ཕྱི་ནང་མཉམ་འདྲེས་བྱས་ནས་བོད་ཀྱི་དེང་རབས་ཅན་གྱི་ལམ་བུ་བཏིང་བ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། “འཕེལ་རྒྱས་ཀྱི་བཀོད་པ་གསར་པ་འགོད་པར་ནང་མཁོ་རྒྱ་ཆེར་གཏོང་བའི་འཐབ་ཇུས་ཀྱི་གཞི་རྩ་མཐའ་འཁྱོངས་བྱས་ཏེ་ཐོན་སྐྱེད་དང་། བགོ་འགྲེམས། འཁོར་རྒྱུག འཛད་སྤྱོད་བཅས་རྒྱལ་ནང་གི་ཁྲོམ་རར་མང་ཙམ་བརྟེན་ནས། རྒྱལ་དམངས་དཔལ་འབྱོར་འཁོར་རྒྱུག་ཡག་པོ་ཡོང་བར་བྱེད་དགོས”ཞེས་ནན་བཤད་གནང་ཡོད། བོད་ཀྱིས་རང་ངོས་ཀྱི་དོན་དངོས་ལ་གཞི་ཚུགས་ནས་སྒོ་མོ་འབྱེད་རྒྱ་ཆེ་རུ་གཏོང་བ་དང་རྒྱལ་ཡོངས་གཅིག་གྱུར་ཁྲོམ་ར་ཆེན་པོར་མཉམ་འདྲེས་བྱེད་པ་ཟུང་འབྲེལ་བྱས་པར་བརྟེན། ནང་ཁུལ་དུ་གཞི་ཁྱོན་ཆེ་བའི་ཁྲོམ་ར་དང་སྦྲེལ་མཐུད་ཐུབ་པ་དང་། ཕྱི་ཕྱོགས་སུ་མཉམ་ལས་གཉིས་ཁེའི་བར་མཐོངས་རྒྱ་སྐྱེད་ཐུབ་སྟེ་སྒོ་དབྱེ་དང་མཉམ་འདྲེས་ཁྲོད་ཁྲོམ་རའི་སྐྱེ་སྟོབས་ཀྱི་དཔལ་འབར་བའི་རྣམ་པ་མངོན་ཡོད།
ནང་ཁུལ་དུ་ཁྲོམ་ར་ཆེན་པོ་དང་མཉམ་འདྲེས་བྱས་ཏེ་ས་མཐོའི་ཁྱད་ལྡན་ཐོན་རྫས་ཕྱིར་ཚོང་བྱས་ཤིང་། “སྔོན་མ་ཚགས་ཤར་རིན་གོང་མཐོ་པོ་རག་གི་མེད། ད་ཆ་དྲ་ཐོག་ཚོང་ལས་ཀྱི་ལས་སྟེགས་བརྒྱུད་རྒྱལ་ཡོངས་སུ་བྲིན་ཚོང་བྱེད་པས། ལོ་གཅིག་ལ་སྒོར་ཁྲི་བཅུ་གྲངས་རག་གི་ཡོད” འདི་ནི་ནག་ཆུའི་འབྲོག་པ་པ་སངས་ཀྱི་ཕྱུག་འགྱུར་གཏམ་རྒྱུད་རེད་ལ། ང་ཚོས་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་དང་མཉམ་འདྲེས་བྱས་པའི་གསོན་ཉམས་དོད་པའི་མཚོན་ཚུལ་ཞིག་དེ་བས་ཀྱང་རེད། བོད་ཀྱིས་ས་གནས་ཀྱི་སྲུང་སྐྱོང་དང་ཁྲོམ་ར་དབྱེ་བའི་རྣམ་པ་ལས་བསྒྲལ་ཏེ་ཐོན་དབང་སྲུང་སྐྱོང་དང་ཁྲོམ་རར་འཇུག་འཐུས་སོགས་ཀྱི་ལམ་ལུགས་སྒྲིག་སྲོལ་གཅིག་གྱུར་བྱས་ནས་ཟོག་འགྲུལ་གྱི་རྨང་གཞིའི་སྒྲིག་བཀོད་འཐུས་སྒོ་ཚང་དུ་བཏང་སྟེ་འཁོར་རྒྱུག་གི་མ་གནས་དམའ་རུ་བཏང་ཡོད། “ཞིང་ཁྲོམ་ཐད་འབྲེལ”དང་། “ཞིང་ལས་དང་ཁེ་ལས་མཉམ་ལས” “ཐད་གཏོང་ཟོག་ཚོང”སོགས་ཀྱི་བྱེད་ཐབས་ལ་བརྟེན་ནས་ས་མཐོའི་ཁྱད་ལྡན་ཐོན་རྫས་རྒྱལ་ཡོངས་ཀྱི་ཁྱིམ་ཚང་ཁྲི་སྟོང་མང་པོར་ཁྱབ་པར་བྱས་ཡོད། ས་ཁོངས་མཉམ་ལས་ལ་ཤུགས་སྣོན་བརྒྱབ་ནས་ས་མཐོའི་ཁྱད་ལྡན་ཐོན་ལས་རྒྱལ་ཡོངས་ཀྱི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་དང་མཉམ་འདྲེས་བྱས་ཏེ་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་བརྒྱུད་ས་མཐོའི་ཚོང་ཟོག་ལ་རིན་གོང་ཡག་པོ་ཡོང་བར་བྱས་ཡོད།
ཕྱི་ཕྱོགས་ལ་སྒོ་མོ་འབྱེད་རྒྱ་ཆེ་རུ་བཏང་ནས་འཕེལ་རྒྱས་ཀྱི་གོ་སྐབས་བསུས་ཤིང་། བོད་ཀྱིས་རང་འགུལ་ངང་རྒྱལ་སྤྱིའི་ཚད་གཞི་མཐོ་བའི་དཔལ་འབྱོར་ཚོང་དོན་སྒྲིག་སྲོལ་དང་ཡང་ཡང་བསྡུར་ནས་ཕྱི་ཕྱོགས་སྒོ་དབྱེའི་སྤྱི་ཡོངས་ཀྱི་རྣམ་པ་མུ་མཐུད་ལེགས་སུ་གཏོང་བ་དང་། “རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་དབར་གྱི་ཁྱབ་ཁོངས་མང་པོའི་མཉམ་ལས་ཟབ་ཏུ་གཏོང་བ། ཧི་མ་ལ་ཡ་སྐོར་བའི་དཔལ་འབྱོར་མཉམ་ལས་ཁུལ་འཛུགས་གཏོད་དམ་འཛིན་བྱ་གཞིར་བཅས་བྱས་ཏེ་ཨེ་ཤེ་ཡ་ལྷོ་མའི་རྒྱལ་ཁབ་དང་ཚོང་དོན་འགྲོ་འོང་དང་ཁུལ་ཁོངས་མཉམ་ལས་རྒྱུན་ཆད་མེད་པར་ཟབ་ཏུ་བཏང་ཡོད། མཐའ་མཚམས་དཔལ་འབྱོར་མཉམ་ལས་ཁུལ་དང་ཕྱོགས་བསྡུས་ཁྲལ་སྲུང་ཁུལ་སོགས་ཀྱི་ལས་སྟེགས་ལ་བརྟེན་ནས། མཐའ་མིའི་ཚོང་འབྲེལ་དང་བརྒྱུད་སྐྱེལ་ཉོ་ཚོང་སོགས་ཀྱི་ལས་རྣམ་གྱི་རྒྱ་སྟོབས་ཆེ་རུ་བཏང་བ་དང་ཆབས་ཅིག ཞོ་སྟོན་དང་ཇོ་མོ་གླང་མའི་རིག་གནས་དུས་ཆེན་སོགས་ཁྱད་ལྡན་རྟེན་འབྲེལ་བྱེད་སྒོ་འབྲེལ་ཐག་ཏུ་བྱས་ཏེ་རིག་གནས་སྤེལ་རེས་དང་དཔལ་འབྱོར་ཚོང་དོན་མཉམ་ལས་དང་མཉམ་འདྲེས་གཏིང་ཟབ་པའི་འབྲེལ་ཟམ་བསྐྲུན་ཡོད། རྒྱལ་ནང་གི་སྣེ་འདྲེན་ཁེ་ལས་ནང་འདྲེན་སྐྱེད་སྲིང་གནད་སྨིན་བྱས་ཏེ་མ་དངུལ་དང་། སྔོན་ཐོན་ལག་རྩལ། ཚན་རིག་དང་མཐུན་པའི་དོ་དམ་བཅས་ཀྱི་ཉམས་མྱོང་གཅིག་སྡུད་བྱས་ནས་ནུས་རྒྱུ་གཙང་མ་དང་ལྗང་མདོག་གཏེར་ལས་སོགས་ཁྱད་ལྡན་ལེགས་ཆའི་ཐོན་ལས་ཀྱི་སྤུས་ཚད་མཐོར་གཏོང་དང་རིམ་སྤོར་ལ་མུ་མཐུད་སྐུལ་འདེད་བཏང་སྟེ་བོད་ཀྱི་སྒོ་དབྱེ་རྣམ་པའི་དཔལ་འབྱོར་འཕེལ་རྒྱས་ཀྱི་སྤུས་ཚད་ལེགས་སུ་དང་ཆུ་ཚད་མཐོ་རུ་ཟམ་མི་ཆད་པར་བཏང་ཡོད།
སྒོ་དབྱེ་ནི་ཕྱོགས་གཉིས་ཀར་བརྟེན་དགོས། “ཕྱིར་གཏོང”བྱེད་དགོས་ལ།“ནང་འདྲེན”ཡང་བྱེད་དགོས་པ་མ་ཟད། “མཉམ་འདྲེས”བྱེད་དགོས་ལ། “མཐོར་འདེགས”ཀྱང་བྱེད་དགོས། བོད་ཀྱིས་ཕྱི་ནང་མཉམ་འགུལ་དང་ཕྱོགས་གཉིས་ལ་ཤུགས་འདོན་རྒྱུ་མཐའ་འཁྱོངས་བྱས་ཏེ་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོར་མཉམ་འདྲེས་བྱེད་པའི་ཁྲོད་ཐོན་ལས་ཀྱི་འགྲན་རྩོད་ནུས་པ་ཆེ་རུ་གཏོང་བ་དང་ཕྱི་ཕྱོགས་ལ་སྒོ་མོ་འབྱེད་རྒྱ་ཆེ་རུ་གཏོང་བའི་ཁྲོད་འཕེལ་རྒྱས་ཀྱི་བར་མཐོངས་རྒྱ་ཆེར་བཏང་ཡོད། “ལོ་ལྔ་ཚན་བཅོ་ལྔ་པའི”རིང་། ང་ཚོས་གྲངས་འཛིན་བོད་ལྗོངས་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་བ་དང་། “རྩིས་ནུས་ཇོ་མོ་གླང་མའི”བྱ་སྤྱོད་ལག་ལེན་བསྟར་བ། རྒྱལ་ཡོངས་གཞི་གཅིག་ཅན་གྱི་རྩིས་ནུས་མ་ལག་ནང་མཉམ་འདྲེས་བྱེད་པ་དང་། དམའ་དབྱིངས་དཔལ་འབྱོར་དང་ཆིང་དབྱང་ཐོན་ལས་སོགས་གསར་དར་ཐོན་ལས་སྐྱེད་སྲིང་བྱས་ནས་དཔལ་འབྱོར་གྱི་འཕར་གཞི་གསར་པ་གཏོད་པ། བོད་སྐྱོར་ཞིང་ཆེན་གྲོང་ཁྱེར་དང་མཉམ་ལས་གཏིང་ཟབ་བྱས་ཏེ“ས་གྲོལ་དཔལ་འབྱོར”འཕེལ་རྒྱས་ཤུགས་ཆེན་བཏང་ནས་ལེགས་ཆ་གསབ་རེས་བྱ་རྒྱུ་རེད། 2035ལོར་སླེབས་སྐབས། ང་ཚོས་དཔལ་འབྱོར་གྱི་སྟོབས་ཤུགས་དང་ལེགས་ཆའི་ཐོན་ལས་ཀྱི་འགྲན་རྩོད་ནུས་པ་ཆེ་རུ་ཤུགས་ཆེན་བཏང་ནས་མི་རེའི་ཆ་སྙོམས་ཀྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་རྒྱལ་ཡོངས་ཀྱི་ཆ་སྙོམས་ཆུ་ཚད་དུ་སླེབས་པར་བྱེད་པའི་དམིགས་ཚད་མངོན་འགྱུར་བྱ་རྒྱུ་ཡིན་ཞིང་། དམིགས་ཚད་འདི་མངོན་འགྱུར་བྱེད་པར་སྒོ་དབྱེར་བརྟེན་ནས་མཐུན་རྐྱེན་མུ་མཐུད་སྦྱོར་རྒྱུ་དང་ཁ་འབྲལ་ཐབས་མེད།
སྒོ་མོ་འབྱེད་རྒྱ་ཇི་ཙམ་ཆེ་བ་དེ་ཙམ་གྱིས་ཆེ་རུ་འགྲོ་བ་དང་འཕེལ་རྒྱས་ཀྱི་ལམ་བུར་ཇི་ཙམ་བསྐྱོད་པ་དེ་ཙམ་གྱིས་ཇེ་ཡངས་སུ་འགྲོ་ཐུབ། ལོ་རྒྱུས་ཀྱི་འགོ་འཛུགས་ས་གསར་པར་ང་ཚོས་ཏང་གི་ཕྱོགས་ཡོངས་ཀྱི་འགོ་ཁྲིད་མུ་མཐུད་མཐའ་འཁྱོངས་བྱེད་པ་དང་། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། སྒོ་དབྱེར་བརྟེན་ནས་སྒྱུར་བཅོས་ལ་སྐུལ་འདེད་གཏོང་བ་དང་མཉམ་འདྲེས་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བཅས་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་གྱི་ལམ་བུའི་ཐོག་དེ་བས་འོད་སྟོང་འཕྲོ་བའི་གངས་ལྗོངས་ས་མཐོའི་ལེའུ་རྩོམ་དགོས།
འབྲེལ་ཡོད་གསར་འགྱུར།