགས་དང་། འཛད་ཕྱོགས། སྲིད་ཇུས་བཅས་ལག་བསྟར་ཡག་པོ་བྱེད་ཐུབ” ཧུའུ་པེ་ཞིང་ཆེན་ཐུང་ཧྲན་རྫོང་ཨུད་ཀྱི་ཧྲུའུ་ཅི་ཝུའུ་ཐའོ་ཡིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱས་ཏེ། ས་གནས་དེ་གའི་དོན་དངོས་དང་ཟུང་འབྲེལ་གྱིས་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་བ་དང་། གློག་རྡུལ་ཆ་འཕྲིན་དང་། སྒྲིག་ཆས་བཟོ་སྐྲུན། ནུས་རྒྱུ་གསར་པ་སོགས་ཐོན་ལས་ཁྱུ་ཚོགས་ལ་སྐུལ་འདེད་བཏང་ནས་རྫོང་ཁོངས་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། དམངས་ལ་བདེ་སྐྱིད་བསྐྲུན་པ་དེ་སྲིད་དོན་ལས་རྗེས་གལ་ཆེན་ལ་བརྩི་རྒྱུ་མཐའ་འཁྱོངས་བྱེད་པ་དང་། དམངས་འཚོའི་བྱ་གཞག་ལ་མ་འཇོག་བྱེད་ཚད་མང་དུ་བཏང་སྟེ་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་གཏོང་གི་ཡིན་ཞེས་བརྗོད།
འབྲེལ་ཡོད་གསར་འགྱུར།