ཀ་ལ་གྲོང་ཚོའི“ཁམ་བུའི་མེ་ཏོག་གི་དཔལ་འབྱོར”
“2025ལོར་ང་ཚོས‘ཁམ་བུའི་མེ་ཏོག་གི་དཔལ་འབྱོར’དེ་དུས་བཞིའི་ཐོན་ལས་སུ་བསྒྱུར་ཡོད”ཅེས་བོད་ལྗོངས་ཉིང་ཁྲི་གྲོང་ཁྱེར་བྲག་ཡིབ་ཆུས་ཉིང་ཁྲི་གྲོང་རྡལ་ཀ་ལ་གྲོང་ཚོའི་གྲོང་ཚོ་ཨུ་ལྷན་གྱི་གཞུང་ལས་ཁང་དུ་གྲོང་ཚོ་ཨུ་ལྷན་གྱི་ཀྲུའུ་རེན་ཉི་མ་རྡོ་རྗེས་གསར་འགོད་པར་ཟིན་དེབ་མཐུག་པོ་ཞིག་སྟོན་བཞིན་དུ་དེ་ལྟར་བཤད།
ཟིན་དེབ་དེ་ནི་ཀ་ལ་གྲོང་ཚོའི་མཉམ་སྡེབ་ཡོང་འབབ་ཀྱི་རྩིས་ཁྲ་རེད། ཉི་མ་རྡོ་རྗེས་གསར་འགོད་པར་འདས་ཟིན་པའི་ལོ་དེའི་ནང་གྲོང་ཚོ་ཡོངས་ཀྱི་ཁམ་བུའི་མེ་ཏོག་དུས་ཆེན་ཡག་པོ་གཉེར་བ་མ་ཟད། ད་དུང“རིག་གནས་བསམ་བཀོད་ཀྱི་འཁྱགས་པ་བྱི་རིལ”དང“ཁམ་བུའི་མེ་ཏོག་གི་གསོལ་སྟོན”སོགས་ལས་རྣམ་གསར་པ་ནང་འདྲེན་བྱས་ཡོད། “ང་ཚོ་བློ་ཡིད་ཚིམ་ཤོས་ནི་གྲོང་ཚོར་ཚད་གཞི་མཐོ་བའི་དྲོད་ཁང་ཆེ་མོ་དང་བོད་སྨན་གྱི་ལུམས་རྒྱག་ས་བསྐྲུན་པས་དུས་ཚིགས་ཚང་མར་ཡུལ་སྐོར་བ་ཡོང་མཁན་མང་པོ་ཡོད”ཅེས་བཤད།
ཉི་མ་རྡོ་རྗེས་གསར་འགོད་པ“ཏ་མེ་དམངས་སྲོལ་གནས་ཚང”ཞེས་སྒོ་བྱང་བཀལ་བའི་ཐོག་ཁང་ཆུང་ཆུང་ཞིག་གི་ཕྱོགས་སུ་ཁྲིད་བྱུང་། མེ་ཏོག་གི་བརྐོས་བརྒྱབ་པའི་སྒོ་མོ་དལ་བུར་ཕྱེ་བས་ན་སྦྱིན་བདག་པད་མ་སྒོ་རའི་ནང་གཙང་སྦྲ་བྱེད་བཞིན་འདུག
པད་མ་ནི་གྲོང་ཚོའི་དམངས་སྲོལ་གནང་ཚང་གཉེར་མཁན་ཁག་དང་པོའི་གྲས་ཡིན་ཞིང་། “དེ་སྔོན་ས་ཞིང་འདེབས་པ་དང་ཕྱུགས་རིགས་གསོས་ནས་འཚོ་བ་སྐྱེལ་གྱི་ཡོད་པས་ལྟོ་གོས་འཕྱིད་ཙམ་ཞིག་རེད། ད་ཆ་ལོ་གཅིག་ལ་ཡོང་འབབ་སྒོར་ཁྲི་བཅུ་ལྷག་ཙམ་ཡོང་གི་འདུག”ཅེས་བརྗོད་སྐབས། ཡུལ་སྐོར་བ་ཁ་ཤས་ཀྱིས་ལམ་ཆས་སྒམ་དྲུད་ནས་སྒོ་རའི་ནང་འཛུལ་བཞིན་འདུག་པས་པད་མས་ལམ་སེང་སེམས་རྩ་འཁོལ་པོས་སྣེ་ལེན་ཞུ་བར་ཕྱིན་སོང་།
དམངས་སྲོལ་གནས་ཚང་གི་ཕྱིའི་རི་ལྡེབས་སུ་ཁམ་སྡོང་མང་པོ་མཐོང་རྒྱུ་ཡོད། ཉི་མ་རྡོ་རྗེས“འདི་ལོ་ཚང་མས་ཆེད་ལས་ཚོགས་པ་གདན་དྲངས་ནས‘ཁམ་བུའི་མེ་ཏོག’སྤུས་རྟགས་ཀྱིIPབཟོས་ཏེ་ཁྱད་ལྡན་རིག་གནས་བསམ་བཀོད་ཀྱི་ཐོན་རྫས་དེ་བས་མང་བ་གསར་སྤེལ་བྱེད་ཀྱི་ཡིན”ཞེས་བཤད།
འབྲེལ་ཡོད་གསར་འགྱུར།