མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། གསར་འགོད་པས“‘ལོ་ལྔ་ཚན་བཅུ་བཞི་པའི’འཕེལ་རྒྱས་གྲུབ་འབྲས”ཀྱི་བརྗོད་དོན་གཙོ་བོའི་རིམ་སྤེལ་གསར་འགྱུར་ཡོངས་བསྒྲགས་ཚོགས་འདུའི་མཚོ་སྔོན་ཞིང་ཆེན་དམངས་སྲིད་ཐིང་གི་ཆེད་དོན་ཚོགས་ར་ནས་ཤེས་རྟོགས་བྱས་པར། “ལོ་ལྔ་ཚན་བཅུ་བཞི་པའི”རིང་ཞིང་ཆེན་ཡོངས་ཀྱིས་སྤྱི་ཚོགས་རོགས་སྐྱོབ་ལམ་ལུགས་རྒྱུན་མཐུད་འཐུས་སྒོ་ཚང་དུ་བཏང་ཞིང་། ཡུལ་གཞན་ནས་སྤྱི་ཚོགས་རོགས་སྐྱོབ་རེ་ཞུ་དང་། ཞབས་ཞུ་རིགས་ཀྱི་སྤྱི་ཚོགས་རོགས་སྐྱོབ། ཏང་འཛུགས་སྐྱོང་དང་སྤྱི་ཚོགས་རོགས་སྐྱོབ་ཟུང་འབྲེལ་གྱི་སྒྱུར་བཅོས་གསར་གཏོད་ཚོད་ལྟ་བཅས་ཧུར་ཐག་བྱས་ཏེ། སྤྱི་ཚོགས་རོགས་སྐྱོབ་དེ“འཚོ་གནས་འགན་ལེན”ནས“ཉེན་ཁ་སྔོན་འགོག”དང“འཕེལ་རྒྱས་ལ་སྐུལ་གཏོང”བར་འགྱུར་ལྡོག་འགྲོ་རྒྱུར་སྐུལ་འདེད་བཏང་བས་ཁྱོན་ཡོངས་ལ་ཁྱབ་པ་དང་། རིམ་དབྱེ་རིགས་དབྱེ། ཕྱོགས་བསྡུས་ནུས་ཆེ་བཅས་ཀྱི་སྤྱི་ཚོགས་རོགས་སྐྱོབ་ཀྱི་རྣམ་པ་ཞིག་རྩ་བའི་ཆ་ནས་གྲུབ་ཡོད་པ་རེད།

ལོ་ལྔའི་རིང་། རིམ་རྩིས་བརྒྱབ་ན་རིགས་ཁག་གི་རོགས་སྐྱོབ་ཁ་གསབ་མ་དངུལ་སྒོར་དུང་ཕྱུར་159ཙམ་བཏང་ནས་དཀའ་ངལ་ཡོད་པའི་མང་ཚོགས་མི་ཐེངས་ཁྲི་300ཙམ་ལ་འགན་སྲུང་བྱས་པ་དང་། དམངས་འཚོའི་མཐའ་ཚད་དམ་འཛིན་དང་བརྟན་པོར་བསྲུངས་ནས་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་འགྲོ་བར་རམ་འདེགས་བྱས་ཡོད། དེ་དང་ཆབས་ཅིག་དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་རྒྱ་སྐྱེད་བཏང་ཞིང་། 2025ལོའི་ཟླ་12པའི་ཟླ་མཇུག་བར་དབུལ་སྒྲོལ་ཐུབ་པའི་མི་ཁྲི་12.29དང་དབུལ་ལོག་སྔོན་འགོག་གི་ལྟ་ཞིབ་བྱ་ཡུལ་མི་ཁྲི་4.7མ་མཐའི་འཚོ་བའི་འགན་ལེན་དང་དམིགས་བསལ་དཀའ་ངལ་ཡོད་པའི་རོགས་སྐྱོབ་འགན་ལེན་ཁྱབ་ཁོངས་ནང་བཅུག་ནས་གཞི་ཁྱོན་རང་བཞིན་གྱི་དབུལ་ལོག་མི་ཐོན་པའི་མཐའ་ཚད་བརྟན་པོར་བསྲུངས་པ་རེད།