འདི་ནི་སྨན་པ་རྒན་གཞོན་དབར་གཞུང་ལུགས་ལག་ལེན་ཐད་སྤེལ་རེས་བྱེད་བཞིན་པ།

མི་ལོ་བཞི་ཡི་གོང་རོལ་ཏེ། 2022ལོའི་དགུན་དུས་ཀྱི་དགུ་དང་པོ་འགྲིམ་པའི་ཉིན་མོར། ངེད་ཚོ་བོད་ལྗོངས་ཉིན་རེའི་ཚགས་པར་ཁང་གི་གསར་འགོད་པ་བོད་ལྗོངས་ལྷོ་ཁ་གྲོང་ཁྱེར་ལྷོ་བྲག་རྫོང་དུ་བཅར་འདྲིར་བསྐྱོད་དེ་རྫོང་དེའི་ལྷ་ཁང་གྲོང་རྡལ་མཁར་ཆུའི་བོད་སྨན་བཟོ་གྲྭ་ཡི་བོད་སྨན་ཐོན་སྐྱེད་བརྒྱུད་རིམ་དང་གྲོང་གསེབ་ཀྱི་ཚན་རྩལ་རྣམ་པའི་ཁེ་ལས་ཆུང་ངུའི་འཕེལ་རྒྱས་གནས་ཚུལ་གཏོང་སྤེལ་ཞུས་ཤིང་། འདས་མ་ཐག་པའི་2025ལོར་མཁར་ཆུའི་བོད་སྨན་བཟོ་གྲྭར་སླར་ཡང་བཀྲ་ཤིས་ཡར་འགྲོའི་གཏམ་བཟང་ཡོད་པས་མ་ཚད་བཟོ་གྲྭའི་དབུ་འཛིན་བོད་རང་སྐྱོང་ལྗོངས་ཀྱི་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་ལས་དོན་ཁྲོད་སྔོན་ཐོན་མི་སྒེར་གྱི་གཟེངས་བསྟོད་མཚན་སྙན་ནང་ཚུད་ཅིང་། ད་དུང་ལྷ་ས་གྲོང་ཁུལ་དུ་བོད་སྨན་གྱི་སྒོ་བསྟེན་སྨན་ཁང་ཞིག་བཙུགས་པའི་ཆ་འཕྲིན་སོགས་གོ་ཐོས་བྱུང་འཕྲལ་ངེད་ཚོས་སྒོ་བསྟེན་སྨན་ཁང་ཆུང་ཆུང་དེ་ལ་བཅར་འདྲིར་བསྐྱོད་པ་ཡིན།

2026ལོའི་ཟླ་1ཚེས་9ཉིན་ནི་དགུན་དུས་ཀྱི་དགུ་གསུམ་པ་འགྲིམ་པའི་ཉིན་དང་པོ་དེ་རེད། ངེད་ཚོ་གསར་འགོད་པ་ལྷ་ས་གྲོང་ཁྱེར་སེ་ར་ལམ་གྱི་མཁར་ཆུའི་བོད་སྨན་སྒོ་བསྟེན་སྨན་ཁང་དུ་འབྱོར་སྐབས། སྨན་དོན་པ་རྣམས་ཞོགས་པའི་གཙང་སྦྲ་འཕྲོད་བསྟེན་གྱི་གྲ་སྒྲིག་ཚར་ཏེ་གོ་རིམ་བཞིན་དེ་གར་འོང་མཁན་གྱི་ནད་པར་སྨན་བཅོས་ཞབས་ཞུ་སྒྲུབ་བཞིན་འདུག མི་ལོ་ཧྲིལ་ཧྲིལ་བཞི་ནི་ཡུད་ཙམ་ལ་འདས་ཤིང་། གངས་ལྗོངས་ས་མཐོའི་བརྟན་ལྷིང་འཕེལ་རྒྱས་ཀྱི་གོ་སྐབས་བཟང་པོ་དང་། ཞིང་འབྲོག་ཁུལ་གྱི་ཁྱད་ལྡན་ཐོན་ལས་ལ་གཟིགས་སྐྱོང་ཆེ་བའི་མདུན་ལམ་ཡངས་པོའི་སྟེང་དུ་འབད་འབུངས་ཡར་བརྩོན་བྱེད་བཞིན་པའི་མི་རྣམས་ལ་མཚོན་ན། བྱས་པའི་རྗེས་དང་དྲུས་པའི་ཤུལ་ཞིག་སྟོན་རྒྱུ་ཡོད་པ་ཀུན་གྱི་མིག་ལམ་དུ་མངོན།

ཞོགས་པ་ནད་པ་ཉུང་བའི་སྐབས་དང་བསྟུན། ངེད་ཚོས་མཁར་ཆུའི་བོད་སྨན་བཟོ་གྲྭའི་སྨན་བཅོས་སྒོ་བསྟེན་ཁང་འདི་བཙུགས་པའི་གྲ་སྒྲིག་གི་ལས་ཀའམ་དམིགས་ཡུལ་གང་ཡིན་པ་དང་། ད་ཆའི་བོད་སྨན་བཟོ་གྲྭའི་འཕེལ་རྒྱས་ཀྱི་གནས་བབ་གང་འདྲ་ཡིན་མིན་སྐོར་ལ་སྨན་པ་ཀུན་བཟང་རྡོ་རྗེར་བཅར་འདྲི་ཞུས་ཤིང་། ཁོང་གིས་ངེད་ཚོར་གྲོགས་པོ་རྙིང་པ་འཕྲད་པ་ལྟར་གྱི་སྙིང་གཏམ་གླེང་དོན། འདས་ཟིན་པའི་ལོ་ཤས་ནང་མཁར་ཆུའི་བོད་སྨན་བཟོ་གྲྭས་ལྟེ་བའི་ལས་སྒོ་རིམ་སྤོར་དང་ཁྲོམ་རའི་ཁྱབ་རྒྱ་ཆེ་རུ་གཏོང་བར་དམིགས་ཏེ་སྤྱི་ཚོགས་དང་དཔལ་འབྱོར་གྱི་ཕན་འབྲས་བརྟན་པོའི་ངང་ཆེ་རུ་འགྲོ་བར་འབད་འབུངས་བྱས་ཡོད་པ་རེད།

འདི་ནི་ལྷོ་བྲག་མཁར་ཆུའི་བོད་སྨན་སྒོ་བསྟེན་ཁང་ཡིན་པ།

1. ཁྲིམས་མཐུན་གཉེར་སྐྱོང་ལམ་ནས་འཕེལ་རྒྱས་རྨང་གཞི་བཏིངས།

2025ལོར་མཁར་ཆུའི་བོད་སྨན་བཟོ་གྲྭས་བོད་སྨན་ཐོན་སྐྱེད་ཀྱི་ལག་ཁྱེར་བརྗེ་བ་གོ་སྐབས་སུ་བྱས་ཤིང་། འཕེལ་རྒྱས་ཀྱི་རྨང་གཞི་ནི་འབད་བརྩོན་ལ་རག་ལས་པ་དང་འབད་བརྩོན་གྱི་སྟོབས་ཤུགས་ནི་གྲུབ་འབྲས་ལ་རག་ལས་པའི་རྩ་དོན་དོན་གཉེར་བྱས་ཐོག སྔ་ཕྱི་བར་གསུམ་དུ་ལྷོད་གཡེང་དང་། སྒྱིད་ལུག ཕྱིར་གཤོལ་བཅས་ཀྱི་དབང་དུ་མ་སོང་བར་དེང་རབས་ཅན་གྱི་ཚད་ལྡན་འཆར་འགོད་དང་སྒྲིག་ཆས་ཡོད་པའི་བོད་སྨན་གྱི་སྨན་སྦྱོར་འཁོར་ཁང་དང་། སྨན་སྦྱོར་ཚོད་ལྟ་ཁང་ལ་སོགས་པ་རྒྱ་སྐྱེད་བཀོད་སྒྲིག་བྱས་པ་བརྒྱུད། གཅིག་ནས་རང་སྐྱོང་ལྗོངས་བཟའ་བཅའ་དང་སྨན་རྫས་ལྟ་འདོམས་ཅུས་ཀྱི་ཞིབ་བཤེར་ཚད་ལེན་ལེགས་འགྲུབ་ཡང་དག་བྱུང་ནས་བཟོ་གྲྭའི་སྨན་སྦྱོར་ཆོག་འཐུས་ལག་ཁྱེར་བདེ་བླག་ངང་ལེན་ཐུབ་པ་བྱུང་ཞིང་། གཉིས་ནས་ཁེ་ལས་ཀྱིས་སྔར་ཡོད་སྨན་སྦྱོར་ཆོག་འཐུས་ལག་ཁྱེར་ཡོད་པའི་བོད་སྨན་སྣེ་གྲངས་14ཡི་སྟེང་། བོད་སྨན་ཞིབ་འཇུག་གསར་སྤེལ་ཐད་མ་དངུལ་སྒོར་ཁྲི་17.75ལྷག་ཙམ་བཏང་ནས་ཆེད་དམིགས་ཚོགས་པ་བཙུགས་ཐོག ལག་རྩལ་གྲུབ་འབྲས་སྒྱུར་བཅོས་ལ་སྐུལ་འདེད་དང་ཤེས་བྱའི་བདག་དབང་གི་རེ་ཞུའི་ཡིག་ཆ་གོང་འབུལ་ཞུ་བ་སོགས་ཀྱི་ལས་དོན་ཁག་ལམ་ལྷོངས་བྱུང་བས། ན་ནིང“མཐོ་གསར་ལག་རྩལ་ཁེ་ལས་གཏན་འབེབས”ཞེས་པའི་དམིགས་ཚད་ལེགས་གྲུབ་བྱུང་ནས་རིམ་པ་མཐོ་ཤོས་ཀྱི་ངེས་གཟུང་དེས་ཁེ་ལས་འཕེལ་རྒྱས་གཏོང་བར་ཚན་རྩལ་གྱི་སྒུལ་ཤུགས་གསར་པ་བསྣན་ཐུབ་པ་བྱུང་། དེ་བཞིན་བཟོ་གྲྭས་ལྗོངས་ནང་ཁུལ་གྱི་སྨན་རྫས་དོ་དམ་བྱེད་ཐབས་ལ་ནན་ཏན་ངང་སློབ་སྦྱོང་དང་ཞིབ་འཇུག་བྱས་ཐོག་བཟོ་གྲྭའི་འཕྲུལ་ཆས་ཀྱི་སྒྲིག་བཀོད་ཁྱོན་ཡོངས་ནས་རིམ་སྤོར་བྱས་ཤིང་། སྔ་ཕྱི་བར་གསུམ་དུ་ལྷོ་བྲག་གི་སྨན་རྒྱུའི་སྤུས་ཚད་དོ་དམ་མ་ལག་དང་སྤུས་ཚད་རྗེས་འདེད་བརྒྱུད་རིམ་འཐུས་སྒོ་ཚང་དུ་བཏང་བས། གཞི་རིམ་བོད་ལུགས་གསོ་རིག་གི་སྨན་རྫས་གཞི་ཁྱོན་ཅན་དང་ཚད་ལྡན་ཅན་གྱི་ཐོན་སྐྱེད་ལ་ཐེབས་པའི་འགོག་རྐྱེན་གཙང་སེལ་ཐུབ་སྟེ། སྨན་བཅོས་ཀྱི་ལྟེ་བའི་ལས་སྒོ་ཁྲིམས་མཐུན་དང་སྒྲིག་སྲོལ་ཡོད་པའི་སྒོ་ནས་སྤེལ་བར་འགན་ལེན་ཐུབ་པ་བྱུང་།

འདས་མ་ཐག་པའི་ལོའི་ནང་བོད་སྨན་བཟོ་གྲྭས་ཁྲོམ་རའི་བཀོད་སྒྲིག་སྣུར་སྲིང་བྱས་ཏེ་ཞབས་ཞུའི་ཁྱབ་རྒྱ་ཇེ་ཆེར་བཏང་ཞིང་། སྔར་ཡོད་བོད་སྨན་བཟོ་གྲྭ་དང་སྒོ་བསྟེན་ཁང་། བདུད་རྩི་སྨན་ལུམས་ཁང་བཅས་ཀྱི་རྨང་གཞིའི་སྟེང་ཁྲོམ་རའི་དགོས་མཁོར་གཞི་ཚུགས་ཏེ་ལྷ་སར་སྒོ་བསྟེན་ཡན་ལག་སྨན་ཁང་ཆུང་གྲས་འདི་བཙུགས་པས་ས་གནས་ས་ཐོག་གི་ཞབས་ཞུ་སྔར་བས་འཐུས་སྒོ་ཚང་དུ་སོང་བ་དང་ཁྲོམ་རའི་ཁྱབ་རྒྱ་ཇེ་ཆེར་ཕྱིན་ཏེ། བོད་སྨན་བཟོ་གྲྭའི་སྨན་སྦྱོར་དང་སྨན་བཅོས་ཞབས་ཞུ་སྤྱི་ཚོགས་ལ་ཐིམ་ཚད་འཕར་བ་མ་ཟད། དེ་བས་ཐོན་སྐྱེད་དང་ཞབས་ཞུ་མཐུན་སྦྱོར་གྱིས་འཕེལ་རྒྱས་གཏོང་བའི་རྣམ་པ་ཆགས་ནས་ཁེ་ལས་གཉེར་སྐྱོང་གི་ཡོང་འབབ་འཕར་གཞི་གསར་པར་གྱུར་བ་རེད།

འདི་ནི་བོད་སྨན་བཟོ་གྲྭའི་ལས་མི་ཚོས་ཚེས་ཆེན་བཅོ་ལྔའི་མཚན་མོར་ཅོང་ཞི་ཟླ་འོད་ལས་སྣོན་བྱས་པ།

2. གྲོང་གསེབ་དར་རྒྱས་ཆེད་དུ་རང་ནུས་ཡོད་རྒུ་བཏོན།

ལོ་ཤས་རིང་། མཁར་ཆུའི་བོད་སྨན་བཟོ་གྲྭས་ཐོག་མཐའ་བར་གསུམ་དུ་སྤྱི་དབང་ལམ་ལུགས་མིན་པའི་དཔལ་འབྱོར་གྱི་འཕེལ་རྒྱས་འདུ་ཤེས་རྒྱུན་འཁྱོངས་བྱས་ཏེ་ཁེ་ལས་ནང་ཁུལ་གྱི་འཆམ་མཐུན་འཛུགས་སྐྱོང་ནས་ཕྱི་རོལ་གྱི་སྤྱི་ཕན་རོགས་སྐྱོར་བར་བྱ་སྤྱོད་དངོས་ཀྱི་ཐོག་ནས་སྤྱི་ཚོགས་ཀྱི་འགན་འཁྲི་ལག་བསྟར་བྱས་ཏེ་སྤྱི་ཚོགས་ཀྱི་ཕན་འབྲས་ཐད་རང་ནུས་གང་ཡོད་བཏོན་ཡོད། ལོ་ཤས་རིང་། ཁེ་ལས་ཀྱིས་འཆམ་མཐུན་གྱི་ངལ་རྩོལ་འབྲེལ་བ་བཙུགས་ནས་ལས་བཟོའི་ཁེ་དབང་ལ་འགན་སྲུང་བྱས་ཡོད་པ་སྟེ། ནང་ཁུལ་གྱི་དོ་དམ་ལམ་ལུགས་རྒྱུན་ཆད་མེད་པར་འཐུས་ཚང་དང་གཉེར་སྐྱོང་བྱ་སྤྱོད་ཚད་ལྡན་བཟོས་ཤིང་། ན་ནིང་ལོ་གཅིག་རིང་ལས་བཟོའི་གླ་ཕོགས་སྒོར་ཁྲི་209.4དུས་ཐོག་གྲངས་ཚང་དུ་སྤྲད་ནས་ལས་བཟོའི་ཁེ་དབང་འགན་ལེན་གང་ལེགས་བྱས་ཡོད། དུས་མཚུངས་ཕན་བདེའི་མ་ལག་འཐུས་ཚང་བཟོ་བ་དང་རྩལ་ནུས་གསོ་སྦྱོང་བྱེད་པ་སོགས་ཀྱི་བྱེད་ཐབས་བརྒྱུད་ལས་བཟོར་བདེ་སྐྱིད་ཚོར་སེམས་དང་ལས་རིགས་འཕེལ་རྒྱས་ཀྱི་བར་སྟོང་གཉིས་ཀ་ཆེ་རུ་བཏང་བས་ཁེ་ལས་ཧྲིལ་པོའི་འཕེལ་རྒྱས་ཆེད་དུ་སྟོབས་ཤུགས་གཅིག་སྒྲིལ་ཐུབ་ཡོད་པ་རེད།

ཁེ་ལས་འཕེལ་རྒྱས་འགྲོ་བའི་རིང་། བོད་སྨན་ཐོན་ལས་ཀྱིས་ལས་ཞུགས་ལ་སྐུལ་ཁྲིད་ཐུབ་སྟེ་མང་ཚོགས་ཀྱི་ཡོང་འབབ་འཕར་བའི་ཐབས་ལམ་རྒྱ་ཆེར་ཕྱིན་ཡོད། མིག་སྔའི་བར་མཁར་ཆུའི་བོད་སྨན་བཟོ་གྲྭས་སློབ་ཆེན་ཐོན་པའི་སློབ་མ་21དང་དེ་མིན་སྟབས་བསྟུན་ལས་མི་བཅས་ཁྱོན་མི་གྲངས་96ཙམ་སྐོང་འཐེན་བྱས་ནས། ཁོ་ཚོའི་ལས་ཞུགས་ཀྱི་དཀའ་ངལ་བསལ་བ་དང་སྦྲགས་གཞོན་ནུ་ཚོར་སྦྱངས་པ་གོ་ཆོད་ཀྱི་ལས་སྟེགས་མཁོ་འདོན་བྱས་པས་ཡུལ་དེ་གའི་མང་ཚོགས་ལ་འབབ་འཕར་གྱི་ཐབས་ལམ་རྒྱ་ཆེར་ཕྱིན་ཡོད།

2016ལོ་ནས་བཟུང་། མཁར་ཆུའི་བོད་སྨན་བཟོ་གྲྭས་མགོ་འབྲེལ་རོགས་སྐྱོར་གྱི་ལས་ཀ་རྒྱུན་མཐུད་སྤེལ་བའི་རྨང་གཞིའི་ཐོག་ན་ནིང་དཀའ་ངལ་ཡོད་པའི་ཐེམ་དུད་བཅུ་ལ་འཚོ་བའི་མཁོ་ཆས་དང་འཚམས་འདྲིའི་དངུལ་སྨར་གནད་ལ་སྨིན་པ་སྤྲད་ཅིང་། ཐོན་ལས་ཀྱི་ཁེ་སྤོགས་བགོ་བཤའ་དང་འཚམས་འདྲིའི་རོགས་སྐྱོབ་སོགས་ཀྱི་རྣམ་པ་བརྒྱུད་རགས་རྩིས་བྱས་ན་ཡུལ་དེ་གའི་མང་ཚོགས་ལ་སྒོར་ཁྲི་868ཙམ་སྤྲད་དེ་རང་ཡུལ་གྱི་མང་ཚོགས་ཚོའི་ཐོན་སྐྱེད་འཚོ་བའི་ཆ་རྐྱེན་ལེགས་བཅོས་དང་གྲོང་གསེབ་དར་རྒྱས་ཀྱི་འཐབ་ཇུས་ལག་བསྟར་ཐད་ཁེ་ལས་ཀྱི་རང་ནུས་གང་ཡོད་བཏོན་ཡོད་པ་ཤེས་རྟོགས་བྱུང་།

འདི་ནི་མཁར་ཆུའི་སྒོ་བསྟེན་སྨན་ཁང་གི་སྨན་པ་ཚོས་ནད་རྟགས་ལ་དབྱེ་ཞིབ་བྱེད་པ།

3. དམངས་འཚོའི་དམིགས་ཡུལ་རྩ་བའི་རྩེ་ལ་བཀུར།

ད་ཕན་ལོ་ཤས་རིང་། ཁེ་ལས་ཀྱིས་ཡུལ་མིའི་འབབ་འཕར་ལ་སྣེ་ཁྲིད་དང་སྤྱི་ཚོགས་ཀྱི་འགན་འཁྲི་ཕྲག་ཏུ་འཁུར་བཞིན་ཡོད་པ་སྟེ། 2013ལོ་ནས་ཡུལ་དེའི་དུད་ཚང་30དང་མི་གྲངས་112ཀྱི་མ་དངུལ་བསྡུ་རུབ་བྱས་ནས་མ་རྐང་སྒོར་ཁྲི་80ཙམ་གྱི་མཉམ་ལས་ཁང་ཞིག་བཙུགས་པ་དང་། མཉམ་ལས་ཁང་གི་མང་ཚོགས་རྣམས་ལ་སོ་སོའི་མ་རྐང་ལ་གཞིགས་ནས་ལོ་རེའི་ཡོང་འབབ་ཀྱི་བརྒྱ་ཆ་10ནས་15སྟེ་ལོ་རེའི་ཁེ་སྤོགས་ཡོང་འབབ་སྒོར་ཁྲི་6.2400བགོ་འགྲེམས་བརྒྱབ་པས། ད་བར་ལོ་13ནང་དུ་དངུལ་སྒོར་ཁྲི་81.120བར་བགོ་འགྲེམས་བརྒྱབ་ཐུབ་པ་བྱུང་བས་མང་ཚོགས་རྣམས་ལ་ཐོག་མའི་མ་རྐང་གི་སྐྱེད་ཀ་གཙང་ལེན་ཐུབ་པ་བྱུང་སྟེ། མང་ཚོགས་རྣམས་གནས་བཟོད་བདེ་པོའི་ངང་འཚོ་བའི་ཁ་ཕྱོགས་གསར་པ་ཞིག་ཏུ་ཁྲིད་སྟོན་བྱ་ཐུབ་པ་བྱུང་། གཞན་ཡང་བཟོ་གྲྭ་ཆགས་ཡུལ་ལྷ་ཁང་གྲོང་རྡལ་གྱི་རང་བྱུང་ཐོན་ཁུངས་ཀྱི་སྨན་རྒྱུ་ཁག་ལུགས་མཐུན་ངང་འཐུ་སྒྲུག་དང་གསར་སྤེལ་ཡང་དག་བཅས་བྱས་པ་བརྒྱུད། ཡུལ་དེའི་མང་ཚོགས་ཀྱིས་འཐུ་སྒྲུག་བྱས་པའི་སྨན་རྒྱུ་རྣམས་ཐད་ཀར་བཟོ་གྲྭའི་སྨན་སྦྱོར་ཁང་ནས་ཉོ་སྒྲུབ་བྱས་པ་དང་། ས་ཞིང་མུའུ་300ལྷག་ཙམ་གྱི་ནང་སྤྱོད་གོ་མང་ལ་དཀོན་ཟོག་ཡིན་པའི་སྔོ་སྨན་ལྕ་བ་དང་མ་ནུ། སྤྲི་ཀུ་ལ་སོགས་སྨན་སྣེ་ཁག་7ལྷག་ཙམ་འདེབས་འཛུགས་བཅས་བྱས་པས། ལོ་ལྟར་ཡུལ་དེའི་མང་ཚོགས་ཀྱི་ལག་ཏུ་སྒོར་ཁྲི་80ཡན་གྱི་དངུལ་སྨར་ཡོང་འབབ་སྤྲོད་ཐུབ་པ་བྱུང་ཡོད།

ངེད་ཚོའི་བཅར་འདྲི་མཇུག་སྒྲིལ་ལ་ཉེ་དུས། སྒོ་བསྟེན་ཁང་གི་སྨན་པ་བསོད་ནམས་ཚེ་རིང་གི་གམ་དུ་ནད་པ་སྔ་རྟིང་བཞིན་བཅར་འོང་གི་འདུག ངེད་ཚོས་ཁོང་ལ་མཁར་ཆུའི་བོད་སྨན་གྱི་དམིགས་བསལ་ཁྱད་ཆོས་དང་རྒྱུན་མཐོང་ནད་རིགས་གང་དག་ལ་སྨན་བཅོས་གནང་ལུགས་ཟུར་ཙམ་འདྲི་དུས་ཁོང་གིས། སྨན་རྒྱུའི་སྤུས་ཚད་ལ་དང་དོད་ཆེན་པོ་བྱས་པའི་དབང་གིས་སྤུས་ལེགས་ཀྱི་མཁར་ཆུའི་བོད་སྨན་དེས་ཕོ་བ་དང་མཁྲིས་པའི་ནད་རིགས་སྣ་ཚོགས་ཀྱི་སྨན་བཅོས་ལ་ཕན་ནུས་ཁྱད་པར་ཅན་མངོན་ཐུབ་པ་དང་། དེ་མིན་སྒོ་བསྟེན་ཁང་གིས་ད་ཡོད་ཆ་རྐྱེན་ལ་གཞིགས་ཏེ་བོད་ལུགས་གསོ་རིག་གི་ཁྱད་ཆོས་ལྡན་པའི་ས་མཐོའི་རྒྱུན་མཐོང་ནད་རིགས་སྣ་ཚོགས་ལ་སྨན་བཅོས་ཀྱི་ཞབས་ཞུ་སྒྲུབ་བཞིན་ཡོད་ཅེས་བརྗོད།

ངེད་ཚོའི་མིག་ལམ་དུ་མངོན་པ་ནི། མཁར་ཆུའི་བོད་སྨན་གྱི་སྒོ་བསྟེན་ཁང་ཆུང་ཆུང་དེས་བོད་ཀྱི་ཕུལ་བྱུང་གསོ་རིག་གི་ཤེས་དཔལ་ཁྱབ་སྤེལ་དང་རྒྱུན་འཛིན་བྱས་པ་ཙམ་མ་ཟད། ལྷག་པར་དུ་བོད་ཀྱི་མང་ཚོགས་ཚོའི་བདེ་ཐང་ལ་འགན་སྲུང་དང་བདེ་ཐང་གི་ཆུ་ཚད་གོང་མཐོར་གཏོང་བའི་ཐད་ཁེ་ལས་ཆུང་ངུ་ཞིག་གིས་འཆང་བཞིན་པའི་ཟོལ་མེད་ཀྱི་བརྩེ་བ་དང་འབུལ་མུས་ཡིན་པའི་གང་ཐུབ་ཀྱི་ལེགས་སྐྱེས་དེ་རེད།

འདི་ནི་ལྷོ་བྲག་མཁར་ཆུའི་སྙན་གྲགས་ཅན་གྱི་སྔོ་སྨན་བདུད་རྩི་རྟག་ངུ་ཡིན་པ།