ཐུམ་སྒྲིལ་ཡག་པོ་བྱས་པའི་གཏེར་ཆུ་འགྱིག་དམ་མང་པོ་5100བོད་ལྗོངས་འཁྱགས་རོམ་གཏེར་ཆུ་ཚད་ཡོད་ཀུང་སིའི་ཐོན་སྐྱེད་འཁོར་ཁང་ནས་ཐོན་འཕྲལ་ལྷ་ས་འགག་སྒོ་ལས་ཁུངས་ཀྱི“ཁག་ཐེངས་ཞིབ་བཤེར(རིམས་བཤེར)” བརྒྱུད་རྒྱང་རིང་གི་གཏོགས་ཁོངས་ཞིབ་བཤེར་བྱས་རྗེས་ཤང་ཀང་དུ་དབོར་གྱི་ཡོད་པ་རེད། གངས་ལྗོངས་ས་མཐོ་ནས་བཏང་བའི་བདུད་རྩི་འདིས“ལོ་ལྔ་ཚན་བཅུ་བཞི་པའི”རིང་བོད་ལྗོངས་དང་ཤང་ཀང་དབར་གྱི་དཔལ་འབྱོར་ཚོང་དོན་མཉམ་འགུལ་ལ་འགྲེལ་བཤད་གསོན་ཉམས་དོད་པོ་བརྒྱབ་ཡོད།

ལྷ་ས་འགག་སྒོ་ལས་ཁུངས་ཀྱིས་བསྡོམས་རྩིས་བརྒྱབ་པ་ལྟར་ན། “ལོ་ལྔ་ཚན་བཅུ་བཞི་པའི”རིང་། བོད་རང་སྐྱོང་ལྗོངས་དང་ཤང་ཀང་དབར་དངོས་ཟོག་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་6.22ཟིན་པ་ལས་ཕྱིར་གཏོང་བྱེད་མང་ཤོས་དབྱར་རྩ་དགུན་འབུ་དང་གཏེར་ཆུ་སོགས“བོད་ལྗོངས་རྟགས་ཅན”གྱི་ཁྱད་ལྡན་ཐོན་རྫས་ཡིན་པ་དང་། ཤང་ཀང་གིས་ཐོན་སྐྱེད་བྱས་པའི་དྲི་ཞིམ་རྫས་དང་། སྔོན་ཐུམ་བཟའ་བཅའ། བརྒྱུད་འདྲེན་བྱས་པའི་སྤུས་རྟགས་གྲགས་ཅན་གྱི་མཛེས་རྫས་སོགས་ཀྱང་གཞུང་ལམ་དང་མཁའ་ལམ་བརྒྱུད་ནས་ས་མཐོར་ནང་འདྲེན་བྱེད་ཀྱི་ཡོད་པ་རེད།

ཉེ་བའི་ལོ་ཤས་རིང་། ཤང་ཀང་གི་ཞིམ་ཟས་སྟོན་ཚོགས་དང་བོད་ལྗོངས་ཀྱི་ཡུལ་སྐོར་འོས་སྦྱོར་བྱེད་སྒོ་སོགས་ཐབས་ལམ་མང་པོར་བརྟེན་པས། “བོད་ལྗོངས་རྟགས་ཅན”ཐོན་རྫས་ལ་ཤང་ཀང་ཁྲོམ་རའི་དགའ་བསུ་རྒྱུན་མཐུད་ཐོབ་ཡོད། ཉེ་ཆར། ལྷ་སའི་སྐྱེ་ལྡན་ནས་དང་། ལྷོ་ཁའི་རྒུན་འབྲུམ་ཨ་རག ཉིང་ཁྲིའི་སྦྲང་རྩི་སོགས་ཐོན་རྫས་མང་པོ་ཤང་ཀང་གི་ཁྲོམ་རར་ཐེངས་དང་པོ་བཏོན་ཡོད། “ཕྱིར་གཏོང་བྱེད་ཚད་མང་པོ་མེད་ཀྱང་། ཕྱིར་གཏོང་ཐོན་རྫས་ཀྱི་སྣ་ག་མང་དུ་ཕྱིན་ཡོད། འདི་ནི་ཁྲོམ་ར་གསར་སྤེལ་གྱི་ཚོད་ལྟ་གལ་ཆེན་ཞིག་རེད”ཅེས་ཟངས་རི་རྫོང་ཕག་གྲུ་རུང་ཧྲུན(ས་གཙང)གཞིས་ཀ་ཚད་ཡོད་ཀུང་སིའི་ཏུང་ཧྲི་ཀྲང་ཆུས་ཐེན་ཝུན་གྱིས་བཤད།

ཤེས་རྟོགས་བྱུང་བར་གཞིགས་ན། ལྷ་ས་འགག་སྒོ་ལས་ཁུངས་ཀྱིས“དྲ་ཐོག་མཆན་སྤྲོད”ཀྱི་ཞིབ་བཤེར་རིམས་བཤེར་དཔང་ཡིག་སོགས་སྟབས་བདེ་ཅན་གྱི་བྱེད་ཐབས་སྤྱོད་མང་དུ་བཏང་ནས། ཐོན་རྫས་སྐྱེལ་འདྲེན་སོགས་ཀྱི་ལྷུ་ཚིགས་ཁག་ལེགས་སུ་བཏང་བས། ཕྱིར་གཏོང་ཐོན་རྫས་དག་དམིགས་སར་མ་སླེབས་བར་བཏོན་མི་དགོས་པར་མཉམ་འགུལ་ལྟ་འདོམས་ཐུབ་པ་མངོན་འགྱུར་བྱུང་ཡོད། རྒྱལ་ཡོངས་ཀྱི་གཏེར་ཆུ“ཁག་ཐེངས་ཞིབ་བཤེར(རིམས་བཤེར)”ཕྱིར་གཏོང་ཚོད་ལྟའི་ལས་དོན་ཁག་དང་པོ་གསར་གཏོད་བྱས་ནས་སྤེལ་བས། དེ་སྔ་ལམ་བར་དུ་ཆུ་ཚོད་6དང་ཞིབ་བཤེར་བྱེད་པར་གཟའ་འཁོར་1དགོས་པ་དེ་ད་ཆ་སྐར་མ་6ཙམ་བར་ཐུང་དུ་ཕྱིན་ནས། ཁེ་ལས་ཀྱི་ཟོག་འགྲུལ་ལས་ཕྱོད་70%ཙམ་མཐོ་རུ་ཕྱིན་ཡོད་པ་རེད།