ཟླ་1ཚེས་19ཉིན་ནི། གཞིས་རྩེའི་སོ་ནམ་ལོ་གསར་གྱི་ཚེས་གཅིག་རེད།

སྔ་དྲོའི་ཆུ་ཚོད་དྲུག་པ་ཙམ་ལ། ལྷ་རྩེ་རྫོང་ཆུ་ཤར་གྲོང་རྡལ་ལུའུ་རུ་གྲོང་ཚོའི་ཡུལ་མི་བསྟན་པའི་ཁྱིམ་གྱི་ལྕགས་ཐབ་ནང་མེ་ཚ་ཆིལ་ཆིལ་འབར་བ་དང་ཁོག་མ་ནས་ཆང་བསྐོལ་གྱི་དྲི་ཞིམ་ལྷང་ལྷང་དུ་འཐུལ་འོང་།

འདི་ནི་དིང་རི་རྫོང་དུ་ས་ཡོམ་རིམ་པ་6.8བརྒྱབ་རྗེས་བསྟན་པའི་ནང་མི་ལྔ་པོས་བསྐྱར་སྐྲུན་བྱས་པའི་ཁང་པ་གསར་པའི་ནང་གཞིས་རྩེའི་སོ་ནམ་ལོ་གསར་གཏོང་ཐེངས་དང་པོ་དེ་རེད།

ས་ཡོམ་སྔ་ནུབ་ཀྱི་ལོ་གསུམ་ནང་། བསྟན་པའི་ནང་མི་ཚོས་སྡོད་ཁང་མི་འདྲ་བ་གསུམ་ནང་ལོ་གསར་ཐེངས་གསུམ་གཏོང་མྱོང་བས་ན། ལོ་གསར་གཏོང་ཐེངས་རེའི་ཆང་བསྐོལ་གྱི་བྲོ་བའང་འདྲ་གི་མེད།

སྡོད་ཁང་རྙིང་པར་ལོ་གསར་བཏང་བ།

བསྟན་པའི་ནང་མི་ཚོས་2024ལོའི་ལོ་གསར་སྡོད་ཁང་རྙིང་པར་བཏང་བ་རེད།

སྡོད་ཁང་རྙིང་པ་དེ་2008ལོར་བསྐྲུན་ཞིང་། རང་སྐྱོང་ལྗོངས་ཀྱི་ཞིང་འབྲོག་པའི་བདེ་སྡོད་ལས་གྲྭའི་ཁ་གསབ་རོགས་དངུལ་དང་ཡུལ་མི་ཚོའི་རོགས་རམ་འོག ཁྱོ་ཤུག་གཉིས་པོས་ས་ཕག་བརྩིགས་ནས་ཉི་མ་དྲོ་བའི་བོད་ཁང་ཉིས་ཐོག་ཅིག་བརྒྱབ་པ་རེད།

ལོ་71ལ་སླེབས་པའི་རྨོ་བོ་སྐྱིད་ལགས་ལྕགས་ཐབ་ཀྱི་འགྲམ་དུ་བསྡད་ནས་ཆང་བསྐོལ་འཐུང་གིན“ང་ཚོ་ཆུང་དུས་ལོ་གསར་གཏོང་སྐབས་རྩམ་པ་བཟའ་རྒྱུ་བྱུང་ན་བློ་ཡིད་རྦད་དེ་ཚིམ་གྱི་ཡོད། འོན་ཀྱང་། ལོ་འདི་དག་ནང་ཁྱིམ་གྱི་འཚོ་བ་ཉིན་རེ་ལས་མ་འདས་པར་སྐྱིད་དུ་སོང་བ་མ་ཟད། ད་དུང་བཟའ་རྒྱུ་ཡང་འབེལ་འབེལ་ལྷུག་ལྷུག་ཡོད”ཅེས་འཚོ་བའི་འགྱུར་ལྡོག་སྐོར་གླེང་།

སྟབས་བདེའི་ཁང་པར་ལོ་གསར་བཏང་བ།

གློ་བུར་དུ་བརྒྱབ་པའི་ས་ཡོམ་ལས་ས་ཕག་གི་ཁང་པ་རྙིང་པའི་ནང་འཚོ་བ་སྐྱེལ་བཞིན་པའི་བསྟན་པའི་ཁྱིམ་ཚང་གི་འཚོ་བར་འགྱུར་ལྡོག་ཆེན་པོ་བྱུང་ཡོད།

2025ལོའི་ཟླ་1ཚེས་7ཉིན་གྱི་ཞོགས་པར། ས་ཡོམ་རྒྱག་ཐེངས་གཅིག་གིས་ཁུ་སིམ་མེར་གནས་པའི་ལུའུ་རུ་གྲོང་ཚོའི་ལྷིང་འཇགས་ཡོངས་སུ་དཀྲོགས།

ས་ཡོམ་བརྒྱབ་རྗེས། མ་གཞི་སྡོད་ཁང་རྙིང་པ་དག་ལོག་མེད་རུང་སེར་ཀ་གས་ནས་ཉེན་ཡོད་ཁང་པར་གྱུར།

དངངས་འཚབ་ཀྱི་གནས་སུ་གྱར་ནས་ག་བྱེད་འདི་བྱེད་མེད་པའི་སྐབས་འདིར། རོགས་སྐྱོབ་མི་སྣ་འཕྲལ་དུ་གྲོང་ཚོར་འབྱོར་བ་དང་། ཉིན་དེ་རང་ལ་གྲོང་ཚོའི་ས་སྟོང་དུ་རྒུད་སྐྱོབ་གུར་སྔོན་པོ་མང་པོ་ཞིག་ཕུབ་པ་རེད། ཡུན་རིང་མ་སོང་བར་སྒྲིག་བཀོད་ཚང་བའི་དྲོ་སོབ་སོབ་ཀྱི་སྟབས་བདེའི་ཁང་པ་མང་པོ་བརྒྱབ་པ་དག་ཡུལ་མི་ཚོའི་གནས་སྐབས་ཀྱི་ཁྱིམ་དུ་གྱུར། ལོ་གསར་འཆར་ལ་ཉེ་བས་ལོ་གསར་གྱི་མཁོ་ཆས་ཉོ་ཆ་རྒྱག་རྒྱུ་དེ་བསྟན་པའི་སེམས་ཁྲལ་ཆེ་ཤོས་སུ་གྱུར་ཡོད།

རང་བྱུང་གནོད་འཚེར་སྙིང་རྗེ་མེད་རུང་མི་ཡུལ་ལ་བརྩེ་བས་ཁེངས། ཁོང་གི་སེམས་ཁྲལ་དེ་སྲིད་གཞུང་གིས་སྤྲད་པའི“ལོ་གསར་མཁོ་ཆས་ཀྱི་ཁུག་མ་ཆེན་པོ”ཞིག་གིས་མགྱོགས་མྱུར་བསལ། ནས་ཆང་དང་། རྩམ་པ། ཕྱུར་བ། ཇ་བག་ཆུང་སོགས་ཚང་མ་ནི་ལོ་གསར་གྱི་མཁོ་ཆས་མེད་དུ་མི་རུང་བ་རེད།

ལོ་གསར་ཚེས་གཅིག་ཉིན། དཀར་ཆ་དོད་ལ་རྒྱ་ཆེ་བའི་ཚོམས་ཁང་མེད་རུང་། ནང་མི་ཚོས་ལྟེབ་རྩིས་སྒྲོག་རྩེའི་མདུན་དུ་བསྡད་ནས་ཚ་སོབ་སོབ་ཀྱི་ཆང་བསྐོལ་འཐུང་གིན་ཚང་མ་བདེ་མ་ཐང་མ་ཡིན་ན་ཡག་ཤོས་རེད་ཅེས་ཤོད་བཞིན་མཆིས།

སྡོད་ཁང་གསར་པར་ལོ་གསར་བཏང་བ།

བསྟན་པའི་སྡོད་ཁང་གསར་པ་དེ་ཡོམ་འགོག་གི་ཚད་གཞིར་ནན་པོར་གཞིགས་ནས་དེ་སྔའི་ས་ཆར་མགྱོགས་མྱུར་བསྐྲུན་པ་ཞིག་ཡིན། མྱུར་ཚད་དེ་ལས་ཕྱིར་ལས་ཞུགས་དང་སློབ་གྲྭར་སྐྱོད་མཁན་གྱི་བུ་མོ་ཚོ་ཧང་སངས། དབྱར་གསེང་རིང་ལོག་ཡོང་སྐབས་ཐོག་བཀབ་བཞིན་ཡོད་པ་དང་། རྒྱལ་སྟོན་རིང་རྩིག་པ་རྒྱག་གི་ཡོད། དགུན་གསེང་རིང་ལོག་ཡོང་སྐབས་ནུས་པ་ཆ་ཚང་བའི་སྡོད་ཁང་གསར་པ་ཞིག་བརྒྱབ་ཚར་ནས་སྡོད་ཆོག་ཆོག་རེད།

དེ་ནི་རྙིང་པ་བསྐྱར་གསོ་བྱས་པ་ཞིག་མིན་པར་རིམ་སྤོར་བྱས་པ་ཞིག་ཡིན།

2026ལོར་བསྟན་པའི་ཁྱིམ་གྱི་ཆང་བསྐོལ་གྱི་བྲོ་བ་དེ་བས་ཞིམ་ལ། ནང་མི་ཚང་མས་དགའ་སྤྲོའི་ངང་ལོ་གསར་གྱི་འདུན་པ་གླེང་བཞིན་མཆིས།

དྲོད་འཇམ་ཉི་འོད་མི་རྣམས་ཀྱི་ངོ་གདོང་ལ་འཕྲོས།

ལོ་གསར་གཏོང་ཐེངས་གསུམ་ལས་བོད་རིགས་ཁྱིམ་ཚང་དཀྱུས་མ་ཞིག་གིས་སེམས་པ་གཅིག་ཏུ་སྦྲེལ་བ་དང་ཐུན་མོང་ཐོག་མཛེས་སྡུག་ལྡན་པའི་འཚོ་བ་གཏོད་པའི་འགྱུར་མེད་ཀྱི་དོན་གཉེར་ཞིག་རེད་ལ། རྒྱལ་ཁབ་ཀྱི་སྲིད་ཇུས་དང་དམངས་འཚོའི་བདེ་རྩ་གཅིག་ཏུ་འདུས་པའི་དྲོ་སྐྱིད་ལྡན་པའི་རྣམ་པ་ཞིག་དེ་བས་རེད།

ཁྱིམ་ཚང་ཆུང་ངུའི་དྲོ་སྐྱིད་ལྷག་པར་ཆེ། རྒྱལ་ཁབ་ཆེན་པོའི་བརྩེ་བ་དམངས་ལ་བཅངས།

ཀྲུའུ་ཞི་ཞི་ཅིན་ཕིང་གིས་2026ལོའི་ལོ་གསར་གྱི་ཤིས་ཚིག་ནང“ཇ་མར་ཚྭ་བུལ་དང་དུས་བཞིའི་ཐུན་གསུམ་ལྟོ་ཆས་ཀྱི་འཚོ་བ་ལས་ཁྱིམ་ཚང་ཆུང་ངུ་རེ་རེའི་ཚ་སོབ་སོབ་ཀྱི་རྣམ་པ་མངོན་པ་དང་། ཀྲུང་གོའི་ཁྱིམ་ཚང་ཆེན་པོ་འདི་ཉིན་རེ་བཞིན་གྲ་རྒྱས་ཕུན་སུམ་ཚོགས་སུ་འགྲོ་བ་མངོན་ཡོད”ཅེས་བརྩེ་བ་ཟབ་མོས་གསུངས།

བཅར་འདྲི་བྱེད་རིང་། བསྟན་པའི་ཁྱིམ་གྱི་སྡོད་ཁང་གསར་པའི་ཚོམས་ཆེན་ནང་ངས་ཆང་བསྐོལ་ཚ་པོ་དེ་ལག་ཏུ་ལེན་སྐབས“མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་བའི”དོན་སྙིང་དེ་གང་ལེགས་ཚོར་བྱུང་།

དབུལ་སྒྲོལ་འགག་སྒྲོལ་གྱི་སྲིད་ཇུས་ལས་བསྟན་པའི་ཁྱིམ་གྱི་དབུལ་ཞྭ་ཕུད་པ་དང་། གེགས་རྗེས་བསྐྱར་སྐྲུན་གྱི་སྲིད་ཇུས་ལས་ཡུལ་མི་ཚོ་སྡོད་ཁང་གསར་པའི་ནང་མགྱོགས་མྱུར་སྤོ་ཐུབ་པ། འཚོ་རྟེན་ལས་སྤྲོད་ཀྱི་སྲིད་ཇུས་ལས་མང་ཚོགས་ཚོར་ཁྱིམ་གྱི་སྒོ་རྩ་ནས་འབབ་འཕར་མངོན་འགྱུར་ཐུབ་ཡོད།

རྒྱལ་ཁབ་ཀྱི་བརྗིད་ཆེའི་འཆར་གཞི་དེ་འབོད་ཚིག་ཙམ་ཞིག་མིན་པར། དེ་བས་མི་སེར་ཚོའི་སྡོད་ཁང་གསར་པ་དང་། ལྟོ་ཆས་ཚ་པོ་ཞིག ངོ་གདོང་གི་འཛུམ་མདངས་བཅས་དང་། དེ་བཞིན་མི་ཚང་མའི་འཚོ་བ་དང་འབྲེལ་བ་དམ་ཟབ་ལྡན་པའི་ཕྱོགས་གཉིས་ཀྱི་རེ་སྒུག་ཅིག་ཡིན། མི་སེར་ཚོའི་བདེ་སྐྱིད་ནི་སྲིད་ཇུས་ཐ་སྐྱོང་དང་འབད་འཐབ་ལྷུར་ལེན་གྱི་གྲུབ་འབྲས་ཤིག་རེད།

རྒྱལ་ཁབ་ཀྱིས་མང་ཚོགས་ཀྱི་རེ་སྒུག་བློ་ལ་འཆང་བ་དང་མང་ཚོགས་ཚོས་འབད་འཐབ་ཧུར་ཐག་བྱས་ནས་དུས་རབས་ཀྱི་འབོད་སྐུལ་དང་ལེན་ཧུར་ཐག་བྱེད་བཞིན་མཆིས།

བྱང་སྐར་སྤུན་བདུན་གྱི་ལམ་སྟོན་ཇི་བཞིན་བསྐྱོད་ན་ལམ་ནོར་ཐེབས་མི་སྲིད་པ་དང་གུང་ཁྲན་ཏང་གི་རྗེས་སུ་འབྲངས་ན་བདེ་སྐྱིད་ཐོབ་ངེས་རེད།