ཉིན་ཤས་གོང་། གསར་འགོད་པས་རང་སྐྱོང་ལྗོངས་དམངས་སྲིད་ཐིང་ནས་ཤེས་རྟོགས་བྱས་པ་ལྟར་ན། ཉེ་ཆར། རང་སྐྱོང་ལྗོངས་དམངས་སྲིད་ཐིང(ན་རྒས་ལས་དོན་གཞུང་དོན་ཁང)གིས《བོད་རང་སྐྱོང་ལྗོངས་ཀྱི་མི་འབོར་ན་རྒས་ཅན་གྱི་རྒྱལ་བབ་སློབ་གསོའི་ལས་འགན་ཁག་བགོས་ཇུས་གཞི》བཟོས་ནས་རང་ལྗོངས་ཀྱི་མི་འབོར་ན་རྒས་ཅན་གྱི་རྒྱལ་བབ་སློབ་གསོའི་ལས་དོན་ལ་མཛུབ་ཁྲིད་བྱས་པ་རེད།

ངོ་སྤྲོད་བྱས་པར་གཞིགས་ན། 《ཇུས་གཞི》ཡི་ནང“ཡང་དག་པའི་ན་རྒས་ལྟ་བ་དང་བདེ་ཐང་གི་ན་རྒས་ཅན”གྱི་གཙོ་རྐང་ལ་དམ་པོར་དམིགས་ནས། རང་ལྗོངས་ཀྱིས་2029ལོར་སླེབས་སྐབས་རྒྱལ་བབ་སློབ་གསོ་ཕྱོགས་ཡོངས་སུ་ཁྱབ་པ་དང་། 2035ལོར་སླེབས་སྐབས་འདུ་ཤེས་ཡོངས་ཁྱབ་ཏུ་ཆགས་པའི“གོམ་སྟབས་གཉིས”ཀྱི་དམིགས་ཚད་མ་ལག་བརྒྱུད་རིམ་ལྡན་པའི་ངང་བཙུགས་ཏེ། ལྗོངས་ཡོངས་ཀྱིས་འབྲེལ་ཡོད་ལས་དོན་ཏན་ཏིག་སྤེལ་བར་བྱ་སྤྱོད་ཀྱི་རྩ་འཛིན་གསལ་པོ་མཁོ་འདོན་བྱས་ཡོད། དེ་དང་ཆབས་ཅིག་མི་འབོར་ན་རྒས་ཅན་གྱི་དུས་བབ་སློབ་གསོ་དང་། ན་རྒས་སྲིད་ཇུས་དང་ཁྲིམས་སྲོལ་གྱི་སློབ་གསོ། ཡང་དག་པའི་ན་རྒས་ལྟ་བ་དང་བདེ་ཐང་གི་ན་རྒས་ཅན་གྱི་འདུ་ཤེས་སློབ་གསོ། གཉེན་སྐྱོང་རྒན་བཀུར་གྱི་སྲོལ་རྒྱུན་རིག་གནས་ཀྱི་སློབ་གསོ་བཅས་ནང་དོན་གཙོ་བོ་ཆེན་པོ་བཞི་བརྒྱུད་རིམ་ལྡན་པའི་ངང་བཀོད་སྒྲིག་བྱས་ཡོད།

《ཇུས་གཞི》ཡི་ནང་། ཚོགས་སྤྱི་དང་རྣམ་པ་མི་འདྲ་བར་དམིགས་ནས་འབྲེལ་ཡོད་ནང་དོན་ཏང་སྲིད་ལས་བྱེད་པའི་གསོ་སྦྱོང་ནང་འཇུག་དགོས་པ་དང་། གཞོན་ནུ་ལོ་ཆུང་གི“སློབ་ཚན་དང་། ལག་ལེན། རིག་གནས་བཅས་ཟུང་འབྲེལ་དང་། ཁྱིམ་ཚང་དང་། སློབ་གྲྭ སྤྱི་ཚོགས་བཅས་མཉམ་སྒྲུབ”ཀྱི་སློབ་གསོའི་མ་ལག་བཙུགས་ཏེ་རྒན་བཀུར་ཞབས་ཞུའི་རྗེས་གྲབས་སྟོབས་ཤུགས་གསོ་སྐྱོང་བྱེད་དགོས་པ། རྒན་རྒོན་གྱི་གྲངས་འཛིན་བྱང་ཚད་དང་བསླུ་འགོག་སློབ་གསོར་ཤུགས་སྣོན་བརྒྱབ་སྟེ་ཁོང་ཚོ་སྤྱི་ཚོགས་ཀྱི་རྗེས་སུ་མ་ལུས་པ་དང་ལེགས་སྐྱེས་འབུལ་བར་རྒྱབ་སྐྱོར་བྱེད་དགོས་པ། སློབ་གསོ་དེ་བསམ་པའི་དཔལ་ཡོན་འཛུགས་སྐྱོང་དང་རྒན་རྒོན་མཛའ་མཐུན་ཅན་གྱི་སྡེ་ཁུལ་འཛུགས་སྐྲུན་དང་མཉམ་འདྲེས་བྱས་ནས་རྒན་རྒོན་ལ་དམིགས་པའི་དང་བླངས་ཞབས་ཞུ་འཕེལ་རྒྱས་གཏོང་དགོས་པ། དཔུང་ཁག་འཛུཊ་སྐྱོང་དང་། འཐབ་ས་རྒྱ་སྐྱེད། དྲ་ཐོག་དང་དྲ་ཕྱིའི་ལས་སྟེགས་བེད་སྤྱོད། དུས་ཆེན་གྱི་བྱེད་སྒོ་གཞི་རྟེན་དུ་བྱེད་པ། ཀུན་འདུས་སྨྱན་སྦྱོར་ཁྱབ་སྤེལ། དཔེ་མཚོན་དཔེ་སྟོན། རིག་རྩལ་བརྩམས་ཆོས་གསར་རྩོམ་བཅས་འདེགས་སྐྱོར་གྱི་འགན་སྲུང་ཆེན་པོ་བདུན་ལ་ཤུགས་སྣོན་བརྒྱབ་སྟེ་ཁྱབ་རྒྱ་ཆེ་བའི་ཕྱོགས་མང་ལས་ཀའི་དྲ་རྒྱ་ཞིག་འཛུགས་དགོས་པ་བཅས་བཏོན་ཡོད།