མཐའ་བཞི་རི་བོས་བསྐོར་བའི་ལྷ་སར་ཆུ་དང་གྲོང་ཁྱེར་ཞི་མཐུན་མཉམ་གནས་སྐོར་གྱི་གསོན་ཉམས་དོད་པའི་འགྱིག་བལ་སྤྱི་གླིང་རེ་རེ་བསྐྲུན་པ་དང་བསྟུན་ནས་དེ་དག་རིམ་བཞིན་མིག་ལམ་དུ་མངོན། འགྱིག་བལ་གྲོང་ཁྱེར་འཛུགས་སྐྲུན་གྱི་ལྟེ་བའི་གཞི་རྟེན་ཡིན་པའི་སྐྱེ་ཁམས་ནུས་པ་དང་དམངས་འཚོའི་དྲོ་སྐྱིད་ཚོར་བའི་ལྗང་མདོག་སྤྱི་གླིང་དེ་དག་གིས་ས་མཐོའི་གྲོང་ཁྱེར་གྱི་ཞོད་སྐྱོན་ཆུ་ལོག་གི་དཀའ་གནད་ཐག་གཅོད་བྱས་པ་མ་ཟད། “ཆུ་བཟང་གྲོང་དང་ལྗང་མདོག་གྲོང”འཛུགས་སྐྲུན་གྱི་འདུན་པ་གྲོང་མི་ཚོའི་རྒྱུན་གཏན་འཚོ་བའི་ནང་མངོན་འགྱུར་བྱུང་ཡོད།

ས་མཐོར“སྐྱེ་ཁམས་སྲུང་བཅད”བརྟན་པོ་བསྐྲུན་པ།

ས་བབ་སྨི་3600ལྷག་ཙམ་ཟིན་པའི་ལྷ་ས་གྲོང་ཁྱེར་ལ་ཆར་ཆུ་གཅིག་སྡུད་དང་། ཉིན་མཚན་གྱི་དྲོད་ཚད་ཧེ་བག་ཆེ་བ། འཁྱགས་པ་བཞུ་བའི་དུས་ཡུན་རིང་བ་བཅས་ཀྱི་གནམ་གཤིས་ཀྱི་ཁྱད་ཆོས་ལྡན་པ་མ་ཟད། ད་དུང་རི་བོ་མཐོ་ལ་གཡང་གཟར་བ་དང་ཤྭ་འོད་ཐོན་སླ་བའི་ས་དབྱིབས་ཀྱི་ཁྱད་ཆོས་ལྡན་པས། འགྱིག་བལ་སྤྱི་གླིང་འཛུགས་སྐྲུན་བྱེད་པར་ངེས་པར་དུ་ས་མཐོའི་ཇུས་གཞི་ཆ་ཚང་ཞིག་འདིང་དགོས།

སྟོད་ལུང་བདེ་ཆེན་ཆུས་སུ་སྐྱོད་སྐབས་འཛུགས་སྐྲུན་བྱེད་བཞིན་པའི་འགྱིག་བལ་སྤྱི་གླིང་གསུམ་སྟེ་ལྷ་ས་གྲོང་ཁྱེར་སྟོད་ལུང་ཕུ་ཆུའི་ལྷོ་ངོགས་ཀྱི་ལུས་རྩལ་སྤྱི་གླིང་དང་། ལྷ་ས་གྲོང་ཁྱེར་སྟོད་ལུང་ཕུ་ཆུའི་བྱང་ངོགས་ཀྱི་ལུས་རྩལ་སྤྱི་གླིང་། སྟོད་ལུང་བདེ་ཆེན་ཆུས་ཀྱི་གནས་ཆུང་སྤྱི་གླིང་བཅས་ཡིན་པ་རེད།

སྟོད་ལུང་བདེ་ཆེན་ཆུས་སྡོད་ཁང་འཛུགས་སྐྲུན་ཅུས་སྤྱི་ཁྱབ་བཟོ་ཚོགས་གཞུང་ལས་ཁང་གི་ལས་དོན་པ་རིན་ཆེན་ནོར་ལྷས། སྤྱི་གླིང་གསུམ་དེ་2025ལོའི་ཟླ་5པར་འཛུགས་སྐྲུན་བྱེད་འགོ་ཚུགས་པ་དང་། སྔོན་དཔག་བྱས་ན་2026ལོའི་ཟླ་12པར་ལས་མཇུག་འགྲིལ་རྒྱུ་ཡིན་ཞིང་། དེའི་སྤྱིའི་རྒྱ་ཁྱོན་ལ་སྨི་ངོས་གྲུ་ཁྲི་13ལྷག་ཙམ་ཟིན་གྱི་ཡོད་ཅེས་ངོ་སྤྲོད་བྱས།

གཞན་ཡང་། སྤྱི་གླིང་ཁག་གི་འགྱིག་བལ་མ་ལག་ཇུས་འགོད་ཀྱང་ལྷ་སའི་གནམ་གཤིས་དང་ས་དབྱིབས་ཀྱི་ཁྱད་ཆོས་དང་དམ་པོར་དམིགས་ཡོད། ལྷ་སར་ཆར་ཆུ་གཅིག་སྡུད་བབས་པ་དང་ཆར་པ་སིམ་སིམ་བབས་མང་བའི་ཁྱད་ཆོས་ལ་དམིགས་ནས། སྤྱི་གླིང་གིས“སིམ་པ་དང་། འཁྱིལ་བ། གསོག་པ། གཙང་བཟོ། བེད་སྤྱོད། ཕྱིར་གཏོང་བཅས་ལྟེ་བར་བྱས་ཏེ“འབྱུང་རྩ་ནས་ཉུང་དུ་གཏོང་བ་དང་། བར་དུ་འདྲེན་པ། མཇུག་ཏུ་སྙོམས་སྒྲིག་ངང་གསོག་པའི”སྦྲེལ་ཐག་ཧྲིལ་པོའི་ཆར་ཆུ་དོ་དམ་ཚོད་འཛིན་མ་ལག་བཙུགས་པ་རེད། སྐྲུན་དངོས་ཀྱི་ཆར་ཆུ་མེ་ཏོག་ལྡུམ་ར་དང་སྤང་ལྗོངས་སུ་འདྲེན་པ་དང་ས་ངོས་ཀྱི་ཆར་ཆུ་དག་ཆུ་ཐིམ་ཨར་འདམ་ལམ་བུ་བརྒྱུད་ས་འོག་ཏུ་སིམ་གྱི་ཡོད་པ་རེད། ལྷ་ས་གྲོང་ཁུལ་གྱི་ཆུ་ལོག་ཐོན་སླ་བའི་གྲོག་རོང་23གྱི་ཆུ་ལོག་འགོག་པའི་གནོན་ཤུགས་ལ་འགྱིག་བལ་སྤྱི་གླིང་གིས་ཆུ་ལོག་འགོག་པའི་ནུས་པ་ཐོན་ཡོད།

སྤྱི་གླིང་གི་ཕྱི་ནང་ཚང་མ་དམངས་འཚོའི་སྤྲོ་སྐྱིད་གླིང་ཡིན་པ།

འགྱིག་བལ་སྤྱི་གླིང་འཛུགས་སྐྲུན་བྱ་རྒྱུ་དེ་ནི་དུས་ནམ་ཡང་ལས་གྲྭ་ཙམ་ཞིག་མིན་པར་དྲོ་སྐྱིད་ལྡན་པའི་དམངས་འཚོའི་རྒྱུགས་ལན་ཞིག་རེད། ལྷ་སར་འགྱིག་བལ་སྤྱི་གླིང་རེ་རེ་བཞིན་འཛུགས་སྐྲུན་བྱས་པ་ལས་མཐའ་འཁོར་གྱི་དམངས་འཚོའི་ལེ་ལག་ཆ་ཚང་བ་དང་རིམ་སྤོར་བྱུང་བ་དང་ཆབས་ཅིག་གྲོང་མིའི་སྤྲོ་གསེང་འཚོ་བའང་འཐུས་སྒོ་ཚང་དུ་འགྲོ་གི་ཡོད་པ་རེད།

“སྔོན་ཆད་ས་ཆ་དེ་དག་སྐྱ་ཐེར་ཐེར་ཡིན་པས། ལྷགས་པ་བརྒྱབ་མ་ཐག་བྱེ་མས་ཁེངས་ཀྱི་ཡོད། ད་ཆ་སྤྱི་གླིང་བསྐྲུན་པས་བྱེ་རླུང་མེད་ལ་ལན་ཆིའུ་སྤོ་ལོ་ཐང་དང་། རྐང་རྩེད་སྤོ་ལོ་ཐང་། ཝང་ཆིའུ་སྤོ་ལོ་ཐང་བཅས་ཀྱང་ཡོད། ལྟོ་ཆས་ཟས་རྗེས་ཕྲུ་གུ་ཁྲིད་ནས་འཆམ་འཆམ་བྱེད་པར་དངོས་གནས་སྟབས་བདེ་པོ་འདུག”ཅེས་འཛུགས་སྐྲུན་བྱེད་བཞིན་པའི་ལྷ་ས་གྲོང་ཁྱེར་ལྟེ་བའི་གྲོང་ཁུལ་གྱི་ཆུ་རྒྱུད་སྐྱེ་ཁམས་བཅོས་སྐྱོང་ལས་གྲྭའི(དུས་ཐེངས་གཉིས་པ)ཁྲལ་དོན་གླིང་ཁའི་སྐོར་གླེང་སྐབས་ཉེ་འཁོར་གྱི་གྲོང་མིས་བསྔགས་བརྗོད་བྱེད་བཞིན་དུ་དེ་ལྟར་བཤད།

གྲོང་ཁུལ་རྙིང་པའི་ངོས་ནས་བརྗོད་ན། འགྱིག་བལ་སྒྲིག་ཆས་དོན་འཁྱོལ་བྱས་པ་དེས་ཆུ་ལོག་གི་གནོན་ཤུགས་ཆུང་དུ་ཕྱིན་ཡོད། བར་སྐོར་ཁྲོམ་གཞུང་དང་གླིང་ཕྲན་གཉིས་ཀྱི་ཁྲོམ་གཞུང་སོགས་གྲོང་ཁྱེར་རྙིང་པའི་ལྟེ་བའི་ཁུལ་དུ་ས་ངོས་མཁྲེགས་འགྱུར་གྱི་བསྡུར་ཚད་མཐོ་བ་དང་རང་བྱུང་ཆུ་འབུད་ནུས་པ་ཞན་པས། འབྲུབ་དུས་ཀྱི་འཁྱིལ་ཆུའི་གནད་དོན་དེ་གྲོང་མིའི་སེམས་ཁྲལ་བྱ་ཡུལ་དུ་གྱུར་ཡོད། ལྷ་སས་ཁུལ་ཆུང་དང་། གྲོང་ཁྱེར་གྱི་ལམ་བུ། ཐང་ཆེན་གྱི་སྤང་ལྗང་སོགས་ལ་ས་བབ་དང་བསྟུན་ནས་ཆུ་ཐིམ་ཨར་འདམ་བཏིང་པས་གྲོང་ཁྱེར་གྱི་རང་བྱུང་ཆུ་འབུད་བགྲོད་ལམ་སླར་གསོ་བྱུང་བ་དང་འཁྱིལ་ཆུ་མང་སར་ཐབས་ཇུས་སྣ་ཚོགས་བཏོན་ནས་ཆུ་དེ་བས་བདེ་བླག་ངང་འབུད་ཐུབ་པ་བྱུང་ཡོད།

འགྱིག་བལ་འདུ་ཤེས་ལ་བརྟེན་ནས་ལྗང་མདོག་སྒུལ་ཤུགས་འཕེལ་བར་བྱེད་པ།

ལྷ་སའི་འགྱིག་བལ་གྲོང་ཁྱེར་འཛུགས་སྐྲུན་བྱེད་པར་འགྱིག་བལ་སྤྱི་གླིང་དེ་རྟེན་གཞིར་བྱས་ཏེ་གྲོང་ཁྱེར་གྱི་སྐྱེ་ཁམས་དང་། དམངས་འཚོ། འཕེལ་རྒྱས་བཅས་ཀྱི་འཕོ་འགྱུར་མང་པོ་ཞིག་ལ་སྐུལ་འདེད་བཏང་ནས་བདེ་འཇགས་དང་། སྐྱེ་ཁམས། རྒྱུན་མཐུད་ཆོག་པ་བཅས་ཀྱི་ས་མཐོའི་གྲོང་ཁྱེར་གྱི་རྣམ་པ་གསར་པ་ཞིག་གཏོད་བཞིན་ཡོད།

གསར་འགོད་པས་ཤེས་རྟོགས་བྱས་པར་གཞིགས་ན། སྟོད་ལུང་བདེ་ཆེན་ཆུས་ཀྱིས་འཛུགས་སྐྲུན་བྱེད་བཞིན་པའི་རྣམ་གྲངས་མང་བའི་ལེགས་ཆར་བརྟེན་ནས་འགྱིག་བལ་གྲོང་གསར་བསྐྲུན་རྒྱུ་ལྟེ་བར་བྱས་ཏེ། གྲོང་མིའི་སྡེ་ཁུལ་དང་། འགྲོ་ལམ་གྱི་སྦུག་ལམ། འདམ་རའི་སྤྱི་གླིང་བཅས་ཀྱི་འགྱིག་བལ་འཛུགས་སྐྲུན་ལ་སྤྱི་འདོམས་སྐུལ་འདེད་བཏང་སྟེ། གཅིག་སྡུད་ཡུག་འབྲེལ་གྱི་འགྱིག་བལ་ཚད་གཞི་ལོན་པའི་དཔེ་སྟོན་ཁུལ་ཕྱོགས་སུ་མདུན་སྐྱོད་བྱེད་པ་དང་། སྣེའུ་ཁུལ་གསར་བྱང་མས་ཚོགས་སྒྲིག་གིས་ཆུ་འབུད་དང་ཞོད་སྐྱོན་འགོག་པའི་མ་ལག་འཐུས་སྒོ་ཚང་དུ་གཏོང་རྒྱུར་དམིགས་པ་དང་ཆར་ཆུ་དང་བཙོག་ཆུ་མཉམ་འདྲེན་ལྕགས་མདོང་སྒྱུར་བཀོད་བྱས་ཏེ་འབྱུང་རྩ་ནས་བཙོག་འབུད་ཉུང་དུ་གཏོང་བའི་སྒྲིག་བཀོད་བསྐྲུན་ཏེ་ཡུག་ཁུལ་གྱི་ཞོད་སྐྱོན་དང་འཁྱིལ་ཆུའི་རྙིང་ཆེ་དཀའ་གསུམ་གྱི་གནད་དོན་ཐག་གཅོད་བྱས་པ། གྲོང་ཁུལ་རྙིང་པའི་ལྟེ་བའི་ཁུལ་གྱིས་ཆུ་རྒྱུད་མ་ལག་ཕྱོགས་བསྡུས་བཅོས་སྐྱོང་ལ་དམིགས་ནས་རང་བྱུང་ཆུ་རྒྱུད་མ་ལག་སླར་གསོ་དང་། ཆག་སྐྱོན་བྱུང་བའི་སྦུབས་ལམ་ཉམས་གསོ། འགྱིག་བལ་སྒྲིག་བཀོད་འཛུགས་སྐྲུན་བཅས་བྱས་ནས་གནའ་བོའི་གྲོང་ཁུལ་དུ་སྐྱེ་སྟོབས་ཀྱི་དཔལ་འབར་བ་བྱས་པ་རེད།

ཆུ་བཟང་གྲོང་ཁྱེར་བསྐྲུན། ས་མཐོར་སྔོ་ལྗང་རྒྱས། ད་ཆ་ལྷ་སར་འགྱིག་བལ་སྤྱི་གླིང་གིས་མུ་ཏིག་བཞིན་གྲོང་ཁྱེར་ལ་མཛེས་རྒྱན་སྤྲས་ཡོད། དེ་དག་ནི་ཆུ་ལོག་འགོག་པའི“སྐྱེ་ཁམས་སྲུང་བཅད”དང་སྤྲོ་གསེང་རོལ་རྩེད་ཀྱི“དམངས་འཚོའི་སྤྲོ་སྐྱིད་གླིང”ཡིན་པ་མ་ཟད། ས་མཐོའི་གྲོང་ཁྱེར་སྤུས་ཚད་མཐོ་བའི་འཕེལ་རྒྱས་འགྲོ་བའི“ལྗང་མདོག་གི་སྒུལ་ཤུགས”སུའང་གྱུར་ཡོད།