ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་བ་གཞིར་བཟུང་། ཉེ་ཆར། གསར་འགོད་པར་ལྷ་ས་གྲོང་ཁྱེར་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་ཚོགས་འདུ་ཐེངས་དྲུག་པའི་ཐོག་ནས་ཤེས་རྟོགས་བྱུང་བར། 2025ལོར་བོད་ལྗོངས་ལྷ་ས་གྲོང་ཁྱེར་གྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་སྟོང་གི་འགག་སྒོ་ལས་ཐེངས་དང་པོ་བརྒལ་བ་རེད།

2025ལོར། ལྷ་ས་གྲོང་ཁྱེར་གྱི་མ་འཇོག་དང་འཛད་སྤྱོད་གཉིས་ཀ་བརྟན་ཐོག་ཡར་འཕེལ་བྱུང་ཡོད། གྲོང་ཁྱེར་ཡོངས་ཀྱི་གཙོ་གནད་རྣམ་གྲངས་60ཚང་མ་སྐྲུན་འགོ་ཚུགས་ཤིང་། སྔོན་དཔག་ལྟར་ན་གཏན་འཇགས་རྒྱུ་ནོར་ལ་མ་འཇོག་བྱེད་ཚད་དུས་མཚུངས་ལས་5%ཡན་འཕར་རྒྱུ་དང་། སྤྱི་ཚོགས་འཛད་རྫས་སིལ་ཚོང་གི་དངུལ་འབོར་སྒོར་དུང་ཕྱུར་553ཟིན་པ་དེ་དུས་མཚུངས་ལས་5%འཕར་ཡོད་པ་རེད།

སྤྱི་འབོར་མང་དུ་སོང་བ་དང་སྦྲགས། འཕེལ་རྒྱས་ཀྱི་སྤུས་ཚད་དང་གྲུབ་ཆ་ཡང་རྒྱུན་མཐུད་ལེགས་སུ་ཕྱིན་ཡོད། 2025ལོར། ལྷ་ས་གྲོང་ཁྱེར་དུ་མཐོ་གསར་ལག་རྩལ་ཁེ་ལས་61དང་གཞི་ཁྱོན་ཡན་གྱི་བཟོ་ལས་ཁེ་ལས་11མང་དུ་ཕྱིན་ནས། གསར་གཏོད་ཀྱི་སྒུལ་ནུས་དང་ཐོན་ལས་ནུས་རིམ་དུས་མཚུངས་སུ་འཕར་ཡོད། 2025ལོར། སྔོན་དཔག་ལྟར་ན་གྲོང་ཁྱེར་ཡོངས་ཀྱི་ཕྱིར་གཏོང་ནང་འདྲེན་གྱི་དངུལ་འབོར་སྒོར་དུང་ཕྱུར་55ཟིན་ནས་སྒོ་དབྱེ་རྣམ་པའི་དཔལ་འབྱོར་གྱི་གསོན་ཤུགས་སྔར་བས་འཕེལ་ཡོད་པ་རེད།

དེ་དང་དུས་མཚུངས། རིག་གནས་ཡུལ་སྐོར་མཉམ་འདྲེས་རྒྱུན་མཐུད་ཟབ་ཏུ་ཕྱིན་ཏེ་དཔལ་འབྱོར་དང་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་ཡོད། 2025ལོར། ལྷ་ས་གྲོང་ཁྱེར་གྱིས་ཡུལ་སྐོར་བ་མི་ཐེངས་ཁྲི་5051ལ་སྣེ་ལེན་ཞུས་པ་དེ་དུས་མཚུངས་ལས་16.8%འཕར་བ་དང་། ཡུལ་སྐོར་གྱི་འགྲོ་གྲོན་བསྡོམས་འབོར་སྒོར་དུང་ཕྱུར་606ཟིན་པ་དེ་དུས་མཚུངས་ལས་14.5%འཕར་ཡོད་པ་རེད།