འདི་ནི་སུང་རེན་ཏེ་ཡིས་ཆུ་དམར་ལེབ་རྫོང་རྨ་ཆུའི་ཆུ་འགོའི་ལྟེ་བའི་རྒྱུད་སྤེལ་རྟེན་གཞིར་བེའུ་ལ་སྦྱོང་བརྡར་བྱེད་བཞིན་པ།

ཡུལ་ཤུལ་ཀྲོའུ་སྲོག་ཆགས་རིམས་ནད་སྔོན་འགོག་ཚོད་འཛིན་ལྟེ་གནས་ཀྱི་ཀྲུའུ་རེན་སུང་རེན་ཏེ་སླར་ཡང་རྡོག་ཐོན་བྱས། དམིགས་ས་ནི་འབའ་ཐང་ཤང་འབའ་ཐང་སྟོད་གྲོང་ཚོའི་རུ་ཁག་གསུམ་པའི་འབྲོག་པ་ཕུར་ཚེའི་ཁྱིམ་རེད།

སུང་རེན་ཏེ་ནི“འབྲི་གཡག་གི་འབུམ་རམས་པ”ཞིག་རེད། ལོ་39ཡི་རིང་ཁོང་གིས་འབྲོག་ཁུལ་གྱི་མང་ཚོགས་ལ་དེ་བས་ཡག་པའི་འབྲི་གཡག་གསོ་སྤེལ་ལག་རྩལ་ཁྱབ་གདལ་གཏོང་བར་རྩེ་གཅིག་ཏུ་གཞོལ་ནས་འབྲོག་པའི་ཡོང་འབབ་འཕར་བར་རོགས་རམ་བྱས་པ་མ་ཟད། རྩྭ་ཕྱུགས་དོ་སྙོམས་ངང་འཕེལ་རྒྱས་འགྲོ་བར་སྐུལ་འདེད་བཏང་སྟེ། གཙང་གསུམ་ཆུ་འགོའི་སྐྱེ་ཁམས་ཁོར་ཡུག་སྲུང་སྐྱོང་བྱས་ཡོད། ད་ཆ། ཁོང་ནང་མི་གསུམ་པོས་གཙང་གསུམ་ཆུ་འགོར་གཞི་ཚུགས་ནས་ས་མཐོའི་ཡུལ་ལུང་དེར་ཞིང་འབྲོག་ལས་འཕེལ་རྒྱས་གཏོང་བཞིན་ཡོད།

གཞི་རིམ་དུ་རྩ་བ་ཚུགས་པ།

འབྲོག་པར་དཀའ་གནད་ཡོད་ན“འབྲི་གཡག་གི་འབུམ་རམས་པ”འཚོལ་བ།

དེ་སྔོན་འབྲི་གཡག་འཚོ་སྐྱོང་དང་འོ་མ་འཇོ་བར་ཕུར་ཚེའི་ཁྱིམ་ཚང་གིས་སྣང་ཆེན་དང་འབད་བརྩོན་ཧུར་ཐག་བྱས་ནའང་ཡོང་འབབ་དེ་ཙམ་ཡག་པོ་ཞིག་རག་གི་མེད། “དགུན་ཁར་ཕྱུགས་རིགས་ཀྱི་ཤ་ཤེད་སྐྱོ་བས་བཤས་གཏོང་བར་འཚམ་པོ་མེད་པ་དང་། ལོ་ལྟར་བེའུ་བཙའ་ཚད་ཉུང་ཁར། གསོན་ཚད་ཀྱང་དམའ་པོ་རེད”ཅེས་ཕུར་ཚེས་བཤད།

ཡུལ་ཤུལ་བོད་རིགས་རང་སྐྱོང་ཀྲོའུ་ནི་གཙང་གསུམ་ཆུ་འགོའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་གནས་པ་དང་སྐྱེ་ལྡན་ཁས་ལེན་དཔང་འདོན་གྱི་འབྲོག་ར་རྒྱ་ཆེན་པོ་ཡོད་པས། འབྲི་གཡག་གསོ་ཚགས་ཀྱི་རང་བྱུང་ཆ་རྐྱེན་ཕུན་སུམ་ཚོགས་པོ་ཡོད། འོན་ཀྱང་རྗེས་ལུས་ཀྱི་གསོ་ཚགས་བྱེད་ཐབས་ནི་འབྲོག་པའི་ཡོང་འབབ་ལ་ཚོད་འཛིན་བཟོ་བའི་རྒྱུ་རྐྱེན་གཙོ་བོ་དེ་རེད།

སུང་རེན་ཏེ་ཡིས་གསར་འགོད་པར་བརྗོད་དོན། དེ་སྔོན་འབྲོག་པ་མང་པོ་ཞིག་གི་དབུལ་ཕྱུག་ཡིན་མིན་གྱི་ཚད་གཞི་ནི་སྟབས་བདེ་ཐག་ཆོད་ཡིན་ཏེ། ནོར་ལུག་ལག་ཡོད་མགོ་གྲངས་གཞི་འཛིན་སར་བྱས་ནས་ཇི་ཙམ་མང་ན་དེ་ཙམ་གྱིས་ཕྱུག་པར་ངོས་འཛིན་གྱི་ཡོད། དེར་བརྟེན་དུད་ཁྱིམ་ཚང་མས་ནོར་ལུག་གང་མང་གསོ་བས་རྩྭ་ཕྱུགས་ཀྱི་འགལ་བ་མངོན་གསལ་དོད་དུ་ཕྱིན་ཏེ། མཐར་རྩྭ་ཐང་ཉམས་ཞན་དུ་གྱུར་ནས་ནོར་ལུག་ལ་རྩྭ་བཟའ་རྒྱུ་མེད་པ་དང་། ཤ་ཤེད་ཞན་པ། གོང་ཚད་མཐོ་པོ་མི་རག་པའི་ཁར་འཆི་ཚད་མང་བ་བཅས་ཇེ་སྡུག་ཇེ་ཞན་དུ་གྱུར་ཡོད།

སྲོལ་རྒྱུན་གྱི་གསོ་ཚགས་འདུ་ཤེས་ལ་འགྱུར་ལྡོག་གཏོང་བ་ནི་ལས་སླ་པོ་ཞིག་མིན། སུང་རེན་ཏེ་ཡིས་གསལ་པོར་ཤེས་པ་ནི། འབྲི་གཡག་གསོ་ཚགས་དང་རྩྭ་ཐང་སྲུང་སྐྱོང་གཉིས་དབར་འགལ་བ་ཡོད་ནའང་། དོན་དངོས་སུ་འཆམ་མཐུན་མཉམ་གནས་ཀྱི་དོ་མཉམ་བྱེད་ས་ཞིག་ལྡན་ཡོད་པ་རེད། འབྲོག་པའི་འདུ་ཤེས་བསྒྱུར་དགོས་ན་འབྲི་གཡག་གསོ་ཚགས་བྱེད་ཚད་དང་བཤས་གཏོང་ཚད་མཉམ་དུ་མཐོ་རུ་གཏོང་བའི་ཁྲོད་འབྲོག་པར་ཕྱུགས་རིགས་ཉུང་དུ་བཏང་ཡང་ཡོང་འབབ་འཕར་ཐུབ་པ་དངོས་འབྲེལ་ཚོར་དུ་འཇུག་དགོས།

ཕུར་ཚེའི་ཁྱིམ་གྱི་ཕྱུགས་རའི་འཁྲིས་སུ་སྒྱེ་མོ་སྟར་པ་གཅིག་རྩིས་ཡོད་ཅིང་། “འདི་དག་ནི་ལོ་གཉིས་རིང‘འབྲི་གཡག་གི་འབུམ་རམས་པས’ང་ལ་སྤྲད་པའི་གཟན་ཆག་རེད། གཟན་ཆག་འདི་དག་ཡོད་པས་ཉེ་བའི་ལོ་གཉིས་ཀྱི་རིང་བེའུ་བཙའ་ཚད་དང་འབྲི་གཡག་བཤས་གཏོང་ཚད་མང་དུ་སོང་ཡོད། ད་ཆ་ངེད་ཁྱིམ་ཚང་ལ་འབྲི་གཡག་ལག་ཡོད་མགོ་གྲངས་200ལྷག་ཡོད་པ་དང་འབྲི་48ལ་བེའུ་བཙས་ཡོད། ཉེ་བའི་ལོ་གསུམ་གྱི་རིང་བེའུ་བཙའ་ཚད་དེ་སྔ་ལས་ལྡབ་གཅིག་འཕར་ཡོད”ཅེས་ཕུར་ཚེས་ངོ་སྤྲོད་བྱས།

“གཟན་ཆག་ནས་འགོ་བཙུགས་ཏེ་ཞིང་འབྲོག་པར་མ་གནས་གྲོན་ཆུང་བྱེད་རོགས་བྱས་ཚེ། ཁོང་ཚོས་གསོ་ཚགས་བྱེད་སྟངས་ལ་འགྱུར་ལྡོག་གཏོང་སླ་པོ་ཡོད” སུང་རེན་ཏེའི་ཚོགས་པས་འབྲོག་པ་ཚོར་རང་ཉིད་ཀྱིས་ཞིབ་སྤེལ་བྱས་པའི་གཟན་ཆག་སྤྲད་པས་གོ་ཆོད་པ་དང་སྤྲི་དཀར་མཐོ་བའི་ཁར་བཤལ་ནད་སྔོན་འགོག་ཐུབ་ཡོད། གཟན་ཆག་འདེམས་སྤྱོད་དང་གསོ་ཚགས་གཞི་ཁྱོན་ཚད་ལྡན་བཟོ་བ་ནས་བེའུར་དྲོད་ཁེབས་གཡོག་པ་དང་འོ་མ་གཅོད་པའི་བར་སོགས་བར་དུ། སུང་རེན་ཏེ་ཡིས་ཡུལ་ཤུལ་ཀྲོའུ་ཡི་གང་སར་ཚོད་ལྟའི་ལས་དོན་སྤེལ་ཡོད། ལོ་ངོ་བཅུ་ཕྲག་ཁ་ཤས་རིང་ཁོང་གིས་ཕུན་སུམ་ཚོགས་པའི་གཞི་གྲངས་དང་ཉམས་མྱོང་བསགས་པ་མ་ཟད། ཁྱུ་གཡག་གསོ་འདེམས་དང་། ཁྱུ་གཡག་ཁྱབ་སྤེལ། ནུས་ཆེའི་རྒྱུད་སྤེལ། རིམས་ནད་ཕྱོགས་བསྡུས་སྔོན་འགོག་ཚོད་འཛིན་ནས་འཚོ་སྐྱོང་གཡོག་བྱེད་བར་སོགས་སྤུས་འབྲས་ལེགས་གཉེར་གྱི་ཕྱོགས་བསྡུས་ལྷན་སྦྱར་ལག་རྩལ་རབ་དང་རིམ་པ་རྒྱུན་ཆད་མེད་པར་ཕྱོགས་སྡོམ་བྱས་ཡོད།

ལེགས་སྐྱེས་ཕུལ་བ།

ཡུལ་ཤུལ་དཀའ་ངལ་ཆེ་ཤོས་ཀྱི་སྐབས་སུ་ས་མཐོའི་ཡུལ་ལུང་འདི་ནས་འབྲལ་མི་རུང་།

སུང་རེན་ཏེ་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཀྲོའུ་མོན་ཡོན་ཧུད་རིགས་རང་སྐྱོང་རྫོང་དུ་སྐྱེས་པ་དང་། ཆུང་དུས་ནས་ཐོན་སྐྱེད་རུ་ཁག་ལ་ནོར་ལུག་འཚོ་སྐྱོང་དང་ལྕི་བ་སྒྲུག་རོགས་དང་དེ་བཞིན་གཟན་རྩྭ་འཐུ་རོགས་བྱས་པས། ཕྱུགས་ཟོག་དང་འབྲེལ་འདྲིས་ཟབ་མོ་ཡོད་པ་རེད།

ཆུང་དུས་ནས་ཤུགས་རྐྱེན་ཐེབས་པའི་དབང་གིས་ཁོང་གི་མི་ཚེ་གང་པོའི་བྱ་གཞག་དོན་གཉེར་ལ་རྨང་གཞི་བཏིང་ཡོད། 1986ལོའི་ཟླ་7པར། སུང་རེན་ཏེ་མཚོ་སྔོན་ཕྱུགས་ལས་སློབ་གྲྭ་ཆེན་མོའི(ད་ཆའི་མཚོ་སྔོན་སློབ་ཆེན་ཞིང་འབྲོག་སློབ་གླིང)ཕྱུགས་ལས་ཚན་ཁག་ནས་སློབ་མཐར་ཕྱིན་པ་རེད།

ཐེངས་དང་པོ་ཟི་ལིང་ནས་རྡོག་ཐོན་བྱས་ཏེ་ཡུལ་ཤུལ་ལ་ཉིན་བཞི་འགོར་ཞིང་། ཡུལ་ཤུལ་གྱི་ས་བབ་མཐོ་བ་དང་མཁའ་རླུང་གི་གསོ་རླུང་འདུས་ཚད་ཀླུང་ཐང་གི་60%ཙམ་ཡང་ཟིན་གྱི་མེད་ལ། ལོ་རེའི་ཆ་སྙོམས་དྲོད་ཚད་ཧྲེ་ཧྲི་ཏུའུ་0ཙམ་ཡིན། སུང་རེན་ཏེས“སྐབས་དེ་དུས་ཡུལ་ཤུལ་གྱི་མཐའ་འཁོར་ནི་སྐྱ་ཐེར་ཐེར་གྱི་རི་ཚོགས་ཡིན་པ་དང་། ཁོད་མི་སྙོམས་པའི་ཁྲོམ་གཞུང་དང་། ལམ་ངོས་སུ་སོ་ཕག་གི་ཁང་རྙིང་དང་སྡོང་པོ་ཐར་ཐོར་རེ་གཉིས་ཙམ་ལས་མེད”ཅེས་ཕྱིར་དྲན་བྱས།

1997ལོར་སུང་རེན་ཏེ་རྒྱལ་ཁབ་གཞུང་མངགས་ཀྱི་ནུབ་རྒྱུད་ས་ཁུལ་གྱི་ཤེས་ལྡན་པ་གསོ་སྐྱོང་གི་དམིགས་བསལ་རྣམ་གྲངས་ནང་བདེ་བླག་ངང་ཡིག་ཚད་ལོན་ནས་ཕྱི་རྒྱལ་དུ་སྒོ་ཕྱུགས་དོ་དམ་རིག་པའི་ཆེད་ལས་སྦྱངས་པ་མ་ཟད། རྗེས་སུ་ཞིང་ལས་རིག་པའི་འབུམ་རམས་པར་ཡིག་རྒྱུགས་བཏང་ནས་ཕྱུགས་ཟོག་གསོ་ཚགས་ཁྱབ་ཁོངས་སུ་སྦྱངས་བརྩོན་ཡང་བྱས་པ་རེད། འབུམ་རམས་པ་སློབ་མཐར་ཕྱིན་རྗེས། ས་གནས་དེ་གའི་སློབ་གྲྭ་དང་ཁེ་ལས་ཀྱིས་ཁོང་གླ་ཕོགས་མཐོ་པོ་སྤྲོད་པའི་ལས་ཀའི་ནང་གདན་འདྲེན་ཞུས་ཀྱང་སུང་རེན་ཏེ་ཡིས“ངའི་ཞིབ་འཇུག་ཁྱབ་ཁོངས་ནི་མཚོ་བོད་ས་མཐོ་དང་ཁ་བྲལ་ཐབས་མེད་པས། ང་ངེས་པར་དུ་དེར་ལོག་གི་ཡིན”ཞེས་བརྗོད་ནས་དང་ལེན་བྱས་མེད།

2010ལོར་སུང་རེན་ཏེ་ཡུལ་ཤུལ་དུ་ལས་ཀ་བྱས་ནས་ལོ་20ལྷག་ཙམ་སོང་ཡོད། ཁྲག་ཤེད་མཐོ་བའི་ནད་དང་གཅིན་སྙི་ཟགས་ཁུའི་ནད་ཕོག་པའི་ཁོང་ས་བབ་མཐོ་བའི་ཡུལ་ལུང་དུ་མུ་མཐུད་ལས་ཀ་བྱེད་རྒྱུར་མི་འཚམ་པར་བརྟེན། ཁོང་དང་བཟའ་ཟླས་ཟི་ལིང་དུ་ལས་སྒྱུར་བྱ་རྒྱུའི་ཐག་བཅད། ཟླ་4པར། གློ་བུར་དུ་ས་ཡོམ་བརྒྱབ་པས་འཆར་གཞི་འཁྲུག་པ་དང་། ཁོང་བཟའ་ཚོ་གཉིས་ཀྱིས་བསམ་བློ་ཞིབ་ཕྲ་བཏང་བ་བརྒྱུད། “ཡུལ་ཤུལ་དཀའ་ངལ་ཆེ་ཤོས་ཀྱི་སྐབས་སུ་གཙང་གསུམ་ཆུ་འགོ་ནས་ཁ་འབྲལ་མི་རུང”ཞེས་དེ་གར་མུ་མཐུད་སྡོད་རྒྱུའི་སེམས་ཐག་བཅད།

ས་ཡོམ་དེའི་ཁྲོད་ཡུལ་ཤུལ་གྱི་གྲོང་ཁྱེར་དང་གྲོང་གསེབ་ཀྱི་སྒོ་ཁྱི་4900ལྷག་ཙམ་དང་རྟ་ནོར་ལུག་གསུམ་ཁྲི་4.7ཤི་བ་རེད། སྐབས་དེ་དུས་ཡུལ་ཤུལ་ཀྲོའུ་ཕྱུགས་རིགས་སྨན་བཅོས་ས་ཚིགས་ཀྱི་ཀྲན་ཀྲང་ཡིན་པའི་སུང་རེན་ཏེ་ཡིས་རིམས་འགོག་རུ་ཁག་གི་སྣེ་ཁྲིད་དེ་སེམས་ཅན་གྱི་ཤི་རོ་རུབ་རུབ་བཟོས་ནས་གནོད་མེད་ཐག་གཅོད་བྱས་ཏེ། གནམ་གཤིས་ཚ་རུ་འགྲོ་སྐབས་ནད་ཡམས་མི་ཐོན་པར་བྱས་པ་རེད། དེ་རྗེས་འཕྲལ་སྡོམ་རིམས་འགོག་དང་དཔྱིད་དུས་སྲོག་ཆགས་ཀྱི་རིམས་ནད་ཚབས་ཆེན་སྔོན་འགོག་ཚོད་འཛིན་ལས་ལ་གཞོལ་ནས། འབྲོག་པར་གེགས་རྗེས་འབྲོག་ལས་ཐོན་སྐྱེད་སླར་གསོ་བྱེད་པར་མཛུབ་ཁྲིད་བྱས་པ་རེད།

ས་ཡོམ་བརྒྱབ་རྗེས། སུང་རེན་ཏེ་བཟའ་ཚོ་གཉིས་ཐོག་མཐའ་བར་གསུམ་དུ་ཡུལ་ཤུལ་རྟ་རྒྱུག་ཐང་གི་གེགས་སྐྱོབ་གུར་ནང་བསྡད་ནས་ཉེ་འགྲམ་གྱི་སྟབས་བདེའི་ཁང་པའི་ནང་དུ་ལས་ཀ་བྱེད་ཀྱི་ཡོད། གནོད་འཚེ་ཕོག་རྗེས་ཀྱི་ལོ་ཤས་རིང་ཁང་པ་གསར་པ་གཅིག་རྗེས་གཉིས་མཐུད་ངང་བརྒྱབ་ཚར་བ་དང་། ཁང་པ་གསར་པ་བགོ་བཤའ་རྒྱག་སྐབས་བཟའ་ཚོ་གཉིས་ཀྱིས་རྟག་ཏུ་རང་འགུལ་ངང་ལས་རོགས་གཞན་སྔོན་ལ་སྤོ་རུ་འཇུག་གི་ཡོད། 2019ལོར། ཁོང་གཉིས་གཞི་ནས་སྨི་ངོས་གྲུ་45ཟིན་པའི་ལས་ཤག་ནང་སྤོས་པ་རེད།

ཚོགས་པ་འཛུགས་སྐྱོང་།

“ཚན་ཞིབ་ཀྱི་ཁྱིམ་ཚང་ཆུང་ངུ”བསྐྲུན་པ་དང་ལག་རྩལ་ཁྱབ་གདལ་གྱི“དཔུང་ཁག་ཆེན་པོ”ཡང་བཙུགས་པ།

སུང་ཝེ་རུའུ་ནི་སུང་རེན་ཏེ་ཡི་བུ་མོ་རེད། མི་ཞིག་གིས་ཁོང་ལ་ཁྱོད་ཚོའི་ནང་མི་ཚོ་ཡང་སྙིང་ལས་ཀ་གང་བྱེད་མཁན་རེད་དམ་ཞེས་དྲིས་པར། ཁོང་གིས“ངའི་པཱ་ལགས་ནི་ཕྱུགས་རིགས་ལ་ཞིབ་འཇུག་བྱེད་མཁན་ཞིག་དང་། ངའི་ཨ་མ་ལགས་ནི་ཕྱུགས་རྩྭར་ཞིབ་འཇུག་བྱེད་མཁན་ཞིག་ཡིན་པས། ངས་རྩྭ་ཕྱུགས་དོ་སྙོམས་ལ་ཞིབ་འཇུག་བྱེད་ཀྱི་ཡོད”ཅེས་ཀུ་རེའི་ཚུལ་དུ་བཤད།

སུང་རེན་ཏེ་ཡི་བཟའ་ཟླ་ལི་གོ་མེ་ནི་རྩྭ་རིག་ཆེད་ལས་ཀྱི་ཞིང་ལས་རིག་པའི་འབུམ་རམས་པ་ཡིན་ཞིང་། ཟི་ལིང་ནས་ཡུལ་ཤུལ་ཀྲོའུ་རྩྭ་ཐང་ལས་དོན་ས་ཚིགས་སུ་ལས་སྒྱུར་བྱས་ཏེ་རྩྭ་སའི་སྐྱེ་ཁམས་མ་ལག་ཞིབ་འཇུག་ལས་ལ་གཞོལ་བཞིན་ཡོད། དེ་སྔོན་ལས་རོགས་དང་མཉམ་དུ་ས་བབ་སྨི་4000ཟིན་པའི་ས་མཐོའི་འབྲོག་རར་མུའུ་500ལྷག་ཙམ་ཡོད་པའི་ཡུག་པོའི་མི་ཐབས་གཟན་ཆག་རྟེན་གཞི་བཙུགས་པར། མུའུ་རེ་ནས་རླུང་སྐམ་ཡུག་པོའི་སྔོ་རྩྭ་ཐོན་ཚད་སྤྱི་རྒྱ་1076ཟིན་ནས། ཡུལ་ཤུལ་ས་ཁུལ་གྱི་ལོ་རྒྱུས་ཐོག་མུའུ་རེའི་ཐོན་ཚད་མཐོ་ཤོས་ཀྱི་ཟིན་ཐོ་བཏོད་ཡོད།

སུང་ཝེ་རུའུ་ལ་ཆུང་དུས་ནས་ཁྱིམ་ཚང་གི་ཤུགས་རྐྱེན་བཟང་པོ་ཐེབས་ཤིང་། འབུམ་རམས་པའི་སློབ་གནས་སུ་སློབ་སྦྱོང་བྱེད་སྐབས་ཁོང་གིས་ཐོན་ཁུངས་ཁོར་ཡུག་ཚན་རིག་ཆེད་ལས་བདམས་པ་དང་། སློབ་གྲྭ་ཐོན་རྗེས་པཱ་ལགས་ཀྱི་ལས་རོགས་འཇོན་པོ་ཞིག་ཏུ་གྱུར་ཡོད།

ཁྱིམ་ཚང་གཅིག་ལ་འབུམ་རམས་པ་གསུམ་ཡོད་པ་ཚང་མ་ནི་ས་མཐོའི“ཕྱུགས་སྲུང་བ”ཡིན། ལོ་39ཡི་རིང་སྐད་གྲགས་མེད་པར་གཙང་གསུམ་ཆུ་འགོར་རྩ་བ་ཚུགས་པའི་སུང་རེན་ཏེ་དང་། དེ་བཞིན་ཁོང་གི་བཟའ་ཟླ་དང་བུ་མོ་ཚང་མས་ས་མཐོའི་འབྲི་གཡག་གསོ་ཚགས་ལག་རྩལ་ཞིབ་འཇུག་དང་ཁྱབ་གདལ་གཏོང་བར་གཞོལ་བཞིན་ཡོད།

ལོ་མང་རིང་འབྲི་གཡག་ལ་ཞིབ་འཇུག་བྱས་པར་བརྟེན་སུང་རེན་ཏེ་ལ་ཐབས་མཆོག་ཡག་པོ་རྙེད་ཅིང་། འབྲི་གཡག“དབྱར་དུས་སྤུ་ཁ་ལེགས་པ་དང་། སྟོན་དུས་ཤ་ཤེད་རྒྱས་པ། དགུན་དུས་ཤེད་མོ་ཞན་པ། དཔྱིད་དུས་ཤི་བ”བཅས་ཀྱི་དཀའ་གནད་དང་རྩྭ་ས་ཞན་འགྱུར་གྱི་གནད་དོན་ལ་དམིགས་ནས། ཁོང་གིས་རྒྱལ་ཁབ་ཀྱི་བཤས་ཕྱུགས་ཐོན་ལས་ལག་རྩལ་མ་ལག་ཡུལ་ཤུལ་ཕྱོགས་བསྡུས་ཚོད་ལྟའི་ས་ཚིགས་ཀྱི་དཔེ་སྟོན་རྟེན་གཞི་18སྐྲུན་པ་དང་། འབྲི་གཡག་ལྟེ་བའི་ཚོགས་པ་28སྐྱེད་སྲིང་བྱས་པ། ཡུལ་ཤུལ་གྱི་འབྲི་གཡག་རིམ་གསུམ་གསོ་ཚགས་མ་ལག་གཏོད་དེ། ཡུལ་ཤུལ་གྱི་འབྲི་གཡག་འདེམས་གསོ་བྱེད་ཤུགས་ཆེ་རུ་བཏང་བས། “ཡུལ་ཤུལ་གྱི་འབྲི་གཡག”རྒྱལ་ཁབ་ཀྱི་སྒོ་ཕྱུགས་དང་ཁྱིམ་བྱའི་རྒྱུད་འཛིན་ཐོན་ཁུངས་ཀྱི་དཀར་ཆག་ནང་བདམས་ཐོན་བྱུང་བ་མ་ཟད། རྒྱལ་ཁབ་རིམ་པའི་སྒོ་ཕྱུགས་དང་ཁྱིམ་བྱའི་རྒྱུད་འཛིན་ཐོན་ཁུངས་སྲུང་སྐྱོང་གི་མིང་གཞུང་ནང་དུའང་ཚུད་པ་རེད། གསར་གཏོད་རང་བཞིན་གྱི་སྒོ་ནས“ཉིན་མོ་འཚོ་བ་དང་དགོང་མོར་གཟན་ཆག་སྤུས་ལེགས་གསབ་པ་ཟུང་འབྲེལ”གྱི་རྣམ་པ་བཏོན་པས། འབྲིར་བེའུ་བཙའ་ཐེངས་དང་པོའི་ལོ་ཚད་ལོ་2སྔ་རུ་དང་། རྒྱུན་མཐུད་བེའུ་བཙའ་ཚད་78%ཡན་བར་མཐོ་རུ། འབྲི་གཡག་བཤས་གཏོང་བའི་དུས་འཁོར་ལོ་2ཡན་ཐུང་དུ་བཅས་ཕྱིན་ནས། འབྲོག་དུད་ཁྲི་ལྷག་ཙམ་ལ་འབབ་འཕར་ཡོང་བར་སྐུལ་ཁྲིད་ཐུབ་སྟེ། སྲོལ་རྒྱུན་གྱི་ཕྱུགས་རིགས་གསོ་སྟངས་ལ་འགྱུར་ལྡོག་བཏང་བ་མ་ཟད། གཙང་གསུམ་ཆུ་འགོའི་སྐྱེ་ཁམས་ཁོར་ཡུག་ཀྱང་སྲུང་སྐྱོང་བྱས་ཡོད།

སུང་རེན་ཏེ་ཡིས་ཡུལ་ཤུལ་དུ་རྩ་བ་ཚུགས་པའི“ཚན་ཞིབ་ཁྱིམ་ཚང་ཆུང་ངུ”ཞིག་བསྐྱངས་པ་མ་ཟད། གཙང་གསུམ་ཆུ་འགོར་ཁྱབ་པའི་གསོ་ཚགས་ལག་རྩལ་ཁྱབ་གདལ་གཏོང་བའི“དཔུང་ཁག་ཆེན་པོ”ཞིག་དེ་བས་གསོ་སྦྱོང་བྱས་ཡོད།

ཉེ་བའི་ལོ་5ཡི་རིང་། སུང་རེན་ཏེ་ཡིས་སྔ་རྗེས་སུ་ཆེད་ལས་ལག་རྩལ་མི་སྣ་དང་། གསོ་ཚགས་དུད་ཚང་ཆེ་གྲས། འབྲོག་པ་བཅས་ཀྱི་གསོ་སྦྱོང་འཛིན་གྲྭ་ཐེངས་72གཉེར་ནས། འབྲོག་པ་དང་དེ་བཞིན་འབྲི་གཡག་གསོ་ཚགས་དུད་ཚང་ཆེ་གྲས་མི་ཐེངས་8300ལྷག་ཙམ་ལ་གསོ་སྦྱོང་བྱས་པ་རེད། ཁོང་གིས་ད་དུང་འབྲི་སྟོད་དང་རྫ་སྟོད་སོགས་རྒྱལ་ཁབ་ཀྱི་གྲོང་གསེབ་དར་རྒྱས་གཏོང་བའི་གཙོ་གནད་རོགས་སྐྱོར་རྫོང་5ཡི་ཚན་རྩལ་ཆེད་མངགས་ཚོགས་པའི་ཚོགས་གཙོ་དང་། དེ་བཞིན་ནང་ཆེན་དང་རྩེ་ཁོག་སོགས་གཙོ་གནད་རོགས་སྐྱོར་རྫོང་3གྱི་ཚན་རྩལ་ཆེད་མངགས་ཚོགས་པའི་འབྲི་གཡག་ཐོན་ལས་ཚོགས་ཆུང་གི་ཙུའུ་ཀྲང་། འབྲི་སྟོད་རྫོང་གི་ཨང་རྟགས་001ཚན་རྩལ་ཆེད་མངགས་པའི་ལས་དོན་ས་ཚིགས་ཀྱི་ཀྲན་ཀྲང་བཅས་ཀྱི་འགན་ཁུར་ཏེ་ཐོན་ལས་ལག་རྩལ་མཛུབ་ཁྲིད་དང་། རིགས་རྒྱུད་གསར་པ་དང་ལག་རྩལ་གསར་པ་ནང་འདྲེན་ཁྱབ་གདལ་གཏོང་བ། ལག་རྩལ་གྱི་དཀའ་གནད་གཅིག་སྡུད་འགག་སྒྲོལ། རང་ཡུལ་གྱི་ཤེས་ལྡན་པར་རོགས་ཁྲིད་སོགས་ལ་གཞིགས་ནས་ཚན་རྩལ་རོགས་སྐྱོར་ལས་དོན་སྤེལ་ཡོད།

ཡུལ་ཤུལ་གྱི་དགུན་དུས་གྲང་ངར་ཧ་ཅང་ཆེ་མོད། སུང་རེན་ཏེ་ཡིས་སྔར་བཞིན་སེམས་རྩ་འཁོལ་པོས་རང་འཁྲིའི་ལས་ལ་གཞོལ་ཞིང་། ཁོང་གིས“ང་རང་ཡུལ་ཤུལ་ལ་དགའ་པོ་ཡོད། འདི་ག་ནི་ངའི་ཕ་ཡུལ་ཡིན། ངའི་བསམ་འདུན་ཆེ་ཤོས་ནི་རང་ཉིད་ཀྱི་ཞིབ་འཇུག་གྲུབ་འབྲས་ཁྱབ་གདལ་བཏང་ནས་ཞིང་འབྲོག་མང་ཚོགས་ཀྱི་འཚོ་བའི་ཆུ་ཚད་མཐོ་རུ་གཏོང་བ་དང་ཆབས་ཅིག ཕ་ཚ་བུ་རྒྱུད་ཀྱི་ཆེད་དུ་མཛེས་སྡུག་ལྡན་པའི་རྩྭ་ཐང་འདིར་སྲུང་སྐྱོང་ཡག་པོ་བྱ་རྒྱུ་དེ་ཡིན”ཞེས་བཤད།