བོད་དང་ཀོང་ཏུང་གི་ཐད་རྒྱུག་ལས་གྲྭའི་འཕར་སྣོན་བརྟན་པོ་དང་མ་འཇོག་རྒྱ་ཆེར་གཏོང་བའི་སྐུལ་སློང་ཚོགས་འདུ་སྟེ། ཀོང་ཏུང་དུམ་བུའི་རྩིགས་རྨང་དང་པོ་སྔོག་པའི་མཛད་སྒོ་ཚེས་20ཉིན་ཀོང་ཏུང་ཞིང་ཆེན་པོ་ལུའོ་རྫོང་དུ་འཚོགས་ནས། བོད་དང་ཀོང་ཏུང་གི་ཐད་རྒྱུག་ལས་གྲྭའི་ཀོང་ཏུང་དུམ་བུའི་སྐུད་ལམ་དངོས་སུ་སྐྲུན་འགོ་ཚུགས་ཡོད། བོད་དང་ཀོང་ཏུང་གི་ཐད་རྒྱུག་ལས་གྲྭའི་སྐུད་ལམ་ལས་གྲྭ་དེ་བོད་ལྗོངས་ཆབ་མདོ་མཛོ་སྒང་རྫོང་སྨད་ཡུལ་ཤང་གི་ཆབ་མདོ་གློག་སྒྱུར་ས་ཚིགས་ནས་འགོ་ཚུགས་པ་དང་། ལམ་བར་དུ་བོད་ལྗོངས་ཉིང་ཁྲི་རྫ་ཡུལ་རྫོང་གི་རྫ་ཡུལ་གློག་སྒྱུར་ས་ཚིགས་དང་ཀོང་ཏུང་ཀོང་ཀྲོའུ་ཧྭ་ཏུའུ་ཆུས་ཀྱི་ཞའོ་ཅིང་གློག་སྒྱུར་ས་ཚིགས་བརྒྱུད། མཐར་ཀོང་ཏུང་ཧྲེན་ཀྲེན་ལུང་ཧྭ་ཆུས་ཀྱི་དབུས་བརྒྱུད་གློག་སྒྱུར་ས་ཚིགས་བར་ཡིན་ཞིང་། ཐད་རྒྱུག་སྐུད་ལམ་གྱི་སྤྱིའི་རིང་ཚད་ལ་སྤྱི་ལེ་2681ཡོད།

ངོ་སྤྲོད་བྱས་པར་གཞིགས་ན། བོད་དང་ཀོང་ཏུང་གི་ཐད་རྒྱུག་ལས་གྲྭ་ནི་རང་རྒྱལ་གྱི་ཞིང་ཆེན་དང་ལྗོངས་སྒྲོལ་བའི་གློག་གཏོང་ལས་གྲྭ་གལ་ཆེན་ཞིག་ཡིན་ལ། གློག་གཏོང་ཚད་གཞི་ཁྱོན་ཆན་ཝ་ཁྲི་1000ཟིན་ཡོད། འཁོར་སྐྱོད་བྱེད་འགོ་ཚུགས་རྗེས་བོད་ཤར་ལྷོའི་ནུས་རྒྱུ་གཙང་མའི་རྟེན་གཞིས་ལོ་ལྟར་གཡོད་ཀང་ཨའོ་ཁུག་ཆེན་ཁུལ་ལ་ལྗང་མདོག་གློག་ནུས་ཆུ་ཚོད་ཆན་ཝ་དུང་ཕྱུར་430ལྷག་འདྲེན་ཐུབ་པ་དེ་འགག་གསུམ་གློག་ཁང་གི་ལོའི་གློག་འདོན་ཚད་ཀྱི་ཕྱེད་ཀ་ཙམ་ཟིན་ནས། ལོ་རེར་ཚད་ལྡན་རྡོ་སོལ་ཏུན་ཁྲི་1200ཙམ་གྱི་ཚབ་བྱེད་ཐུབ་ནས་དབྱང་གཉིས་ཐཱན་འགྱུར་འབུད་ཚད་ཏུན་ཁྲི་3300ཙམ་ཉུང་དུ་གཏོང་ཐུབ་རྒྱུ་རེད། བོད་དང་ཀོང་ཏུང་གི་ཐད་རྒྱུག་ལས་གྲྭ་ཁོ་ནར་མ་འཇོག་བསྡོམས་འབོར་སྒོར་དུང་ཕྱུར་532ཙམ་ཟིན་པའི་ཁར་ལེ་ལག་ཚང་སྒྲིག་གི“ཆུ་རླུང་འོད་གསུམ་གཞི་གཅིག་ཅན”གྱི་གློག་ཁུངས་རྟེན་གཞིའི་མ་འཇོག་སྒོར་དུང་ཕྱུར་1500ལྷག་བསྣན་ན། སྟོད་སྨད་རྒྱུད་ཀྱི་སྒྲིག་ཆས་བཟོ་སྐྲུན་དང་ལས་གྲྭའི་ཨར་ལས་སོགས་འབྲེལ་ཡོད་ཐོན་ལས་འཕར་བ་དང་མི་སྣ་ལས་ཞུགས་བྱེད་པར་སྐུལ་ཁྲིད་ནུས་ལྡན་ཐུབ་རྒྱུ་ཡིན་པ་རེད།