“མེ་འཁོར”བརྒྱུད་ནས་སྒེར་འཁོར་མངགས་སྐྱེལ་བྱེད་པ།
མཚོ་བོད་ལྕགས་ལམ་ཟོག་འགྲེམས་ལྟེ་གནས་ཀྱིས་ལས་བྲེལ་ཆེ་ཤོས་ཀྱི་མངགས་སྐྱེལ་ལས་སྒོ་གཉེར་འགོ་ཚུགས་པ།
ལོ་གསར་འཆར་ཉེར་ཡོད་པའི་མཚམས་སུ། གངས་ལྗོངས་ས་མཐོར་ལོ་གསར་གྱི་རྣམ་པ་རིམ་བཞིན་ཟབ་ཏུ་འགྲོ་བཞིན་ཡོད་པ་དང་། མཚོ་བོད་ལྕགས་ལམ་ཟོག་འགྲེམས་ལྟེ་གནས་ལྷ་ས་འབབ་ཚུགས་ནུབ་མའི་ཟོག་འདྲེན་ས་ཚིགས་སུ་དུས་ཆེན་གོང་བོད་ནས་སྒེར་འཁོར་མངགས་སྐྱེལ་བྱེད་མང་ཤོས་ཀྱི་དུས་སུ་སླེབས་ཡོད། ཤེས་རྟོགས་བྱུང་བར་གཞིགས་ན། མིག་སྔར་ཟོག་སྐྱེལ་ས་ཚིགས་དེར་ཉིན་རེར་ཆ་སྙོམས་མངགས་སྐྱེལ་བྱེད་ཚད་སྒེར་འཁོར་100ཡས་མས་ཟིན་ཞིང་། ལྕགས་ལམ་སྡེ་ཚན་གྱིས་སྐྱེལ་འདྲེན་ནུས་པ་གནད་སྨིན་བཀོད་སྒྲིག་དང་། ཞབས་ཞུའི་ལས་རིམ་ལེགས་སུ་གཏོང་བ། ལས་སྒྲུབ་ལས་ཕྱོད་ཆེ་རུ་གཏོང་བ་སོགས་ཀྱི་བྱེད་ཐབས་བརྒྱུད་བོད་དུ་ལས་ཀ་བྱེད་མཁན་དང་འཚོ་བ་སྐྱེལ་མཁན་ཚོར་སྟབས་བདེ་ལ་བློ་འགེལ་ཆོག་པའི་སྒེར་འཁོར་མངགས་སྐྱེལ་གྱི་ལམ་བུ་ཞིག་བཏོད་ཡོད།
དཔྱིད་གསར་དུས་ཆེན་གྱི་སྔ་ནུབ་ཏུ་སྒེར་འཁོར་མངགས་སྐྱེལ་བྱེད་པའི་དགོས་མཁོ་ཤིན་ཏུ་ཆེ་བའི་ཁྱད་ཆོས་ལ་དམིགས་ནས། མཚོ་བོད་ལྕགས་ལམ་ཟོག་འགྲེམས་ལྟེ་གནས་ཀྱིས་དང་ལེན་གང་མགྱོགས་དང་གནད་སྨིན་ཇུས་བསྟར་བྱས་ཏེ། ཉིན་རེར་སྒེར་འཁོར་མངགས་སྐྱེལ་བྱེད་པའི་དུས་གཏན་མེ་འཁོར་གཏོང་བ་དང་། དྲ་ཕྱིའི་ཞབས་ཞུའི་སྐར་ཁུང་མང་དུ་གཏོང་བ་དང་དུས་མཚུངས་སུ། དྲ་ཐོག་དང་དྲ་ཕྱིའི་སྟབས་བདེའི་ཞབས་ཞུ་མཁོ་འདོན་བྱས་ནས། ཐབས་མང་མཉམ་སྤྱོད་ཀྱིས་སྐྱེལ་འདྲེན་ཞབས་ཞུའི་ཕན་ནུས་ཕྱོགས་ཡོངས་ནས་ཆེ་རུ་བཏང་ཡོད།
“མིག་སྔར། བོད་ནས་མངགས་སྐྱེལ་བྱེད་པའི་སྒེར་འཁོར‘སྒོ་འགྲམ་ནས་སྒོ་འགྲམ་བར’གྱི་གཞུང་ལམ་དང་ལྕགས་ལམ་མཉམ་སྐྱེལ་རིམ་སྤོར་བྱས་ཡོད་པས། འཁོར་བདག་གིས་12306Appསམ་ཡང་ན‘རྒྱལ་ཁབ་ལྕགས་ལམ་རླངས་འཁོར་མངགས་སྐྱེལ’གྱི་བྱ་རིམ་ཆུང་ངུ་བརྒྱུད་མངགས་ཐོ་བཀོད་ཚེ་ང་ཚོའི་ཚོགས་པས་སྒོ་རྩར་རླངས་འཁོར་ལེན་པར་ཡོང་གི་ཡོད་པས། སྒོ་འགྲམ་ནས་དམིགས་སའི་བར་ཟོག་འགྲེམས་ལྟེ་གནས་ཀྱིས་འགན་འཁུར་གྱི་ཡོད” མཚོ་བོད་ལྕགས་ལམ་ཟོག་འགྲེམས་ལྟེ་གནས་ལྷ་ས་འབབ་ཚུགས་ནུབ་མའི་ཟོག་འགྲེམས་ས་ཚིགས་ཀྱི་འགན་འཁུར་བ་ཝུའུ་ཧའོ་ཡིས། “ཟོག་འགྲེམས་ས་ཚིགས་སུ་ཉིན་མཚན་དབྱེར་མེད་ཀྱི་ཞབས་ཞུའི་ཐད་འབྲེལ་ཁ་པར་ཤར་གཏོང་བྱས་པས། མཚན་གུང་ངམ་ཡང་ན་དུས་ཆེན་གྱི་གུང་གསེང་སྐབས་སུའང་འཁོར་བདག་གི་བློ་འདྲི་དང་མངགས་ཐོ་དུས་ཐོག་ཏུ་དང་ལེན་བྱས་ཏེ་འཁོར་བདག་གི་དགོས་མཁོ་གང་ལེགས་སྐོང་གི་ཡོད”ཅེས་ངོ་སྤྲོད་བྱས།
འབྲེལ་ཡོད་གསར་འགྱུར།