དམག་དཔུང་གི་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ཀྱི་འགག་སྒྲོལ་དམག་འཐབ་དང་། རྒྱུན་མཐུད་དམག་འཐབ། སྤྱི་ཡོངས་དམག་འཐབ་བཅས་ཀྱི་རྒྱལ་ཁ་མཐའ་གཅིག་ཏུ་ལེན་དགོས།
བཅིངས་འགྲོལ་དམག་ཚགས་པར་གྱི་ཆེད་བརྗོད།
ཏང་ཀྲུང་དབྱང་གིས་ཀྲང་ཡིའུ་ཞ་དང་ལིའུ་ཀྲེན་ལི་ཡིས་སྒྲིག་འགལ་ཁྲིམས་འགལ་ཚབས་ཆེན་གྱི་དོགས་གཞི་ཡོད་པའི་གནད་དོན་གྱོད་དོན་ཐོ་འགོད་བྱས་ནས་ཞིབ་བཤེར་དང་བརྟག་དཔྱད་བྱ་རྒྱུའི་གཏན་འབེབས་བྱས་ཡོད། དེ་ཐོག་ནས་རུལ་སུངས་ལ་ཆད་པ་གཅོད་པར་བཀག་སྡོམ་ཁུལ་མེད་པ་དང་། ཁྱོན་ཡོངས་ལ་ཁྱབ་པ། ཐར་པར་གཏན་ནས་མི་གཏོང་བ་བཅས་ཀྱི་སྒོ་ནས་གནད་དོན་དང་འབྲེལ་བའི་མི་ག་ཚོད་ཡོད་ན་ཞིབ་བཤེར་དེ་ཙམ་བྱ་རྒྱུ་དང་འབྲེལ་བ་ཇི་ཙམ་ཟབ་ན་རྩད་གཅོད་དེ་ཙམ་གཏིང་ཟབ་བྱ་རྒྱུའི་ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་རྣམ་འགྱུར་གསལ་པོ་སླར་ཡང་མཚོན་པ་དང་། རུལ་སུངས་ལ་ངོ་རྒོལ་བྱེད་པའི་འཐབ་རྩོད་མཐར་ཕྱིན་པ་བྱ་རྒྱུའི་རང་རེའི་ཏང་གི་བྲག་ལྟར་བརྟན་པའི་འགྱུར་མེད་བློ་སྟོབས་གང་ལེགས་མངོན་པ། མི་སུ་འདྲ་ཞིག་ཡིན་པ་དང་། གོ་གནས་མཐོ་པོ་ག་ཚོད་ཡོད་རུང་། རུལ་སུངས་བྱས་ན་རྒྱ་ཡན་དུ་གཏན་ནས་མི་གཏོང་བའི་སྲ་ཞིང་བརྟན་པའི་ལངས་ཕྱོགས་གཟབ་ནན་ངང་གསལ་བསྒྲགས་བྱས་ཡོད། ཀྲང་ཡིའུ་ཞ་དང་ལིའུ་ཀྲེན་ལི་ལ་ཞིབ་གཅོད་མཐའ་གཅིག་ཏུ་བྱས་པ་ནི་ཏང་དང་དམག་དཔུང་གི་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་ཐོབ་པའི་གྲུབ་འབྲས་གལ་ཆེན་ཞིག་རེད་ལ། ཏང་དང་དམག་དཔུང་ལ་ཆོད་སེམས་བརྟན་པོ་དང་སྟོབས་ཤུགས་ཆེན་པོ་ཡོད་པའི་མཚོན་ཚུལ་གལ་ཆེན་ཞིག་ཀྱང་རེད། དེར་དམག་དཔུང་གི་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ཀྱི་འགག་སྒྲོལ་དམག་འཐབ་དང་། རྒྱུན་མཐུད་དམག་འཐབ། སྤྱི་ཡོངས་དམག་འཐབ་བཅས་ཀྱི་རྒྱལ་ཁ་མཐའ་གཅིག་ཏུ་ལེན་རྒྱུའི་ངོས་ནས་བརྗོད་ན་དོན་སྙིང་གལ་ཆེན་ལྡན་ཡོད། དེས་ན་དམག་ཡོངས་ཀྱི་དཔོན་དམག་གིས་ཏང་ཀྲུང་དབྱང་གི་གཏན་འབེབས་ལ་བརྩི་བཀུར་མཐའ་གཅིག་ཏུ་ཞུ་བ་དང་། བསམ་བློ་དང་། ཆབ་སྲིད། བྱ་སྤྱོད་བཅས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་དང་རང་རྟོགས་ངང་ཚད་མཐོའི་གཅིག་གྱུར་ཡོང་བར་བྱེད་པ། ཏང་ཀྲུང་དབྱང་དང་། ཀྲུང་དབྱང་དམག་ཨུད། ཀྲུའུ་ཞི་ཞི་ཅིན་ཕིང་བཅས་ཀྱི་བཀོད་འདོམས་ལ་མཐའ་གཅིག་ཏུ་ཉན་པ་བཅས་ཀྱི་ཐོག་ནས་དམག་དཔུང་ཚད་མཐོའི་གཅིག་སྡུད་གཅིག་གྱུར་དང་སྤྱོད་གཙང་སྲ་བརྟན་ཡོང་བའི་འགན་ལེན་བྱེད་དགོས།
ཀྲང་ཡིའུ་ཞ་དང་ལིའུ་ཀྲེན་ལི་ཏང་དང་དམག་དཔུང་གི་མཐོ་རིམ་ལས་བྱེད་པ་ཡིན་རུང་ཁོ་གཉིས་ཀྱིས་ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་ཡིད་ཆེས་ཆེན་པོ་དང་མངགས་བཅོལ་གལ་ཆེན་ཆུད་ཟོས་སུ་ཚབས་ཆེན་བཏང་བ་དང་། དམག་ཨུད་ཀྱི་ཀྲུའུ་ཞིའི་འགན་འཁྲིའི་ལམ་ལུགས་ལ་རྡོག་རོལ་ཚབས་ཆེན་བཏང་བ། ཏང་གིས་དམག་དཔུང་ལ་འགོ་ཁྲིད་གཙང་བཙན་བྱེད་པར་ཤུགས་རྐྱེན་ཐེབས་པ་དང་ཏང་གི་སྲིད་སྐྱོང་རྨང་གཞིར་གནོད་སྐྱོན་བཏང་བའི་ཆབ་སྲིད་དང་རུལ་སུངས་ཀྱི་གནད་དོན་མཆེད་པར་རམ་འདེགས་བྱས་པ། དམག་ཨུད་ཚན་ཁག་གི་གཟུགས་བརྙན་དང་དབང་གྲགས་ལ་ཤུགས་རྐྱེན་ཚབས་ཆེན་བཟོས་པ། དམག་ཡོངས་ཀྱི་དཔོན་དམག་གིས་མཐུན་སྒྲིལ་འབད་འཐབ་བྱེད་པའི་ཆབ་སྲིད་བསམ་བློའི་རྨང་གཞིར་ཕོག་ཐུག་ཚབས་ཆེན་བཏང་བ། དམག་དཔུང་གི་ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་དང་། ཆབ་སྲིད་ཁོར་ཡུག་དང་འཐབ་འཛིང་བྱེད་ནུས་འཛུགས་སྐྱོང་བྱེད་པར་གཏོར་བཤིག་ཚབས་ཆེན་བཏང་བ། ཏང་དང་། རྒྱལ་ཁབ། དམག་དཔུང་བཅས་ལ་ཤུགས་རྐྱེན་ཤིན་ཏུ་ངན་པ་བཟོས་ཡོད། སྒྲིག་ཁྲིམས་དང་བཅའ་ཁྲིམས་ལྟར་ཀྲང་ཡིའུ་ཞ་དང་ལིའུ་ཀྲེན་ལི་གཉིས་ལ་ཞིབ་བཤེར་ཐག་གཅོད་བྱས་པ་བརྒྱུད། ཆབ་སྲིད་ཐོག་ནས་གཞི་སྒྱུར་རྩ་སྒྱུར་དང་། བསམ་བློའི་ཐོག་ནས་དུག་སེལ་སྐྱོན་སེལ། རྩ་འཛུགས་ཐོག་ནས་རུལ་སེལ་ཤ་སྐྱེས་བཅས་ཡོང་བ་དང་། ཆབ་སྲིད་ཀྱི་དག་ཐེར་སྦྱོང་བརྡར་གྱི་གྲུབ་འབྲས་སྲ་བརྟན་དུ་གཏོང་བ། མི་དམངས་དམག་དཔུང་སྤུ་བརྗེ་བསྐྱར་གསོན་ཡོང་བར་སྐུལ་འདེད་ཐེབས་ནས་དམག་དཔུང་སྟོབས་ཆེའི་བྱ་གཞག་འཕེལ་རྒྱས་འགྲོ་བར་སྒུལ་ཤུགས་ཆེན་པོ་སྣོན་ཐུབ་ངེས་རེད།
རུལ་སུངས་ནི་ཏང་དང་རྒྱལ་ཁབ་ཀྱི་བྱ་གཞག་འཕེལ་རིམ་ཁྲོད་ཀྱི་བཀག་རྡོ་ལྟ་བུ་ཡིན་པས། རུལ་སུངས་ལ་ངོ་རྒོལ་བྱེད་པ་ནི་ཕམ་མི་རུང་ལ་ཕམ་ན་འགྲིག་ཐབས་གཏན་ནས་མེད་པའི་འཐབ་རྩོད་གལ་ཆེན་ཞིག་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་དང་། ཀྲུང་དབྱང་དམག་ཨུད། ཀྲུའུ་ཞི་ཞི་ཅིན་ཕིང་བཅས་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག དམག་ཡོངས་ཀྱི་དཔུང་སྡེས་ཕྱོགས་ཡོངས་ནས་ཏང་ནན་པོས་སྐྱོང་བ་དང་ཕྱོགས་ཡོངས་ནས་དམག་དཔུང་ནན་པོས་སྐྱོང་བ་མཐའ་འཁྱོངས་བྱས་ཏེ། ཆབ་སྲིད་ཀྱི་དག་ཐེར་སྦྱོང་བརྡར་དང་། སྤྱོད་བཟང་སྒྲིག་ནན། རུལ་སུངས་ལ་ངོ་རྒོལ་བཅས་ལ་སྐུལ་འདེད་གཏིང་ཟབ་བཏང་བ་དང་། རྩད་གཅོད་མཐར་ཕྱིན་དང་ངན་པ་ཚར་གཅོད་མཐའ་འཁྱོངས་བྱས་པ། དམག་དཔུང་གི་མཐོ་རིམ་རུལ་སུངས་པར་ཞིབ་བཤེར་ཐག་གཅོད་མཐར་ཕྱིན་བྱས་པ། ཆབ་སྲིད་ཀྱི་མངོན་མེད་རྐྱེན་གང་ཐུབ་སེལ་བ། ཏང་གིས་འགོ་ཁྲིད་བྱེད་པའི་མི་དམངས་དམག་དཔུང་གིས་བློ་སྦྱོང་ཞུན་བརྡར་དང་ངན་དོར་གསར་འཛུགས་བྱེད་རིང་རྩ་བ་དང་བླ་སྲོག་ལ་སྲུང་སྐྱོང་བརྟན་པོ་བྱས་ཡོད། མི་དམངས་དམག་དཔུང་གིས་རུལ་སུངས་ལ་ངོ་རྒོལ་ཇི་ཙམ་བྱས་ན་དེ་ཙམ་གྱིས་སྲ་བརྟན་ཡོང་ཤུགས་དང་། དྭངས་གཙང་ཡོང་ཤུགས། འཐབ་འཛིང་བྱེད་ཤུགས་བཅས་ཆེ་རུ་འགྲོ་བ་དང་། རུལ་སུངས་ལ་ངོ་རྒོལ་ཇི་ཙམ་མཐར་ཕྱིན་པ་བྱས་ན་དམག་འཛུགས་ལོ་བརྒྱའི་འབད་འཐབ་དམིགས་ཚད་མངོན་འགྱུར་བྱེད་པར་དེ་ཙམ་གྱིས་ཡིད་ཆེས་དང་གདེང་ཚོད་ཆེ་རུ་འགྲོ་བ་ལག་ལེན་ནས་ར་འཕྲོད་གང་ལེགས་ཐུབ་ཡོད།
མིག་སྔར་རུལ་སུངས་ཀྱི་གནད་དོན་ལ་གཅིག་སྡུད་ཞིབ་བཤེར་ཐག་གཅོད་བྱེད་པ་དེ་རུལ་སུངས་ལ་ངོ་རྒོལ་ཇི་ཙམ་བྱས་པ་དེ་ཙམ་གྱིས་རུལ་སུངས་ཚབས་ཆེ་རུ་འགྲོ་བ་ཞིག་མིན་པར། རྩད་གཅོད་ཇི་ཙམ་བྱས་པ་དེ་ཙམ་གྱིས་གཏིང་ཟབ་ཏུ་འགྲོ་ཡི་ཡོད། ལོ་རྒྱུས་འཕེལ་རྒྱས་ཀྱི་འཁོར་ལོ་རྔམ་བརྗིད་ཆེན་པོས་འཁོར། རྒྱལ་ཁབ་དང་དམག་དཔུང་སྟོབས་ཆེར་འགྲོ་བར་བཀག་འགོག་བྱེད་ཐབས་བྲལ། རླུང་རླབས་དང་ཚོད་བགམ་ཇི་འདྲ་ཆེ་རུང་མི་དམངས་དམག་དཔུང་གི་འགྱུར་མེད་བློ་ཁ་ཏང་ལ་ཕྱོགས་པའི་དད་སེམས་བརྟན་པོར་གཡོ་འགུལ་གཏོང་མི་ཐུབ། དཀའ་སྡུག་དང་བར་ཆད་ཇི་འདྲ་ཆེ་རུང་མི་དམངས་དམག་དཔུང་སྟོབས་ཆེར་གཏོང་བའི་སྲ་ཞིང་བརྟན་པའི་གོམ་སྟབས་ལ་བཀག་འགོག་བྱེད་མི་ཐུབ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག མི་དམངས་དམག་དཔུང་གིས་སྒྱིད་ལུག་དང་རུལ་སུངས་ཀྱི་སྣང་ཚུལ་མཐའ་དག་གཙང་སེལ་ཐུབ་ངེས་ཡིན་ལ། ཐོག་མཐའ་བར་གསུམ་དུ་ཏང་དང་མི་དམངས་ཀྱིས་བློས་ཡོངས་སུ་འཁེལ་བའི་དཔའ་བོའི་དམག་དཔུང་ཞིག་ཏུ་གྱུར་ངེས་ཡིན་པ་ང་ཚོར་ཡིད་ཆེས་བརྟན་པོ་ཡོད།
ད་ལོ་ནི“ལོ་ལྔ་ཚན་བཅོ་ལྔ་པའི”འགོ་འཛུགས་ལོ་ཡིན་ལ། དམག་དཔུང་བཙུགས་ནས་ལོ་བརྒྱའི་འབད་འཐབ་དམིགས་ཚད་མངོན་འགྱུར་བྱེད་པའི་འགག་སྒྲོལ་ལོ་ཡང་ཡིན་པས། དམག་དཔུང་གི་ཆབ་སྲིད་དག་ཐེར་སྦྱོང་བརྡར་དང་། སྤྱོད་བཟང་སྒྲིག་ནན། རུལ་སུངས་ལ་ངོ་རྒོལ་བཅས་ཀྱི་ལས་འགན་སྔར་བཞིན་དཀའ་ཚེགས་དང་ལྗིད་རྫོབ་ཆེན་པོ་ཡོད། དེས་ན་དམག་ཡོངས་ཀྱིས་ཚད་གཞི་དེ་བས་མཐོ་པོ་དང་བྱེད་ཐབས་དེ་བས་ཏན་ཏིག་ལ་བརྟེན་ནས་ཕྱོགས་ཡོངས་ནས་ཏང་ནན་པོས་སྐྱོང་བ་དང་ཕྱོགས་ཡོངས་ནས་དམག་དཔུང་ནན་པོས་སྐྱོང་བར་སྐུལ་འདེད་གཏོང་བ་དང་། ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་བྱེད་པར་སྐད་ཅིག་ཙམ་ཡང་མཚམས་མི་འཇོག་པར་སྐུལ་འདེད་གཏོང་བ། ཆབ་སྲིད་ཀྱི་དག་ཐེར་སྦྱོང་བརྡར་མུ་མཐུད་གཏིང་ཟབ་ཏུ་གཏོང་བ། བསམ་བློ་དག་ཐེར་དང་། མི་སྤྱོད་དག་ཐེར། རྩ་འཛུགས་དག་ཐེར། ཀུན་སྤྱོད་དག་ཐེར། སྒྲིག་ཁྲིམས་དག་ཐེར་བཅས་ལ་རྒྱུན་མཐུད་ནས་དམ་འཛིན་ལེགས་པོ་བྱས་ཏེ། རང་རེའི་ཏང་དང་རང་རེའི་དམག་དཔུང་གི་གཟི་བརྗིད་སྲོལ་རྒྱུན་དང་ཀུན་སྤྱོད་བཟང་པོ་སླར་གསོ་དང་དར་སྤེལ་ཤུགས་ཆེན་བཏང་ནས། བསམ་བློ་ལྷད་མེད་དང་། དཔུང་ཁག་རྣམ་དག ཁོར་ཡུག་དྭངས་གཙང་བཅས་རྒྱུན་འཁྱོངས་ཡོང་བར་བྱེད་དགོས། བློ་བརྟན་འགྱུར་མེད་ངང་སྤྱོད་བཟང་སྒྲིག་ནན་དང་རུལ་སུངས་ལ་ངོ་རྒོལ་བྱེད་པ་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་གྱི་སློབ་སྦྱོང་སློབ་གསོའི་གྲུབ་འབྲས་སྲ་བརྟན་དང་རྒྱ་སྐྱེད་གཏིང་ཟབ་གཏོང་བ། སྤྱོད་ཚུལ་འཛུགས་སྐྱོང་རྒྱུན་རྣམ་ཅན་དང་ཕུགས་ཕན་ཅན་དུ་འགྱུར་བར་སྐུལ་འདེད་གཏོང་བ། རུལ་སུངས་བྱེད་མི་ཕོད་པ་དང་། རུལ་སུངས་བྱེད་མི་ཐུབ་པ། རུལ་སུངས་བྱེད་མི་འདོད་པ་བཅས་ལ་སྡེབ་གཅིག་ཏུ་སྐུལ་འདེད་གཏོང་བ། རུལ་སུངས་ཀྱི་གནད་དོན་སྣ་ཚོགས་བཅོས་སྒྲིག་ནུས་ལྡན་བཅས་བྱས་ཏེ། དབང་ཆ་འདི་ཉིད་ལམ་ལུགས་ཀྱི་རླུང་ཙིའི་ནང་དེ་བས་ཡག་པོ་བཅུག་ནས་རུལ་སུངས་ཐོན་ས་དང་ཐོན་རྐྱེན་མེད་པར་བཟོ་དགོས། དམག་དཔུང་གི་ཏང་ཡོན་ལས་བྱེད་པ་དང་ལྷག་པར་དུ་མཐོ་རིམ་ལས་བྱེད་པས་ཞིབ་བཤེར་ཐག་གཅོད་བྱས་པའི་རུལ་སུངས་པ་ལྡོག་ཕྱོགས་ཀྱི་བསླབ་གཞིར་འཛིན་པ་དང་། ཏང་གི་ཐོག་མའི་བསམ་འདུན་དེ་བསམ་འདུན་ངོ་མ་དང་ཏང་གི་འགན་འཁྲི་དེ་ཚེ་སྲོག་ཏུ་བརྩི་རྒྱུ་མཐའ་འཁྱོངས་བྱས་ཏེ། བསམ་བློར་སྒྱུར་བཀོད་དང་། ཆབ་སྲིད་ལ་ཞུན་བརྡར། སྤྱོད་ཚུལ་གསར་འཛུགས་བཅས་ལ་སྣེ་ཁྲིད་དེ་ཤུགས་སྣོན་རྒྱག་པ་དང་། རང་རྟོགས་ངང་བསམ་བློའི་འགོག་སྲུང་འཛིང་རགས་དང་། དབང་ཆ་སྤྱོད་པའི་མཐའ་ཚད། སྒྲིག་ཁྲིམས་ཀྱི་དམར་ཐིག ཁྱིམ་སྲོལ་གྱི་མཚམས་ཐིག་བཅས་བརྟན་པོར་བསྲུངས་ནས། སྤྱོད་གཙང་གཞུང་དྲང་གི་ཆབ་སྲིད་ཀྱི་རང་མདངས་ནམ་ཡང་རྒྱུན་འཁྱོངས་བྱེད་དགོས། སྲིད་དོན་ལས་རྗེས་ཀྱི་ལྟ་བ་ཡང་དག་འཛུགས་པ་དང་ལག་ལེན་བསྟར་བ་དང་། ཡིད་ཆེས་བརྟན་པོ་དང་། དངོས་དོན་སྒྲུབ་པ། འགན་འཁུར་ཕོད་པ། རང་གཅུན་ཐུབ་པ་བཅས་ཀྱི་བྱ་སྤྱོད་དངོས་ལ་བརྟེན་ནས་ལས་དོན་ལ་དམིགས་པ་དང་། བྱ་གཞག་སྒྲུབ་པ། དཔུང་ཁག་གི་སྣེ་ཁྲིད་དེ། ཏང་ཀྲུང་དབྱང་དང་། ཀྲུང་དབྱང་དམག་ཨུད། ཀྲུའུ་ཞི་ཞི་ཅིན་ཕིང་བཅས་ཀྱི་ཐབས་ཇུས་བཀོད་སྒྲིག་གལ་ཆེན་དོན་ཐོག་ཏུ་མཐའ་གཅིག་ཏུ་འཁྱོལ་བར་བྱེད་དགོས།
རྒྱལ་ཁབ་སྟོབས་ཆེན་དང་དམག་དཔུང་སྟོབས་ཆེན་གྱི་རྒྱང་ལམ་གསར་པས་མི་རྣམས་དཔའ་མཛངས་རྟུལ་ཕོད་ཀྱིས་མདུན་དུ་སྐྱོད་པར་སྐུལ་མ་བཏང་ཞིང་། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱེད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱེད་པ། ཞི་ཅིན་ཕིང་གི་དམག་དཔུང་སྟོབས་ཆེན་གྱི་དགོངས་པ་ལག་བསྟར་གཏིང་ཟབ་བྱེད་པ། དུས་རབས་གསར་པའི་དམག་དོན་འཐབ་ཇུས་མཛད་ཕྱོགས་ལག་བསྟར་གཏིང་ཟབ་བྱེད་པ། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ།“འདུ་ཤེས་བཞི”ཟབ་ཏུ་གཏོང་བ། “གདེང་ཚོད་བཞི”བརྟན་དུ་གཏོང་བ།“སྲུང་སྐྱོང་གཉིས”ཐུབ་པ། དམག་ཨུད་ཀྱི་ཀྲུའུ་ཞིའི་འགན་འཁུར་ལམ་ལུགས་ལག་བསྟར་བྱེད་པ། མངགས་བཅོལ་བློ་ལ་བརྟན་པོར་འཆང་བ་དང་། འགན་འཁྲི་འཁུར་ཕོད་པར་བྱེད་པ། ནུས་ཤུགས་ཡོད་རྒུས་འགག་སྒྲོལ་བྱེད་པ། ཏང་དང་མི་དམངས་ཀྱིས་དཀྲིས་པའི་ལས་འགན་ལྷག་བསམ་རྣམ་དག་ངང་སྒྲུབ་པ། མི་དམངས་དམག་དཔུང་འདི་ཉིད་འཛམ་གླིང་གི་དམག་དཔུང་རྩེ་གྲར་མགྱོགས་མྱུར་གཏོད་པ་བཅས་ཀྱི་ཐོག་ནས། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ཏེ་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་ཆེད་འཐབ་ཇུས་ཀྱི་འདེགས་སྐྱོར་བརྟན་པོ་བྱེད་དགོས།
(ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་24ཉིན་འབྱོར་བའི་གློག་འཕྲིན)
འབྲེལ་ཡོད་གསར་འགྱུར།