ཉེ་བའི་ལོ་ཤས་རིང་། ལྷོ་ཁ་གྲོང་ཁྱེར་གྱིས་5Gདྲ་རྒྱ་ཕྱོགས་ཡོངས་ལ་ཁྱབ་པ་དང་གྲང་ཕྲེང་ཟོག་འགྲེམས་རིམ་སྤོར་ལ་བརྟེན་ནས་མང་ཚོགས་ཀྱི་ཐད་གཏོང་ཟོག་འཚོང་གི་སྒུལ་ནུས་གསར་པ་འཕེལ་བར་བྱས་ཡོད། ཡུལ་དེ་གའི་ཞིང་འབྲོག་པ་དང་ལས་གཏོད་པས་གཞི་རིམ་རྩ་འཛུགས་ཀྱི་ལས་དོན་པ་དང་མཉམ་དུ“སྤྲིན་ཚོམ་ཟོག་ཚོང”བྱས་ཏེ་ལྷོ་ཁའི་མར་དང་། སྡོང་ཐུང་ཀུ་ཤུ། རྒྱ་ཚའི་སྟར་ཁ་སོགས་ས་མཐོའི་ཁྱད་ལྡན་ཐོན་རྫས་ས་ཁོངས་ཀྱི་བཀག་རྒྱ་ལས་བསྒྲལ་ནས་རྒྱལ་ཁབ་ཕྱི་ནང་དུ་བཙོངས་པར། ཚོང་ལམ་ཡངས་སུ་དང་དམངས་འཚོའི་ཁེ་སྤོགས་མང་དུ་ཕྱིན་པ་མ་ཟད། གྲོང་གསེབ་དར་རྒྱས་ལའང་གསོན་ཤུགས་ཆེན་པོ་སྦྱིན་ཡོད།

འཕྱོངས་རྒྱས་རྫོང་གི་འབྲོག་མོ་བཀྲ་ཤིས་ལྷ་མོའི“བོད་ལྗོངས་ལྷ་མོ”ཞེས་པའི་དྲ་མིང་ལ་དགའ་མོས་བྱེད་མཁན་ཁྲི་120ལྷག་ཙམ་ཡོད་ཅིང་། ཁོང་གིས་རང་ཁྱིམ་གྱི་སྒོ་ར་དང་། ཞིང་ནང་དང་མུ་ཁར་ཐད་གཏོང་བྱས་ཏེ། མར་དང་རྩམ་པའི་སྲོལ་རྒྱུན་བཟོ་རྩལ་གྱི་བརྒྱུད་རིམ་ཧྲིལ་པོ་སྟོན་པ་མ་ཟད། ད་དུང་སྣེ་ཁྲིད་དེ་ཞིང་འབྲོག་པ་དུད་ཚང་20ལྷག་ཙམ་ཚུད་པའི་ཞིང་རོགས་མནའ་འབྲེལ་བཙུགས་ཤིང་། ཐད་གཏོང་བྱེད་ཐེངས་གཅིག་ཁོ་ནར་ཕྱིར་ཚོང་ཡོང་འབབ་མང་ཤོས་བསྡོམས་འབོར་སྒོར་ཁྲི་15ཟིན་པ་དང་། ཆ་སྙོམས་ཞིང་ལས་ཐོན་རྫས་ཐད་ཚོང་བྱེད་ཐེངས་རེར་ཡོང་འབབ་སྒོར་ཁྲི་3ནས་5བར་ཟིན་ཏེ། ཉེ་འཁོར་གྱི་ཞིང་དུད་རྣམས་ལ་ལོ་རེར་ཆ་སྙོམས་འབབ་འཕར་སྒོར་ཁྲི་2ནས་3བར་ཡོང་བར་ཐད་ཀར་སྐུལ་མ་ཐེབས་ཡོད། ཐོན་རྫས་དེ་དག་རྒྱལ་ཡོངས་ཀྱི་ཞིང་ཆེན་དང་གྲོང་ཁྱེར་20ལྷག་ཙམ་དང་དེ་བཞིན་ནེ་པ་ལ་དང་རྒྱ་གར་སོགས་སུ་བཙོངས་དང་འཚོང་མུས་ཡིན་པ་རེད།

སྣེ་གདོང་ཆུས་བདེ་ཞིང་གྲོང་ཚོས“སྦྲག་ལས་ཀྱིས་ལས་སྟེགས་སྐྲུན་པ་དང་། སྨྱན་སྦྱོར་གྱིས་རོགས་རམ་བྱེད་པ། བོད་སྐྱོར་ལ་བརྟེན་ནས་ཞིང་ལས་དར་རྒྱས་གཏོང་བ”བཅས་ཀྱི་བརྗོད་དོན་གཙོ་བོའི་ཐད་གཏོང་ལ་བརྟེན་ནས་ཀུ་ཤུའི་ཆེད་གཏོགས་ཟོག་འགྲེམས་བགྲོད་ལམ་བཏོད་པར། ཆུ་ཚོད་4ཡི་ནང་ཐད་གཏོང་ལ་ལྟ་མཁན་མི་ཐེངས་ཁྲི་12དང་མངགས་ཐོ་856ཟིན་ནས་ཕྱིར་ཚོང་དངུལ་འབོར་སྒོར་ཁྲི་42.8ཟིན་པ་དང་། མཛོད་ཉར་བྱས་པའི་སྡོང་ཐུང་ཀུ་ཤུ་རྒྱ་མ་ཁྲི་15བྲིན་ནས་ཤིང་འབྲས་འདེབས་མཁན་ཞིང་དུད་ལ་ཆ་སྙོམས་འབབ་འཕར་སྒོར་8000བྱུང་ཡོད།

གྲི་གུ་གྲོང་རྡལ་གྱི་འབྲོག་པ་རྒྱ་མཚོས་ཡུལ་མི་དུད་ཚང་15ཡི་སྣེ་ཁྲིད་དེ་ཚགས་ཤ་སྐམ་པོ་བཙོངས་པར་ལོ་རེར་ཕྱིར་ཚོང་ཡོང་འབབ་སྒོར་ཁྲི་50ལྷག་ཙམ་ཟིན་པ་དང་། དུད་ཚང་རེར་ཆ་སྙོམས་ཡོང་འབབ་སྒོར་ཁྲི་3ནས་5བར་འཕར་བ་ནས་ཐད་གཏོང་ཞིང་སྐྱོར་བྱེད་སྟངས་སྣ་ཚོགས་གང་སར་ཁྱབ་པའི་བར། ལྷོ་ཁས“མི་སྒེར་གྱི་IPཡིས་ཕྱིར་འདྲེན་དང་སྲིད་གཞུང་དང་ཁེ་ལས་མཉམ་འགུལ་གྱིས་མཐུན་རྐྱེན་སྦྱོར་བ། འགྲེམས་ཚོགས་ཀྱི་གཅིག་སྡུད་རྣམ་པ་ཟུང་དུ་འབྲེལ་བའི”ཁོར་ཡུག་བཟང་པོ་བཏོད་པས། ས་མཐོའི་ཁྱད་ལྡན་ཐོན་རྫས་དག་དངུལ་སྨར་ལ་སྒྱུར་ཐུབ་པ་དང་། ཐད་གཏོང་བརྒྱུད་བོད་མི་རིགས་ཀྱི་རིག་གནས་ཡུལ་ཕྱོགས་གང་སར་ཁྱབ་ཐུབ་པ་བྱུང་ཡོད།