2025ལོར། མངའ་རིས་ས་ཁུལ་གྱིས་རྨང་གཞིའི་སྒྲིག་བཀོད་རིམ་སྤོར་འདེགས་སྐྱོར་དུ་བྱས་པ་དང་སྒོ་དབྱེ་མཉམ་ལས་སྒུལ་ཤུགས་སུ་བྱས་པས། ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་དངུལ་འབོར་སྒོར་ཁྲི་5999.71ཟིན་པ་དེ་དུས་མཚུངས་ལས་118%འཕར་ནས། ལོ་འཁོར་གྱི་དམིགས་ཚད་ལས་འགན་ཚད་བརྒལ་ངང་ལེགས་གྲུབ་བྱུང་ཞིང་། མཐའ་མཚམས་ཚོང་དོན་ཟོག་འགྲུལ་སྤུས་ཚད་མཐོ་པོས་འཕེལ་རྒྱས་འགྲོ་བའི་གྲུབ་འབྲས་གསར་པ་མངའ་རིས་ས་མཐོར་མངོན་བཞིན་ཡོད།

རང་ཡུལ་གྱི་སྤུས་རྟགས་དང་རིག་གནས་ས་མཐོ་ནས་ཕྱིར་གཏོང་ཐུབ་པ།

“ཁག་དང་པོའི་གངས་རིན་པོ་ཆེའི་གཏེར་ཆུ་ནེ་པ་ལའི་གྲོང་ཁྱེར་ཀ་ཏ་མན་རྡུར་བདེ་བླག་ངང་འབྱོར་བ་དེ་ཐོག་ནས་ང་ཚོ་མངའ་རིས་ཀྱི་ཁྱད་ལྡན་ཐོན་རྫས་ཨེ་ཤེ་ཡ་ལྷོ་མའི་ཁྲོམ་རར་དངོས་སུ་འདོན་འགོ་ཚུགས་པ་མཚོན་གྱི་ཡོད”ཅེས་བོད་ལྗོངས་གངས་རིན་པོ་ཆེ་ཐོན་ཁུངས་གསར་སྤེལ་ཚད་ཡོད་ཀུང་སིའི་འགན་འཁུར་བ་ལི་ཞའོ་ཡིས་སྤོབས་པ་ཆེན་པོས་བརྗོད།

ནེ་པ་ལའི་རྒྱལ་སྤྱིའི་ཚོང་དོན་དངོས་མང་སྟོན་ཚོགས་སྐབས་བཅུ་པའི་ཐོག་ཀུང་སི་དེས་གངས་ཏི་སེ་རི་རྒྱུད་ནས་ཐོན་པའི་རང་བྱུང་གཏེར་ཆུ་འགྲེམས་སྟོན་བྱས་པར་སྒོར་ཁྲི་30ཡི་མངགས་ཐོ་འབྱོར་བ་མ་ཟད། ལོ་5ཡི་ཕྱིར་གཏོང་གྲོས་མཐུན་ཡང་བདེ་བླག་ངང་བཞག་པ་རེད།

རིག་གནས་ཚོང་དོན་དེ་མཐའ་མཚམས་ཚོང་དོན་མཉམ་ལས་ཀྱི་འབྲེལ་ཐག་གསར་པ་ཞིག་ཏུ་གྱུར་ཞིང་། ཀྲུང་གོའི་བོད་ལྗོངས་མངའ་རིས་ས་ཁུལ་དང་ནེ་པ་ལའི་མཉམ་འབྲེལ་མངོན་མིན་རིག་གནས་ཤུལ་བཞག་བཟོ་རྩལ་ཐོན་རྫས་ཚོང་འདུས་སྐབས་གཉིས་པའི་ཐོག་ནེ་པ་ལ་དང་། འབྲུག་ཡུལ། ཕ་ཁི་སི་ཐན་སོགས་རྒྱལ་ཁབ་ནས་ཡོང་བའི་ཕྱི་རྒྱལ་གྱི་ཚོང་པ་འགྲེམས་ཚོགས་ལ་ཞུགས་པ་དང་། འགྲེམས་ཚོགས་ལ་ཁྱོན་འགྲེམས་གནས་32བཙུགས་ཡོད། “ང་རང་མངའ་རིས་ས་ཁུལ་དུ་ཡོང་ཐེངས་དང་པོ་ཡིན། འདི་གར་ཉོ་ཚོང་གི་རྣམ་པ་ཧ་ཅང་འཁྲུག་པོ་འདུག ད་ཐེངས་ཀྱི་ཚོང་འདུས་ལ་ངས་སྤུས་དག་གོང་ཁེའི་ཤིང་ཕོར་དང་། བོ་དྷི་ཕྲེང་བ། གྱོན་ཆས་སོགས་ཚོང་ཟོག་འཁྱེར་ཡོད་པ་ཚང་མ་ལག་བཟོའི་ཐོན་རྫས་ཡག་པོ་ཤ་སྟག་ཡིན”ཞེས་འགྲེམས་ཚོགས་ལ་ཞུགས་མཁན་ནེ་པ་ལའི་ཚོང་པ་ཐ་ར་ཡིས་བཤད།

མངའ་རིས་ས་ཁུལ་ཚོང་དོན་ཅུས་ཕྱི་ཕྱོགས་ཚོང་དོན་ཕྱོགས་བསྡུས་ཁོའོ་ཡི་ཁོའོ་ཀྲང་ལིའུ་ཡུང་གིས། ད་ཐེངས་ཀྱི་ཚོང་འདུས་ཐོག་ཉོ་ཚོང་དངུལ་འབོར་སྒོར་ཁྲི་326.2ཟིན་ནས་རིག་གནས་དང་ཚོང་དོན་མཉམ་འདྲེས་གཏིང་ཟབ་བྱུང་ཡོད་ལ། ནེ་པ་ལ་དང་འབྲུག་ཡུལ་སོགས་རྒྱལ་ཁབ་དབར་གྱི་སྤེལ་རེས་དང་འགྲོ་འོང་ཡང་ཟབ་ཏུ་ཕྱིན་ཏེ། ཁྱིམ་མཚེས་རྒྱལ་ཁབ་དབར་གྱི་མཛའ་མཐུན་འབྲེལ་བ་དེ་བས་བརྟན་དུ་ཕྱིན་ཡོད་ཅེས་ངོ་སྤྲོད་བྱས་པ་རེད།

སྤུ་ཧྲེང་གི་མཐའ་མཚམས་ཚོང་དོན་ལ་སྒུལ་ནུས་ཆེན་པོ་ལྡན་པ།

མངའ་རིས་ཀྱི་མཐའ་མཚམས་ཚོང་དོན་གྱི་ལྟེ་བའི་གཞི་རྟེན་ཞིག་ཡིན་པའི་སྤུ་ཧྲེང་འགག་སྒོ་དང་དེ་བཞིན་མཐའ་མཚམས་ཚོང་དོན་ཁྲོམ་རར་2025ལོར་འཕེལ་རྒྱས་ཆེན་པོ་བྱུང་ཞིང་། མ་དངུལ་སྒོར་ཁྲི་907བཏང་བའི་སྤུ་ཧྲེང་རྫོང་ཐང་དཀར་མཐའ་མཚམས་ཚོང་དོན་ཁྲོམ་རའི་དུས་ཐེངས་གཉིས་པའི་རྣམ་གྲངས་ད་ཆ་འཛུགས་སྐྲུན་ལེགས་གྲུབ་ཟིན་ནས། ཕྱི་རྒྱལ་གྱི་ཚོང་པའི་ཚོང་ཁང་194དང་ས་གནས་དེ་གའི་ཚོང་ཁང་95ཡོད་ཅིང་། ཕྱི་ནང་ཚོང་དོན་ཁུལ་གྱི་ཕྱིར་ཚོང་དངུལ་འབོར་སྒོར་ཁྲི་1800ཟིན་ཡོད། “ཁྱེད་ཀྱིས་གཟིགས་དང་། ཁྲོམ་རའི་ནང་ཆུ་དང་གློག་སོགས་ཀྱི་ལེ་ལག་ཚང་མ་ཧ་ཅང་འཐུས་སྒོ་ཚང་པོ་ཡོད། ཚོང་གཉེར་ཆ་རྐྱེན་ལེགས་སུ་ཕྱིན་པ་དང་བསྟུན་ནས། ཚོང་ཁང་ནང་གི་ཚོང་ཡང་ཡག་ཏུ་འགྲོ་གི་འདུག 2025ལོར་ཡོང་འབབ་སྒོར་ཁྲི་52རག་བྱུང”ཞེས་ཁྲོམ་རའི་ནང་ཟ་ཁང་བཙུགས་ནས་ལོ་མང་སོང་བའི་ནེ་པ་ལའི་ཚོང་པ་ཉི་མ་ལྷ་མོས་ཚོར་སྣང་ཟབ་མོའི་ངང་བཤད།

རྨང་གཞིའི་སྒྲིག་བཀོད་འཐུས་སྒོ་ཚང་དུ་ཕྱིན་པ་ལས་འགག་སྒོ་སྒྲོལ་བའི་ལས་ཕྱོད་ཀྱང་ཇེ་ཆེར་ཕྱིན་ཞིང་། 2025ལོའི་ཟླ་7པ་ནས་བཟུང་། སྤུ་ཧྲེང་རྫོང་གི་ཏིང་དཀར་དང་། ལབ་རྩེ་ལ། པི་ལིང་ལ་བཅས་སྲོལ་རྒྱུན་མཐའ་མཚམས་ཚོང་དོན་ས་ཚིགས་ཁག་3སྔ་རྗེས་སུ་སྒོ་མོ་ཕྱེ་བ་དང་། ལོ་ཧྲིལ་པོའི་ཉོ་ཚོང་དངུལ་འབོར་སྒོར་ཁྲི་2304.633ཟིན་ཡོད་པ་རེད།

དམངས་འཚོ་དང་ཐོན་ལས་ཀྱིས་ཕན་ཚུན་མཐུན་རྐྱེན་སྦྱར་བ།

མཐའ་མཚམས་ཚོང་དོན་ཟོག་འགྲུལ་འཕེལ་རྒྱས་ཕྱིན་པ་དེས་ས་ཁུལ་གྱི་དཔལ་འབྱོར་ལ་སྐུལ་འདེད་ཐུབ་པ་མ་ཟད། མཐའ་མཚམས་མང་ཚོགས་ཀྱི་འཚོ་བར་དེ་བས་དྲོ་སྐྱིད་སྦྱིན་ཡོད། 2025ལོར། མངའ་རིས་ས་ཁུལ་གྱིས་ཚད་ལྡན་ཅན་གྱི་ཞིང་ཞོར་ཐོན་རྫས་ཁྲོམ་ར་2དང་ཚོང་དོན་ཕྱོགས་བསྡུས་ཁྲོམ་ར་1བསྐྲུན་པ་དང་། ཕྱི་ནང་ཚོང་དོན་གཞི་གཅིག་ཅན་གྱི་མཐུད་སྐྲུན་རྣམ་གྲངས་3ལག་ལེན་བསྟར་བའི་ནང་རྣམ་གྲངས་1བསྐྲུན་ཟིན་པ་མ་ཟད་གཉེར་སྐྱོང་བྱེད་འགོ་ཚུགས་ཡོད།

གཞན་ཡང་། གནས་སྤོས་བཀོད་སྒྲིག་བྱ་ཡུལ་17གྱི་ཚོང་དོན་ཞབས་ཞུའི་དྲ་ཚིགས་བསྐྲུན་ཟིན་པ་དང་འབྲེལ་གཉེར་སྐྱོང་བྱེད་འགོ་ཚུགས་ཤིང་། རིམ་རྩིས་བརྒྱབ་ན་བསྡོམས་ཏུན་171.1ཟིན་པའི་དངོས་ཟོག་ཐེངས་167སྡེབ་སྐྱེལ་བྱས་པར“དངོས་ཟོག་ཉོ་ཡུལ་ཐག་རིང་བ་དང་སྡེབ་སྐྱེལ་བྱེད་དཀའ་བའི”གནད་དོན་ཐག་གཅོད་ནུས་ལྡན་ཐུབ་ཡོད། རྩྭ་མདའ་རྫོང་གནས་སྤོས་བཀོད་སྒྲིག་བྱ་ཡུལ་གྱིས་ཉོ་སྒྲུབ་མི་སྣ་སྒྲིག་འཛུགས་བྱས་ནས་སྒར་རྫོང་སེང་གེ་ཁ་འབབ་གྲོང་རྡལ་དུ་དངོས་ཟོག་ཉོ་བར་བསྐྱོད་ཅིང་། ས་གནས་དེ་གའི་མང་ཚོགས་བཀྲ་ཤིས་ཀྱིས“དེ་སྔོན་ཅ་དངོས་ཉོ་སྐབས་ཐག་རིང་པོར་འགྲོ་དགོས། ད་ཆ་ཁྱིམ་གྱི་སྒོ་འགྲམ་ནས་ཚང་མ་ཉོ་ཐུབ་པ་མ་ཟད། སྲིད་གཞུང་གིས་ད་དུང་ཉོ་སྒྲུབ་བྱེད་མཁན་དང་རླངས་འཁོར་ལ་ཁ་གསབ་ཀྱང་སྤྲོད་ཀྱི་འདུག འཚོ་བ་དངོས་གནས་ཇི་ཙམ་བསྐྱལ་བ་དེ་ཙམ་གྱིས་སྐྱིད་དུ་འགྲོ་གི་འདུག”ཅེས་གད་མོ་དགོད་བཞིན་བཤད།

དེ་དང་ཆབས་ཅིག་སྦྲག་སྲིད་མྱུར་སྐྱེལ་མཉམ་ལས་དང་འགྲིམ་འགྲུལ་མཉམ་འགུལ་ལས་ཟོག་འགྲུལ་དྲ་རྒྱ་དེ་བས་ཚགས་དམ་དུ་ཕྱིན་ཞིང་། མངའ་རིས་ས་ཁུལ་དུ་ས་ཁུལ་དང་རྫོང་རིམ་པ་གཉིས་ཀྱི་སྦྲག་སྲིད་མྱུར་སྐྱེལ་མཉམ་ལས་གྲོས་མཐུན་བཞག་པའི་ཁེ་ལས་6ཡོད་པ་དག་གི་མཉམ་ལས་ཀྱི་ལས་འབོར་ཁྲི་23.6ལྷག་ཙམ་ཟིན་ནས་ཡོང་འབབ་སྒོར་ཁྲི་264ལས་བརྒལ་ཡོད། སྦྲག་སྲིད་དང་འགྲིམ་འགྲུལ་སྐྱེལ་འདྲེན་ཁེ་ལས་དབར་མཉམ་ལས་གཏིང་ཟབ་བྱེད་པར་རྒྱུན་མཐུད་སྐུལ་འདེད་བཏང་སྟེ། རྫོང་ཚན་པར་བྱས་ནས་མཉམ་ལས་གྲོས་མཐུན་4བཞག་པ་དག་མཉམ་ལས་ཤང་དང་གྲོང་རྡལ་8ལ་ཁྱབ་ཏེ། མཉམ་ལས་ཀྱི་ལས་སྒོའི་གྲངས་འབོར་རིམ་རྩིས་བརྒྱབ་ན་བསྐུར་མ་41711ཟིན་ཡོད།

2026ལོར་རྒྱང་ལྟ་བྱེད་སྐབས། མངའ་རིས་ས་ཁུལ་ཚོང་དོན་ཅུས་ཀྱི་ཅུས་ཀྲང་གཞོན་པ་ཕུར་བུ་ཚེ་རིང་གིས། མངའ་རིས་ས་ཨུད་དང་སྲིད་འཛིན་ཀུང་ཧྲུའུ་ཡི“1+5+1”གི་མཐའ་མཚམས་ཚོང་དོན་ཟོག་འགྲུལ་ཐོན་ལས་འཕེལ་རྒྱས་ཀྱི་བཀོད་སྒྲིག་དོན་འཁྱོལ་ནན་པོ་བྱས་ནས་སྒོ་དབྱེ་མཉམ་ལས་རྒྱུན་མཐུད་བྱེད་ཟབ་ཏུ་གཏོང་གི་ཡིན་ཞེས་བཤད་པ་རེད།