རྒྱལ་ཁབ་ནུས་རྒྱུ་ཅུས་ཀྱིས་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། 2025ལོར། རྒྱལ་ཡོངས་ཀྱི་གློག་ཤུགས་ཁྲོམ་རར་གློག་ཉོ་ཚོང་བྱེད་ཚད་རིམ་རྩིས་བརྒྱབ་ན་ཆུ་ཚོད་ཆན་ཝ་དུང་ཕྱུར་66394ཟིན་ནས་དུས་མཚུངས་ལས་7.4%འཕར་བ་དེས་སྤྱི་ཚོགས་ཡོངས་ཀྱི་གློག་སྤྱོད་ཚད་ཀྱི་བསྡུར་གྲངས་བཟུང་ཚད་64%བཟུང་ནས་དུས་མཚུངས་ལས་བརྒྱ་ཆའི་གྲངས་1.3འཕར་ཡོད་པ་རེད།

ཉོ་ཚོང་གི་ཁྱབ་ཁོངས་ནས་བལྟས་ན། ཞིང་ཆེན་ནང་ཁུལ་དུ་གློག་ཉོ་ཚོང་བྱེད་ཚད་ཆུ་ཚོད་ཆན་ཝ་དུང་ཕྱུར་50473ཟིན་ནས་དུས་མཚུངས་ལས་6.2%འཕར་བ་དང་། ཞིང་ཆེན་དང་ས་ཁོངས་བརྒལ་ནས་གློག་ཉོ་ཚོང་བྱེད་ཚད་ཆུ་ཚོད་ཆན་ཝ་དུང་ཕྱུར་15921ཟིན་ནས་དུས་མཚུངས་ལས་11.6%འཕར་བའི་ཁྲོད། གློག་དྲ་གཉེར་སྐྱོང་ཁུལ་བརྒལ་ནས་གློག་ཉོ་ཚོང་བྱེད་ཚད་ཆུ་ཚོད་ཆན་ཝ་དུང་ཕྱུར་34ཟིན་ཡོད་པ་རེད།

ཉོ་ཚོང་གི་སྣ་ཁ་ནས་བལྟས་ན། དུས་ཡུན་རིང་འབྲིང་དུ་གློག་ཉོ་ཚོང་བྱེད་ཚད་ཆུ་ཚོད་ཆན་ཝ་དུང་ཕྱུར་63522ཟིན་པ་དང་། ལག་ཡོད་གློག་ཤུགས་ཉོ་ཚོང་བྱེད་ཚད་ཆུ་ཚོད་ཆན་ཝ་དུང་ཕྱུར་2872ཟིན་པ། ལྗང་མདོག་གློག་ཉོ་ཚོང་བྱེད་ཚད་ཆུ་ཚོད་ཆན་ཝ་དུང་ཕྱུར་3285ཟིན་པ་དེ་དུས་མཚུངས་ལས་38.3%འཕར་ཡོད་པ་རེད།

2025ལོར། གློག་དྲ་གཉེར་སྐྱོང་ཁུལ་ལས་བརྒལ་བའི་རྒྱུན་རྣམ་ཅན་གྱི་གློག་ཤུགས་ཉོ་ཚོང་ལམ་སྲོལ་བཙུགས་པ་དང་། རྒྱལ་ཁབ་གློག་དྲ་དང་ལྷོ་ཕྱོགས་གློག་དྲས་གློག་ཤུགས་ཉོ་ཚོང་སོ་སོར་སྒྲིག་འཛུགས་བྱས་པའི་རྨང་གཞིའི་ཐོག “དྲ་ཐོག་གློག་ཤུགས་ཚོང་ཁང”བཙུགས་ནས་རྒྱལ་ཡོངས་གཅིག་གྱུར་གྱི་གློག་ཤུགས་ཁྲོམ་རའི་མ་ལག་འཁོར་སྐྱོད་ཡག་པོ་ཐུབ་པའི་འགན་ལེན་བྱས་པ་རེད། དབྱར་གློག་སྙོམས་སྒྲིག་བྱེད་རིང་ལྷོ་ཕྱོགས་ཁུལ་གྱིས་ཧྲང་ཧའེ་དང་། ཀྲེ་ཅང་། ཨན་ཧུའེ་བཅས་ལ་ཐོག་མར་གློག་བཏང་ནས་རོགས་སྐྱོར་བྱས་པ་དང་། ཟླ་10པར་རྒྱལ་ཁབ་གློག་དྲ་དང་ལྷོ་ཕྱོགས་གློག་དྲས་ལག་ཡོད་གློག་ཤུགས་ཉོ་ཚོང་གི་རྣམ་པའི་ཐོག་ནས་ཁྱབ་ཁོངས་ལས་བརྒལ་བའི་གློག་ཤུགས་བཀོད་གཏོང་ཐེངས་དང་པོ་བྱས་པ་རེད།